Ntirho Wa Le Bethele—Ku Laveka Vatirhi Va Ku Tirhandzela Lava Engetelekeke
1 Hi tsakisiwa hi ku vona ntirho lowukulu lowu Yehovha a wu endlaka emasikwini lawa ya makumu. Pisalema 110:3 yi kombisa leswaku enkarhini lowu mfanelo leyinene ya vanhu va Xikwembu yi ta va ku tiyimisela ka vona ka ku hlanganyela hi ku hiseka entirhweni wa Mfumo. Emisaveni hinkwayo vanhu va Yehovha va tinyiketele ku endla leswaku mahungu lamanene ya Mfumo ma chumayeriwa. Buku leyi nge Vahuweleri, tluka 295, yi ri: “Van’wana va tirha tanihi swirho swa ndyangu wa Bethele wa misava hinkwayo. Lowu i ntlawa wa vatirheli va nkarhi hinkwawo, lava va tinyiketeleke ku endla xin’wana ni xin’wana lexi va nga averiwaka ku xi endla leswaku va lunghiselela ni ku kandziyisa tibuku ta Bibele, va endla ntirho lowu lavekaka wa le hofisi ni mintirho yin’wana ya le tlhelweni leyi lavekaka. Lowu a hi ntirho lowu va kumaka ndhuma ya munhu hi xiyexe kumbe swilo leswi vonakaka. Ku navela ka vona i ku xixima Yehovha, naswona va eneriseka hi malunghiselelo lama va endleriwaka wona hi tlhelo ra swakudya, ndhawu yo tshama, ni malinyana leyi ringaneleke ya ku hakelela swilo swa munhu hi xiyexe.” Loko u tshama u endzela Bethele, swi nga ha endleka se u wu toloverilenyana ntirho lowu endliwaka kona. Hambi swi ri tano, hi navela ku nyikela rungula leri engetelekeke leswaku hi kurisa ku tlangela ka wena hi lunghelo leri leri hlawulekeke ra ntirho, ni ku endla leswaku u xalamukela swilaveko swa Sosayiti.
2 Leswaku hi ta kota ku vona nkoka wa ntirho wa Bethele ni vuyelo bya wona lebyi fuweke, a hi kambisiseni matimunyana ya wona—ya khale ni ya manguva lawa—ya nhlengeletano ya Yehovha. Ku ringana malembe ya 19, Sosayiti ya Watch Tower a yi ri ni ntsindza wa yona emuakweni wa swithezi swa mune le 56-60 Arch Street, Allegheny, ePennsylvania. A wu vitaniwa Bible House. Hambi swi ri tano, hi 1908, ndyangu wa Bible House, kumbe vatirhi va le yindlu-nkulu ya Sosayiti, va andze va va ehenhla ka swirho swa 30. A ku ri nkarhi wa ku ndlandlamuxa. Endzhaku ka ku lava nkongomiso wa Xikwembu, vamakwerhu va fikelele xiboho xa leswaku Brooklyn yi ta va xivandla lexi faneleke xa ntirho. Hikwalaho muako lowu nga le 13-17 Hicks Street eBrooklyn wu xaveriwe ku tirhisiwa tanihi tihofisi ta Sosayiti ni holo. Tihofisi leti ti pfuriwe hi January 31, 1909, kambe a ku nga ri na tindlu ta byetlelo tanihi xiphemu xa muako lowu wa le Hicks Street. Eku sunguleni, ku ehleketiwe leswaku miako ya byetlelo yi fanele ku hirhiwa. Hambi swi ri tano, ku hava miako yo tshama eka yona endhawini ya le Brooklyn Heights leyi a yi ta hirhiwa. Hi laha swilo swi endlekeke ha kona, lexi va hlamariseke ni ku va tsakisa, vamakwerhu va kote ku xava muako wa maribye ya buraweni wa swithezi swa mune “hi mbhukuto” e-124 Columbia Heights, khale ka ndhawu yo tshama ya Henry Ward Beecher. Nakambe, ku kumeke ni muako wa le 126 Columbia Heights. Watch Tower ya March 1, 1909, yi tivise hi ntsako yi ku: “Kaya lerintshwa hi ta ri vitana Bethele,” ri siva xiga xa le Pittsburgh lexi nge “Bible House.” Kutani hi April 1909, Bethele yi sungule ku tirha, naswona ndyangu wu rhurhele ekaya ra wona lerintshwa. Bethele ya le Brooklyn yi ni malembe ya 85 yi ri endhawini leyi.
