Yesu U Nyikela Ndzayo Mayelana Ni Xikhunguvanyiso Ni Xidyoho

Yesu wa ha ku kombisa langutelo leri valandzeri vakwe va faneleke va va na rona. Va fanele va tikhoma ku fana ni vana, va titsongahata naswona va nga titlakusi. Vadyondzisiwa va fanele va ‘amukela vana volavo lavatsongo hi vito rakwe naswona hi ndlela yoleyo va amukela Yesu.’—Matewu 18:5.

A hi khale vaapostola va ha ku phikizana hileswaku lonkulu i mani exikarhi ka vona kutani va nga ha teka marito ya Yesu ma ri ndzayo. Sweswi muapostola Yohane u vulavula hi nchumu lowu wa ha ku endlekaka, u ri: “Hi vone munhu un’wana a hlongola madimona hi vito ra wena naswona hi ringete ku n’wi tshikisa, hikuva a a nga fambi na hina.”—Luka 9:49.

Xana Yohane u teka vaapostola ku ri vona ntsena lava pfumeleriweke ku horisa vanhu kumbe ku hlongola madimona? Loko swi ri tano, swi kotekisa ku yini leswaku wanuna loyi wa Muyuda a kota ku hlongola mimoya yo biha? Yohane u vona onge wanuna loyi a nga fanelanga a endla mahlori hikuva a nga n’wi landzeli Yesu ni vaapostola.

Hambiswiritano, Yohane wa hlamala loko a twa Yesu a ku: “Mi nga n’wi siveli, hikuva a nga kona loyi a nga endlaka masingita hi vito ra mina kambe hi ku hatlisa a tlhela a ndzi rhukana. Hikuva loyi a nga hi kaneteki u yima na hina. Loyi a mi nyikaka mati leswaku mi nwa hileswi mi nga valandzeri va Kreste, ndzi tiyisile ndzi ri eka n’wina, u ta katekisiwa.”—Marka 9:39-41.

A swi bohi leswaku wanuna loyi, a famba na Kreste leswaku a va etlhelweni rakwe. Vandlha ra Vukreste a ri si simekiwa, kutani leswi wanuna loyi a nga fambiki na Yesu a swi vuli swona leswaku i mukaneti kumbe u dyondzisa tidyondzo ta vukhongeri bya mavunwa. Swi le rivaleni leswaku wanuna loyi wa pfumela eka vito ra Yesu naswona leswi Yesu a swi vulaka swi kombisa leswaku u ta kuma hakelo yakwe.

Hi hala tlhelo, a swi ta va ni khombo loko wanuna loyi a khunguvanyisiwa hi marito ni swiendlo swa vaapostola. Yesu u ri: “Kambe loyi a khunguvanyisaka un’wana wa lava lavatsongo lava nga ni ripfumelo eka mina, nxupulo wakwe wu ta va wukulu lerova swi nga antswa loko o boheleriwa ribye lerikulu ro sila enhan’wini, kutani a hoxiwa elwandle.” (Marka 9:42) Yesu u vula leswaku valandzeri vakwe va fanele va susa nchumu wihi ni wihi wa nkoka wo fana ni xandla, nkondzo kumbe tihlo loko swi va khunguvanyisa. Swa antswa ku lahlekeriwa hi nchumu wolowo lowu rhandziwaka kutani u nghena eMfun’weni wa Xikwembu ku tlula ku khomelela eka wona ivi u nghena eGehena (Nambu Wa Hinomi). Swi nga endleka vaapostola va wu vonile nambu lowu ekusuhi na Yerusalema laha a ku hisiwa thyaka eka wona, kutani va swi twisisa leswaku wu fanekisela ku loviseriwa makumu.

Yesu u tlhela a va lemukisa a ku: “Mi nga n’wi languteli ehansi un’wana wa lava lavatsongo, hikuva ndza mi byela leswaku tintsumi leti va khathalelaka etilweni mikarhi hinkwayo ti vona xikandza xa Tatana.” Xana “lava lavatsongo” i va risima ku fikela kwihi eka Tata wakwe? Yesu u va byela hi wanuna loyi a nga ni tinyimpfu ta 100 kambe a lahlekeriwa hi nyimpfu yin’we. Wanuna loyi u siya tinyimpfu ta 99 leswaku a ya lava nyimpfu yin’we leyi lahlekeke naswona loko a yi kuma wa tsaka hikwalaho ka yona ku tlula leta 99. Yesu wa engetela a ku: “Hilaha ku fanaka, Tata wa mina la nga ematilweni a nga naveli leswaku un’wana wa lava lavatsongo a lova.”—Matewu 18:10, 14.

Swi nga endleka leswaku Yesu u ehleketa hi ku phikizana ka vaapostola vakwe ka leswaku i mani lonkulu exikarhi ka vona, kutani u va khongotela a ku: “Lungani ku fana ni munyu mi hanyisana hi ku rhula.” (Marka 9:50) Munyu wu endla leswaku swakudya swi nandziha. Munyu wo fanekisela wu endla swi olova ku amukela leswi vuriwaka hi munhu un’wana naswona swi nga endla leswaku ku va ni ku rhula, ku nga leswi nga ta ka swi nga endliwi hi ku phikizana.—Vakolosa 4:6.

Mikarhi yin’wana, ku holova lokukulu ku ta va kona naswona Yesu u hi byela ndlela leyi hi nga ku lulamisaka hayona. U ri: “Loko makwenu a ku dyohela, famba u ya n’wi komba xihoxo xakwe mi ri vambirhi. Loko a ku yingisa, u ta va u pfune makwenu ku endla leswinene.” U fanele u endla yini loko a nga ku yingisi? Yesu u tsundzuxa a ku: “Famba ni munhu un’we kumbe vambirhi, leswaku mhaka yin’wana ni yin’wana yi ta tiya loko ku ri ni vumbhoni bya timbhoni timbirhi kumbe tinharhu.” Loko sweswo swi nga yi lulamisi mhaka ya kona, va fanele va byela “vandlha,” leswaku vakulu lava nga ni vutihlamuleri va ta teka xiboho. Xana ku ta endliwa yini loko mudyohi a ya emahlweni a ala ku yingisa? “A a fane ni munhu wa matiko ni muluvisi eka wena,” ku nga vanhu lava Vayuda a va nga ta tihlanganisa na vona.—Matewu 18:15-17.

Vakulu va vandlha va fanele va namarhela Rito ra Xikwembu. Loko va kuma leswaku mudyohi u ni nandzu naswona u fanele a tshinyiwa, xigwevo xa vona ‘xi ta va xi bohiwe ni le tilweni.’ Kambe loko va kuma leswaku a nga na nandzu, u ta va la “tshunxiweke ni le tilweni.” Swiletelo leswi, a swi ta pfuna swinene loko vandlha ra Vukreste se ri simekiwile. Eka timhaka teto ta nkoka, Yesu u ri: “Laha vambirhi kumbe vanharhu va hlengeletaneke hi vito ra mina, ndzi kona exikarhi ka vona.”—Matewu 18:18-20.