“Ntokoto Lowu Fuweke Swinene”

ENKARHINI wa ximumu xa 1984, Gerard, jaha leri humaka eFurwa, u langalangele riendzo ra tin’hweti ta tsevu—pfhumba ra xikanyakanya a tsemakanya United States na Canada. Tintshava leti hlamarisaka ta Rocky ti n’wi nyanyurile, tiphaka to rhula ti n’wi phyuphyisile, kambe xivono lexi a xi voneke eMontmagny, eQuebec, le Canada, xi n’wi hlamarise ngopfu; xi hundzule mahanyelo yakwe.

Hi Sonto, September 16, Gerard a a tsemakanya hi le Montmagny loko a xiya nxaxamelo wo leha wa mimovha leyi pakiweke etlhelo ka gondzo. Ku ya emahlweni, u vone madzana ya vanhu va pholongana exivandleni xa muako. “Ku humelela yini laha?” u vutise un’wana wa vatirhi loyi a a kongomisa mimovha. Hambi leswi wanuna wa kona a a khomekile swinene, u ve ni nkarhi wo hlamusela Gerard leswaku vatirhi lava hinkwavo a va ri Timbhoni ta Yehova leti tirhisaka ku hela ka tona ka vhiki leswaku ti aka holo ya minhlangano ya vukhongeri bya tona. Lexi a xi nga tiveki eka Gerard, hi leswaku a a fike enkarhini wa tiawara leti bohaneke to hetelela ta ntirho wa Holo ya Mfumo wa masiku mambirhi. U hlamarisiwe hi hinkwaswo leswi a swi voneke ni ku swi twa. Vusiku byebyo u tsale eka buku yakwe ya tinotsi a ku: “Nimadyambu ndzi hlangane ni Timbhoni ta Yehova. Va ake yindlu hi masiku mambirhi. A ku ri ni lava tlulaka 1 000. I ntokoto lowu fuweke swinene.”

Hi ku hatlisa endzhakunyana Gerard u tlhelele eFurwa. Endzhaku ka masiku mambirhi, hi July 26, 1986, u rhumele papila leri yaka eka Holo ya Mfumo ya Timbhoni ta Yehova eMontmagny. U tsarile a ku:

‘Ma ha tsundzuka mi vulavula ni mukhandziyi wa xikanyakanya la humaka eFurwa hi siku ra vumbirhi ra ntirho wa n’wina wo aka Holo ya Mfumo? Siku rolero mulawuri wa mimovha u byale mbewu. Tin’hweti ti nga ri tingani endzhakunyana Timbhoni ti ndzi endzerile eFurwa, naswona ndzi amukele nyiko ya dyondzo ya Bibele na vona. Tanihi leswi ndzi humaka endyangwini lowu tiyeke wa Khatoliki, dyondzo a yi nga olovi. Kambe Yehova u endle leswaku mbewu yi kula. Mavhiki mambirhi lama hundzeke ndzi khuvuriwile entsombanweni eNantes. Ndzi tlangela Yehova hikwalaho ka ku ndzi pfumelela ndzi kuma ntiyiso, naswona ndzi nkhensa hinkwaswo leswi makwerhu a ndzi dyondziseke swona Sonto liya, September 16, 1984. Marungula lama humaka eka makwenu la langalangaka la hundzuleriweke entiyisweni.’

Mawaku ntsako lowu bandlha ra le Montmagny ri veke na wona endzhaku ko twa ku hlayiwa ka papila ra Gerard eHolweni ya rona ya Mfumo! Hinkwavo lava pfuneteke eku akeni ka holo va tokote ntiyiso wa marito ya Solomoni lama nge: “Tšukumeta v̌uŝa bya wena e henhla ka mati, hikuv̌a e nḍaku ka masiku la’yo tala u ta tlhela u byi kuma.” (Eklesiasta 11:1) Ina, mimbuyelo leyinene ya miako ya Tiholo ta Mfumo i ya nkarhi wo leha naswona yi fika ekule hi tindlela to tala.