Ntirho Wa Yesu Wo Chumayela Eperiya

I khale Yesu a ri karhi a dyondzisa ni ku horisa vanhu eYudiya ni le Yerusalema. Kutani u pela Nambu wa Yordani leswaku a ya dyondzisa hi muti ni muti emugangeni wa Periya. Kambe u ta tlhelela eYerusalema ku nga ri khale.

Loko Yesu a ri ePeriya, wanuna un’wana u n’wi vutisa a ku: “Hosi, xana lava ponisiwaka i vatsongo?” Swi nga endleka leswaku wanuna loyi wa swi tiva leswaku varhangeri va vukhongeri va kanakana hileswaku lava nga ta ponisiwa i vatsongo kumbe va tele. Yesu u bakanyela etlhelo mhaka ya leswaku i vangani lava nga ta ponisiwa ivi a hlamusela leswi va faneleke va swi endla leswaku va ponisiwa. U ri: “Tikarhateni leswaku mi nghena hi nyangwa leyo lala.” Ina, ku laveka matshalatshala ni ku tikarhata. Hikwalahokayini? Yesu u hlamusela a ku: “Vo tala va ta swi navela ku nghena kambe va ta tsandzeka.”—Luka 13:23, 24.

Leswaku a kombisa nkoka wa ku endla matshalatshala, Yesu u ri: “Loko n’wini wa yindlu a pfuka a khiya nyangwa, mi ta yima ehandle mi gongondza, mi ku, ‘Hosi, hi pfulele.’ . . . Kambe u ta ku eka n’wina, ‘A ndzi ku tivi lomu mi humaka kona. Sukani eka mina, n’wina hinkwenu vaendli va leswo homboloka!’”—Luka 13:25-27.

Xifaniso lexi xi hlamusela khombo leri nga vaka kona loko munhu a vuya nivusiku hi nkarhi lowu a wu lavaka kutani a kuma nyangwa wu pfariwile wu tlhela wu khiyiwa. A fanele a vuye ka ha ri nkarhi, hambiloko swi n’wi tikela. Swi tano ni le ka vanhu vo tala lava a va fanele va vuyeriwile loko Yesu a va dyondzisa. Va tsandzeke ku tirhisa nkarhi wolowo leswaku va rhangisa vugandzeri bya ntiyiso evuton’wini bya vona. Vanhu lava Yesu a rhumiweke eka vona va tsandzeke ku amukela lunghiselelo ra Xikwembu ro ponisa. Yesu u vula leswaku va ta ‘rila ni ku getsela meno’ loko va cukumeteriwa ehandle. Kambe “vanhu va ta ta va huma hi le vuxeni ni le vupeladyambu ni le n’walungwini ni le dzongeni,” ina, vanhu va tinxaka hinkwato, “va fika va tshama etafuleni eMfun’weni wa Xikwembu.”—Luka 13:28, 29.

Yesu u hlamusela a ku: “Lavo hetelela [vo fana ni lava nga riki Vayuda ni Vayuda lava languteriwaka ehansi] va ta va vo sungula kasi lavo sungula [ku nga Vayuda lava rhandzaka vukhongeri lava tinyungubyisaka hi ku va vatukulu va Abrahama] va ta va vo hetelela.” (Luka 13:30) Ku va va ri “vo hetelela” swi vula leswaku a va nge vi kona eMfun’weni wa Xikwembu nikatsongo.

Vafarisi van’wana va ta eka Yesu ivi va n’wi lemukisa va ku: “Famba hikuva Heroda [Antipasi] u lava ku ku dlaya.” Kumbexana Hosi Heroda hi yena a sunguleke mavarivari lawa hileswi a lavaka leswaku Yesu a baleka endhawini yoleyo. Swi nga endleka Heroda a chava leswaku u ta katseka eku dlayiweni ka muprofeta un’wana hilaha a katsekeke hakona eku dlayiweni ka Yohane Mukhuvuri. Kambe Yesu u byela Vafarisi a ku: “Fambani mi ya byela mhungubye yoleyo mi ku, ‘Namuntlha ni mundzuku ndzi ta hlongola madimona ndzi tlhela ndzi hanyisa lava vabyaka naswona hi siku ra vunharhu ndzi ta va ndzi hetile.’” (Luka 13:31, 32) Loko a vula leswaku Heroda i “mhungubye,” Yesu a a vulavula hi ndlela leyi timhungubye ti kanganyisaka hayona. Hambiswiritano, Yesu a nge kanganyisiwi kumbe ku jahisiwa hi Heroda kumbe munhu un’wana entirhweni wakwe. U ta hetisisa xiavelo lexi a nyikiweke xona hi Tata wakwe naswona u ta endla tano hi nkarhi lowu Xikwembu xi n’wi nyikeke wona, ku nga ri wa vanhu.

Yesu u ya emahlweni ni riendzo rakwe ro ya eYerusalema hilaha a vulaka hakona a ku: “Muprofeta u fanele a dlayeriwa eYerusalema.” (Luka 13:33) Ku hava vuprofeta bya le Bibeleni lebyi vulaka leswaku Mesiya u fanele a fela emutini wolowo kutani hikwalahokayini Yesu a vula leswaku u fanele a dlayeriwa kwalaho? Hikuva Yerusalema i ntsindza, laha ku nga ni khoto leyikulu ya Sanedri leyi nga ni swirho swa 71 naswona hi kona laha lava a va hehliwa hi ku va vaprofeta va mavunwa va tengisiwaka kona. Ku tlula kwalaho, yoleyo a ku ri ndhawu leyi a ku nyikeriwa magandzelo ya swiharhi eka yona. Hikwalaho, Yesu wa swi xiya leswaku a swi nge amukeleki ku ya dlayeriwa endhawini yin’wana.

Yesu u rila a ku: “Yerusalema, Yerusalema, mudlayi wa vaprofeta ni loyi a va khandlaka hi maribye lava rhumiweke eka yena, i ko tala ndzi lava ku hlengeleta vana va wena ku fana ni mbhaha loko wu hlengeleta swiciwana ehansi ka timpapa ta wona! Kambe a wu nga swi lavi. Maswivo! Yindlu ya n’wina yi le kusuhi ni ku lovisiwa.” (Luka 13:34, 35) Tiko a ri n’wi amukeli N’wana wa Xikwembu naswona ri fanele ri langutana ni vuyelo bya kona!

Loko Yesu a nga si fika eYerusalema, murhangeri wa Vafarisi u n’wi rhamba ekaya rakwe leswaku va ta dya swakudya hi Savata. Vanhu lava rhambiweke va le ku xiyisiseni leswaku Yesu u ta endla yini eka wanuna loyi a nga ni vuvabyi byo pfimba miri (ku va ni mati yo tala ngopfungopfu emilengeni ni le mikondzweni). Yesu u vutisa Vafarisi ni vativi va Nawu a ku: “Xana swa pfumeleriwa ku hanyisa munhu hi Savata kumbe a swi pfumeleriwi?”—Luka 14:3.

A nga kona la hlamulaka. Yesu u horisa wanuna ivi a va vutisa a ku: “I mani eka n’wina loyi loko n’wana wakwe kumbe nkuzi yakwe yo wela exihlobyeni a nga ta ka a nga hatli a yi humesa hi siku ra Savata?” (Luka 14:5) Va tsandzeka ku hlamula nakambe.