Ku Hlalela ‘Yindlu Ya Xikwembu’ Hi Ku Tlangela
“NḌI komberile šilo šiṅwe ka Yehova, nḍa ha ši nav̌ela ngopfu: Hi leŝaku nḍi ṭhama e ndlwini ya Yehova hi masiku hikwawo ya ku hanya ka mina. Nḍi ta hlalela ku kwetsima ka Yehova, nḍi v̌a nḍi kambisisa tempele ya yena.”—Pisalema 27:4.
Hosi Davhida la tlangelaka a a tsakela kumbe ku rhandza tempele ya Yehovha. Xana u titwa hi laha ku fanaka malunghana ni tindhawu ta vugandzeri bya ntiyiso namuntlha? Makaya ya Bethele lama tlulaka 95 emarhavini ya Sosayiti ya Watch Tower ma le xikarhi ka miako leyi nga ya vugandzeri bya Yehovha enkarhini wa hina.
“Loko ndzi languta endzhaku eka malembe yo tala ya ntirho wa mina wa le Bethele ndzi titwa ndzi ri ni ntsako ni ku tlangela lokukulu, loku engetelekeke lembe na lembe,” ku hlamusela Helga loyi a sunguleke ntirho erhavini ra le Jarimani hi 1948. Helga i un’wana wa vatirhi va 13 828 lava tsakeke va le Bethele emisaveni hinkwayo, lava ‘voneke ku kwetsima ka Yehovha’ hi lembe ra ntirho ra 1993. Kahle-kahle vito ra Bethele ri vula yini xana? Xana un’wana ni un’wana wa Timbhoni ta Yehovha, hambi u tirhela Xikwembu eBethele kumbe ehandle a nga ri tlangerisa ku yini lunghiselelo leri?
Vito Leri Lavaka Ku Tinyiketela
“Bethele” i vito leri fanelaka hakunene, tanihi leswi vito ra Xiheveru Behth-ʼElʹ ri vulaka “Yindlu ya Šikwembu.” (Genesa 28:19) Ina, Bethele swi vula yindlu leyi akiweke kahle, kumbe ‘yindlu leyi akiweke hi vutlharhi,’ leyi tlakusaka Xikwembu ni ku rhandza ka xona. (Swivuriso 24:3) “Swi fana ni loko u tshama ni ndyangu wa ka n’wina. Hi ni lunghiselelo ra siku na siku leri hleriweke kahle,” ku vula Herta a tsakile. U ni malembe yo tlula 45 a ri karhi a tirha eBethele yin’we na Helga. Xirho xin’wana ni xin’wana xa ndyangu lowu lowukulu xi ni ntirho wa xona ni ndhawu ya xona, leswi endlaka leswaku xi tshama xi tsakile ni ku sirheleleka. Hi ku pfumelelana ni vito ra Bethele, ku ni malunghiselelo ni nhleleko lowunene eka ndzawulo yin’wana ni yin’wana. Leswi swi kondletela ku rhula ni ku endla ku chumayeriwa ka mahungu lamanene loku humelelaka ku koteka, ni ku nyika mavandlha xivangelo xo twala xo languta “Yindlu ya Šikwembu” hi ku xixima swinene.—1 Vakorinto 14:33, 40.
Ha yini miako yo tano yi ri ya nkoka? Hi xikombiso, magazini lowu wu humesiwe evugandliselweni bya le Bethele. Ku chumayeriwa ka rungula ra Mfumo ni ku hangalasiwa ka swakudya swa moya, leswi hinkwaswo ka swona swi vhumbhiweke hi Yesu Kreste, swi endla malunghiselelo ya nhlengeletano tanihi ya Bethele ma va ya nkoka—ma seketeriwa hi vatirhi va ku tirhandzela ni ku tlangeriwa swinene hi vagandzeri hinkwavo va Yehovha.—Matewu 24:14, 45.
