Ku Tshama Kusuhi Ni Nhlengeletano Ya Yehova

Hi ku vula ka John Barr

A NDZI ri ni riendzo ro hetelela ra le kaya n’waxemu hi June leyi hundzeke, ndzi haha ndzi suka eGlasgow ndzi ya eAberdeen. Loko xihahampfhuka xerhu xi tlakukela ehenhla etikweni ra rihlaza ra Scotland ni le henhla ka nambu lowu khulukaka swintsongo wa Clyde, mianakanyo ya mina yi tsutsumele endzhaku elembeni ra 1906 naswona ximutana xexo xa Bishopton, a xi ri kun’wana kwalaho edzongeni wa nambu.

Wa vona, rero a ri ri lembe ni ndhawu laha kokwana wa xisati, Emily Jewell, a sunguleke ku hlaya buku ya Charles T. Russell leyi nge, The Divine Plan of the Ages. Hi ku anghwetla mahlo yakwe ma pfulekele ntiyiso wa leswaku Bibele a yi yi dyondzisi dyondzo ya tihele ta ndzilo. Ku nga ri kungani vana vakwe vambirhi va vanhwana lava kuleke Bessie na Emily (lowo hetelela u ve mana wa mina) na vona va sungule ku vona ku vonakala ka ntiyiso loku voningaka exikarhi ka dyondzo ya mavunwa leyi dyondzisiweke hi United Free Church of Scotland. Hi 1908 Granny u khuvuriwile leswaku a kombisa ku tinyiketela kakwe ku endla ku rhandza ka Xikwembu, naswona vanhwana vakwe va khuvuriwile hi ku anghwetla endzhakunyana.

Tatana a a ri matsalani wa nongonoko eka Kereke yoleyo ya United Free eBishopton. Minkarhi hinkwayo u kume swi nonon’hwa ku amukela dyondzo ya Vunharhu-un’we, kutani mufundhisi wa kereke u tinyikerile leswaku a chumayela hi dyondzo yo hlawuleka leswaku ku pfuneka yena Sonto yin’wana. Sweswo swi pfunile! Loko a twa nhlamuselo leyi ringetiweke, tatana manuku u khorwisekile leswaku dyondzo ya Vunharhu-un’we a yi ri vunwa. U tlhentlhile ekerekeni kutani a khuvuriwa hi 1912 leswaku a kombisa ku tinyiketela kakwe eka Yehova. Hi ku hatlisa endzhakunyana vatswari va mina va rhurhile eN’walungwini va ya eAberdeen ni vana va vona vambirhi, Louie na James, naswona mina ndzi velekiwe kwalaho hi 1913.

Mianakanyo ya mina ehenhleni ka malembe wolawo yo sungula ni matshalatshala ya vatswari va mina yo kurisa hina vana vanharhu ‘hi ndzayo ni ku dyondzisa ka mianakanyo ya Yehova’ swi tshame na mina loko xihahampfhuka xi sungula ku ehlela ka xona ehenhla ka swintshabyana, milambu ni swinambyana leswi ndzi swi tiveke ku sukela evuhlangini. (Vaefesa 6:4) Eka mixo lowu wo xonga wo hisa, i ku tlangela muni konghasi loku ndzi veke na kona eka Yehova hikwalaho ka vuleteri byebyo bya vatswari! Ndzi swi tivile leswaku swi seketele ku tshama ka mina kusuhi ni nhlengeletano ya Yehova minkarhi hinkwayo.

Ntikelo Wa Vuleteri Byo Sungula

Ndyangu wa ka hina minkarhi hinkwayo a wu hlanganisiwe wu va wun’we hi ntsako. Loko Tatana na Manana va ri na ku hambana ko karhi ka malangutelo, va ringete ku ka va nga swi kombisi leswi emahlweni ka hina vana. Leswi a swi vumbanga xichavo ntsena eka hina xa vatswari verhu kambe ni matshamelo ya ku rhula ni nsirhelelo swa xiviri ekaya ka hina.

