DYONDZO 15

Vulavula Hi Ndlela Leyi Kombisaka Leswaku Wa Tiyiseka

1 Vatesalonika 1:5

HI KU KOMISA: Kombisa leswaku leswi u swi vulaka i swa nkoka naswona wa tiyiseka ha swona.

Lunghiselela kahle. Hlaya rungula ra wena kukondza u ti twisisa kahle tinhlankulu ta rona ni ndlela leyi Bibele yi ti hlamuselaka ha yona ku kombisa leswaku rungula rero ra tshembeka. Hi marito ma nga ri mangani, hlamusela tinhlankulu ta wena hi ndlela leyi twisisekaka hi ku olova. Anakanyisisa hi ndlela leyi ti nga ta va pfuna ha yona vayingiseri va wena. Khongela u kombela moya lowo kwetsima.

Praktisa rungula ra wena hi ku ri hlayela ehenhla leswaku u ta ri tolovela kahle, sweswo swi ta endla leswaku u antswisa ndlela leyi u nga ta ri andlala ha yona.
Tirhisa marito lama kombisaka leswaku wa tiyiseka hi timhaka ta wena. Tirhisa marito ya wena u nga hlayi marito lawa rungula ra wena ri sekeriweke eka wona. Loko u ri karhi u andlala mhaka ya wena, vulavula hi ndlela leyi kombisaka leswaku wa tiyiseka hi leswi u swi vulaka.
Kombisa leswaku wa tiyiseka hi leswi u swi vulaka. Vulavula hi rito leri twalaka kahle u tlhela u languta vayingiseri va wena.

Ku veka mhaka hi ku tiyiseka a swi vuli ku vulavula ntsena u nga hlawuli marito kumbe ku vulavula hi ndlela yo sindzisa. Hambiloko u vulavula hi ndlela leyi kombisaka leswaku wa tiyiseka hi leswi u swi vulaka, vulavula hi ndlela ya musa.