Swivutiso Swa Vahlayi

◼ Loko munhu a sayine Xitiviso xa ku Hlambanya ka Vutshembeki, xana lunghiselelo rero ri nga herisiwa?

Xivutiso lexi xi yelana ni lunghiselelo leri ri nga tirhiki ematikweni yo tala. Xo sungula a hi voneni leswi lunghiselelo rero ra ntikelo leri endliweke ri nga swona.

Xihondzo xo Rindza xa Xinghezi xa March 15, 1977, xi vulavule hi xirhalanganya lexi nga kona ematikweni man’wana. Hambi leswi Xikwembu xi pfumelelaka ku dlaya vukati eswisekelweni swa Matsalwa, tihulumendhe tin’wana ti hava lunghiselelo ro dlaya vukati. (Matewu 19:9) Kumbe nawu wu nga ha endla leswaku swi nonon’hwa ku kuma ku dlaya vukati, kumbexana wu lava malembe yo tala. Kutani ke, nkandziyiso wolowo wa magazini wu hlamusele leswaku Timbhoni ta Yehova ti ni mpfumelelo lowu tirhaka ematikweni yo tano ntsena; wu katsa Xitiviso xa ku Hlambanya ka Vutshembeki. Xiya xikombiso xa lunghiselelo leri:

Wansati u tiva ntiyiso wa Vukriste loko a hanya ni (naswona kumbexana a ri na vana ni) wanuna loyi ku nga khale a hambanile ni nsati wakwe wa nawu. Wansati loyi a ha ku tsakelaka wa tshembeka eka yena naswona u lava ku tekana na yena, kambe sweswo a swi koteki hikuva nawu a wu n’wi pfumeleli ku dlaya vukati ni nsati wakwe wa le nawini. Kutani, loko vakulu va bandlha va khorwiseka leswaku vuxaka byakwe ni nuna loyi hi ndlela yin’wana byi ta amukeriwa hi Xikwembu, va ta n’wi pfumelela ku sayina Xitiviso xa ku Hlambanya ka Vutshembeki. Eka xona u hlamusela leswaku u endle hinkwaswo leswi a nga swi kotaka leswaku a tsarisa xinakulobye lexi; leswaku u xiya ku boha ka Xitiviso lexi emahlweni ka Xikwembu; ni leswaku u tshembisa ku tsarisa vukati hi ku hatlisa loko sweswo swi koteka, xisweswo a herisa Xitiviso lexi n’wi pfuneke ku va xiyenge xa bandlha ra Vukriste.

Hambi swi ri tano, xivutiso xa tlakuka: Loko yena (kumbe un’wana la nga eka xiyimo xexo) a nghena ebandlheni ehansi ka Xitiviso xo tano, xana yi kona ndlela yin’wana leyi xi helaka ha yona kumbe leyi xi nga herisiwaka ha yona?

Xitiviso hi xoxe xi vula leswaku musayini wa xona ‘u xiya xinakulobye xakwe tanihi xiboho lexi bohaka emahlweni ka Yehova Xikwembu ni le mahlweni ka vanhu hinkwavo, lexi faneleke ku khathaleriwa ni ku xiximiwa ku pfumelelana ni milawu ya Rito ra Xikwembu hi xitalo.’ Xisweswo, elangutelweni ra bandlha, hi lexi bohaka emahanyelweni lamanene tanihi vukati lebyi tsarisiweke. Hambi swi ri tano, ku fa ka munghana ku herisa vukati kumbe ku hlangana ehansi ka Xitiviso xo tano. (Varhoma 7:2) Nakambe Bibele yi vula leswaku loko munghana wa munhu wa vukati a ri ni nandzu wa por·neiʹa (rigangugangu ehandle ka ku hlangana loku), munghana la nga hava nandzu a nga ha dlaya vukati. (Matewu 5:32; 19:9) Hi ku fanana, ehansi ka Xitiviso xa ku Hlambanya ka Vutshembeki, vunghwavava bya munghana byi nga va xisekelo xo herisa ku hlangana, loko munhu la nga hava nandzu a hlawula tano. Mukriste la nga hava nandzu u fanele ku andlala vumbhoni bya ku pfumala vutshembeki eka vakulu. Leswi swi nga herisa Xitiviso; endzhaku munhu la nga hava nandzu u ta va la ntshunxekeke hi ku ya hi Matsalwa.