Yin’wana ya mianakanyo ya mina leyi ndzi yi rhandzaka yi tiseketele hi tinhlengeletano ta ndyangu wa ka hina to titsakisa nimadyambu. Hi lunghiselele ku tirivatisa ka hina vini, hi endla swilo swo fana ni ku yimbelela eka ku hlangana ka hina vini ka vuyimbeleri ni ku tlanga kun’we ni mitlangu ya le bodweni yo fana ni Muravarava. Nakambe, ku nga khathariseki ndlela leyi Tatana a a ri bizi ha yona, a nga hlulekanga ku heta nkarhi wo karhi na hina siku rin’wana ni rin’wana, a hlayela Bibele ehenhla ni tibuku ta Watch Tower, kun’we ni tibuku tin’wana ta muxaka wo olova ni leti nonon’hwaka swinene. Swilo leswi hinkwaswo swi tirhe ku hlayisa ndyangu wa ka hina wu hlangane kun’we loko hi ri karhi hi kula.

A ku ri hina ntsena ndyangu wa “ntiyiso” exiyengeni xexo xa le N’walungu wa Scotland emalembeni wolawo yo sungula. Hikwalaho, kaya ra ka hina ri ve leri tivekaka khwatsi eka vo tala va vayimeri lava famba-fambaka va Sosayiti ya Watch Tower (vaendzela-vukhongeri, hi laha a va vitaniwa ha kona enkarhini wolowo), ku fana na Albert Lloyd, Herbert Senior na Fred Scott. Van’wana va te va huma ni le yindlu-nkulu ya Sosayiti eBrooklyn, New York, ku katsa na W. E. Van Amburgh na A. H. Macmillan. Maendzo lawa a ya phyuphyisa emalembeni ya mina yo sungula.

Ku ta fika namuntlha ndzi titwa ndzi tlangela moya lowunene wa malwandla lowu kombisiweke hi vatswari va mina. Leswi swi fuwise mahanyelo ya ndyangu wa ka hina, naswona hambi leswi a ndzi ri ntsongo ndzi sungule ku anamisa ku tlangela ka mina ka xinakulobye hinkwaxo xa vamakwerhu. Oho, swi tele swonghasi leswi vatswari va nga swi endlaka eku hlakuleleni ka xiboho lexi kufumelaka xa rirhandzu exikarhi ka vana va vona ni xinakulobye xa misava hinkwayo xa vamakwavo!

Ku Hlangavetana Ni Xiphiqo Xa Munhu Hi Xiyexe

Loko ndzi ri karhi ndzi nghenela malembe ya mina yo sungula ya vuntshwa, ndzi sungule ku va jaha leri nga ni tingana swinene ni leri tihambanisaka. Loko ndzi ri karhi ndzi kula, hi laha ndzi kumeke swi ya swi nonon’hwa ku hlangana ni vanhu kutani ndzi vulavurisana na vona. Tingana leti ti andlale xihinga lexikulu hi tindlela to tala kambe ngopfu-ngopfu swi ve tano loko ku tiwa eku kombiseni ka ripfumelo ra mina hi ku chumayela mahungu lamanene ya Mfumo.

Hi ku anghwetla endzhaku ka Nyimpi yo Sungula ya Misava, kokwana wa xisati na manana va ve Timbhoni to sungula eAberdeen ku hlanganyela evutirhelini bya yindlu na yindlu. Hina vana hi hlanganyerile eku hangalaseni ka swiphephana, kambe sweswi eka mina entiyisweni ku vulavula ni vanhu emakaya ya vona—kunene, wolowo a wu ri nchumu lowu hambaneke! Wolowo a wu ri ntlhontlho wa xiviri. Kambe eku heteleleni ndzi hlangavetane na wona. Ndzi nga ka ndzi nga rivali ndzhenga lowuya wa Sonto hi November 1927 loko ndzi byele Tata wa mina leswaku a ndzi ta famba na yena evutirhelini bya yindlu na yindlu. A ku ri ro sungula ndzi vona mihloti emarhameni ya tatana—mihloti ya ntsako emhakeni leyi!

