Tshama U Lunghekile Nandza Wo Tshembeka!

Yesu u hlamusele leswaku hi lava “ntlhambinyana” ntsena lava nga ta kuma swiluvelo eMfun’weni wa matilo. (Luka 12:32) Kambe ku kuma hakelo yoleyo a hi nchumu lowu faneleke wu tekeriwa ehansi. Kahlekahle, u kandziyisa nkoka wo va ni mianakanyo leyinene loko munhu a ta va un’wana wa lava nga ta fuma eMfun’weni.

Hikwalaho, Yesu u tsundzuxa vadyondzisiwa vakwe ku tshama va rindzele ku vuya kakwe. U ri: “Ambalani mi lungheka, mi lumeka ni timboni ta n’wina, mi fanele ku fana ni vavanuna lava rindzeleke n’wini wa vona leswaku a vuya emucatweni, kutani loko a fika a gongondza va hatla va n’wi pfulela. Ma tsaka malandza lawa loko n’wini wa wona a fika a nga ta ma kuma ma rindzile!”—Luka 12:35-37.

Vadyondzisiwa swa va olovela ku twisisa matikhomelo lama Yesu a vulavulaka ha wona. Malandza lawa a vulavulaka ha wona ma lunghekile naswona ma rindzele ku vuya ka n’wini wa wona. Yesu u hlamusela a ku: “Ma tsaka loko [n’wini] a fika nivusiku [ku sukela hi awara ya kaye nimadyambu ku ya fikela exikarhi ka vusiku] kumbe hi matakuxa [ku sukela exikarhi ka vusiku ku ya fikela hi awara ya vunharhu nimixo] ivi a ma kuma ma rindzile!”—Luka 12:38.

Leswi swi vula swo tala ku tlula ku landzela xitsundzuxo xo va mutirhi loyi a hisekaka kumbe ku gingiriteka. Leswi swi tikomba eka ndlela leyi Yesu, N’wana wa munhu na yena a khumbekaka hayona eka xifaniso lexi. U byela vadyondzisiwa vakwe a ku: “Na n’wina, tshamani mi lunghekile, hikuva N’wana wa munhu u ta fika hi nkarhi lowu mi nga wu ehleketiki.” (Luka 12:40) Kutani enkarhini lowu taka, Yesu u ta ta. U lava leswaku valandzeri vakwe ngopfungopfu lava “ntlhambinyana”va tshama va rindzile.

Petro u lava ku swi twisisa kahle leswi Yesu a swi vulaka kutani u vutisa a ku: “Hosi, xana u byela hina ntsena xifaniso lexi kumbe ni lavan’wana?” Ematshan’weni yo hlamula Petro hi ku kongoma, Yesu u hlamusela xifaniso a ku: “Kahlekahle i mani nandza wo tshembeka ni wo tlhariha, loyi n’wini wakwe a nga ta n’wi hlawula leswaku a khathalela malandza yakwe, a ma phamela swakudya leswi ringaneke hi nkarhi lowu faneleke? Wa tsaka nandza yoloye, loyi loko n’wini wakwe a fika a nga ta n’wi kuma a endla tano! Ndzi mi byela ntiyiso, u ta n’wi hlawula leswaku a hlayisa swilo swa yena hinkwaswo.”—Luka 12:41-44.

Eka xifaniso lexi boxiweke eku sunguleni, swi le rivaleni leswaku “n’wini” i Yesu N’wana wa munhu. Entiyisweni, “nandza wo tshembeka” u katsa vavanuna lava va “ntlhambinyana” ni lava nga ta nyikiwa Mfumo. (Luka 12:32) Emhakeni leyi, Yesu u vula leswaku swirho swin’wana swa ntlawa lowu swi ta khathalela “malandza yakwe” ni ku “ma phamela swakudya leswi ringaneke hi nkarhi lowu faneleke.” Hikwalaho, Petro ni vadyondzisiwa van’wana lava Yesu a va dyondzisaka ni ku va wundla hi Rito ra Xikwembu, va nga gimeta hileswaku ku ta va ni nkarhi lowu N’wana wa munhu a nga ta vuya ha wona. Enkarhini wolowo, ku ta va ni lunghiselelo ro wundla “malandza” ya N’wini lava nga valandzeri va Yesu hi Rito ra Xikwembu.

Yesu u tirhisa ndlela yin’wana ku kandziyisa nkoka wo va vadyondzisiwa vakwe va tshama va xalamukile ni ku va ni mianakanyo leyinene. Sweswo i swa nkoka hikuva un’wana a nga ha sungula ku ka a nga khathali ni ku kaneta vamakwavo: “Kambe loko nandza yoloye o tibyela a ku, ‘N’wini wa mina wa hlwela ku vuya,’ kutani a sungula ku ba malandza ya xinuna ni ya xisati, a dya, a nwa a tlhela a dakwa, n’wini wa nandza yoloye u ta ta hi siku leri a nga ri langutelangiki ni hi nkarhi lowu a nga wu tiviki, kutani u ta n’wi xupula hi ndlela ya tihanyi a n’wi veka endhawini yin’we ni lava nga tshembekiki.”—Luka 12:45, 46.

Yesu u vula leswaku u tele ku ta “lumeka ndzilo emisaveni.” Nakambe u vulavule hi timhaka leti pfuxeke njhekanjhekisano lowukulu ni ku hlamusela vuyelo lebyi nga tisiwaka hi ku landzela tidyondzo ni mikhuva ya mavunwa. Leswi swi hambanisa vanhu lava a ku rindzeriwe leswaku va va ni vun’we, swi hambanisa “tatana ni n’wana wakwe wa jaha ni n’wana wa jaha ni tata wakwe, manana ni n’wana wakwe wa nhwanyana ni n’wana wa nhwanyana ni mana wakwe, n’wingi ni nhlomi ya yena ni nhlomi ni n’wingi wa yona.”—Luka 12:49, 53.

Leswi a swi vulaka u swi kongomisa ngopfu eka vadyondzisiwa vakwe. Hiloko Yesu a hundzuluka a langutisa ntshungu. Vanhu vo tala va sihalala naswona va ala ku amukela leswaku hi yena Mesiya, hikwalaho Yesu u ri: “Loko mi vona papa ri humelela hi le vupeladyambu, mi ri, ‘Xidzedze xi le ku teni,’ kutani swi va tano. Loko mi vona moya wu huma hi le dzongeni, mi ri, ‘Ku ta va ni moya wo hisa,’ kutani swi va tano. Vakanganyisi ndzin’wina, ma swi tiva ku hlamusela ta maxelo, kambe hikwalaho ka yini mi tsandzeka ku twisisa leswi endlekaka hi nkarhi lowu?” (Luka 12:54-56) Kunene a va swi lunghekelanga ku n’wi amukela.