Vufambisi Lebyi Hanyaka Bya Kriste Namuntlha
“Ndzi na n’wina masiku hinkwawo, ku ko ku hela misava.”—MATEWU 28:20.
1. Xana Kriste u siye “xuma” xa yena eka vadyondzisiwa va yena hi ndlela yihi?
LOKO Kriste a ri kusuhi ni ku siya vadyondzisiwa vakwe ivi a tlhelela etilweni hi 33 C.E., u “veke xuma xa yena emavokweni ya vona.” Leswi swi katse ku va “vayimeri va Kriste” ni ku endla ntirho wo chumayela lowu a wu sunguleke, va wu yisa “emakun’wini ya misava.” Loko a nga si va siya, u va lerise ku “hundzula vamatiko hinkwavo leswaku va va vadyondzisiwa.” Xana hi na byona vumbhoni bya leswaku a a khathalela ndlela leyi a va tirha ntirho lowu ha yona? Hakunene hi na byona!—Matewu 25:14; 2 Vakorinto 5:20; Mintirho 1:8; Matewu 28:19.
2. I yini leswi kombisaka leswaku Kriste a a landzelela swinene ntirho wa mabandlha ya lembe xidzana ro sungula?
2 Malembe lama tlulaka 60 endzhaku ka loko Kriste a tlhandlukele etilweni, u kombise leswaku a a landzelela mintirho ya mabandlha ya Vukriste emisaveni swinene. Eka nhlavutelo leyi yi nyikiweke muapostola Yohane, xirho xa huvo leyi fumaka ya lembe xidzana ro sungula, Yesu Kriste u rhumele mahungu emabandlheni ya nkombo lama nga eAsia Minor. Eka ntlhanu ya wona u te: ‘Ndzi tiva mintirho ya n’wina.’ Naswona u kombise leswaku a a tolovelane ngopfu ni leswi a swi humelela exikarhi ka laman’wana mambirhi, Smirna na Pergamo. U nyike xikhutazo ni ndzayo leyi kongomeke eka bandlha rin’wana ni rin’wana. A ku nga ta va ni ku kanakana emianakanyweni ya vona malunghana ni loyi a a ri mufambisi wa vona la hanyaka.—Nhlavutelo 1:11; 2:1–3:22.
3. Xana kahle-kahle mahungu ya nkombo a ma kongomisiwe eka vamani, naswona i yini leswi kombisaka leswi?
3 Kahle-kahle, mahungu wolawo ya nkombo a ya nga hikiwanga eka ntirho wa wona eka mabandlha ya nkombo ya le Asiya. Ndzayo ni switsundzuxo leswinene leswi a ya swi tamerile swi tirhe eka mabandlha hinkwawo, ku sukela eka lembe xidzana ro sungula ku fikela ‘esikwini ra Hosi,’ laha hina hi nga kona sweswi.a Mahlo ya Kriste, lama fanisiweke ni “malangavi ya ndzilo,” ma hambetile ma langutisa leswi a swi endleka exikarhi ka “tikereke hinkwato”.—Nhlavutelo 1:10; 2:18, 23.
N’wini Ni Nandza Wa Yena
4. Xana Kriste u ‘ye njhani’ etikweni ra le kule ivi a vuya ‘endzhaku ka masiku layo tala’?
4 Endzhaku ka loko a tifanise ni “munhu la lavaka ku khoma riendzo, [la nga] vitana malandza ya yena, a veka xuma xa yena emavokweni ya vona,” Kriste u engeterile a ku: “Endzhaku ka masiku layo tala, n’wini wa malandza wolawo a fika, kutani a ma kambela.” (Matewu 25:14, 19) Hi 33 C.E., Kriste ‘u ye etilweni,’ laha a tshamisisiweke “vokweni ra xinene ra Xikwembu.” (1 Petro 3:22) “Endzhaku ka masiku layo tala,” loko a vekiwe exiluvelweni hi 1914, Kriste u sungule ‘ku fuma exikarhi ka valala va yena’ hi ku lahlela Sathana ni mademona ya yena emisaveni. (Psalma 110:1, 2; Nhlavutelo 12:7-9) Kutani u hundzuluxele mianakanyo ya yena eka malandza yakwe. Nkarhi wo tengisana na wona a wu fikile. Ku tlula hambi ku ri rini, a a ri Mufambisi wa vona la hanyaka.
5. Xana nkarhi wo tengisana wu te rini, naswona lava tshembekaka va hakeriwe hi ndlela yihi?
5 Matimu ya manguva lawa ya vanhu va Xikwembu ya kombisa leswaku nkarhi lowu wo tengisana wu te hi 1918-19. Xifaniso xa titalenta xi kombisa ndlela leyi N’wini a a ta tengisana ni masalela ya malandza ya yena lama totiweke ha yona. A va ta fanela ku tihlamulela munhu hi xiyexe ehenhleni ka ndlela leyi va tirhiseke xuma xa yena ha yona, ‘un’wana ni un’wana hi ku ringana matimba ya yena,’ kumbe vuswikoti bya moya. Lava va bindzuleke va nghene eku tsakeni ka N’wini wa vona, loyi a nga te eka vona: ‘Mi tshembekile eswilweni swi nga ri swingani, ndzi ta mi veka ku va valanguteri va leswo tala.’—Matewu 25:15, 20-23.
