Ndzima 63

Ndzayo Yin’wana Leyi Lulamisaka

LOKO Yesu ni vadyondzisiwa va yena va ha ri endlwini eKapernawume, ku vulavuriwa hi swin’wana handle ka ku kanetana ka vaapostola ka leswaku i mani lonkulu. Lexi i xiendlakalo lexi na xona xi nga ha vaka xi humelele loko va tlhelela eKapernawume, loko Yesu hi yexe a nga ri kona. Muapostola Yohane wa vika: “Hi vonile un’wana, la nga riki wa hina, a hlongola mademona hi vito ra wena, kutani hi n’wi siverile, hikuva a hi wa hina.”

Entiyisweni Yohane u languta vaapostola tanihi ntlawa wo hlawuleka, lowu nga ni xidlodlo wa vahanyisi. Kutani u vona onge munhu wa kona a a endla mintirho ya matimba hi ndlela leyi nga fanelangiki hikuva a a nga ri xiphemu xa ntlawa wa vona.

Hambi swi ri tano, Yesu wa tshinya: “Mi nga tshuki mi n’wi sivela, hikuva a ku na munhu loyi, ku nga te loko a endlile mahlori hi vito ra mina, a nga hatlaka a vula swo biha hi mina. Loyi a nga lwiki na hina ú yima na hina. Ndzi tiyisile ndzi ri ka n’wina, la mi nyikaka ndzheko wa mati hi leswi mi vuriwaka va ka Kriste, a nga ka a nga pfumali hakelo ya yena.”

A swi nga bohi leswaku munhu loyi a landza Yesu hi nyama leswaku a va etlhelo kakwe. Bandlha ra Vukriste a ri nga si tlhomiwa, kutani ku ka a nga ri xiphemu xa ntlawa wa vona a swi nga vuli swona leswaku a a ri wa bandlha leri hambaneke. Hakunene munhu loyi a a ri na ripfumelo evitweni ra Yesu kutani xisweswo u humelerile eku hlongoleni ka mademona. A a endla nchumu lowu a wu rhandzeka lowu yelanaka ni leswi Yesu a vuleke leswaku a swi faneriwa hi hakelo. Yesu u komba leswaku hi ku endla leswi, a nga ka a nga pfumali hakelo yakwe.

Kambe ku vuriwa yini loko wanuna a a lo khunguvanyisiwa hi marito ni swiendlo swa vaapostola? Leswi a swi ta va swi bihile swinene! Yesu u ri: “La khunguvanyisaka un’wana wa lavatsongo lava pfumelaka eka mina, swi nga antswa loko a boheleriwa ribye ra ku sila enhan’wini, a hoxiwa lwandle.”

Yesu u vula leswaku valandzeri vakwe va fanele ku susa nchumu wihi na wihi lowu rhandzekaka eka vona tanihi voko, nenge kumbe tihlo leswi swi nga va vangelaka ku khunguvanyisa eku hanyeni ka vona. Swi nga antswa ku pfumala xilo lexi xa nkoka ivi u nghena eMfunw’eni wa Xikwembu ku ri na ku tshama na xona ivi u hoxiwa eGehena (nhulu ya thyaka leyi tshwaka ekusuhi na Yerusalema), leswi fanekiselaka ku loviseriwa makumu.

Nakambe Yesu wa tsundzuxa: “Tilanguteleni leswaku mi nga sandzi un’wana wa lavantsongo lava; hikuva ndzi mi byela leswaku tintsumi ta vona le matilweni ti tshama ti langutile mombo wa Tata wa mina la nge matilweni, masiku hinkwawo.” Kutani u komba ku vangama ka “lavatsongo” loko a va byela hi ta munhu loyi a fuweke tinyimpfu ta dzana kambe a lahlekeriwa hi yin’we. Munhu u ta siya leta 99 leswaku a ya lava leyi lahlekeke, Yesu wa hlamusela, naswona loko a yi kuma u ta yi tsakela swinene ku tlula leta 99. “Hi mukhuva wolowo,” kutani Yesu wa dlayelela, “a hi ku rhandza ka Tata wa n’wina la nge matilweni leswaku ku lahleka na un’we wa lavatsongo lava.”

Kumbexana hi ku tsundzuka ku kanetana ka vaapostola vakwe, Yesu wa khutaza: “Lungani ku fana ni munyu, mi hanyisana hi ku rhula.” Swakudya leswi phyamaka swi nandzihisiwa swinene hi munyu. Xisweswo, munyu wo fanekisela wu endla leswaku leswi munhu a swi vulaka swi olova ku swi amukela. Ku va ni munyu wo tano swi ta pfuna ku hlayisa ku rhula.

Kambe hikwalaho ka ku va munhu a nga hetisekanga, minkarhi yin’wana ku kanetana lokukulu ku ta humelela. Nakambe Yesu u nyikela nkongomiso wo hlangavetana na kona. “Loko makwenu a ku dyoherile,” ku vula Yesu, “yana, u ya n’wi komba ku hoxa ka yena, mi ri vambirhi ntsena; loko a ku yingisa, u ta va u vuyisile makwenu.” Loko a nga ku yingisi, ku tsundzuxa Yesu, “teka vanhu vambirhi, kumbe un’we, leswaku mhaka hinkwayo yi tiyisiwa hi milomo ya timbhoni tinharhu, kumbe timbirhi.”

Tanihi goza ro hetelela ntsena, Yesu u ri, yisa mhaka eka “nhlengeletano,” hi leswaku, eka valanguteri lava nga ni vutihlamuleri va bandlha lava nga nyikelaka ku avanyisa ko hetelela. Loko mudyohi a nga ku amukeli ku avanyisa ka vona, Yesu wa dlayelela, “a a kotise muhedeni ni muluvisi.”

Eku endleni ka xiboho xo tano, valanguteri va fanele ku namarhela swinene eka swiletelo leswi nga le Ritweni ra Yehova. Xisweswo, loko va kuma munhu a ri ni nandzu kutani a faneriwa hi ku rihisiwa, ku avanyisa ‘ku ta va se ku bohiwile etilweni.’ Kutani loko ‘ku ntshunxiwa emisaveni,’ hi leswaku, munhu u kumiwe a nga ri na nandzu, kutani ku ta va se ku ‘ntshunxiwile etilweni.’ Eku kanerisaneni ko tano ka vuavanyisi, Yesu u ri, “laha vambirhi kumbe vanharhu va hlengeletaneke kona hi vito ra mina, na mina ndzi kona exikarhi ka vona.” Matewu 18:6-20; Marka 9:38-50; Luka 9:49, 50.

▪ Ha yini a swi nga bohi esikwini ra Yesu ku famba na yena?

▪ Yi bihe hi ndlela yihi mhaka yo khunguvanyisa lavatsongo, naswona Yesu u wu kombisa njhani nkoka wa lavatsongo vo tano?

▪ I yini lexi kumbexana xi susumetelaka xikhutazo xa Yesu xa leswaku vaapostola va va ni munyu?

▪ I nkoka wihi lowu nga kona eku ‘boheni’ ni le ku ‘ntshunxeni’?