Xana U Tshika Ntiyiso Wu Hundza?

ENDZHAKU ka ku pona ku ehlisiwa ka nsindziso ekhwatini ra Amazon, vakhandziyi vo tala a va ri ni mboyamelo wuntsongo wo languta ngopfu rivala. Kambe a ku nga ri ni loyi a vavisekeke ni munhu wa vuxiyaxiya! A a ri mudyondzi wa misava, kutani u vone hi laha rivala ra kona leri xihaha-mpfhuka-phatso a xi tshame eka rona a ri ri hava nchumu ha kona. Ematshan’wini yo pfumelela nkarhi wu hundza, u langutisisile ripala leri. Hi nkarhinyana wo koma u xiye leswaku lexi eka van’wana a xi ta fana ntsena ni rivala rin’wana leri hakunene ri nga rin’wana ra mabandhi lama tshembisaka ngopfu ra maribye ya rifuwo ra Misava—xihatla lexikulu xa ngwedi, bauxite, manganese, koporo ni nsuku leyi siku rin’wana yi nga ta dzunisiwa tanihi “El Dorado leyintshwa.”

I munhu la kalaka loyi a tirhisaka minkarhi, eMatshwan’wini ya ku yi tshika yi hundza. Hi xikombiso, xiya hosi ya Varhoma Pontiyo Pilato endzhaku hi lembe xidzana ro sungula ra Nguva ya hina leyi Tolovelekeke. Nkarhi lowu hlawulekeke a wu vekiwe emahlweni ka yena. Varhangeri va Vayuda a va n’wi tisele mudyondzisi lonkulu wa ntiyiso loyi a nga tshama a hanya emisaveni, Yesu Kriste. Anakanya hi swivutiso leswi Pilato a a ta swi vutisa! Anakanya hi mintiyiso leyi a a ta va a yi dyondzile! Kambe lexi tsakisaka, loko va tise Yesu eka yena ro sungula, va ku u tivula “hosi ya Vayuda,” Pilato u vonake wonge u lava ku tiva:

“Xana hosi ya Vayuda hi wena ke?” Ku vutisa Pilato.

Loko a hlamula, Yesu u te: “Mfumo wa mina a wu ti hi la misaveni leyi; . . . Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso. Un’wana ni un’wana la nga wa ntiyiso u yingisa rito ra mina.” Lowu a wu ri nkarhi wa nkoka wa Pilato. Emahlweni ka yena a ku yime wanuna loyi vutomi bya yena a ku ri vumbhoni lebyi hanyaka bya ntiyiso wa switshembiso swa Xikwembu, wanuna loyi a rhandzaka ni ku kota ku n’wi dyonzisa ku tlula munhu wihi na wihi. Hambi swi ri tano nhlamulo ya Pilato yi vile yihi? “Ntiyiso i ncini?” Kutani xikan’we “a huma kambe a ya eka Vayuda.”—Yohane 18:33-38.

Ina, Pilato u tshike ntiyiso wu hundza. Ni vo tala namuntlha va endle xihoxo lexi fanaka. Magazini walowu u wu hlayaka, Xihondzo xo Rindza, xi tsaleriwe ku dyondzisa vanhu hi ta ntiyiso. Hambi swi ri tano, vo tala va loloha ni ku wu hlaya. Van’wana va wu hlaya ni ku tsakela swihloko swa wona kambe va nga endli nchumu hi leswi va swi dyondzeke. Xana ku nga va leswaku vanhu vo tano, tanihi Pilato, va tshika ntiyiso wu hundza?