Yesu A Hlamula Murhangeri Loyi A Nga Muntshwa Naswona A Fuweke

Yesu u hundza hi le Periya ivi a kongoma eYerusalema. Jaha leri fuweke ri tsutsuma ri ya eka yena ivi ri fika ri khinsama emahlweni ka yena. Jaha leri hi rin’wana ra ‘varhangeri’ naswona swi nga endleka a tirha tanihi ndhuna ya sinagoga kumbe xirho xa huvo ya Sanedri. Ri vutisa Yesu ri ku: “Mudyondzisi Lonene, ndzi fanele ndzi endla yini leswaku ndzi kuma vutomi lebyi nga heriki?”—Luka 8:41; 18:18; 24:20.

Yesu u ri hlamula a ku: “Hikwalaho ka yini u ndzi vula lonene? A ku na munhu lonene handle ka Xikwembu.” Swi nga endleka jaha leri ri tirhise xiga lexi nge “lonene” hileswi a ri landzelela nawu, ku nga leswi varabi a va tala ku swi endla. Hambileswi Yesu a nga mudyondzisi lonene, u byela wanuna loyi leswaku xithopo xexo lexi nge “lonene” xi fanela Xikwembu ntsena.

Yesu u n’wi byela a ku: “Loko u lava ku kuma vutomi, yana emahlweni u yingisa milawu.” Hiloko wanuna yoloye a vutisa a ku: “Milawu yihi?” Yesu u boxa Milawu ya ntlhanu eka leya Khume mayelana ni ku dlaya, ku oswa, ku yiva, ku nyikela vumbhoni bya mavunwa ni mhaka ya ku xixima vatswari. Kutani u engetela nawu wun’wana wa nkoka a ku: “U fanele u rhandza warikwenu hi ndlela leyi u tirhandzaka ha yona.”—Matewu 19:17-19.

Hiloko wanuna loyi a ku: “Milawu leyi hinkwayo ndza yi yingisa; xana ku laveka yini swin’wana?” (Matewu 19:20) Swi nga endleka wanuna loyi a vona onge u kayivela nchumu wun’wana lowunene lowu nga ta endla leswaku a kuma vutomi lebyi nga heriki. Loko a vona ku tiyimisela kakwe, Yesu u ‘titwe a n’wi rhandza.’ (Marka 10:21) Hambiswiritano, ku ni swin’wana leswi wanuna loyi a faneleke a swi endla.

Wanuna loyi u rhandza leswi a nga naswona kutani Yesu u ri eka yena: “Famba u ya xavisa swilo leswi u nga na swona u nyika swisiwana mali ya kona, kutani u ta va ni xuma etilweni; ivi u ta u va mulandzeri wa mina.” Ina, wanuna loyi u fanele a nyika swisiwana mali ya yena hikuva a swi nge swi koti ku n’wi hakela kutani a ta va mudyondzisiwa wa Yesu. Kambe lexi twisaka ku vava, Yesu u vona jaha leri ri tlakuka ivi ri suka ri famba. Rirhandzu leri wanuna loyi a nga na rona eka rifuwo rakwe ni “swilo swo tala” leswi a nga na swona, swi n’wi pfale mahlo lerova a nga ri voni rifuwo ra xiviri. (Marka 10:21, 22) Hiloko Yesu a ku: “Swi ta va tikela swinene lava nga ni mali ku nghena eMfun’weni wa Xikwembu!”—Luka 18:24.

Vadyondzisiwa va hlamarisiwa hi marito lawa ni leswi Yesu a tlhelaka a swi vula loko a ku: “Swi olova ngopfu ku va kamela yi hundza embhoveni wa neleta yo rhunga ku ri ni ku va munhu la fuweke a nghena eMfun’weni wa Xikwembu.” Sweswo swi endla vadyondzisiwa va vutisa va ku: “Xana u kona loyi a nga ta pona?” Xana ku ponisiwa swa tika lerova munhu swi nga n’wi tikela ku va a swi fikelela? Yesu u va languta ematihlweni ivi a ku: “Leswi vanhu va nga kotiki ku swi endla, Xikwembu xa swi kota.”—Luka 18:25-27.

