Leswi Vakriste Va Faneleke Ku Titwisa Swona Hi Ntshunxeko

VAKRISTE va lwisana ni “ntshunxeko” lowu solaka vuhosi lebyi tirhisiwaka hi mfanelo. Hikwalaho ka yini? Hikuva entiyisweni a wu ntshunxi—wu tisa vuhlonga. Xikombiso xo olova xi nga kombisa leswi.

Muntshwa a nga aneriseki ehansi ka vuhosi bya vatswari va yena, lava n’wi arisaka ku dzaha ni ku nwa swakunwa leswi nga ni xihoko. Hi ku ka a nga tlangeli leswaku vuhosi bya vona byi endleriwa ku pfuna yena n’wini, u navela ntshunxeko. Loko se a kurile kutani a suka ekaya, eku heteleleni u kuma ntshunxeko lowa a a wu lava minkarhi hinkwayo. Kambe endzhakunyana ka malembe, endzhaku ka loko a ve mudzahi wa nkarhi na nkarhi ni mutirhisi-nkulu wa xihoko, dokodela ya yena yi n’wi byela leswaku hikwalaho ka swivangelo swa rihanyo u fanele ku tshika ku dzaha ni ku nwa. U kuma leswi swi tika ku swi endla. Ntshunxeko wa yena wu yise eka swidzidzirisi, evuhlongeni.

Ku Ntshunxeka Loku Humaka eVuhosini Lebyi Heleleke

Vuhosi bya Xikwembu byi helerile naswona byi sekeriwe ehenhleni ka ku va ka xona Muvumbi. Leswi swi xi nyika lunghelo ro byela swivumbiwa swa xona leswi mahanyelo lamanene ma nga swona, leswinene ni leswo biha. Mimpimanyeto leyi, leyi simekeriweke ku tshamiseka ka vanhu, yi andlariwe hi laha ku twalaka eBibeleni. Yi ri: “Mi nga tshuki mi tikanganyisa: Loko ti ri timbhisa, ni lava phahlaka swikwembu swa hava, ni vaoswi, ni vavanuna lava endlaka swa tingana ni vavanuna-kulobye, ni vayivi, ni va makwanga, ni swidakwa, ni varhukani, ni vaxisi, va nga ka va nga dyi ndzhaka ya Mfumo wa Xikwembu.”—1 Vakorinto 6:9, 10.

Ngopfu-ngopfu hi le ka lembe xidzana leri ra vutlhari ra misava, leri pfilunganeke ra vu-20 laha munhu a ringeteke ku tintshunxa eka vukongomisi byo tano bya mahanyelo lamanene. Kambe ke, ku nga khathariseki swin’wana ni swin’wana leswi vuriwaka ntshunxeko, a nga swi koti ku tintshunxa eka vuyelo byo endla leswi Xikwembu xi nge i xidyoho. Ematshan’wini yo ntshunxeka, vanhu vo tano va ve mahlonga ya ku navela ka vona vini, ku navela loko biha ni minyanyuko, hi laha Yesu a kombeke khwatsi ha kona loko a ku: “Un’wana ni un’wana la endlaka xidyoho, i hlonga ra xidyoho.”—Yohane 8:34; nakambe vona Varhoma 6:16.

Ku Ntshunxeka Eka Vuhosi Lebyi Pimiweke

Vatirhela-mfumo va hulumendhe va ni lunghelo ro tirhisa vuhosi exikarhi ka tiko, vatswari exikarhi ka ndyangu, mathicara exikarhi ka mafambiselo ya xikolo ni vakulu va Vukriste exikarhi ka bandlha. Kavula, vuhosi bya kona i bya xinkarhana. Hi xikombiso, vuhosi lebyi heleleke bya Yehova, loyi a lerisaka leswaku malandza yakwe ma hlaya Rito ra yena ivi ya hlanganyela ni Vakriste-kulobye, byi ta lawula vuhosi lebyi pimiweke bya wanuna loyi a nga ha lavaka leswaku nsati wakwe a nga endli xin’we xa swilo leswi.—Mintirho 5:29.

Hambi swi ri tano, hi ku xixima vuhosi lebyi pimiweke bya tiko, Vakriste a va nga ta hlanganyela eka mafambiselo ya ntshunxeko yo wisa vuhosi byo tano. A va nga ta yimelela nxandzuko wa nhluvuko hikwalaho ka leswi va nga pfumelelaniki ni nawu wa hulumendhe, naswona a va nga ta khutaza ku tshika ku humesa mindzuvo tanihi ndlela yo Iwisana ni maphorisa man’wana. “Loyi a solaka vuhosi, u sola ku lerisa ka Xikwembu,” ku vule muapostola Pawulo, a engetela a ku: “Lava solaka, va tivangela ku avanyisiwa.”—Varhoma 13:1-4.

