Dyondzo Ya Ku Gingiriteka—titalenta

Loko a ha ri ni vaapostola vakwe va mune eNtshaveni ya Mitlhwari, Yesu u va byela xifaniso xin’wana. Eka masiku ma nga ri mangani lama hundzeke loko a ri eYeriko, u vulavule hi xifaniso xa timayina ku kombisa leswaku Mfumo a wa ha ri ekule ni ku fika. Xifaniso lexi a xi hlamuselaka sweswi xi ni tinhla to hlaya leti yelanaka ni tinhla leti a ti hlamuseleke eka swifaniso swin’wana. Xi yelana ni nhlamulo yakwe ya xivutiso xa ku vuya kakwe ni ku lovisiwa ka misava leyi. Xi kandziyisa leswaku vadyondzisiwa vakwe va fanele va gingiriteka eka vutihlamuleri lebyi a va nyikeke byona.

Yesu u sungula hi ku vula a ku: “Hikuva swi fana ni munhu loyi a lavaka ku endzela etikweni ra le kule, la vitanaka malandza yakwe a ma khomisa nhundzu ya yena.” (Matewu 25:14) Leswi Yesu a nga tshama a tifanisa ni wanuna loyi a endzeleke etikweni ra le kule “ku ya vekiwa ku va hosi,” swi endla leswaku vaapostola va swi vona hi ku olova leswaku hi yena “wanuna” loyi a vulavulaka ha yena sweswi.—Luka 19:12.

Eka xifaniso lexi, loko wanuna a nga si endzela etikweni ra le kule, u nyika malandza ya yena nhundzu yakwe ya nkoka. Eka malembe manharhu ni hafu ya ntirho wakwe wa laha misaveni, Yesu a khomeke swinene hi ntirho wo chumayela mahungu lamanene ya Mfumo wa Xikwembu naswona u letele vadyondzisiwa vakwe ku endla ntirho lowu. Sweswi wa famba naswona wa tiyiseka leswaku va ta ya emahlweni va endla hilaha a va leteleke hakona.—Matewu 10:7; Luka 10:1, 8, 9; ringanisa na Yohane 4:38; 14:12.

Eka xifaniso lexi, xana wanuna loyi u yi ava njhani nhundzu yakwe? Yesu u hlamusela a ku: “A nyika un’wana titalenta ta ntlhanu, un’wana timbirhi, kasi lon’wana a n’wi nyika yin’we, ha un’we hi ku ya hi vuswikoti bya yena, ivi a famba.” (Matewu 25:15) Xana malandza lawa ma ta endla yini hi leswi ma nyikiweke swona? Xana va ta gingiriteka va swi tirhisa hi ndlela leyi nga ta tsakisa n’wini wa vona? Yesu u byela vaapostola a ku:

“Loyi a kumeke titalenta ta ntlhanu a hatla a famba a ya bindzula ha tona kutani a vuyeriwa hi tin’wana ta ntlhanu. Hi ndlela leyi fanaka loyi a kumeke timbirhi a vuyeriwa hi tin’wana timbirhi. Kambe nandza loyi a kumeke yin’we a famba a ya yi celela, a fihla mali ya n’wini wakwe.” (Matewu 25:16-18) Ku ta endleka yini loko n’wini wa vona a vuya?

Yesu u ya emahlweni a ku: “Endzhaku ka nkarhi wo leha n’wini wa malandza wolawo a vuya a ta vona leswi ma swi endleke hi mali yakwe.” (Matewu 25:19) Malandza mambirhi yo sungula ma endle hinkwaswo leswi ma nga swi kotaka, ‘un’wana ni un’wana hi ku ya hi vuswikoti byakwe.’ Nandza ha un’we a a gingiriteka, a tirha hi matimba ni ku kuma ntswalo eka leswi a nyikiweke swona. Loyi a kumeke titalenta ta ntlhanu u bindzule tin’wana ta ntlhanu, hilaha ku fanaka loyi a nyikiweke timbirhi u bindzule timbirhi. (Khale, mutirhi a a ta tirha malembe ya 19 ku kuma leswi a swi ringana ni talenta yin’we.) N’wini u bumabumele ha un’we wa vona hi ndlela leyi fanaka hi ku vula a ku: “U endle kahle, wena nandza lonene ni wo tshembeka! U tshembekile eka swilo leswitsongo. Ndzi ta ku nyika swo tala leswaku u swi hlayisa. Tsaka ni n’wini wa wena.”—Matewu 25:21.

Kambe, swi hambanile ni swa nandza loyi a kumeke talenta yin’we. Nandza yoloye u ri: “Hosi yanga, ndza swi tiva leswaku u munhu loyi a karhataka, loyi a tshovelaka laha a nga byalangiki kona ni ku hlengeleta mavele lawa a nga ma tirhelangiki. Kutani ndzi chavile ivi ndzi famba ndzi ya celela talenta ya wena. Hi leyi, teka.” (Matewu 25:24, 25) A nga kalanga a tikarhata hi ku vekisa mali ya kona eka vabindzurisi leswaku a ta kumela n’wini wakwe ntswalo. Kahlekahle a nga swi endlanga leswi a swi ta tsakisa n’wini wakwe.

Swa fanela ku va n’wini a n’wi vitana “nandza wo homboloka loyi a lolohaka.” U tekeriwe swilo leswi a a ri na swona kutani swi nyikiwa nandza loyi a a tiyimisele ku gingiriteka. N’wini yoloye u veka xikombiso a ku: “Hikuva loyi a nga ni swo karhi, u ta nyikiwa swo tala naswona u ta va ni swo tala. Kambe loyi a nga riki na nchumu, u ta tekeriwa ni leswi a nga na swona.”—Matewu 25:26, 29.

Vadyondzisiwa va Yesu va ni swo tala swo ehleketa hi swona, ku katsa ni xifaniso lexi. Va swi vona leswaku leswi Yesu a va nyikaka swona ku nga ntirho wa ku endla vadyondzisiwa, i nchumu wa nkoka swinene. Naswona u lava leswaku va gingiriteka eka ntirho lowu. Yesu a nga langutelanga leswaku hinkwavo va endla ntirho wo chumayela hi ndlela leyi fanaka. Kambe hilaha a hlamuseleke hakona, un’wana ni un’wana u fanele a endla hinkwaswo leswi a nga swi kotaka ‘hi ku ya hi vuswikoti byakwe.’ Leswi a swi vuli swona leswaku Yesu wa tsaka hi munhu loyi a “lolohaka” naswona a tsandzekaka ku endla leswi nga ematimbeni yakwe ku engetela ntswalo eka nhundzu ya N’wini wakwe.

Mayana ndlela leyi xi va tsakiseke hayona vaapostola, xitiyisekiso lexi nge: “Loyi a nga ni swo karhi, u ta nyikiwa swo tala”!