Xana u rhandza ku tiva swo tala malunghana ni lunghiselelo ra ntirho wa siku na siku laha? Laha ku tshamaka Helga na Herta, ku ba bele leyi nga ni vuyimbeleri emiakweni hinkwayo yo tshama eka yona hi 6:30 ni mixo, hambi leswi vatirhi va nkarhi hinkwawo vo tala eka lava 800 va pfukaka emahlweni ka kwalaho leswaku va tilulamisela ntirho wa siku. Hi 7:00 ni mixo ku sukela hi Musumbunuku ku ya fika hi Mugqivela, ndyangu wu hlengeletana etiholweni to dyela eka tona leswaku wu yingisela ndzimana ya siku, kumbe vugandzeri bya ni mixo. Ivi ku landzela swakudya swo fihlula leswi fuweke. Siku rin’wana ni rin’wana ra ntirho ri sungula hi 8:00 ni mixo, ivi ri heta tiawara ta nhungu, ri kavanyetiwa hi nkarhi wa swakudya swa ni nhlikanhi ntsena. (Hi ntolovelo ndyangu wu tirha hafu ya siku hi Mugqivela.) Hambi u tirha ekhixini, evugandliselweni, evuhlantswelweni, etihofisini, etindhwini to tirhela eka tona, laha ku hlanganisiwaka kona tibuku, kumbe eka ndzawulo yihi na yihi ku ni swo tala swo swi endla.
Ni madyambu ni hi mahelo-vhiki, swirho swa ndyangu swi hlanganyela ni mavandlha ya kwalaho eminhlanganweni ni le ku chumayeleni ka le rivaleni. Vamakwerhu vo tala va xinuna va le Bethele i vakulu kumbe malandza ya vutirheli emavandlheni lawa. Entiyisweni, Timbhoni ta kwalaho ti tlangela ntirhisano lowu, loko mintlawa hinkwayo yi tirha swin’we hi ntwanano tanihi miri wun’we, yi kombisana xichavo ni ku twisisana. (Vakolosa 2:19) Mutirhi un’wana ni un’wana wa le Bethele wa swi tiva leswaku xiavelo xakwe ‘eNdlwini ya Xikwembu’ xi rhangela mintirho leyin’wana hinkwayo. Hambi swi ri tano, ku gingiriteka eku chumayeleni, ni ku tirhisana ni vandlha, swin’we ni langutelo lerinene, swi tiyisa mutirhi wa le Bethele emoyeni, swi engetela ntsako wakwe, ni ku endla leswaku a va xirho lexi nga mpfuno lowukulu endyangwini. Mawaku ndlela leyi timfanelo leti ti nga ta nkoka ha yona loko u tirha ‘endlwini’ leyi vito ra yona ri fambelanaka ni ku tinyiketela hi moya-xiviri hinkwawo!
Ku Endla Ntirho Wa Le Bethele Wu Humelela
I yini lexi pfuneke Timbhoni ta Yehovha ta ntsandza-vahlayi leswaku ti endla ntirho wa le Bethele wu humelela? Swirho swa ndyangu wa Bethele le Furwa leswi nga ni malembe yo tala entirhweni wa le Bethele swi hlamusela hi ndlela leyi landzelaka: “Ku rhandza Yehovha. Ku tiyimisela ku tiyisela kwihi na kwihi laha a hi vekaka kona; ku titsongahata ni ku yingisa nkongomiso lowu Sosayiti yi hi nyikaka wona.” (Denise) “Ndzi xiye ndlela leyi swi nga swa nkoka ha yona ku xixima nsinya wa nawu lowu boxiweke hi Pawulo eka Varhoma 12:10 lowu nge: ‘Mi tlula van’wana hi ku kombana xichavo.’ Tsalwa leri ri hi komba nkoka wa ku ka hi nga sindzisi leswaku langutelo ra hina ri amukeriwa, kambe ematshan’wini ya sweswo, hi xiya langutelo ra van’wana. Hi marito man’wana, hi tshika ku tikurisa.” (Jean-Jacques) Barbara u ri: “Ku xixima ka hina ntirho wa le Bethele ku nga onhiwa loko hi languta swilo hi langutelo ra nyama ra vanhu, hikuva leswi swi nga hi endla hi rivala leswaku Yehovha u kongomisa nhlengeletano yakwe. Xichavo xo tano xi nga nyamalala loko hi khunguvanyisiwa hi ku nga hetiseki ka van’wana.”
