Ku Ringiwa Ni Ku Sefiwa eMinkarhini Ya Manguva Lawa
“Kambe i mani l’a nga ṭhamelaka siku ra ku ta ka yena? I mani l’a nga yimaka e ku fikeni ka yena?”—MALAKIA 3:2.
1. Yehova u te rini etempeleni yakwe ya moya eminkarhini ya manguva lawa, xana u kume yini, swi tlhontlha xivutiso xihi?
LOKO ‘Hosi ya ntiyiso’ yi tile etempeleni ya moya yi heleketiwa hi ‘ntsumi ya yona ya ntwanano,’ hi ku hatlisa endzhaku ka loko Mfumo wu tlhomiwile etilweni hi 1914, xana Yehova u kume yini? Vanhu va yena a va lava ku hlantswiwa ni ku basisiwa. Xana a va ta titsongahatela leswi ni ku tiyisela ku basisiwa kwihi na kwihi loku lavekaka ka nhlengeletano ya vona, ntirho, dyondzo ni mahanyelo? Hi laha Malakiya a swi vekaka ha kona: “Kambe i mani l’a nga ṭhamelaka siku ra ku ta ka yena? I mani l’a nga yimaka e ku fikeni ka yena?”—Malakia 3:1, 2.
2. Eminkarhini ya manguva lawa, “v̌ana v̌a Levi” va Malakia 3:3 i vamani?
2 Yehova u amukela vutihlamuleri byo basisa ni ku hlela “v̌ana v̌a Levi.” (Malakia 3:3) Eka Israyele wa khale, rixaka ra Levhi ri nyikele vaprista ni vapfuni va tempele. ‘Vana vo tano va Levhi’ va yelana ni huvo leyi hlelekeke ya vanhu lava totiweke namuntlha lava tirhaka tanihi vaprista ehansi ka Yesu, Muprista Lonkulu. (1 Petro 2:7-9; Vaheveru 3:1) Hi lava ro sungula va hundzeke eku ringiweni loko Yehova a tile etempeleni ya moya ni ‘ntsumi yakwe ya ntwanano.’ Sweswi, i vumbhoni byihi byi nga kona bya leswaku ku basisa loku ku humelele ku sukela emasikwini yo hetelela ya Nyimpi yo Sungula ya Misava ku ya emahlweni?
Nkarhi Wa Miringo Leyikulu
3. Hi ximun’wana xa 1918, a ku ri xihi xiyimo xa timbhoni ta Xikwembu?
3 Loko Yehova a fambisane ni ‘ntsumi yakwe ya ntwanano’ etempeleni yakwe ya moya, U kume masalela ya ri karhi ya lava ku hleriwa ni ku basisiwa. Hi xikombiso, Xihondzo xo Rindza xa Xinghezi xi khutaze vahlayi va xona ku vekela May 30, 1918, etlhelo, tanihi siku ra xikhongelo xo hlula ra mimfumo ya xidemokrati, hi laha swi komberiweke ha kona hi nhlengeletano ya U.S. na hi Presidente Wilson. Leswi swi vange ku tshoviwa ka vukala-tlhelo bya Vukriste.—Yohane 17:14, 16.
4. I yini lexi humeleleke malunghana ni ku xanisiwa ka malandza ya Yehova?
4 Vafundhisi na tihulumendhe va tise ntshikilelo lowukulu eka malandza lama totiweke ya Yehova. Loko va hehleriwe mpfilumpfilu hi vunwa, masalela lama totiweke ma ringete ku endla leswaku ku pfumala ka wona nandzu ku va erivaleni. Hambi swi ri tano, hi May 7, 1918, switiyisekiso swa ku khotsa swirho swa nhungu swa ntirho ni ntlawa wa vahleri va Watch Tower Bible and Tract Society swi simekiwile, ku katsa ni muungameri, J. F. Rutherford. Ku tengisiwa ka vona ku sungule hi Musumbunuko, June 3. Hi June 20 huvo yo avanyisa yi tlherisele ku avanyisa ka nandzu eka vabohiwa va mune. Kutani hi July 4, 1918, vavanuna lava va tinyiketeke va Vukriste va tekiwile hi xitimele va yisiwa ekhotsweni eAtlanta, Georgia, U.S.A.
