A Ku Ri Mani Yobo?

Etikweni ra Uzha a ku tshama wanuna un’wana loyi a a gandzela Yehovha. Vito rakwe a ku ri Yobo. A a fuwile swinene naswona a a ri ni ndyangu lowukulu. A a ri ni tintswalo naswona a a pfuna swisiwana, vavasati lava feriweke hi vavanuna ni vana lava nga riki na vatswari. Xana leswi Yobo a a endla swilo leswinene, swi vula leswaku a a nga ta langutana ni swiphiqo?

Sathana Diyavulosi a a n’wi langutile Yobo hambileswi yena a a nga tivi nchumu. Yehovha u byele Sathana a ku: ‘Xana u veke mbilu ya wena ehenhla ka nandza wa mina Yobo? A ku na munhu loyi a fanaka na yena emisaveni. Wa ndzi yingisa naswona u endla swilo leswinene.’ Sathana u te: ‘I ntiyiso leswaku Yobo wa ku yingisa. Wa n’wi sirhelela u tlhela u n’wi katekisa. U n’wi nyika tiko ni swifuwo. N’wi tekele swona hinkwaswo kutani u ta tshika ku ku gandzela.’ Yehovha u te: ‘U nga n’wi ringa Yobo. Kambe a wu fanelanga u n’wi dlaya.’ Hikwalaho ka yini Yehovha a pfumelele Sathana leswaku a ringa Yobo? Hikuva a a tiyiseka leswaku Yobo u ta tshama a tshembekile.

Sathana u sungule ku ringa Yobo hi ku n’wi tisela makhombo yo hambanahambana. U rhange hi ku rhumela vanhu lava vuriwaka Vasebiya leswaku va yiva tihomu ni timbhongolo ta Yobo. Endzhakunyana, ndzilo wu dlaye tinyimpfu takwe hinkwato. Vakalidiya va yive tikamela takwe. Malandza yakwe lawa a ma khathalela swifuwo sweswo ma dlayiwile. Endzhaku ka sweswo, ku humelele mhangu yo vava swinene. Vana va Yobo hinkwavo va file loko yindlu leyi a va endlele nkhuvo eka yona yi va werile. Hambileswi Yobo a langutaneke ni maxangu yo tala, a nga tshikanga ku gandzela Yehovha.

Leswi Sathana a a lava ku engetela ku vava loku Yobo a ku twa, u endle leswaku miri wakwe hinkwawo wu huma marhumba. Yobo a a twa ku vava swinene. A a nga swi tivi leswaku hikwalaho ka yini a a weriwa hi maxangu lawa hinkwawo. Hambiswiritano, a nga tshikanga ku gandzela Yehovha. Xikwembu a xi swi vona swilo leswi hinkwaswo naswona xi tsakisiwe hi Yobo.

Endzhaku, Sathana u rhumele vavanuna vanharhu leswaku va ya ringa Yobo. Va byele Yobo va ku: ‘U fanele u dyohile kambe u ringeta ku fihla xidyoho xa wena. Xikwembu xi le ku ku xupuleni.’ Yobo u te: ‘A ndzi dyohanga.’ Kambe u sungule ku anakanya leswaku Yehovha hi yena loyi a a n’wi vangela swiphiqo leswi, naswona u tlhele a vula leswaku Xikwembu a xi nga n’wi kombisi vululami.

Wanuna loyi a vuriwaka Elihu, a a yingisele bulo leri a lo ntsee! Endzhaku u te: ‘Leswi mi swi vulaka hinkwenu swi hoxile. Yehovha u tlakuke ngopfu ku tlula leswi hina hi nga swi twisisaka. A nge pfuki a endle swilo swo biha. U vona swilo hinkwaswo naswona u pfuna vanhu lava nga ni swiphiqo.’

Endzhaku Yehovha u vulavule na Yobo. U te: ‘A wu ri kwihi loko ndzi endla tilo ni misava? Hikwalaho ka yini u vula leswaku a ndzi lulamanga? U vulavula handle ko anakanya hikuva a wu swi tivi leswaku hikwalaho ka yini swilo leswi swi humelela.’ Yobo u pfumerile leswaku u hoxisile kutani a ku: ‘A ndzi hoxisile. A ndzo twa ha wena kambe sweswi se ndzi ku tiva kahle. A wu tsandzi hi nchumu. Ndzi kombela ku rivaleriwa eka leswi ndzi swi vuleke.’

Loko ndzingo se wu herile, Yehovha u endle leswaku Yobo a tlhela a va ni rihanyo lerinene a tlhela a n’wi nyika rifuwo ro tala swinene ku tlula leri a a ri na rona eku sunguleni. Yobo u hanye nkarhi wo leha naswona a tsakile. Yehovha u katekise Yobo hileswi a n’wi yingiseke hambiloko xiyimo xi tika. Xana u ta hambeta u gandzela Yehovha hilaha Yobo a endleke hakona ku nga khathariseki miringo leyi u nga ha langutanaka na yona?