3 Xana vito Bethele ra yi fanela yindlu-nkulu ya Sosayiti? Xiya masungulo ya le Bibeleni ya vito leri ni leswi ri vulaka swona. Loko hi tlhelela endzhaku emalembeni lama tlulaka 3 700, Genesa ndzima 28 yi rungula ntokoto wa Yakobo, wanuna la nga tekangiki wa malembe ya 77 hi vukhale. Yakobo a a tlangela swilo leswo kwetsima kambe a vengiwa hi makwavo wakwe, Esawu. Hi ku ya hi nkongomiso wa Isaka tata wakwe, Yakobo u balekile a suka eBerexeba a kongoma en’walungwini etikweni ra maxaka ya Abrahama, laha Yakobo a nga kunguhata ku tikumela nsati exikarhi ka vona. Endzhaku ka loko a fambe tikhilomitara ta 100, Yakobo u wisile ni vusiku endhawini leyi vuriwaka Luzi eswitsungeni swa Yudiya. Eka Genesa 28:10-19, hi nga ha hlaya vuxokoxoko lebyi nyanyulaka bya ndlela leyi ha yona Yehovha a nyikeke Yakobo xitiyisekiso lexikulu xa nseketelo wa le henhla. Enorhweni, Yakobo u vone phandze leri dzimiweke emisaveni ri ya fika etilweni. Tintsumi a ti ri karhi ti khandziya ti xika ha rona, naswona Yehovha a a yime ehenhla ka rona. Kutani Yehovha a vulavula, a tiyisa leswaku xitshembiso xa Abrahama malunghana ni mbewu a xi ri karhi xi hundziseriwa eka Yakobo ni leswaku Yehovha a nge n’wi tshiki. Vona ntokoto wo chavisa swonghasi eka Yakobo loyi a ri ni mianakanyo ya moya! Xana swi nga hi hlamarisa leswi leyi yi veke ndhawu yo hlawuleka emahlweni ya yena? Eka yena ndhawu leyi yi ve “yindlu ya Šikwembu,” kumbe Behth-ʼElʹ, hi ririmi ra Xiheveru, Behth swi vula “yindlu” naswona ʼEl swi vula “Xikwembu.”—Gen. 28:19, nhlamuselo ya le hansi, NW.
4 Xisweswo, vito Bethele ri ni xisekelo lexi fuweke xa matimu naswona vito rolero ra yi fanela yindlu-nkulu ya misava hinkwayo ya vanhu va Yehovha. Namuntlha vanhu va Xikwembu va hava milorho leyi huhuteriweke ya Xikwembu. Tintsumi a ti voniwi ti khandziya ti tlhela ti xika hi phandze ti suka eBethele ti ya etilweni. Vamakwerhu a va swi kumi swivono kumbe ku twa rito ra Xikwembu hi ku kongoma. Kambe, loko u xiya hinkwaswo leswi humeleleke eBethele emalembeni lawa ya 85 lama hundzeke, ku sukela enkarhini wa Makwerhu Russell ku fika sweswi, ku hava ku kanakana leswaku voko ra Yehovha a ri ri ni malandza ya yena lama totiweke, xiphemu xa mbewu ya moya ya Abrahama, eBethele. Swiendlakalo swo tala ematin’wini ya Timbhoni ta Yehovha ta manguva lawa swi fambisana kahle na Bethele! Xiya tinhla-nkulu tin’wana:
◼ Hi October 2, 1914, loko a nghena ekamareni ro dyela ra le Bethele ya le Brooklyn, Makwerhu Russell u tivise leswi hi ku kongoma: “Minkarhi ya Vamatiko yi herile; tihosi ta wona ti heleriwe hi nkarhi.”
◼ Eku sunguleni ka va 1920, loko ku tekiwa ndzimana ya siku ni mixo, xirho xa ndzawulo ya vuhleri ya Sosayiti xi tirhise marito lama nge “nhlengeletano ya Xikwembu.” Leswi swi nyanyule mianakanyo ya vona lerova hi 1925 vamakwerhu va kote ku vona leswaku ku ni tinhlengeletano timbirhi leti hambanaka ni leti kanetanaka, ya Yehovha ni ya Sathana.—w85 3/15 tl. 10.