Petro u vula leswaku va endle xiboho lexi hambaneke ni lexi endliweke hi wanuna loyi a fuweke hi ku vula a ku: “Waswivo! Hi siye swilo hinkwaswo hi ku landzela; kahlekahle hi ta vuyeriwa hi yini?” Yesu u boxa vuyelo byo hetelela lebyi va nga ta byi kuma hileswi va endleke xiboho lexinene, u ri: “Hi nkarhi lowu swilo hinkwaswo swi nga ta endliwa leswintshwa, loko N’wana wa munhu a tshama ehansi exiluvelweni xakwe lexi vangamaka, n’wina lava mi ndzi landzeleke mi ta tshama eswiluvelweni swa 12, mi avanyisa tinyimba ta 12 ta Israyele.”—Matewu 19:27, 28.

Swi le rivaleni leswaku Yesu u ehleketa hi vumundzuku bya laha misaveni loko swilo hinkwaswo swi tlhela swi endliwa leswintshwa ku fana ni leswi a swi ri xiswona entangeni wa Edeni. Petro ni vadyondzisiwa van’wana va ta hakeriwa hi ku fuma misava leyi nga Paradeyisi va ri na Yesu, ku nga hakelo leyi tlulaka swilo hinkwaswo leswi va titsoneke swona!

A hi mikateko hinkwayo leyi a va ta yi kuma enkarhini lowu taka ntsena. Vadyondzisiwa va yena va tiphina hi yin’wana ya mikateko yoleyo sweswi. Yesu u byela vadyondzisiwa vakwe a ku: “A ku na munhu loyi a siyeke yindlu kumbe nsati kumbe vamakwavo va xinuna kumbe vatswari kumbe vana hikwalaho ka Mfumo wa Xikwembu loyi a nga ta ka a nga kumi swo tala sweswi, kutani enkarhini lowu taka a kuma vutomi lebyi nga heriki.”—Luka 18:29, 30.

Ina, kun’wana ni kun’wana laha vadyondzisiwa vakwe va yaka kona, va nga tiphina hi vunghana lebyi tsakisaka ni vamakwerhu ku tlula vunghana lebyi va tiphineke ha byona ni maxaka ya vona. Lexi twisaka ku vava, swi tikomba onge jaha leri fuweke ri ta lahlekeriwa hi nkateko wolowo, ku katsa ni hakelo yo kuma vutomi eMfun’weni wa Xikwembu wa le tilweni.

Yesu u tlhela a ku: “Kambe vo tala lava nga vo sungula va ta va vo hetelela, kasi lavo hetelela va ta va vo sungula.” (Matewu 19:30) Xana u vula yini hi sweswo?

Jaha leri fuweke ri wela eka “vo sungula” tanihi leswi ri nga un’wana wa varhangeri lava nga va Yuda. Leswi ri yingisaka nawu wa Xikwembu, a ku ri na ntshembo wa leswaku ri ta cinca langutelo ra rona naswona a ku ta languteriwa swo tala eka rona. Nilokoswiritano, ri teka rifuwo ni swikhundlha swi ri swa nkoka evuton’wini bya rona ku tlula swilo leswin’wana hinkwaswo. Ku hambana ni sweswo, vanhu lava tolovelekeke va vona ntiyiso ni ndlela yo kuma vutomi eka leswi Yesu a swi dyondzisaka. A va ri vo “hetelela” kambe sweswi va ta va “vo sungula.” Va nga swi langutela hi mahlongati ku tshama na Yesu eswiluvelweni swa le tilweni kutani va fuma misava leyi nga ta va yi ri Paradeyisi.