Khombo Ra Ndyangu Ri Ndzi Khumbile

Ku rhula lokunene ka vutomi bya ndyangu wa ka hina ku hahluriwile nimadyambu hi June 25, 1929, loko ndzi ri na 16. Endzhaku ka siku evutirhelini, manana ni makwerhu wa xisati a va tsutsumela ekaya ku ya lunghiselela Tatana swo lalela. Hi xitshuketa, xithuthuthu lexi tsutsumaka swinene xi chayisa Manana, xi n’wi koka-koka exitarateni kwalomu ka 37 wa timitara. Timbanga takwe ta nhloko a ti vava swinene lerova a a nga languteri ku hanya. Kambe hikwalaho ka tin’hweti to tala ta nkhathalelo wa rirhandzu wa makwerhu wa mina wa xisati Louie, u ponile. Hi nkarhi lowu faneleke, Manana u swi kotile ku hanya vutomi lebyi vonakaka byi tolovelekile ku fikela eku feni kakwe hi 1952.

Ntokoto wolowo wo tsema ni nhlana wu endle nchumu wa nkoka eka mina—wu endle leswaku ndzi xiyisisa swinene vutomi bya mina ni leswi a ndzi swi endla ha byona. Ximumu xexo ndzi sungule ku dyondza Bibele swinene ku tlula eku sunguleni—ndzi endle ntiyiso wu va wa mina. Loku a ku ri ku hundzuka lokukulu eka mina, naswona ndzi nyiketele vutomi bya mina entirhweni wa Yehova. Hambi swi ri tano, ku hundze malembenyana ndzi nga si va ni nkarhi wo kombisa ku tinyiketela ka mina hi nkhuvulo wa mati.

Ku Nghenela Ntirho Wa Nkarhi Hinkwawo

Loko ndzi tshika xikolo hi 1932, ndzi nghenele dyondzo ya vuleteri eka vunjhiniyara byo lunghisa ni bya gezi. Le Britain emasikwini wolawo, a ku ri hava xikhutazo lexi nga kona namuntlha xa vanhu lavantshwa xo nghenela ntirho wo chumayela wa nkarhi hinkwawo tanihi maphayona. Kambe ke, loko malembe ma ri karhi ma famba, ndzi tive laha ndzi faneleke ku tirhisa matimba ya mina kona—evutirhelini bya nkarhi hinkwawo.

Ndzi wu tsundzuka kahle nchumu lowu hi wu dyondzeke eku sunguleni hi 1938 lowu kandziyiseke eka mina mimpfuno yo tshama kusuhi ni nhlengeletano ya Yehova ni ku tirhisa swiletelo swa yona hi munhu hi xiyexe. A ku ri minkandziyiso ya magazini wa Xihondzo xo Rindza malunghana na Yonasi lexi hlamuseleke mintokoto leyi a hundzeke eka yona loko a baleka exiavelweni xakwe xa ntirho. Ndzi nghenise dyondzo leyi swinene embilwini, ndzi tiyimisela leswaku a ndzi fanelanga ku ala xiavelo xihi na xihi lexi teke eka mina xi huma enhlengeletanweni ya Yehova. Enkarhini wolowo ndzi xiye swintsongo leswaku i swiavelo swo tarisa ku yini swa le tilweni leswi nga emahlweni swo ringa ku tiyimisela ka mina.