◼ Eka tiawara ta ni mixo siku rin’wana hi 1931, emahlweninyana ka ntsombano eColumbus, Ohio, muungameri wa Sosayiti, Makwerhu Rutherford, u xiye leswaku vito ra Timbhoni ta Yehovha entiyisweni ri hlamusela vanhu va Xikwembu ni ntirho lowu a va ri eku wu endleni ni leswaku va fanele ku tiviwa tanihi timbhoni ta Yena.—yb75 tl. 151.
◼ Eku sunguleni ka 1935, ku tlakusiwe swivutiso swa leswaku i vamani va “ntshungu lowukulu,” kumbe “vunyingi lebyikulu.” (Nhlav. 7:9; KJ) Van’wana exikarhi ka lava va tihlamuseleke enkarhini wolowo va ringanyete leswaku i va ntlawa wa laha misaveni. Hi May 31, 1935, entsombanweni wa le Washington, D.C., ku nyikeriwe nhlamuselo leyi enerisaka.—jv-TS tl. 166.
5 Swikombiso leswi swi nga ri swingani swi kombisa ndlela leyi ha yona Yehovha, hi ku tirhisa moya wa yena lowo kwetsima, a kongomiseke ni ku seketela malandza ya yena layo tshembeka lama totiweke eBethele. Ku vuriwa yini hi tintsumi? Loko u xiya nkaneto wa tihanyi lowu humaka eka valala va hina ni malembe yo nonon’hwa lawa rifuwo-pfuneta a ri kala, ku hava ku kanakana leswaku handle ka nsirhelelo ni mpfuno wa tintsumi, Bethele a yi ta va yi nga yanga emahlweni hi ndlela leyi leyi hlamarisaka emalembeni lawa hinkwawo.
6 Handle ka vatirhi va le yindlu-nkulu eUnited States, ku ni mindyangu ya Bethele emarhavini ya 100 lama kumekaka emisaveni hinkwayo. Buku leyi nge Ku Hleleriwa Ku Hetisisa Vutirheli Bya Hina, tluka 116, yi ri: “Vito Bethele . . . hakunene ri lulamele swivandla leswi swa ntirho wa le tilweni.” Xana i ntirho wa muxaka muni lowu vatirhi va ku tirhandzela va le Bethele va averiweke wona?
7 Mintirho Yo Hambana-hambana: Swiavelo swa mintirho leswi nyikiwaka swirho swa ndyangu wa le Bethele swi hambanile. Erhavini ra le Afrika Dzonga, vamakwerhu van’wana va tirha efektri va tirhisa michini yo kandziyisa timagazini, tibroxara ni swiphephana leswaku swi ta hangalasiwa emisaveni hinkwayo. Ntirho wa van’wana i ku rhumela tibuku leti emavandlheni yo tlula 1 400. Van’wana va vona va averiwe ku lunghisa switirho ni miako. Ekaya ra Bethele ntirho wo tala wu katsa ku hlayisa ndyangu. Hi xikombiso, eBethele, ku nga si hela timinete ta 20 xifihlulo xi phameriwa vanhu va kwalomu ka 760 etikamareni timbirhi to dyela. Endhawini yo hlantswela swiambalo, vamakwerhu va xinuna ni va xisati va hlantswa tikhilogiramu ta 3 200 ta swiambalo vhiki rin’wana ni rin’wana, kun’we ni tihembe ta 2 300. Ku engetela kwalaho, vabasisi va yindlu va hlayisa mpimanyeto lowu tlakukeke wa ku basa emiakweni yo tshama eka yona ya nhungu ni ku khathalela mintirho yin’wana yo tala ya nkoka.
8 Timfanelo Ni Swilaveko: Hikwalaho ka rihanyo lerinene ni matimba ya miri lama lavekaka entirhweni lowu lowo tala, sweswi ku laveka vantshwa lava hanyeke kahle ni lava titshameleke voxe. Leswaku a endla xikombelo xa ntirho wa le Bethele, muntshwa u fanele ku va a tinyiketerile naswona a ri ni lembe rin’we kumbe ku tlula a khuvuriwile. U fanele ku va munhu la tinyiketeleke, munhu wa moya. Nakambe, u fanele ku tiyimisela ku endla ntirho lowo tika. Emisaveni ya namuntlha, vanhu vo tala va languta ntirho wo tika wu ri lowu faneriwaka hi ku papalatiwa. Hikwalaho muntshwa loyi a endlaka xikombelo xa ntirho wa le Bethele u fanele ku ambala munhu lontshwa lerova a tiyimisela ku endla ntirho wo tika, a endla hi mavoko ya yena leswi nga ntirho lowunene. (Ringanisa Vaefesa 4:28.) Leswi swi vula leswaku a nga fanelanga a va munhu loyi mianakanyo ya yena yi hlongorisaka ku titsakisa, mintlango kumbe ku tihungasa. Loko a anakanya hi ntirho wa le Bethele, u fanele a yi tshikile mikhuva yo tano ya vuntshwa. Marito ya Pawulo lama nga eka 1 Vakorinto 13:11 ma tirha kahle: “Loko ndza ha ri xihlangi, a ndzi vulavula tanihi xihlangi, ndzi ehleketa tanihi xihlangi, ndzi pimanisa tanihi xihlangi; kambe sweswi ndzi nga hundzuka wanuna, ndzi tshikile swa vuhlangi.”
