Ndzima 82

Yesu U Ya eYerusalema Nakambe

HI KU hatlisa Yesu nakambe u le gondzweni, u dyondzisa hi muti ni muti na hi ximutana ni ximutana. Kahle-kahle u le mugangeni wa Periya, entsungeni wa Nambu wa Yordani ku suka eYudiya. Kambe laha a yaka kona hi le Yerusalema.

Filosofi ya Vayuda ya leswaku i nhlayo leyi hikiweke ntsena leyi nga ta kuma ku pona kumbexana hi yona leyi susumetaka wanuna loyi ku vutisa a ku: “Hosi, xana va ta va va nga talanga lava nga ta ponisiwa xana?” Hi nhlamulo ya yena, Yesu u susumetela vanhu lava ku anakanya hi leswi swi lavekaka ku kuma ku pona a ku: “Ringetani hi matimba [hi leswaku, lwelani, kumbe tikarhateni] ku nghena hi nyangwa leyo khuma.”

Matshalatshala yo tano ya matimba i ya xihatla “hikuva,” Yesu u ya emahlweni, “ndza mi byela leswaku lavo tala va ta navela ku nghena, kambe va ta tsandzeka.” Ha yini va ta ka va nga swi koti? U hlamusela leswaku ‘loko n’wini o kala a yima a lotlela nyangwa kutani vanhu va yima ehandle ivi va gongondza, va ku, “Hosi, hi pfulele,” u ta ku: “A ndzi tivi leswaku mi huma kwihi; sukani eka mina, n’wina hinkwenu lava endlaka leswi nga lulamangiki.”’

Lava lotleriweke ehandle kahle-kahle va ta hi nkarhi lowu nga wunene eka vona ntsena. Kambe hi nkarhi wolowo nyangwa wa nkarhi wu pfariwe wu tlhela wu lotleriwa. Leswaku va nghena, a va fanele va hatle va fika, hambi loko hi nkarhi wolowo swi nga ha va swi nonon’hwa ku endla tano. Hakunene, vuyelo lebyi khomisaka gome byi rindzele lava va tshikaka ku endla vugandzeri bya Yehova xikongomelo xa vona lexikulu evuton’wini!

Vo tala va Vayuda lava Yesu a rhumiweke ku va chumayela, va tsandzekile ku tirhisa nkarhi wa vona lowunene wa ku amukela lunghiselelo ra Xikwembu ra ku pona. Kutani Yesu u ri va ta rila ni ku getsela meno ya vona loko va hoxeriwa ehandle. Hi tlhelo rin’wana, vanhu vo huma “evuxeni ni le vupela-dyambu, en’walungwini ni le dzongeni,” ina, lava humaka eka matiko hinkwawo, “va ta tshama eswakudyeni eMfun’weni wa Xikwembu.”

Yesu u ya emahlweni: “Van’wana lava va nga va le ndzhaku [lava nga riki Vayuda lava languteriwaka ehansi, kun’we ni Vayuda lava kandziyeriwaka] va ta va va le mahlweni, ni van’wana va le mahlweni [Vayuda lava fuweke ni lava seketeriwaka hi vukhongeri] va ta va va le ndzhaku.” Ku va ka vona va le ndzhaku swi vula leswaku vanhu volavo vo loloha, lava nga nkhensiki a va nge vi kona eMfun’weni wa Xikwembu nikantsongo.

Kutani Vafarisi va ta eka Yesu ivi va ku: “Suka u famba u ya kun’wana, hikuva Heroda [Antipasi] u lava ku ku dlaya.” Swi nga ha endleka leswaku Heroda hi yexe a sungule mhaka leyi ku endlela leswaku Yesu a suka endhawini leyi. Heroda a nga ha va a chave ku katseka eka rifu ra muprofeta un’wana wa Xikwembu tanihi leswi a katsekeke eku dlayiweni ka Yohane Mukhuvuri. Kambe Yesu u byela Vafarisi a ku: “Fambani, mi ya byela nhlati yoloye mi ku: ‘Swi tive leswaku, ndzi hlongola mademona ni ku hanyisa vanhu namuntlha ni mundzuku, kutani siku ra vunharhu ndzi ta heta ntirho wa mina.’”

Endzhaku ko heta ntirho wa yena kwalaho, Yesu u ya emahlweni ni riendzo ra yena ro ya eYerusalema hikuva, hi laha a hlamuselaka ha kona, “a swi endleki leswaku muprofeta a dlawela handle ka muti wa Yerusalema.” Ha yini a swi fanele swi languteriwa leswaku Yesu a a ta dlayeriwa eYerusalema? Hikuva Yerusalema i ntsindza, laha huvo leyikulu ya Sanedri ya swirho swa 71 yi nga kona ni laha magandzelo ya swiharhi ma endliwaka kona. Hikwalaho ke, a swi nga ta endleka leswaku “Xinyimpfana xa Xikwembu” xi dlayiwa kwihi na kwihi kambe eYerusalema.

Yesu u phofula ku vaviseka a ku: “Yerusalema, Yerusalema, wena la dlayaka vaprofeta, la khandlaka hi maribye lava rhumiweke eka wena; kangani ndzi naverile ku hlengeleta vana va wena, kukotisa huku loko yi hlengeleta swiciwana swa yona ehansi ka timpapa ta yona, kambe a wu swi lavanga. Vonani, muti wa n’wina wu ta tshikiwa.” Hikwalaho ka ku ala N’wana wa Xikwembu, tiko ri avanyisiwile!

Loko Yesu a ya emahlweni a kongoma eYerusalema, u rhamberiwa endlwini ya mufumi wa Vafarisi. I Savata, kutani vanhu va n’wi xiya-xiya swinene, tanihi leswi ku nga ni wanuna la nga ni vuvabyi byo pfimbisa miri, ku hlengeletana ka mati kumbexana emavokweni ni le milengeni ya yena. Yesu u vulavula ni Vafarisi ni vativi va Nawu lava nga kona, a vutisa a ku: “Xana swa pfumeleriwa ku hanyisa munhu hi siku ra Savata?”

Ku hava la hlamulaka. Kutani Yesu u hanyisa munhu loyi ivi a n’wi byela leswaku a famba. Kutani wa vutisa a ku: “Xana i mani eka n’wina la nga ta ka a nga hatlisi ku humesa n’wana wa yena kumbe homu ya yena ekheleni ra mati, loko swi wele kona hi siku ra Savata xana?” Nakambe, ku hava la hlamulaka. Luka 13:22–14:6; Yohane 1:29.

▪ I yini lexi Yesu a kombaka leswaku xa laveka leswaku u kuma ku pona, naswona ha yini vo tala va lotleriwe ehandle?

▪ I vamani va le “ndzhaku” lava vaka va le mahlweni, ni “va le mahlweni” lava vaka va le ndzhaku?

▪ Ha yini ku nga ha vaka ku vuriwe leswaku Heroda a a lava ku dlaya Yesu?

▪ Ha yini a swi nga ta endleka leswaku muprofeta a dlayiwa ehandle ka Yerusalema?