Ndzi khongelele vukongomisi, naswona nhlamulo yi tile hi papila leri ndzi hlamariseke leri humaka eyindlu-nkulu ya Sosayiti eLondon, ri ndzi kombela ku xiyisisa ku va xirho xa ndyangu wa Bethele. Ndzi teke nkarhi lowu hi ku chivirika leswaku ndzi nghena hi nyangwa yoleyo leyikulu leyi yisaka emalunghelweni lamakulu ya ntirho. Xisweswo, hi April 1939 ndzi tikume ndzi tirha ekusuhi na Harold King, loyi endzhakunyana a tirheke tanihi murhumiwa eChina, naswona hikwalaho ka ntirho wakwe wo chumayela, u hete malembe ekhotsweni ra vukhomunisi. Hi tirhe ku hlengeleta michini yo tsala ni tigramafono leti tirhisiwaka ni ku tlanga tidyondzo leti rhekhodiweke etinyangweni ta makaya ya vanhu.

Mina na Harold a hi anakanya hi tinxaka hinkwato leti hambaneke ta vanhu lava eku heteleleni a va ta yingisa rungula ra Mfumo hi ku tirhisa xitirho lexi a hi xi endla. Hi ndlela leyi a hi kalanga hi lahlekeriwa hi xivono xa vuyelo byo hetelela bya ntirho wa hina. Ku sukela enkarhini wolowo, eka swiavelo hinkwaswo leswi hambaneke leswi ndzi swi amukeleke eBethele, ndzi tikarhatele ku hlayisa langutelo leri. Leswi swi endle leswaku ntirho wa mina wu va ntsako wa xiviri naswona minkarhi hinkwayo wu va ni leswi wu swi vulaka mayelana ni ntirho wo chumayela hi Mfumo.

Malunghelo Ya Ntirho

Hi ku hatlisa endzhaku ka ku fika eBethele ya le London, ndzi hlawuriwe tanihi nandza la langutelaka (loyi sweswi a vuriwaka mulanguteri la ungamelaka) wa bandlha leri nga ni vahuweleri lava tlulaka 200. Eku sunguleni, a ndzi ri mulanguteri wa bandlha ra vahuweleri va khume ntsena! Manuku a ndzi rhwexiwe vutihlamuleri bya Ndzawulo ya Mpfumawulo bya ntsombano lowu hlamarisaka wa tiko hinkwaro lowu khomiweke eLeicester hi 1941. Ku fikela enkarhini lowu, a ndzi ri na ntokoto lowu pimiweke ntsena wa mpfumawulo.

Endzhaku ndzi averiwe ntirho wo famba-famba tanihi nandza wa vamakwerhu, loyi sweswi a vuriwaka mulanguteri wa xifundza. A ku ri ni tsevu wa malandza yo tano ntsena eBritain loko ntirho wolowo wu sunguriwile hi January 1943. Xiavelo xa mina a xi ta va xa n’hweti ntsena, kambe xi hetelele hi ku endzela ka mina mabandlha hi malembe lama tlulaka manharhu. Emalembeni wolawo yo nonon’hwa ya Nyimpi ya Vumbirhi ya Misava, ndzi ve mulanguteri wa mintsombano minharhu leyikulu—ku nga nchumu lowu a ndzi nga si tshama ndzi wu endla eku sunguleni.

Ntirho wo famba-famba emasikwini wolawo a wu hambanile ni leswi wu nga swona namuntlha. Minkarhi hinkwayo a hi famba, naswona ku famba-famba eBritain hinkwaro emalembeni wolawo ya nyimpi minkarhi yin’wana a swi tika ngopfu. Eka xiendlakalo lexi tlulaka xin’we, ndzi boheke ku tirhisa xikanyakanya eka xiyenge xa riendzo exikarhi ka mabandlha. Ematshan’wini yo endzela bandlha rin’we hi vhiki hi laha valanguteri lava famba-fambaka va endlaka ha kona namuntlha, loko mabandlha ma ri mantsongo, a hi endzela yo tala ku fika eka tsevu wa wona hi vhiki rin’we!