Kambe ku vuriwa yini loko mutirhela-mfumo wa hulumendhe a hombolokile ni loko a tirhisa vuhosi byakwe hi ku hoxisa? Ku vuriwa yini loko a hambanisa vanhu kumbe mintlawa leyi nga tolovelekangiki ke? Ndzayo ya Bibele hi leyi: “Loko u nga v̌ona e tikweni riṅwana e šisiwana ši šanisiwa, ni ku lulama ni ku av̌anyisa loko ŝi hombolokisiwa, u nga ṭhuki u hlamala ha ŝona, hikuv̌a l’a tlakukeke henhla ka uṅwana l’a tlakukeke o kona l’a langutelaka, ni Muungameri o kona l’a nge henhla ka v̌ona.” (Eklesiasta 5:8) Swi nga ha koteka ku humelela evuhosini kumbe ehubyeni leyi tlakukeke ya hulumendhe. Kambe hambi loko ku rhula ku nga kumiwi hi ndlela yoleyo, malandza ya Xikwembu ya nga tiyiseka leswaku, “mahlo ya Yehova ma famba-famba e misav̌eni hikwayo e ku tiyisa lav̌a nga v̌a yena hi timbilu hikwato ta v̌ona.”—2 Tikronika 16:9.

Xiyimo xa fana endyangwini. Loko vavanuna kumbe vatatana va nga byi tirhisi kahle vuhosi bya vona, hi nga tiyiseka leswaku eku heteleleni Xikwembu xi ta lulamisa timhaka to tano, xi nga pfumeleli ku homboloka kwihi na kwihi leswaku ku va kona emafambiselweni lama taka ku nga ri khale lamantshwa yo lulama. Eka nkarhi wa sweswi, vavasati ni vana va Vukriste va hambeta va xixima nawu wa vunhloko bya Vukriste, hambi loko minkarhi yin’wana byi tirhisiwa hi ndlela yo biha. Va tlangela leswaku a byi endleriwanga ku tsongahatiwa kambe byi kunguhateriwe ku tiyisekisa ku rhula ni vun’we exikarhi ka ndyangu ni bandlha ra Vukriste.—1 Vakorinto 11:3.

“Ku Ntshunxeka” eVuhosini eXikarhi Ka Bandlha

Malunghana ni vunhloko ebandlheni ra Vukriste, Rito ra Xikwembu ri ri: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tani hi vanhu lava nga ta vutisiwa ehenhla ka yona.” (Vaheveru 13:17) Hambi leswi vuhosi lebyi bya vakulu byi pimiweke, kambe va byi nyikiwe hi Xikwembu hi ku tirhisa moya wa xona lowo kwetsima. Kutani va byi nyikiwe hi ndlela leyi kongomeke ngopfu ku tlula vuhosi lebyi pimiweke lebyi, hi xikombiso, byi nyikiweke vatirhela-mfumo va hulumendhe.—Mintirho 20:28.

Van’wana va ehlekete leswaku milawu ni swiletelo leswi humesiweke hi nhlengeletano ya Xikwembu leyi vonekaka swi bohelela ngopfu, a swi pfumeleli ntshunxeko lowu eneleke wa munhu hi xiyexe. Leswi swi va endle leswaku va tshika ku hlanganyela ni Timbhoni ta Yehova; va nga ha swi lavi ku titsongahata eka lava va hitekelaka mimoya ya vona. Hambi leswi vanhu lava va tixiyaka va ri lava ntshunxekeke, entiyisweni, “ntshunxeko” wa vona, wu tlhela wu va endla mahlonga ya tidyondzo ni mikhuva ya vukhongeri byo hemba.

Vakriste va ntiyiso va xixima vuhosi, vuhosi lebyi heleleke bya Xikwembu ni vuhosi lebyi pimiweke bya vanhu. Langutelo leri ro lulama ra vuhosi ri va sivela ku wu tirhisa hi ku hoxisa ntshunxeko wa Vukriste lowu vutivi bya ntiyiso byi va nyikeke wona.

[Rito leri tshahiweke eka tluka 6]

Vuhosi bya Xikwembu byi helerile naswona byi sekeriwe ehenhleni ka ku va Muvumbi ka xona

[Rito leri tshahiweke eka tluka 6]

Vakriste a va ri xandzukeli tiko hikwalaho ka maphorisa lama ma nga ta tihlamulela eka Xikwembu

[Rito leri tshahiweke eka tluka 7]

Vakriste va ntiyiso va xixima vuhosi, vuhosi lebyi heleleke byaXikwembu ni vuhosi lebyi pimiweke bya vanhu

[Xifaniso eka tluka 7]

Ku hakela vuhosi bya xiviri

Ku xiya vuhosi lebyi pimiweke ebandlheni

Ku tlangela Hosi leyi Tlakukeke, Yehova Xikwembu