5. Swi vonakise ku yini leswaku a ku ri ni xilaveko xo sefiwa exikarhi ka lava va tirhelaka Xikwembu, naswona i yini leswi kombaka leswaku leswi swi humelerile?
5 Hi ximumu xa 1918, rito leri nga ni matimba, leri hleriweke ra ku chumayela ka le rivaleni ka Mfumo wa Yehova ra lava totiweke ri ehlisiwile hi mpfumawulo. A swi fana ni loko va ‘dlayiwile’ malunghana ni ntirho wa vona wa le rivaleni. (Nhlavutelo 11:3, 7) Hi nkarhi wa mintsombano ya Sosayiti hi ximumu xolexo, vagwinehi van’wana va tlhelele endzhaku ivi va vumba mintlawa ya vona vini leyi kanetaka ya vukhongeri. Hi ku kombisa mikhuva ya “nandza lowo biha,” va ‘hleriwile’ ku fana ni “mungu” leswaku va hambanisiwa ni masalela lama tshembekaka ya Yehova. (Matewu 3:12; 24:48-51) Xitsundzuxo xa rifu ra Kriste xi tlangeriwile hi Sonto, April 13, 1919, ni 17 961 lava veke kona ematikweni yo tala. Loko ku ringanisiwa ni xiphemu xa xiviko xa 1917, lava veke kona eXitsundzuxweni va ehlile hi ku tlula 3 000, leswi kombaka mimbuyelo ya ku sefiwa.
6. Ku pfumelela ka Yehova miringo yo tano ku hetelele hi mikateko ya vanhu vakwe hi ndlela yihi?
6 Hambi swi ri tano, ku pfumelela ka Yehova miringo yo tano leyikulu ku wela vanhu vakwe a ku ri hi ku langutela ka vona mikateko leyi nga heriki. A nga va tshikanga nikantsongo. Hi Ravumbirhi, March 25, 1919, J. F. Rutherford ni vanakulobye vakwe va nkombo va ntshunxiwile ekhotsweni hi ku beyila naswona endzhaku va ntshunxiwe hi laha ku heleleke. Hi ku anghwetla, eka vaponi lava basisiweke va nkarhi lowu wa ku ringiwa, ku te ntshunxeko evuhlongeni! Ina, “ku hefemula ka vutomi loku humaka eka Xikwembu, ku nghena eka vona, kutani va suka va yima hi milenge ya vona,” va tilulamisele ku teka goza.—Nhlavutelo 11:11.
7. (a) I yini lexi timbhoni leti pfuxetiweke sweswi ti xi endlaka? (b) I yini leswi veke kona hi ku hleriwa ni ku basisiwa loku?
7 Xana a va ta endla yini sweswi? Tanihi vanhu va Vakriste lava pfuxetiweke, masalela ya tikambisisile. Va khongelele ku rivaleriwa swidyoho swihi na swihi swa ku landzula hi Yehova. (Ringanisa Psalma 106:6; Esaya 42:24.) Va ye emahlweni tanihi vanhu lava basisiweke. Hikwalaho ka ku va lava basisiweke, masalela ya timbilu leti tshembekaka ‘ya ve vanhu lava humesaka magandzelo hi ku lulama eka Yehova.’ (Malakia 3:3) Magandzelo ya moya ya ku dzunisa lawa va ma nyikeleke ya ve lama tsakisaka eka Xikwembu. (Vaheveru 13:15) Va tsakile leswi ku wisa ko koma ka ku hlundzuka ka Yehova ku heleke. A va tiyiseka leswaku ntirho wa vona wa vumundzuku a wu ta amukeleka eka yena. (Esaya 12:1) Ku sukela hi September 1 ku ya ka 8, 1919, ntsombano lowu tsakisaka wu khomeriwe aCedar Point, Ohio, ku va ni 7 000 na 200 lava khuvuriweke. Leswi hinkwaswo ka swona swi kombe ku pfuxetiwa ni ku navela ku hetisisa ntirho wa Yehova wo chumayela.
8. (a) Xana endlelo ro hlela ni ku basisa ri hi khumba njhani namuntlha? (b) Ku engetela eka “v̌ana v̌a Levi” va manguva lawa, i vamani van’wana lava va faneleke ku hundza hi le ku ringiweni ni ku sefiwa?