9 Xana u le xikarhi ka malembe ya 19 na 35? Xana u ni rihanyo lerinene, emirini ni le mintlhavekweni? Xana u nga hlaya, u tsala ni ku vulavula Xinghezi kahle? Xana u munhu wa moya loyi a nga ni rirhandzu lerikulu hi Yehovha ni nhlengeletano ya yena? Loko u vitaniwa eBethele, xana u nga tshama u tshembekile entirhweni wolowo ku ringana lembe, u tirha ntirho wihi na wihi lowu u nyikiwaka wona? Loko u hlamula u ku ina eka swivutiso leswi, u ta va u endla kahle loko u anakanyisisa hi lunghelo lero hlawuleka ra ntirho wa le Bethele. Mikateko yi tele.
10 Mikateko Ya Ntirho Wa Le Bethele: Xihloko lexi nge “Ku Hlalela ‘Yindlu Ya Xikwembu’ Hi Ku Tlangela,” eka Xihondzo xo Rindza xa June 15, 1994, xi te: “Loko u ri enhlengeletanweni, xana u titwa u eneriseka, loko u rhendzeriwe hi vagandzeri lava tsakeke va Yehovha? Anakanya ha swona, mutirhi wa le Bethele u ni lunghelo ro tirhela Yehovha exikarhi ka ntlawa wa vamakwerhu siku na siku! (Pisalema 26:12) Sweswo swi tisa ntshembo lowukulu wa ku kula hi tlhelo ra moya! Makwerhu un’wana u vule leswaku u dyondze swo tala leswi n’wi pfuneke leswaku a antswisa vumunhu byakwe hi lembe rin’we ntsena eBethele ku tlula leswi a swi endleke hi malembe manharhu a ri kun’wana. Ha yini? Hikuva ku hava kun’wana laha a kumeke lunghelo ra ku vona ni ku tekelela ripfumelo ra Vakreste vo tala lava vupfeke.” (Swiv. 13:20) Hakunene, leyi hi yin’wana ya mikateko yo hlawuleka ya ntirho wa le Bethele.
11 EBethele ya le Brooklyn, vatirhi va ku tirhandzela va tsakela xinghana lexikulu ni swirho swa Huvo leyi Fumaka ni van’wana lava totiweke, kun’we ni vamakwerhu vo tshembeka va ntlawa wa tinyimpfu letin’wana lava nga ni nkarhi wo leha va ri entirhweni. Ku nga khathariseki leswaku i xiavelo xihi lexi munhu a nga na xona, i nkateko ku tirha hi vun’we ni vanghana vo tano lava tshembekaka. Hi leti tinhlamuselo tin’wana ta swirho swa Bethele ya le Brooklyn leti kombisaka ndlela leyi va titwaka ha yona lava nga ni xiphemu eka lunghelo leri ra risima ra ntirho:
◼ Makwerhu loyi a nga ni malembe ya 62 a ri entirhweni wa le Bethele, loyi a tirheke eswiavelweni swo hambana-hambana emalembeni yo tala, u hlamusela moya lowu nga kona eBethele: “Hinkwerhu hi ndyangu wun’we; hinkwerhu hi vamakwerhu. Hi tirha swin’we. Hinkwerhu ka hina hi ni swiavelo swa hina. Swa tsakisa ku vona vamakwerhu va tirha hi matimba; u kota ku vona ku hiseka loku va nga na kona. Hi ni vamakwerhu lava kukulaka rivala. Loko u hlayisa ndhawu yi basile, u sirhelela rihanyo ra ndyangu. Loko u sirhelela rihanyo ra ndyangu, ndyangu wu endla ntirho lowukulu. I swa nkoka. I swa nkoka leswaku hi va ni vanhu entirhweni wa le hofisini. Hinkwerhu ka hina hi humesa vuyelo—vumbhoni bya Mfumo emisaveni hinkwayo. Leyi i ndhawu leyinene emisaveni yo endla ntirho-vutomi wo tirhela Yehovha. Loko u lava ku va entirhweni wa nkarhi hinkwawo, u nga wu endla kahle laha. Swilo hinkwaswo leswi u swi lavaka swa kumeka. Hi tiphina hi swilo swo tala laha. Swi ku endla u vona nhlengeletano hikuva u twa mahungu ya le tinhleni hinkwato ta misava.”