Ku xiya leswaku bandlha ri xiya Xitiviso xa ku Hlambanya ka Vutshembeki xi ri lexi bohaka emahanyelweni lamanene tanihi vukati lebyi tsarisiweke swi tlhontlha mphikamakaneta leyi yelanaka. Leswi swi endleka loko xihinga xo sungula xa vukati xi susiwile. Hi xikombiso, eka xikombiso lexi nga laha henhla, wansati la nga enawini wa wanuna a nga ha fa kumbe hulumendhe yi nga ha pfumelela ku dlaya vukati, kutani yena a rhandza ku tekana ni wansati wa Mukriste hi nawu. Emhakeni yoleyo makwerhu wa xisati a nga ka a nga hambeti ehansi ka Xitiviso xa ku Hlambanya ka Vutshembeki, hambi ku ri hikwalaho ka swivangelo swo fana ni ku va ka swona leswi khomisaka tingana ku va la tekiweke hi nawu sweswi kumbe hikwalaho ka leswi a nga ha lahlekeriwaka hi rifuwo ro karhi. Hi ku pfumelelana ni Xitiviso xa yena, manuku u fanele ku teka magoza yo tsarisa ku hlangana ka vona. Loko swi nga ri tano, bandlha ri ta herisa Xitiviso, naswona a nga ha boheka ku tihambanisa na nuna loyi kumbe a tsemiwa.

Hambi swi ri tano, ku vuriwa yini loko loyi a nga pfumeriki a ala ku tekana na yena? Loko a sayinile Xitiviso, bandlha ri langute ku hlangana loku tanihi loku bohaka ni loku nga ni mahanyelo lamanene. Mhaka ya leswaku u hluleka ku sindzisa munghana wakwe la nga pfumeriki ku tsarisa ku hlangana ka vona manuku a ku endli leswaku ku hlangana ku va loku hombolokeke. Kutani a nga hambeta a va munghana la tshembekaka, loyi a nga bohekiki ku hambana na loyi a nga pfumeriki, hambi leswi a faneleke ku phikelela ematshalatshaleni yakwe yo endla leswaku ku hlangana ku va loku tsarisiweke. (Leswi swi lulamisa nhlamuselo leyi nga eka “Swivutiso Swa Vahlayi” swa November 1, 1985.)—Ringanisa Vaavanyisi 11:35; Luka 18:1-5.

Kavula, xiyimo hi lexi hambaneke loko vanghana hinkwavo va sayine Xitiviso ivi va va Vakriste lava khuvuriweke. Emhakeni leyi, hinkwavo va hlambanye hi laha ku tiyeke leswaku va ta nghena eka vukati lebyi nga enawini loko xihinga xa hulumendhe xi susiwile, ku nga yinhla leyi Xitiviso xi nga herisiwaka eka yona. Va boheka ku endla leswi exikarhi ka nkarhi lowu ringanyetiweke, kumbe va hambana leswaku va hambeta va tshama ebandlheni. (Ringanisa “Swivutiso Swa Vahlayi” leswi nga eka Xihondzo xo Rindza xa Xinghezi xa September 1, 1982.) Loko vo hambana, Xitiviso lexi bohaka emahanyelweni lamanene xa ha tirha, kutani ku hava la ntshunxekeke ku nghena eka xinakulobye ni munhu un’wana.—Ringanisa 1 Vakorinto 7:10, 11.

Hambi leswi lunghiselelo ra Xitiviso xa ku Hlambanya ka Vutshembeki ri nga tirhiki etindhawini to tala, bulu leri nga laha henhla ri sekeriwe eka mpimanyeto wa Bibele lowu tirhaka kun’wana ni kun’wana: “Ku tekana a ku ve loku xiximiwaka hi vanhu hinkwavo, vukati byi nga onhiwi hi ku kanganyisana, hikuva Xikwembu xi ta avanyisa timbhisa ni vaoswi.”—Vaheveru 13:4.