8 Xana leswi hinkwaswo swi khumba vanhu va Yehova lava hanyaka namuntlha hi ndlela yihi? Hi ku ya hi vuprofeta, Yehova, a heleketiwa hi ntsumi yakwe, a a ta ta ivi a “ṭhama, a ri kari a ṅwokisa, a basisa.” (Malakia 3:3) Ina, endlelo ro hlela ni ku basisa a ri ta ya emahlweni, naswona a a ta “ṭhama” ivi a languta hi vukheta. Mhaka ya leswaku masalela lama tshembekaka ya hundze hi le ka nkarhi wa miringo leyikulu eku sunguleni eka lembe xidzana leri a swi nga vuli swona leswaku Muhleri Lonkulu a a hetile ku va basisa kakwe. Ku ringiwa ni ku sefiwa ku ye emahlweni ku ta fika esikwini ra hina. Yehova wa ha ri etempeleni yakwe, u tshame eku avanyiseni. A a nga tengisi “v̌ana v̌a Levi” ntsena, masalela lama totiweke. Vuprofeta bya Malakiya byi kombe ku khathalela Kakwe ka ‘vamatiko,’ loku yelanaka ni “ntshungu lowukulu,” lowu langutelo ra wona ku nga vutomi bya laha misaveni. (Malakia 3:5; Nhlavutelo 7:9, 10) Ina, hi malembe ya 69 lama hundzeke a ku ri na ku tengisiwa loku yaka emahlweni ka vanhu va Yehova hi tindlela ta mune.
Mimbasiso Ya Nhlengeletano
9. I minhluvuko yihi yin’wana leyi yaka emahlweni eka xivumbeko xa nhlengeletano ku sukela hi 1919?
9 Xo sungula, ku basisa ku humelerile hi ku twananisa loku yaka emahlweni ka bandlha ra misava hinkwayo ni milawu leyi ya ha ku twisisiwaka ya Matsalwa. A ku ta va ni ku lahliwa loku nonokaka ka tindlela ta xidemokratiki ta ku fambisa timhaka ta bandlha. Xiya yin’wana ya minhluvuko emhakeni leyi.
1919: Minhlawulo ya Huvo leyi Fumaka yi sungule hi ku hlawuriwa ka mukongomisi wa nkarhi hinkwawo wa ntirho eka bandlha rin’wana ni rin’wana eyindlu-nkulu ya Sosayiti ya Watch Tower ku fambisa timhaka ta ntirho wa nsimu.
1932: Nhlawulo wa lembe na lembe wa vakulu ni vadiyakoni wu herisiwile; ku hlawulela ka bandlha vavanuna swiyimo leswi ku siviwe hi ku hlawula ka komiti ya ntirho leyi pfunetaka (ni ku katsa) mukongomisi wa ntirho la hlawuriweke hi Sosayiti.
1937: Ku xiyiwe leswaku “Vayonadab” [lava nga ni ntshembo wa laha misaveni] va nga ha tamela swiyimo swa vutihlamuleri ebandlheni.
1938: Valanguteri hinkwavo ni vapfuni va vona a va ta hlawuriwa hi Sosayiti hi ndlela ya le tilweni.
1972: Swi vekiwe erivaleni leswaku endlelo ra Matsalwa ro lawula bandlha rin’wana ni rin’wana a ku nga ri hi wanuna un’we la vupfeke wa Mukriste ntsena kambe hi huvo ya vakulu, hi laha yi hlawuriweke ha kona hi Sosayiti.
1975: Ku simekiwa ka tikomiti ta Huvo leyi Fumaka to khathalela vutihlamuleri byo hambana-hambana; a ku nga ri na wanuna un’we loyi a a ta kongomisa timhaka, kambe hinkwavo lava nga exikarhi ka komiti a va ta va ni rito leri ringanaka naswona a va ta languta hi vun’we eka vurhangeri bya Kriste Yesu.
10. (a) Ku humelele yini eka mimbasiso yo tano? (b) Xana u titwa njhani hi mindzulamiso yo tano hinkwayo?