◼ Makwerhu un’wana la totiweke loyi a nga ni malembe ya 75 hi vukhale, loyi xiavelo xakwe xo sungula xa ntirho a xi ri ku namaketa tibuku malembe ya 48 lama hundzeke, u te: “I ntokoto lowunene ku hanya exikarhi ka malandza lama tinyiketeleke, lama khuvuriweke ya Yehovha. Loko ndzi vona jaha ri ta eBethele, mbilu ya mina yi tala hi ku nkhensa Yehovha hikuva ndza swi tiva leswaku jaha leri ri ta va ni vutomi lebyi tsakeke laha Bethele.” Malunghana ni swilo leswi a swi tsakelaka eBethele, u engetele a ku: “Ndzi rhandza vanhu va kona. Ndzi vona va sasekile. Ku ni swin’wana eka vamakwerhu lava nga ni malembe yo tala va ri eBethele leswi u nga ta ka u nga swi kumi kwihi na kwihi emisaveni. Ku ni rirhandzu, ku twisisa ni vun’we lebyi ndzi nga si tshamaka ndzi byi vona.”
◼ Makwerhu un’wana loyi a nga ni malembe yo tlula 62 a ri entirhweni wa le Bethele u hlamusele mimbuyelo leyi engetelekeke leyi kumekaka: “Ku ya eBethele swi ku pfuna leswaku u kuma dyondzo leyo hlawuleka swinene entirhweni wa ku kandziyisa . . . ku tlula kwalaho, u kuma dyondzo ya Bibele leyi ku hlomiselaka ku va muyimeri wa Yehovha Xikwembu kwihi na kwihi emisaveni laha u rhumiwaka kona.”
◼ Xirho xa Huvo leyi Fumaka, loyi sweswi a nga ni malembe ya 92 hi vukhale, u tirhe eBethele ku ringana malembe ya 58. Xana u ehleketa yini hi ntirho wa le Bethele? “Ndyangu wa Bethele lowu nga laha ni le misaveni hinkwayo i lunghiselelo ro hlamarisa ra vanhu lava tinyiketeleke.”
◼ Tin’hweti ti nga ri tingani emahlweni ka ku va xirho xa Huvo leyi Fumaka xi fa xi tshembekile exiavelweni xa xona xi ri na malembe ya 98 hi vukhale, xi tiphofule hi ndlela leyi: “Ndzi rhandza ku tirha eBethele. Hi yona ndhawu leyinene ehansi ka dyambu.”
◼ Xana hi rihi langutelo ra jaha hi ntirho wa le Bethele? Makwerhu un’wana lontshwa wa ha ku tsala a ku: “Tanihi leswi, hi ku vula ka Yesu ‘ku nyika swi tisaka ntsako lowukulu,’ Bethele i ndhawu ya ntsako lowukulu eka leti ndzi tshameke ndzi va eka tona.” U kume moya wa le Bethele—ku nyika.
◼ Makwerhu loyi a nga ni malembe ya 51 ya ntirho wa nkarhi hinkwawo u vule marito lama landzelaka hi ndlela leyinene: “Ntirho wa le Bethele wu hlawulekile hakunene. I xiphemu xa nkoka eku hetisekeni ka swikongomelo swa Yehovha laha misaveni. Hikwalaho un’wana ni un’wana loyi a nga ni lunghelo ro tirha eBethele u fanele ku ri languta ri ri ra nkoka swinene. Hakunene, Bethele yi hi pfuna ku byi kombisa kahle vutomi bya ku tinyiketela eka Xikwembu.”