Un’wana ni un’wana eBethele a nga hetisekanga, kutani vunghana byi lava ku endliwa hi vukheta. Lavantshwa, kumbe lava ha ku fikaka va endla kahle loko va nga endli vunghana ni tintangha ta vona ntsena. Lava nga ha vaka ni mboyamelo wo sola kumbe ku anakanya hi ndlela leyi hoxeke a hi vanghana lavanene eBethele kumbe evandlheni. Hi tlhelo lerin’wana, ku tekelela “vutlhari byo ta hi le henhla,” lebyi hlamuseriweke eka Yakobo 3:17, swi tisa mikateko. Lebyi “byi ni ku rhula, ni ku olova, ni ku yingisela, byi tele musa ni mihandzu leyinene; kambe ngopfu-ngopfu byi tengile; a byi yi hi nghohe, kumbe ku kanganyisa.” Timfanelo to tano, kun’we ni ku lehisa mbilu ni tintswalo, ta xiyiwa ‘eNdlwini ya Xikwembu,’ swi endla leswaku munhu a tshama a tsakile ni ku phyuphya. Hambi ku ri vaendzi lava nga riki Timbhoni va hlamala mahanyelo lamanene, xinghana ni moya lowunene wa vatirhi.
Anny, loyi a nga ni malembe yo tlula 70 hi vukhale, naswona a ri xirho xa ndyangu wa Bethele le Jarimani, ku sukela hi 1956, u hlamusela ndlela leyi a tiyimiselaka ha yona ku tirha: “Leswaku vumoya bya mina byi tshama byi hlayisekile, ndzi endla matshalatshala lamakulu yo fambisana ni tibuku ta Sosayiti, ku va kona eminhlanganweni nkarhi na nkarhi, ni ku hlanganyela hi xitalo eku chumayeleni. Nakambe ndzi ringeta ku hlayisa rihanyo ra mina ra miri hi ku endla vutiolori mixo wun’wana ni wun’wana, ni ku papalata ku tirhisa khexe minkarhi yo tala, ndzi titoloveta ku famba hi milenge hi laha swi kotekaka ha kona ngopfu-ngopfu entirhweni wa nsimu.”
Vo tala lava nga ni ntokoto wa vutomi bya le Bethele va ta pfumelelana na yena Anny. A va tshiki ku dyondza, hambi ku ri ku tirha. Rihanyo ra miri ri lava leswaku va etlela nkarhi lowu eneleke ni ku endla vutiolori kun’we ni ku dya ni ku nwa hi ku pima. Xa nkoka ngopfu, a va xi honisi xikhongelo xa munhu hi xiyexe ni dyondzo ya Bibele.
Ku Tlangela Swinene Ntirho Wo Kwetsima Wa Le Bethele
“Xana u tirha kwihi ke?” i xivutiso lexi talaka ku vutisiwa swirho swa Bethele. Swiavelo swa mintirho swi hambanile, kambe hinkwaswo swi lava ku tekiwa swi ri swa nkoka hi un’wana ni un’wana. Ha yini? Hikuva xiavelo xin’wana ni xin’wana—hambi i xa ku tirhisa muchini lowu kandziyisaka swakudya swa moya, ku hlantswa swiambalo, ku sweka ni ku basisela swirho swa ndyangu, kumbe ku tirha ntirho wa le hofisini—swi vumba ntirho wo kwetsima. Hi laha swi kombisiweke ha kona laha henhla, Vakreste a va na xihlawu-hlawu. Tsundzuka leswaku mintirho hinkwayo leyi faneleke leyi a yi endliwa hi vaprista ni Valevhi etempeleni, eswivaveni swa yona, ni le tiholweni to dyela, hinkwayo a yi tekiwa yi ri mintirho yo kwetsima emahlweni ka Yehovha. A yi katsa ku tlhava ni ku lunghiselela swiharhi swa gandzelo, ku chela timboni mafurha, hambi ku ri ku basisa ni ku endla mintirho yo rindza. Hi ku fanana, xiavelo xihi na xihi eBethele i ntirho lowu enerisaka ni wa nkoka “eHosini,” hikwalaho i lunghelo ro hlawuleka.—1 Vakorinto 15:58.
