Vutomi Ni Vutirheli Bya Yesu

Yesu Ni Mufumi Lontshwa La Fumeke

LOKO Yesu a ri karhi a famba a tsemakanya tiko ra Periya a kongoma eYerusalema, jaha ra tsutsuma ivi ri nkhinsama emahlweni ka yena. Wanuna loyi u vuriwa mufumi, leswi kumbexana swi vulaka leswaku u teka xiyimo lexi tlakukeke esinagogeni ra kwalaho kumbe leswaku i xirho xa Sanedri. Nakambe, u fume ngopfu. “Mudyondzisi lonene,” wa vutisa, “xana ndzi ta endla yini ku kuma ndzhaka ya vutomi lebyi nga heriki xana?”

“U ndzi vulela yini lonene?” ku hlamula Yesu. “A ku na lonene, loko a nga ri un’we ntsena, xi nga Xikwembu.” Kumbexana jaha leri ri tirhisa “lonene” tanihi xithopo, kutani Yesu u n’wi tivisa leswaku xithopo xo tano i xa Xikwembu ntsena.

“Kambe loko,” Yesu u ya emahlweni, “u lava ku nghena evutomini, hlayisa Milawu.”

“Hi yihi ke?” ku vutisa wanuna.

Loko a kombisa ntlhanu eka Milawu ya Khume, Yesu wa hlamula a ku: “Hi leyi nge: ‘U nga tshuki u dlaya, u nga tshuki u oswa, u nga tshuki u yiva, u nga tshuki u humesa vumbhoni byo hemba; u va ni xichavo eka tata wa wena ni ka mana wa wena.’” Naswona loko a tlhandlekela nawu wa nkoka swinene, Yesu u ri: “U rhandza munhu-kuloni kukota loko u tirhandza.”

“Ndzi hlayisile hinkwaswo leswi ku sukela evuntshweni bya mina,” wanuna a hlamula hi ku tiyiseka hinkwako. “Xana ndza ha pfumala yini ke?”

Loko a yingisela xivutiso xa wanuna loyi lexi tiyeke, xa matimba, Yesu u twa ntlhaveko wa rirhandzu eka yena. Kambe Yesu u twisisa ku namarhela ka yena eka rifuwo, kutani a kombisa xilaveko xa yena a ku: “Wa ha pfumala xilo xin’we, xavisa hinkwaswo leswi u nga na swona, u avela swisiwana, hi kona u nga ta va ni xuma ematilweni; kutani u ta, u ndzi landza.”

Yesu wa languta, handle ko kanakana hi ntwela-vusiwana, loko wanuna a tlakuka ivi a hundzuluka a hlunamile ngopfu. Rifuwo ra yena ri n’wi sivela ku vona rifuwo ra ntiyiso. “Swa nonon’hwa ngopfu,” Yesu u phofula marito ya gome, “eka lava nga ni rifuwo ku nghena eMfun’weni wa Xikwembu.”

Marito ya Yesu ma hlamarisa vadyondzisiwa. Kambe va hlamarisiwa swinene loko a ya emahlweni a vula nawu lowu tolovelekeke a ku: “Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun’weni wa Xikwembu.”

“Loko swi ri tano ku nga pona mani ke?” vadyondzisiwa va lava ku tiva.

A va langutile hi ku kongoma, Yesu wa hlamula a ku: “Loko va ri vanhu, swa va tsandza leswi, kambe Xikwembu xona a xi tsandzi hi nchumu.”

Hi ku xiya leswaku va endle ku hlawula loku hambaneke swinene ni lokuya ka mufumi lontshwa la fumeke, Petro u ri: “Waswivo, hina hi tshikile hinkwaswo, hi ku landza.” Kutani wa vutisa: “Xana hina hi ta vuyeriwa hi yini?”

“Loko swilo hinkwaswo swi ta va swi vuyeteriwile,” Yesu wa tshembisa, “ni loko N’wana-wa-Munhu a tshamisile exiluvelweni xa yena lexo kwetsima, n’wina lava mi ndzi landzeke, na n’wina mi ta tshama eswiluvelweni swa 12, mi avanyisa tinxaka ta Israyele leta 12.” Ina, Yesu u kombisa leswaku ku ta va ni ku vuyeteriwa ka swiyimo emisaveni leswaku swilo swi ta va hi ndlela leyi a swi ri ha yona entangeni wa Edeni. Naswona Petro ni vadyondzisiwa van’wana va ta amukela hakelo yo fuma na Kriste eParadeyisini leyi ya misava hinkwayo. Entiyisweni, hakelo yo tano leyinene i ya ntikelo swinene!

Hambi swi ri tano, hambi ku ri sweswi ku na tihakelo, hi laha Yesu a vuleke ha kona hi ku tiyisa a ku: “Un’wana ni un’wana la tshikeke muti wa yena, kumbe vamakwavo va xinuna kumbe va xisati, hambi a ri tata wa yena kumbe mana wa yena, kumbe vana, hambi ma ri masimu, hikwalaho ka vito ra mina, ú ta nyikiwa swona ka dzana, a tlhela a dya ndzhaka ya vutomi lebyi nga heriki.”

Hi laha Yesu a tshembisaka ha kona, kun’wana ni kun’wana emisaveni laha vadyondzisiwa va yena va yaka kona, va tiphina hi vuxaka ni Vakriste-kulobye lebyi nga kusuhi ni lebyi nga bya nkoka swinene ku tlula lebyi va tiphineke ha byona ni swirho swa ntumbuluko swa ndyangu. Mufumi lontshwa la fumeke entiyisweni u lahlekeriwa hi hakelo leyi ni liya ya vutomi lebyi nga heriki eMfun’weni wa Xikwembu wa le tilweni.

Endzhaku Yesu wa tlhandlekela a ku: “Vanyingi lava nga va le mahlweni va ta va va le ndzhaku, ni va le ndzhaku va ta va va le mahlweni.” Xana u vula yini ke?

U vula leswaku vanhu vo tala lava nga va le “mahlweni” eku tiphineni hi malunghelo ya vukhongeri, vo fana ni mufumi lontshwa la fumeke, a va nga ngheni eMfun’weni. Va ta va va le “ndzhaku.” Kambe vo tala, ku katsa ni vadyondzisiwa va Yesu lava titsongahataka, lava va languteriwaka ehansi hi Vafarisi lava tivulaka lavo lulama tanihi lava va le “ndzhaku”—tanihi vanhu va le misaveni, kumbe ‘am ha·’aʹrets—va ta va va le “mahlweni.” Ku va ka vona va le “mahlweni” swi vula leswaku va ta amukela lunghelo ro va vafumi-kulobye na Kriste eMfun’weni. Marka 10:17-31; Matewu 19:16-30; Luka 18:18-30.

◆ Entiyisweni, i muxaka wihi wa mufumi loyi jaha leri fumeke ri nga yena?

◆ Ha yini Yesu a ala ku vuriwa lonene?

◆ Xana ntokoto wa mufumi lontshwa wu kombisa khombo ra ku va la fumeke hi ndlela yihi?

◆ I tihakelo tihi leti Yesu a ti tshembisaka valandzeri vakwe?

◆ Xana va le mahlweni va va va le ndzhaku hi ndlela yihi, naswona va le ndzhaku va va va le mahlweni hi ndlela yihi?