12 Vutomi Bya Siku Na Siku: Vutomi bya siku na siku bya xirho xa ndyangu wa Bethele i bya ntirho wa Mfumo ntsena. Hi 7:00 ni mixo hi Musumbhunuku ku ya fika hi Muqgivela, ku tekiwa ndzimana ya siku etikamareni ta hina to dyela. Ku va ni tinhlamuselo ta ndzimana ya siku leti nyikeriwaka hi swirho swa ndyangu kutani ku va ni nkatsakanyo hi xirho xa Komiti ya Rhavi kumbe makwerhu un’wana loyi a nga ni malembe yo tala ya ntirho wa nkarhi hinkwawo, ivi ku landzela xikhongelo xa ni mixo. Nongonoko lowu wu tiyisa ndyangu emoyeni leswaku wu lunghekela ntirho wa siku. Swirho swa ndyangu wa Bethele swi vula leswaku leyi i yinhla-nkulu ya siku. Endzhaku ka xifihlulo xo xawula, swirho swa ndyangu wa Bethele swi tiyimisela ku ya eswiavelweni swa swona swa mintirho yo hambana-hambana. Siku ra ntirho hi Musumbhunuku ku ya fika Ravuntlhanu ri sungula hi 8:00 ni mixo ku ya fika hi 5:00 ni ndzhenga, kasi awara yin’we yi vekeriwa swakudya swa ni nhlikanhi. Nakambe ntirho wu sungula hi 8:00 ni mixo ku ya fika 12:00 ni nhlikanhi hi Mugqivela. Ni madyambu, hi Mugqivela ni ndzhenga, ni hi Tisonto, vatirhi va le Bethele va ya eminhlanganweni ya vona ya vandlha, va hlanganyela entirhweni wa yindlu ni yindlu kumbe wo fambisa dyondzo ya Bibele, kumbe va khathalela swintirhwana swa vona. Va nga ha tirhisa layiburari ya le Bethele leswaku va va ni dyondzo ya munhu hi xiyexe kumbe ku lunghiselela minhlangano. Ina, nkarhi wo wisa ni ku tihungasa wu kona. (Mar. 6:31, 34) Eka nhlamuselo leyi leyo koma, swi nga vonaka hi ku olova leswaku ntirho wa le Bethele wu pfuna munhu leswaku a tirhisa nkarhi wa yena wo tala siku rin’wana ni rin’wana entirhweni lowo kwetsima, a hambana ni swihinga swa mafambiselo lawa ya khale ya swilo.
13 Mintirho Ya Le Vandlheni: Swirho swa ndyangu wa Bethele ya Afrika Dzonga swi averiwe emavandlheni lama tlulaka 60 endhawini ya le Joni. Va swi languta swi ri swa nkoka ku hlanganyela ni vandlha ra le ndhawini ya ka vona leswaku va hlayisa vumoya bya vona. Xisweswo, va gingiriteka ni vandlha ra ka vona, va hlanganyela minhlangano ya ntlhanu ni ku hlanganyela evutirhelini bya nsimu ni vamakwavo. Ku tlhandlekela eka minhlangano ya vandlha, ndyangu wa Bethele wu ni Dyondzo ya wona ya Xihondzo xo Rindza hi Musumbhunuku ni madyambu; vakulu ni malandza ya vutirheli va averiwa ku hlamula leswaku ku pfuneka hinkwavo. Tanihi leswi xiyimiso xa Bethele xi kandziyisaka swilo swa moya, xi nyika vutomi lebyi tsakisaka ni ku tiphina entirhweni wa Yehovha.—1 Kor. 15:58.
14 Ku Tilulamisela Ntirho Wa Le Bethele: Hakanyingi vantshwa va vutisa leswi va nga swi endlaka leswaku va tilulamisela ntirho wa le Bethele. Xirho xa Huvo leyi Fumaka lexi tirhaka eka Komiti ya Vatirhi xi te: “Loko u ta eBethele, tela ku ta tirhela, ku nga ri ku tirheriwa. Loko u dyondza ku tirhela, ni ntsako wa wena wu ta va lowukulu. Dyondza ku nyika ku nga ri ku amukela. Ringanisela, u titsongahata. Mihandzu ya moya—hi yona leyi Vukreste bya ntiyiso byi titshegeke ha yona.” Ina, ku kurisa vumoya bya wena ni vuxaka lebyikulu na Yehovha i swilotlelo swa ku humelela eBethele. Hi yona mhaka leyi maphayona ma talaka ku hlawuriwa loko vatirhi va ku tirhandzela lavantshwa va vitaniwa eBethele. Loko munhu a tinyiketele ku tirha nkarhi wo tlula tiawara ta 90 hi n’hweti a ri karhi a chumayela ni ku dyondzisa van’wana, ni ku endla ntirho lowu faneleke leswaku a tihanyisa, u va a tiakele masungulo lamanene ya moya ya ntirho wa le Bethele ni ndlela ya wona ya vutomi leyi hlelekeke. Hambi swi ri tano, xiya leswaku ntirho wa le Bethele a wu lulamelanga lava phayonaka ntsena. Un’wana ni un’wana loyi a fikelelaka swilaveko swa xisekelo a nga endla xikombelo.