Xiyanyana mukhuva wun’wana lowu nga sivelaka langutelo ra hina ro tlangela “Yindlu ya Šikwembu.” Vakreste lava nga eBethele ni le handle va fanele ku tivonela malunghana ni mona ni mavondzo, leswi nga “ku bola ka marambu.” (Swivuriso 14:30) Ku hava munhu la nga ni xivangelo xo vondzoka malunghelo ya ntirho ya vatirhi va le Bethele. Ku tlula kwalaho, endyangwini wa le Bethele, ku hava xivangelo xa ku va ni mavondzo ku nga wun’wana wa mintirho ya nyama. Rindza hi ku titsongahata—xexo i xitsundzuxo lexinene eka loyi a nga ha vaka a vilela loko van’wana va nyikiwa malunghelo lama tlakukeke. Xin’wana hi leswaku vanhu va swiyimo swo hambana swinene hi tlhelo ra swa timali va tshama swin’we eBethele. Swi tshova mbilu swonghasi loko munhu a lava ku ‘ringanisa swiyimo swakwe ni swa munhu un’wana’! Ku kolwa hi “swakudya ni tinguvu” swi pfune vo tala leswaku va ya emahlweni hi vutshembeki ‘eNdlwini ya Xikwembu.’—Vagalatiya 5:20, 26; 6:4; 1 Timotiya 6:8.
Timbhoni ta Yehovha ni timiliyoni tin’wana ta vuyeriwa swinene hi ntirho lowu ti wu endlaka eBethele ti nga holeriwi—ntirho lowu ti wu endlaka handle ka vutianakanyi, hikwalaho ko rhandza Xikwembu ni munhu-kulobye. Makaya ya Bethele ni vugandliselo bya Sosayiti ya Watch Tower, tanihi miako yin’wana ya swa le tilweni yi hakeleriwa hi minyikelo ya ku tirhandzela. (2 Vakorinto 9:7) Ku fana na Hosi Davhida ni tihosana, ni tindhuna ta Israyele, hi nga kombisa ku xixima ka hina “Yindlu ya Šikwembu” hi ku tinyiketela hi xiviri ni ku seketela Sosayiti hi swa timali. (1 Tikronika 29:3-7) Sweswi a hi voneni leswaku swi koteka njhani “[ku] hlalela ku kwetsima ka Yehova” eBethele.
Mikateko ‘eNdlwini Ya Xikwembu’
Loko u ri enhlengeletanweni, xana u titwa u eneriseka, loko u rhendzeriwe hi vagandzeri lava tsakeke va Yehovha? Anakanya hi swona, mutirhi wa le Bethele u ni lunghelo ro tirhela Yehovha exikarhi ka ntlawa wa vamakwerhu siku na siku! (Pisalema 26:12) Sweswo swi tisa ntshembo lowukulu wa ku kula hi tlhelo ra moya! Makwerhu u xiye leswaku u dyondze swo tala leswi nga ta n’wi pfuna leswaku a antswisa vumunhu byakwe hi lembe rin’we ntsena eBethele ku tlula leswi a swi endleke hi malembe manharhu kun’wana. Ha yini? Hikuva ku hava kun’wana laha a nga vaka ni lunghelo ra ku vona ni ku tekelela ripfumelo ra Vakreste vo tala lava vupfeke.—Swivuriso 13:20.