Xiyimiso xo fanekisela xa siku a ku ri lexi: Ku pfukiwa hi makume-nharhu ku be ntlhanu, naswona endzhaku ka swo fihlula, ku fambiwa ku yiwa eka bandlha leri landzelaka leswaku ku ya sunguriwa ku kambisisa tirhekhodo ta bandlha hi awara ya nhungu ehenhla ka nhloko. Ndzhenga hi ntolovelo a wu hetiwa evutirhelini bya nsimu, leswi nimadyambu a swi landzeriwa hi nhlangano wa awara yin’we ni malandza ya bandlha ivi endzhaku ku va nkulumo ebandlheni. A ndzi nga etleli ngopfu emahlweni ka 11, kumbe hambi ku ri endzhaku loko ndzi tsale xiviko xa siku ebandlheni madyambu wolawo. Musumbunuku wun’wana ni wun’wana a wu vekeriwa etlhelo leswaku ku tatiwa swiviko swa vhiki, dyondzo ya munhu hi xiyexe ni ntirho wihi na wihi wo lunghiselela vhiki leri tlhandlamaka.

U nga ha ku, ‘a ku nga ri xiyimiso lexi bohaneke xa vhiki ke?’ Ina, a ku ri xona, kambe, oho, swi hakela swonghasi ku vona leswaku a hi tiyisa vamakwerhu emalembeni wolawo ya nyimpi laha a ku nga vulavurisaniwi minkarhi hinkwayo ni nhlengeletano! Hi ku twisisa loku kongomeke, hi ve ni ku aneriseka ka ku vona leswaku a hi pfuna mabandlha ku “tiyisiwa eku pfumeleni.”—Mintirho 16:5.

Ku Tlhelela eNtirhweni Wa Bethele

Ndzi komberiwe ku tlhelela entirhweni wa Bethele hi April 1946. Ndzi tsakele ku endla tano, kambe ndzi swi vonile leswaku vutomi bya mina byi fuwisiwile emoyeni hikwalaho ka malembe wolawo manharhu ni hafu entirhweni wo famba-famba. Nhlengeletano yi vule leswi engetelekeke eka mina sweswi, naswona ndzi titwe onge a ndzi endla leswi hlamuseriweke eka Psalma 48:12, 13 leyi nge: “Ṭemakanyani šikari ka Sion, ṅwi renḍelekeni. . . . Mi kambisisa tindlu ta wona ta v̌uhosi.” Ku va la rhendzelekeke swinene exikarhi ka vanhu va Xikwembu swi vangele rirhandzu ra mina ku kula eka “nhlengeletano ya vamakwerhu.”—1 Petro 2:17.

Endzhaku ka ku tlhelela ka mina eBethele, ndzi ve ni lunghelo ro khathalela ku gandlisa ko tala loku endliwaka evugandliselweni bya hina bya le London naswona endzhakunyana a ndzi katseka eka ntirho wo endla ti-plate. Endzhaku, hi September 1977 ndzi ve ni lunghelo ra nkoka leri ndzi ri nyikiweke ra ku va xirho xa Huvo leyi Fumaka ya Timbhoni ta Yehova, leyi nga eBrooklyn, New York, U.S.A.

Ndzi fanele ku pfumela leswaku minkarhi yin’wana ndzi titwe ndzi lava ‘ku balekela’ swin’wana swa swiavelo swo nonon’hwa ngopfu leswi ndzi swi nyikiweke. Kambe enkarhini wolowo a ndzi tsundzuka Yonasi ni xihoxo lexi a xi endleke, kutani a ndzi tiphindhela xitshembiso lexi hlamarisaka lexi kumekaka eka Psalma 55:22: “Nyiketa Yehova e timhaka ta wena, o ta ku seketela; a nga ka a nga pfumeli ni siku riṅwe l’a lulameke a ṭekaṭekisiwa.” Marito lawa ndzi ya kume ya ri ya ntiyiso swonghasi!