10 Xana ku ve byihi vuyelo bya ku lulamisiwa ko tano? Nkateko wa Yehova handle ko kanakana a wu tele, hi laha swi kombisiweke ha kona hi ku kula ka moya ni nhlayo ya vagandzeri vakwe. (Ringanisa Mintirho 6:7; 16:5.) I ntiyiso, valanguteri van’wana ni van’wana va sefiwile hikuva a va titsongahatelanga ndlela leyi kongomisiwaka hi Xikwembu hi ku tshembeka. Hambi swi ri tano, vunyingi bya vanhu va Yehova, byi tikombe byi ri lebyi yingisaka ni ku titsongahatela eka ku antswisiwa ka nhlengeletano. (Vaheveru 13:17) Va tlangela leswaku hikwalaho ka mindzulamiso yo tano Mubasisi Lonkulu u va tise eka ntwanano lowukulu wa maendlelo ya Matsalwa ya mabandlha.
Vutirheli Bya Nsimu
11. I swivumbeko swihi leswi yaka emahlweni leswi ntirho wo chumayela wu veke na swona eka makume ya malembe ya sweswinyana?
11 Xa vumbirhi, ku basisa ku ve kona hi miringo yo fana ni ku hlanganyela entirhweni wa nsimu.
1922: Hinkwavo lava hlanganyelaka emabandlheni va khutaziwe ku hlanganyela entirhweni wa nsimu wa yindlu hi yindlu. Bulletin ya n’hweti na n’hweti (sweswi Vutirheli Bya Hina Bya Mfumo) leyi nga ni vukongomisi bya ntirho yi ve leyi kumekaka.
1927: Ku chumayela ka yindlu na yindlu ka nkarhi na nkarhi hi Tisonto ku sungurile; tibuku ni swibukwana swi hangalasiwile hi munyikelo.
1937: Xibukwana xo sungula xa Model Study xa tidyondzo ta le kaya ta Bibele xi amukeriwile.
1939: Tsima ra xikhokhelo xo sungula xa lembe na lembe xa Xihondzo xo Rindza ri humelerile; swikhokhelo leswintshwa leswi tlulaka 93 000 swi kumiwile.
1940: Ntirho wa timagazini wa le xitarateni wu sungurile.
Ku chumayela loku ka le rivaleni ku ye emahlweni hi swivumbeko swo tala, ku katsa ni ku endla maendzo yo vuyela ni ku fambisiwa ka tidyondzo ta le kaya ta Bibele.
12. (a) Ku ve yihi mimbuyelo ya mimbasiso yo tano ya vutirheli bya nsimu? (b) Xana hi nga komba ku tshembeka ka hina eka ndlela leyi Yehova a basiseke vanhu vakwe ha yona hi ndlela yihi?
12 Mimbuyelo ku ve yihi? Hi malembe yo tala van’wana va sefiwile hikuva a va nga rhandzi ku va Vakriste lava vekaka mihandzu. (Yohane 15:5) Kambe vo tala va vanhu va Yehova entiyisweni va amukele xirhambo xa vachumayeri va Mfumo. Hikwalaho, ntlawa wolowo wuntsongo wa lava nga ehansi ka 8 000 endzhaku hi 1919 wu kule wu va nhlohlorhi ya vahuweleri va Mfumo va 3 229 022 hi 1986! Ku vuriwa yini hi vutirheli bya nkarhi hinkwawo? Loko va ringanisiwa ni vakhalipotiya (maphayona) lava chivirikaka va 150 hi ximun’wana xa 1919, n’waxemu ku ve ni avhareji ya vahuweleri va maphayona lava tlulaka 391 000 lava chivirikaka n’hweti na n’hweti—nhlayo leyi tlakukeke evurungurwini bya Timbhoni ta Yehova ta manguva lawa! Hi ku hlanganyela loku chivirikaka eku chumayeleni ka mahungu lamanene, hi kombisa ku seketela ka hina loku tshembekaka ka ndlela leyi Yehova a yeke emahlweni a basisa vanhu vakwe ha yona.—1 Vakorinto 9:16.
Ku Vonakala Loku Andzaka
13. I swikombiso swihi swin’wana swa hi laha Yehova a voningeleke vanhu vakwe ha kona?
13 Xavunharhu, ku basisa ku endleke loko vanhu va Xikwembu va ringeriwe ku amukeleka ka ku voninga ka moya loku yaka emahlweni loku humaka eBibeleni. (Swivuriso 4:18) Ku sukela hi 1919 ku fikela sweswi ndhambi leyikulu ya mintiyiso leya ha ku twisisiwaka yi khulukile.