EBethele munhu u tshama ni vatsundzuxi lava nga ni ntokoto. Ku engetela kwalaho, munhu wa vuyeriwa hi ku yingisela tinhlamuselo leti lunghiseleriweke kahle, leti nyikeriwaka evugandzerini bya ni mixo ni le Dyondzweni ya Xihondzo xo Rindza ya ndyangu wa Bethele, ni ku yingisela tinkulumo leti nyikeriwaka hi Musumbunuku ni madyambu. Lava va ha ku taka va kuma swiletelo eXikolweni Xa Lava Ha Ku Fikaka eBethele, naswona va averiwa ku hlaya Bibele hinkwayo hi tin’hweti to sungula ta 12.
Swiviko ni mintokoto ya vaendzi lava humaka ematikweni man’wana swi nyikela xikhutazo lexi engetelekeke. Ku tlula kwalaho, swirho swa Huvo leyi Fumaka kumbe vayimeri va yona swi endzela tihofisi ta marhavi. Helga u ri: “Hambi leswi va nga na swo tala swo swi endla, vamakwerhu va tlhela va va na nkarhi wo vulavurisana hi xinghana kumbe ku n’wayitela.” Vona ndlela leyi swi khutazaka ha yona ku tivonela hi hexe mahanyelo lamanene ni yo titsongahata ya vavanuna lava vo tshembeka!
Ngopfu-ngopfu eBethele munhu a nga kota ku vona kahle ndlela leyi nhlengeletano ya Xikwembu yi tirhaka ha yona ni ndlela leyi moya wa xona wo kwetsima wu susumetaka ha yona timbilu ni mavoko lawa ma swi rhandzaka ku endla swo karhi. “EBethele munhu u titwa a ri ekusuhi ni ‘xivindzi xa mintirho,’” ku hlamusela makwerhu la tirheke eBethele ya le Furwa ku sukela hi 1949. U ya emahlweni a ku: “Ndzi nga vula ndzi tiyisile leswaku eka mina Bethele i xiphemu xin’wana xa ntirho wa nkarhi hinkwawo lowu ndzi pfumelelaka ku nyikela nkarhi ni matimba yo tala entirhweni wa Yehovha ni ku tirhela vunyingi bya vamakwerhu.” Xana xexo a hi xona xikongomelo xa xiviri evuton’wini bya hina—ku endla ku rhandza ka Xikwembu? EBethele munhu a nga “ḍunisa Šikwembu hi masiku hikwawo.” Mawaku nkateko wonghasi!—Pisalema 44:8.
Hi laha hi swi voneke ha kona, loyi a tirhaka ekaya ra Bethele a nga hlalela ku kwetsima ka Yehovha ni ku kuma mikateko leyo tala. (Vaheveru 6:10) Xana ntirho wa le ‘Ndlwini ya Xikwembu’ wu nga va nchumu wa nkoka eka wena? Swirho swa Timbhoni ta Yehovha leswi nga ni malembe ya 19 hi vukhale, leswi hanyeke kahle emoyeni ni le mirini, naswona leswi ku fana na Timotiya, swi ‘khensiwaka hi vamakwerhu’ swi nga endla xikombelo xo ya tirha eBethele. (Mintirho 16:2) Vo tala va endle ntirho wa le Bethele wu va ntirho wa vutomi bya vona hinkwabyo, tanihi lava va tshahiweke laha henhla. Eka vona ku navela lokukulu ka mupisalema—ko ‘tshama endlwini ya Yehovha hi masiku hinkwawo ya vutomi bya vona’—ku ve ka xiviri.
Timbhoni ta Yehovha ti kombisa xichavo lexikulu eka moya wa ku tinyiketa lowu kombisiwaka hi vamakwavo va vona eBethele lava endlaka swiavelo swa vona hi ku tirhandzela ni hi ntsako. Hambi hi tirhela Yehovha eBethele kumbe kun’wana, hinkwerhu ka hina hi ni xivangelo lexinene xo titwa hilaha Hosi Davhida a titweke ha kona—ku hlalela ‘Yindlu ya Xikwembu,’ hi ku tlangela kumbe hi ntsako.
[Xifaniso lexi nga eka tluka 31]
Vakreste lava va tsakele ntirho wo kwetsima eBethele ya le Jarimani hi makume ya malembe