Yehova a nga n’wi kombeli ni un’we wa hina ku endla nchumu lowu a swi tivaka leswaku a nge wu koti. Hambi swi ri tano, i matimba ya yena ntsena lama endlaka leswaku hi swi kota ku endla leswi a hi kombelaka swona. Naswona xin’wana—loko hakunene u rhandza vamakwenu lava tirhaka na wena, va ta ku seketela ivi va ku pfuna, va tirha na wena “hi mbilu yin’we” leswaku va ku pfuna ku hetisisa ndzhwalo wa ntirho lowu u wu averiweke.—Sofonia 3:9.

Swinakulobye Leswi Vangamaka

Kavula, minkarhi hinkwayo ku na vamakwerhu van’wana va Vukriste lava u titwaka u va rhandza ngopfu. Un’wana wa vona a a ri Alfred Pryce Hughes, loyi a feke hi 1978. Mhaka ya vutomi byakwe yi humelele eka nkandziyiso wa Xihondzo xo Rindza xa Xinghezi xa April 1, 1963. Hi malembe yo tala u tirhe tanihi nandza wa rhavi, kutani endzhakunyana tanihi xirho xa Komiti ya Rhavi. A a rhandziwa ngopfu hi vamakwerhu ensin’wini ya Manghezi hikwalaho ka ku xixima kakwe lokukulu ni ku tshembeka enhlengeletanwini ya Yehova ni rirhandzu rakwe ra vamakwerhu hinkwavo. Nchumu wun’wana a ku ri rirhandzu rakwe ra vutirheli bya nsimu. Leswi a swi nyamalalanga evuton’wini byakwe hinkwabyo, ku nga khathariseki vutihlamuleri lebyi a a fanele ku byi rhwala. Ku tirha ekusuhi ni vamakwerhu lava tshembekaka ku fana na Pryce swi vule swo tala eka mina, swi tiyisa ku tiyimisela ka mina ku tshama kusuhi ni nhlengeletano ya Yehova ni ku tshama ndzi ri karhi ndzi gingiriteka evutirhelini.

Hi October 29, 1960, ndzi nghenele xinakulobye lexi vangamaka hi laha ku hlawulekeke ni phayona leri chivirikaka ra nkarhi wo leha, murhumiwa wa ntlawa wa vu-11 wa Gilead, loyi enkarhini wolowo a a tirha elreland. Esikwini rero mina na Mildred Willett hi tekanile, naswona ku sukela kwalaho u ve nseketelo lowu tshembekaka eka mina entirhweni wa Bethele.

Loko mana wa Mildred a nga si fa hi 1965, u tsundzuxe n’wana wakwe wa nhwana leswaku a nga ‘vondzokeli Yehova.’ Minkarhi hinkwayo Mildred u tsundzuke marito ya mana wakwe, naswona leswi swi pfune ku n’wi sivela ku va la nga anerisekiki loko hakanyingi ndzi boheke ku tirha ni le ndzhaku ka nkarhi. Leswi swi ndzi pfune swinene ku khathalela swiavelo swihi na swihi swa ntirho lowu engetelekeke leswi ndzi nyikiweke swona hi ntsako. Hinkwerhu ngopfu-ngopfu hi tiphine hi ku avelana mintokoto yo tala leyi vuyerisaka evutirhelini.

Hi xikombiso, mpatswa wun’wana lowuntshwa lowu hi dyondzeke Bibele na wona, wu endle nhluvuko wa xihatla ku fika eyinhleni yo tinyikela ni ku khuvuriwa ivi wu hlanganyela nkarhi na nkarhi evutirhelini. A hi tsake ngopfu! Manuku ke, hi xitshuketa, ku ri hava xivangelo lexi twalaka, va tshike ku hlanganyela. Mina na Mildred hi avelane gome, naswona hi hambetile hi hlamala laha hi hoxiseke kona eku va leteleni ka hina. Hi khongele Yehova nkarhi na nkarhi leswaku a pfula timbilu ta vona leswaku va kombisa rirhandzu ra vona ra ntiyiso. Xana u nga anakanya hi ntsako wa hina loko hi amukele papila leri humaka eka mpatswa lowu kwalomu ndzhaku ka malembe ya khume ri hi byela leswaku a va hlanganyela nakambe hi ku gingiriteka ni leswaku kaya ra vona manuku a ri ri ntsindza wa Dyondzo ya Buku ke?