15 Ku tlhandlekela kwalaho, i swinene eka vantshwa leswaku va dyondza ndlela yo tirha hi mavoko ya vona. Ntirho wa mavoko a wu tsakeriwi emafambiselweni lawa ya khale ya swilo. Ku tirhandza swi susumetela vanhu vo tala leswaku va lava ntirho lowu nga tikiki kumbe lowu tisaka ndhuma. Kambe, ku tiva ndlela yo tirhisa switirho swo hambana-hambana i swa nkoka naswona swa pfuna. (Swiv. 22:29) Hakanyingi, vantshwa va nga dyondza mintirho ya mavoko eka vatswari va vona kumbe hi ku pfuna vakulukumba lava nga ni ntokoto emintirhweni yo hambana-hambana ya le Holweni ya Mfumo kumbe hi ku pfuna vadyuhari ku lunghisa leswi faneleke emakaya ya vona.
16 Minkarhi yin’wana vantshwa va vutisa: “Xana ndzi fanele ku kuma vuleteri lebyi engetelekeke bya tiko leswaku ndzi ta kota ku fanelekela ntirho wa le Bethele?” Vuleteri bya tiko, hi byoxe a byi endli munhu a faneleka ntirho wa le Bethele. Timfanelo ta moya i ta nkoka swinene naswona ta laveka eka hinkwavo lava vitaniwaka. Hi khutaza vatswari ni vana va vona lava ha riki exikolweni leswaku va xiyisisa langutelo leri ringaniseriweke ra dyondzo ya tiko hi laha swi kombisiweke ha kona eka Xihondzo xo Rindza xa November 1, 1992, matluka 15 ku ya eka 21. Xiboho xo nghenela dyondzo ya tiko i mhaka ya munhu hi xiyexe. Eka xihi na xihi lexi munhu a xi kunguhataka, u fanele ku tiyiseka leswaku u kota ku hlayisa nhluvuko wa yena wa moya hi ku hambeta a languta ntirho wa nkoka wa vanhu va Yehovha, wa ku veka vumbhoni ehenhla ka ntiyiso.
17 Ku nga khathariseki leswaku munhu u kuma vuleteri bya muxaka muni, lexi nga xa nkoka swinene i ndlela yo dyondza ku ehleketa. Bibele yi bumabumela vuswikoti byo anakanya ni vutlharhi lebyi tirhaka. (Swiv. 1:4; 3:21) Ku dyondza ndlela yo ehleketa ni ku va ni xifuva swi ku endla leswaku u kuma vutivi ni vutshila leswi nga ta pfuna wena ni nhlengeletano ya Yehovha ya misava hinkwayo. Xo hetelela, ku nga khathariseki leswaku munhu u ni vutshila byihi, i swa nkoka swinene ku hanyisana ni van’wana. Vatirhi va ku tirhandzela va le Bethele va fanele ku tirhisana tanihi ntlawa leswaku va ta hetisisa ntirho. Xisweswo, moya wa ku tifuma ni wa mphikizano wu fanele ku siviwa hi mboyamelo wa ntirhisano ni wa rirhandzu ni ku tiyimisela ku titsongahatela nkongomiso wa le tilweni.—Ringanisa Vaefesa 4:16.
18 Vantshwa lava nga enhlengeletanweni ya Yehovha va ni lunghelo lero hlamarisa ro tirhela ku antswisa vuswikoti lebyi boxiweke laha henhla. Kutani, loko va rhamberiwe ku ta tirha eBethele, va ta va exiyin’weni lexinene xo leteriwa hi nhlengeletano ya Yehovha leswaku va byarha vutihlamuleri lebyi engetelekeke. Hi khutaza n’wina vatswari va Vakreste ni vakulu leswaku mi hambeta mi kombisana ni vantshwa hi mhaka leyi. Vatswari vo tala va tisa vana va vona leswaku va ta vona Bethele nkarhi na nkarhi, xisweswo va va toloveta leswi endliwaka laha. Leswi swi endle vo tala leswaku va ta eBethele endzhaku ka loko va hetile tidyondzo ta vona.
