Tirhisa Ntshunxeko WaVukriste Hi Mukhuva Lowunene

VAKRISTE va ‘vitaniwele ntshunxeko,’ kambe va tsundzuxiwa ku ka va nga ‘teki ku ntshunxeka ka vona, va ku hundzula mpfumelelo wo endla leswi ntumbuluko wa vona wa laha misaveni wu swi navelaka.’ (Vagalatiya 5:13; 1 Petro 2:16) A swi ta va leswi vavisaka swonghasi loko Mukriste o tirhisa ntshunxeko wa Vukriste hi ndlela leyo biha leswaku a tlhela a va hlonga hi vuntshwa! A hi tekeni xikombiso.

Vanhu vo tala va vukhongeri va dyondzisiwe leswaku ku nwa xihoko i xidyoho. Vutivi lebyinene bya Bibele byi ta n’wi ntshunxa eka mianakanyo leyi yi hoxeke, tanihi leswi ku nga riki ku nwa kambe vudakwa lebyi Bibele yi byi alaka. (Ringanisa Psalma 104:14, 15 na 1 Vakorinto 6:10 na 1 Petro 4:3.) Kutani sweswi Mukriste wo tano la ntshunxekeke a nga ha titwa a ntsunxekile ku tsakela ku nwa hi nkarhi wo karhi. Kambe loko a sungula ku ‘teka ku ntshunxeka ka yena, a ku hundzula mpfumelelo wo endla leswi ntumbuluko wa yena wa laha misaveni wu swi navelaka,’ a nga ha swi endla ku tlula mpimo, a kurisa ku tiseketela ko karhi hi xihoko, hambi ku ri ku tiendla hlonga ra xona.

Xisweswo, endzhaku ka ku ntshunxiwa eka malangutelo lama hoxeke ya ku titsakisa, ku ambala, bombo ra misisi kumbe mahanyelo, Mukriste a nga wela eku swi hundzeleteni: A heta nkarhi wo tala kumbe mali eka swilo leswi khale a swi siveriwa kambe leswi sweswi swi pfumeleriwaka. Leswi ku nga va ku tirhisa ntshunxeko wa Mukriste hi ndlela leyo biha. Swi nga ha va ni mimbuyelo leyo biha.

Twarisa Ntshembo Wa Ntshunxeko

Ngopfu-ngopfu ku sukela eku tlhomiweni ka Mfumo wa Xikwembu wa Vumesiya hi 1914 xitshembiso xa xona xa leswaku “swivumbiwa leswi swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu” a xi ri karhi xi ya eku hetisekeni hi xihatla. (Varhoma 8:21) Kriste ana se a a ntshunxile matilo eka nkucetelo wa Vusathana. (Nhlavutelo 12:7-12) Hi ku hatlisa u ta lovisa Babilona Lonkulu, loyi a boheke vanhu hi xihoxo xa vukhongeri. Kutani enyimpini ya Xikwembu ya Har-Mageddon, u ta ntshunxa vanhu eka tihulumendhe ta vanhu leti nga hetisekangiki hi ku ti susa ti nga ha vi kona. (Daniel 2:44; Nhlavutelo 18:21; 19:11-21) U ta ntshunxa vanhu hambi ku ri eka xivangelo-nkulu xa vuhlonga loko Sathana a pfaleriwile, a nga swi koti ku “xisa vanhu va matiko, ku fikela loko malembe ya 1 000 ma ta va ma hundzile.”—Nhlavutelo 20:2, 3.

Eku heleni ka ku Fuma ka Gidi ra Malembe, Kriste u ta va a ntshunxe vanhu hi laha ku heleleke eka vuyelo hinkwabyo lebyo biha lebyi vangiweke ku sukela eku Iweriweni ko sungula ka ntshunxeko le ndzhaku aEdeni. Tinxaka leti kandziyeriwaka ti ta va ti ntshunxiwile eku xanisiweni loku nga fanelangiki kumbe ku languteriwa ehansi. Vavasati va ta va va ntshunxiwile eka vulawuri lebyi tshikilelaka Bya va xinuna. Vanhu lava vabyaka va ta va va ntshunxiwile eka mavabyi. Vanhu lava kuleke va ta va va ntshunxiwile eka vuyelo lebyi hetaka ntamu bya ku dyuhala. Naswona, xihlamariso xa swihlamariso, vaferiwa va ta va va ntshunxiwile eka nhlomulo, hikuva varhandziwa va vona lava feke va ta va va ntshunxiwile emasirheni!—Nhlavutelo 20:13-21:5; nakambe vona Psalma 146:5-10.

Hi ku twarisa mahungu lawa ya ntshunxeko ya Xikwembu, namuntlha Timbhoni ta Yehova ti tirhisa ntshunxeko wa tona wa Vukriste hi ndlela leyi vuyerisaka. Ku nga va vuhunguki swonghasi eka vona ku seketela matshalatshala ya vanhu ya ntshunxeko, lama nga tisaka ntsena ntshunxeko wa xihlawuhlawu, ni lowu, hi ntiyiso, wu nga ta sirha ntshembo wa ntshunxeko wa xiviri.

Anakanya hi swona: U na nkarhi wo hanya leswaku u kuma ntshunxeko lowunene ku tlula ntshunxeko lowu Patrick Henry a vulavuleke hi wona. Ku tlula kwalaho, u na nkarhi wo tsakela mikateko ya wona endzhaku ka Armagedoni, hi laha ku nga heriki!