Nuna wa kona Will u tsarile a ku: “Ndzi tsakela ku mi nkhensa hikwalaho ka mpfuno hinkwawo ni ku khathalela ka rirhandzu loku mi hi nyikeke kona . . . Ku wa ka mina a xi ri xihoxo xa mina, ku tlangela ka mbilu ya mina a ku nga lulamanga . . . hi kume ntsako lowukulu hi ku tlhelela enhlengeletanweni ya Yehova . . . ndzi tele mianakanyo leyinene leswi ndzi mi tsalelaka madyambu lawa, onge Yehova a nga hambeta a mi katekisa hinkwenu entirhweni wa n’wina eka yena.”

Eka papila rin’wana, manana un’wana u hi tsalerile malunghana ni mufana wakwe Mike: “Ndza tsaka swinene leswi tintsumi ti n’wi tshamisiseke etlhelo ka n’wina.” A a vula yini xana? Ina, Mike a a te entsombanweni ni mana wakwe ni ntsongwana yakwe ya jaha, kambe a a nga tsakeli ntiyiso hakunene. Mildred u xiye xifanyetana xi titshamele xoxe ivi a bula na xona. Endzhaku havambirhi ka hina hi rhambe yena ni makwavo wakwe wa mufana leswaku va ta eBethele ya le London va ta vona ntirho lowu hi wu endleke.

Endzhakunyana, Mike u tile, naswona leswi a swi voneke swi kurise ku tsakela kakwe hi laha ku ringaneke leswaku a hambeta a va ni dyondzo ya Bibele. Vuyelo bya kona ke? Sweswi i nkulu ebandlheni, naswona nsati wakwe ni vafana vambirhi hinkwavo va gingiriteka evutirhelini. Nkarhi wun’wana lowu hundzeke nkata Mike u tsarile a ku: “[Mike] hakanyingi u boxe hi ta ku hlangana na n’wina havambirhi . . . ndlela leyi a hlamarisiweke hi vunene ni ku tsakela ka n’wina eka yena ha yona.”

Loko mina ni nsati wa mina hi amukela swiga swa ku tlangela leswi humaka eka un’wana wo fana na Will kumbe Mike loyi hi veke ni lunghelo ro n’wi pfuna, timbilu terhu ta pupuma hi ku tlangela eka Yehova! Mayana tihakelo leti nga hlamuselekiki leti ‘mapapila yo tano lama hanyaka ya xibumabumelo’ ya nga tona—hinkwaswo i xiyenge xa ntsako lowu amukeriwaka hi ku tshama kusuhi ni nhlengeletano ya Yehova.—2 Vakorinto 3:1-3.

Ku Tirha eYindlu-nkulu Ya Misava Hinkwayo

“I tiko hi roxe.” Yoleyo i ndlela leyi muhleri wa nyuziphepha ya le Brooklyn Heights a hlamuseleke ndyangu lowukulu wa Timbhoni leti tlulaka 3 500 leti tshamaka eyindlu-nkulu ya misava hinkwayo ya Timbhoni ta Yehova eBrooklyn, New York, ni le ka Mapurasi ya Watchtower, lama nga kwalomu ka 160 wa tikhilomitara ehenhla ka le New York. Hakunene, vanhu lava totiweke va Yehova i tiko ra moya emahlweni ka Yehova! Namuntlha, mintshungu leyi humaka ematikweni yo tala ya misava ya tihumelerisa ivi yi ku eka lava va tiko leri: “Hi ta ya na ṅwina, hikuv̌a hi twile leŝaku Yehova u na ṅwina.”—Zakaria 8:23; 1 Petro 2:9.