1925: Swi voniwe kahle leswaku ku na tinhlengeletano timbirhi leti vonekaka ni leti kanetanaka—ya Yehova ni ya Sathana.
1931: Vito lerintshwa ra Timbhoni ta Yehova ri amukeriwile.
1935: “Ntshungu lowukulu” wa Nhlavutelo 7:9-15 wu hlamuseriwile tanihi ntlawa lowu nga ni langutelo ra laha misaveni.
1941: Ku lulama ka vuhosi bya misava hinkwayo bya Yehova ku kombisiwile ku ri mhaka yo sungula leyi tlhontlhiweke hi mphikamakaneta ya Sathana.
1962: “Vuhosi” bya Varhoma 13:1 byi hlamuseriwe hi laha ku fanelaka tanihi mimfumo leyi tirhaka ya tihulumendhe, leyi Vakriste va faneleke ku titsongahata eka yona.
1986: Ku tlangeriwe leswaku masalela hinkwawo ni “ntshungu lowukulu” hi ku fanekisela va fanele ku hlanganyela eka nyama ni ngati ya Yesu hi ku amukela gandzelo rakwe leswaku va ta pfumelelana na yena.—Yohane 6:53-56.
Hi makume ya malembe, loko Yehova a ri karhi a voningela vanhu vakwe, swi ve erivaleni leswaku a ku ri na xilaveko xa nkhathalelo wa bandlha eku hlayiseni ka nhlengeletano leyi baseke, ya vukala-tlhelo leyi xiximeke ku kwetsima ka ngati.—1 Vakorinto 5:11-13; Yohane 17:14, 16; Mintirho 15:28, 29.
14. (a) Xana vanhu va Yehova va amukele ku voningeriwa ko tano loku yaka emahlweni hi ndlela yihi? (b) Ku tiyimisela ka wena n’wini hi kwihi mayelana ni ndlela ya Yehova yo vulavurisana?
14 Vanhu va Xikwembu va amukele ku voninga ko tano loku yaka emahlweni hi ndlela yihi? Nkarhi lowu hinkwawo, a ku ri ni vantsongo lava a va nga swi koti ku amukela mindzulamiso yin’wana. Lava va ‘hleriwile.’ (Matewu 3:12) Hi tlhelo rin’wana, i ntsako muni wonghasi lowu malandza lama tshembekaka ya Yehova ma nga na wona hi ku voningeriwa ko tano ka moya! Hi nkarhi lowu Vujagana byi ngungumelaka emunyameni wa moya, ndlela ya vanhu va Yehova yi ya yi vonaka swinene. Xana a hi fanelanga ku tiyimisela ku khomelela swinene eka ndlela yo vulavurisana leyi Yehova a yi tirhisaka, hi amukela ku voningeriwa ko tano hinkwako loku yaka emahlweni tanihi “swakudya hi nkarhi wa kona”?—Matewu 24:45.
Ku Lahla Swiendlo Leswi Nga Tengangiki
15. Yehova u basise vanhu vakwe hakantsongo-ntsongo eka swiendlo leswi thyakeke kumbe swa Vubabilona hi ndlela yihi?
15 Xa vumune, ku basisa ku ve kona loko swi ve enawini ku lahla swiendlo leswi nga tengangiki kumbe swa Vababilona. Hi va-1920 vanhu va Xikwembu va tshike ku tlangela Khisimusi na tiholideyi tin’wana leti kombisiweke ti ri ta masungulo ya vuhedeni. Hi 1945 xiyimo xa Vukriste eka mipompelo ya ngati xi hlamuseriwile. Hi va-1960 na va-1970, loko xiyimo xa mahanyelo emisaveni xi hambete xi onhaka, Xihondzo xo Rindza xa Xinghezi xi hambete xi nyikela ndzayo leyi kongomeke eka vanhu va Xikwembu etimhakeni to tano tanihi mahanyelo lama faneleke exikarhi ka rimbewu ni xilaveko xo hambana ni fole ni swidzidzirisi swin’wana.
