Papila Leri Humaka Eka Huvo Leyi Fumaka

Eka Vahuweleri-kulorhi Lava Rhandzekaka Va Mahungu Lamanene:

Hakunene i nkateko lowukulu ku va hi n’wi gandzela hi vun’we Yehovha Xikwembu xi ri xin’we xa ntiyiso! Hi “vatirhi-kulobye” vakwe, lava byarhisiweke ntirho wo kwetsima wo chumayela ni ku dyondzisa vanhu mahungu lamanene ya Mfumo wakwe lowu simekiweke. (1 Kor. 3:9; Mat. 28:19, 20) Leswaku ntirho lowu endliwaka emisaveni hinkwayo, hi wu endla hi ku rhula ni hi vun’we, hi fanele hi va lava hlelekeke kahle.—1 Kor. 14:40.

Buku leyi yi ta ku pfuna ku twisisa ndlela leyi vandlha ra Vukreste ri fambisiwaka ha yona namuntlha. Yi hlamusela mikateko ni vutihlamuleri lebyi u nga na byona leswi u nga Mbhoni ya Yehovha. Loko u tlangela mikateko leyi u nga na yona naswona u hetisisa vutihlamuleri bya wena, u ta “tiyisiwa eripfumelweni.”—Mint. 16:4, 5; Gal. 6:5.

Hikokwalaho, hi ku khutaza leswaku u yi hlaya hi vukheta buku leyi. Lava tindlela leti u nga tirhisaka rungula leri evuton’wini bya wena. Hi xikombiso, loko ku ri hileswaku wa ha ku va muhuweleri loyi a nga khuvuriwangiki, hi wahi magoza lawa u faneleke u ma teka leswaku u khuvuriwa tanihi Mbhoni ya Yehovha? Hi hala tlhelo, loko ku ri hileswaku u khuvuriwile, u nga endla yini leswaku u kula hi tlhelo ra moya ni ku ndlandlamuxa ntirho wa wena lowu u wu endlelaka Yehovha? (1 Tim. 4:15) Xana u nga ku kondletela njhani ku rhula evandlheni? (2 Kor. 13:11) Kuma tinhlamulo ta swivutiso leswi ebukwini leyi.

Loko ku ri hileswaku u wanuna loyi a khuvuriweke, u nga endla yini leswaku u fanelekela ku va nandza wa vutirheli kutani endzhakunyana u va nkulu? Tanihi leswi vanhu lavantshwa va magidi va khitikanelaka eka nhlangano wa Xikwembu, ku ni xilaveko xa xihatla xa vamakwerhu va xinuna lava fanelekaka leswaku va ta rhangela. Buku leyi yi ta ku pfuna ku vona leswi lavekaka leswaku u “fikelela” tipakani leti ta moya.—1 Tim. 3:1.

Hi khongela hi mbilu hinkwayo leswaku buku leyi, yi ku pfuna u tiva u tlhela u rhandza leswi u faneleke u swi endla eka nhlangano wa Yehovha. Ha mi rhandza swinene hinkwenu ka n’wina naswona hi ya emahlweni hi khongelela leswaku mi va exikarhi ka lava nga ta tiphina hilaha ku nga heriki eku gandzeleni ka Yehovha Tata wa hina wa le tilweni.—Ps. 37:10, 11; Esa. 65:21-25.