Kutani, xana u nga tlangela ndlela leyi a swi nyanyula ha yona eka mina ni nsati wa mina ku va xiyenge xa nkarhi hinkwawo xa ndyangu lowu wukulu wa Bethele? Ndzi nga vula handle ko ba mariri leswaku malembe ya nhungu yo hetelela ya vutomi bya mina ya ve wona lama hlawulekeke ngopfu eka ntokoto wa mina hinkwawo wa le tilweni. Laha u vona ku tirha ka nhlengeletano leyi vonekaka ya Yehova; laha ku lunghiseleriwa swakudya swa moya ivi endzhaku swi rhumeriwa eswiyengeni swa mune swa misava; laha u vona moya wa Yehova wu tirha ku kongomisa ni ku letela makungu lamakulu lama faneleke ku bohiwa, naswona laha u vona nhulu ya vumbhoni bya ku katekisa ka Yehova ntirho wo chumayela hi Mfumo ni ku endla vadyondzisiwa ku tlula kwihi na kwihi. Mintokoto leyi hinkwayo ya sweswinyana ni swikombiso swi ndzi nyike ku navela loku engetelekeke ka ku tshama kusuhi ni vanhu va Yehova.

Ndzi phindhe mintokoto yi nga ri yingani ya vutomi bya mina. Hambi swi ri tano, yi nga ha ku pfuna ku twisisa mhaka leyi ha yona, loko xihahampfhuka xa mina eku heteleleni xi jitame erivaleni ra Swihahampfhuka ra Aberdeen mixo wolowo wo hisa wa June, ndzi titweke ndzi tlangela Yehova swinene leswi a ndza ha ri xiyenge xa nhlengeletano ya hina ya misava hinkwayo ya vamakwerhu leyi nga ni rirhandzu. Ndzi hete nkarhi wa ku haha ndzi ri karhi ndzi tsundzuka malembe ya mina entiyisweni, naswona leswi swi tlhele swi ndzi tsundzuxa ndlela leyi swi pfunaka ha yona eka hina nkarhi na nkarhi ku ehleketisisa hi mikateko ya hina yo tala evokweni ra Yehova.—Psalma 40:5.

Louie makwerhu wa mina wa xisati u tile a ta ndzi xeweta—a ha tshembeka, a gingiriteka ni ku va ni ripfumelo endzhaku ka malembe lama tlulaka 60 ya ntirho wo tinyiketela eka Yehova. Ndzi tlangele Yehova hikwalaho ka nkateko wolowo wu engetelekeke, hikuva xana muapostola Pawulo a nga vulanga leswaku i ku tshembeka loku Yehova a ku lavaka eka “malandza” yakwe hinkwawo? (1 Vakorinto 4:2) Mawaku xikhutazo lexikulu swonghasi lexi xirho xin’we xa ndyangu xi nga xi nyikaka xin’wana hi ku tshama xi tshembekile!

Muxe u tshama a khongela a ku: “Hi dyonḍise ku hlaya ŝinene masiku ya hina, leŝaku timbilu ta hina ti ṭunḍukela e v̌utlharini.” (Psalma 90:12) Loko mina na Mildred hi ri karhi hi dyuhala, minkarhi hinkwayo hi tlangela xilaveko xo tiseketela hi vutlhari bya Yehova leswaku hi ta tirhisa vutomi bya hina hi ndlela leyi kombisaka rirhandzu ra hina eka yena ni le ka vamakwerhu. Yehova hi rirhandzu u hi komba ndlela yoleyo loko hi tshama kusuhi ni nhlengeletano yakwe.

[Xifaniso lexi nga eka tluka 28]

John Barr (eximatsini xa le mahlweni) kwalomu ka lembe ra 1930, ni makwavo wa xinuna, makwavo wa xisati ni vatswari vakwe

[Xifaniso lexi nga eka tluka 31]

John Barr namuntlha, na Mildred nsati wakwe