16. Mindzulamiso yo tano ya swiendlo leswi nga basangiki yi fanele ku langutiwa njhani?
16 Kavula, mindzulamiso yo tano eka swiendlo leswi nga basangiki hakanyingi yi tirhe tanihi ndzingo wa vutshembeki eka vanhu va Xikwembu. Hambi swi ri tano, lava va endleke mindzulamiso leyi faneleke va langute ku hundzuka ko tano tanihi mpfuno wo hluvula nguvu ya thyaka. (Vakolosa 3:9, 10) Va xiye leswaku hambi leswi mikhuva leyi fambisanaka ni tiholodeyi tin’wana yi nga ha vonakaka yi nga vavisi, i langutelo ra Yehova leri faneleke ku hi khumba; xo sungula u xiye swiendlo swa vukhongeri bya vuhedeni laha leswi swi sunguleke kona. Malunghana ni swilaveko swa mahanyelo lamanene swa Xikwembu, va swi langute tanihi nsirhelelo ematshan’wini ya nsivelo, kutani va katekisiwile hi Yehova hikwalaho ka ku va lava baseke. Loko ndzulamiso wu tikombe wu nonon’hwa ku wu twisisa, va tshembe leswaku Yehova a a ‘va dyondzisela ku va pfuna.’—Esaya 48:17.
17, 18. (a) Xana hina ha un’we-un’we hi ringetiwa hi Mubasisi Lonkulu hi ndlela yihi? (b) Xana ku tiyimisela ka hina ku fanele ku va kwihi loko hi ri karhi hi rindzela siku ra Yehova?
17 Lembe na lembe Yehova u ya emahlweni a hlela ni ku basisa vanhu vakwe. Hinkwavo, va titsongahatele endlelo ro basisiwa ehenhleni ka nhlengeletano ya vona, ntirho, dyondzo ni mahanyelo lama baseke. Kambe xana ku vuriwa yini hi hina ha un’we-un’we? Hi nhlengeletano yakwe Yehova u ya emahlweni a avela “swakudya leswi tiyeke” swa vukongomisi lebyi basisaka mbilu. Minsusumeto ya hina ya ringiwa ni ku kamberiwa. (Vaheveru 4:12; 5:14) Hi ku amukela, endlelo ro basisa, ro hlela ra Mubasisi Lonkulu, hi tshama hi basile loko hi ri karhi hi rindzela ‘ku ta ka siku lerikulu, leri chavisaka ra Yehova.’—Malakia 4:5.
18 A ku nkhensiwe Yehova, ‘Hosi ya ntiyiso,’ ni ‘ntsumi yakwe ya ntwanano,’ Yesu Kriste, loyi a hi basisaka ni ku hi susa eka leswi nga basangiki enkarhini lowu wo ringiwa ni ku sefiwa. Onge hinkwerhu ka hina hi nga tiyimisela ku hambeta hi famba etindleleni leti baseke ta Yehova ta ku rhula ehansi ka “Hosana ya ku rhula,” Kriste Yesu, ivi xisweswo hi hlayisa vuxaka bya hina lebyi tsakeke na Yehova.—Esaya 9:6; Psalma 72:7.
Xana Yehova U Va Basise Njhani Vanhu Vakwe eHenhleni Ka—
◻ Mindzulamiso ya nhlengeletano?
◻ Ku hlanganyela entirhweni wa nsimu?
◻ Ku amukela ku voningeriwa loku yaka emahlweni?
◻ Ku lahla swiendlo leswi nga basangiki?
[Marito lama tshahiweke exihlokweni lama nga eka tluka 16]
Hikwalaho ka ku basisa ni ku hlela, masalela lama nga ni timbilu letinene ‘ya ve tiko leri nyikelaka nyiko hi ku lulama eka Yehova’
[Marito lama tshahiweke exihlokweni lama nga eka tluka 19]
Lembe na lembe Yehova u ya emahlweni no hlela ni ku basisa vanhu vakwe
[Xifaniso lexi nga eka tluka 17]
Mubasisi wa khale u wungule leswi nga basangiki, kumbe thyaka. Hi ku fanana, Yehova u pfumelela ku ringiwa ni ku sefiwa leswaku a basisa vanhu vakwe
[Xifaniso lexi nga eka tluka 18]
Va nga ri vangani va ‘hleriwile’ ku fana ni “mungu,” kambe malandza lama tshembekaka ya Yehova ya amukela ku voningeriwa loku yaka emahlweni ka moya
[Xihlovo Xa Kona]
Swifaniso leswi hlengeletiweke (Ekusuhi Ni Matimu Ya Le Vuxeni) Est.