19 Vanhu Lava Nga Ni Ntokoto: Minkarhi yin’wana ku ni ndhawu ya makwerhu wa xinuna kumbe wa xisati loyi a nga ni malembe lama tlulaka 35 loyi a nga ni vuleteri ni vutshila lebyi lavekaka laha Bethele. Ntirho wo tala lowu Sosayiti yi wu endlaka sweswi wu lava vanhu lava nga ni ntokoto lava nga ta tirha swin’we ni majaha lama tiyeke, lama nga ni matimba lama nga leteriwaka, “v̌adyonḍisi ni v̌adyonḍisiwa.”—1 Tikr. 25:8.
20 Ntirho wo tala wa namuntlha wu lava lava nga ni vutivi bya michini kumbe lava nga ni ntokoto wa ku tirhisa khompyuta. Entiyisweni Sosayiti yi ni michini yo tala yo kopa, yo kandziyisa rungula ra khompyuta ni tikhompyuta, leswi hinkwaswo ka swona swi lavaka ku lunghisiwa. Nakambe, ku ni xilaveko etimhakeni ta nawu ni ta vutshunguri: magqweta, madokodela, vutshunguri bya vutiolori, vaongori lava swi thwaseleke ni lava nga swi thwaselangiki. Lava nga ni vutshila emintirhweni yo hambana-hambana yo aka, yo tanihi vunjhiniyara, vuplambara, gezi ni HVAC (heating, ventilation, and air-condition), va nga pfuna. Vamakwerhu lava vupfeke lava nga ni vutivi lebyi enteke malunghana ni tinkota, ngopfu-ngopfu lava swi thwaseleke va nga pfuna swinene. Leswaku yi ta kota ku hunguta nxavo, Sosayiti yi ni nhlayo ya timovha leti tirhiseriwaka ku rhumela swilo. Hikwalaho ku laveka vachayeri lava nga ni ntokoto ni valunghisi va timovha.
21 Xilaveko xa hina lexikulu i xa vamakwerhu va xinuna lava titshameleke voxe ni lava nga ni vutshila byo hlawuleka, van’wana va vona va nga ha va va tekile. Mi nga ha kuma fomo yo endla xikombelo xo ta eBethele eka mulanguteri wa n’wina wa xifundzha kumbe entsombanweni wa muganga enhlengeletanweni yo hlawuleka ya lava tsakelaka ntirho wa le Bethele, kumbe mi tsalela eka Watch Tower Society, Attention: Bethel Office, Private Bag X2067, Krugersdorp, 1740. Loko u tekile, tsundzuka leswaku munghana wa wena u fanele ku va munhu la hanyeke kahle emoyeni, emintlhavekweni ni le mirini ni ku fanelekela ntirho wa le Bethele. Loko u kume vuleteri naswona u ri ni ntokoto emintirhweni leyi boxiweke laha henhla, hi kombela u tsala vuxokoxoko bya ntirho lowu u wu tivaka ivi u namarheta phepha ra kona eka fomo ya wena ya le Bethele.
22 Xana U Nga Hlamula Xirhambo Xa Xihatla? Ku ni xilaveko lexikulu xa vatirhi va ku tirhandzela va le Bethele. Loko u fanelekela swilaveko swa ntirho wa le Bethele, hi ku khutaza hi matimba leswaku u endla xikombelo xa ntirho wa le Bethele hi ku hlamula xirhambo lexi xa xihatla. U nga heli matimba loko u nga vitaniwi hi nkarhi wolowo. U nga pfuxeta xikombelo xa wena lembe na lembe. Leswi swi ta endla leswaku hi va ni vutivi malunghana ni xiyimo xa wena xa sweswinyana.
23 Etindleveni ta muprofeta Esaya, Yehovha u vutisile: “Nḍi ta ruma mani, i mani l’a nga ta famba e maṭhaṅweni ya hina?” Handle ko ba mariri Esaya u hlamule a ku: “Hi mina loyi, nḍi rume.” Xisweswo Esaya u sungule ntirho-vutomi lowu xiyekaka tanihi muprofeta wa Xikwembu. Xana u nga vula u ku, “Hi mina loyi, nḍi rume”? U ta kuma mikateko yo tala loko u rhamberiwa ku ta tirha ‘eNdlwini ya Xikwembu,’ eBethele.—Esa. 6:8.