6. Vakriste vo tano lava tshembekaka va vumbe yini hi ntlawa, naswona xana N’wini wa vona u va nyike yini leswaku va swi hlayisa?
6 Vakriste vo tano lava totiweke ha un’we-un’we va kumiwe va ri vayimeri lava tshembekaka va Hosi leyi fumaka sweswi, lava swi lavaka ku endlela N’wini wa vona vadyondzisiwa. Tanihi ntlawa va kumiwe va ri “nandza” loyi ha yena N’wini wa vona a nga te: “Xana nandza lowo tshembeka, lowa vutlhari, i mani xana? Xana a hi yena loyi n’wini wa yena a nga ta n’wi veka ku va mulanguteri wa malandza man’wana la mutini, leswaku ma nyikiwa swakudya hi nkarhi wa kona xana? Ku katekile nandza loyi, ku nga ta ku loko n’wini wa yena a fika, a nga ta n’wi kuma a endlise sweswo. Ndzi tiyisile ndzi ri ka n’wina, ú ta n’wi veka ku va mulanguteri wa hinkwaswo leswi a swi fuweke.”—Matewu 24:45-47.
7. (a) Xana ‘xuma’ xa Kriste xi engeteleke njhani ku sukela hi 1914? (b) I yini leswi kombiseke leswaku Kriste nakambe i Mufambisi la hanyaka wa “tinyimpfu tin’wana”?
7 ‘Xuma’ xa Kriste xi engeteleke ngopfu hi nhlayo ku sukela hi 1914. A a ambexiwe “v̌uhosi,” ku katsa ni matimba lama engetelekeke ni vutihlamuleri lebyikulu. (Luka 19:11, 12, Bibele ya Xitsonga.) U sungule hi ku ya emahlweni a hlengeleta masalela ya “vana va Mfumo;” Vakriste lava totiweke va 144 000 “lava kutsuriweke emisaveni” leswaku va va tihosi ni vaprista na yena etilweni. (Matewu 13:38; Nhlavutelo 14:1-4; 5:9, 10) Kutani, hi laha swi kombisiweke ha kona hi ku ya hi matimu ku sukela hi 1935, a a hlengeleta “ntshungu lowukulu” wa “tinyimpfu tin’wana” leti ha tona a nga te: “Na tona ndzi fanele ku ti vuyisa.” (Nhlavutelo 7:9, 10; Yohane 10:16) Ina, hi Yena loyi a tisaka “tinyimpfu” leti, naswona u va Mufambisi wa tona la hanyaka. Lexi tsakisaka, tsalwa ra Xigriki hi ku kongoma ri ku, “Na teto swa laveka [eka] mina ku tifambisa.” Xana u fambisa “tinyimpfu” takwe hinkwato namuntlha hi laha ku hanyaka hi ndlela yihi?
Valanguteri eVokweni Ra Xinene Ra Kriste
8, 9. (a) I xivono xihi lexi muapostola Yohane a xi amukeleke? (b) I yini leswi a swi hlamuseriwa hi switlhoma-rivoni swa nkombo ni tinyeleti ta nkombo?
8 Muapostola Yohane, xirho xa huvo leyi fumaka ya bandlha ro sungula ra Vukriste, u amukele xivono lexi eka xona a nga “vona switlhoma-rivoni swa 7 swa nsuku, ni un’wana la fanaka ni N’wana-wa-Munhu a yimile exikarhi ka swona . . . Evokweni ra yena ra xinene a a tamerile tinyeleti ta 7.” Yesu Kriste u hlamusele Yohane a ku: “Xihundla xa tinyeleti leti ta 7 leti u ti voneke evokweni ra mina, ni xihundla xa switlhoma-rivoni swa 7 swa nsuku, hi lexi: Tinyeleti ta 7 i tintsumi ta tikereke ta 7, kutani switlhoma-rivoni swa 7 i tikereke ta kona ta 7.”—Nhlavutelo 1:12-20.
9 Loko yi hlamusela ndzimana leyi, buku leyi nge “Then Is Finished the Mystery of God” yi ri: “Xana ‘tintsumi’ to tano hi leti nga vonakiki? E-e. Muapostola Yohane u amukele Nhlavutelo hinkwayo yi huma eka Yesu Kriste hi ku tirhisa ntsumi ya le tilweni, kutani a swi ta va leswi nga twisisekiki eka yena ku tlhela a tsalela tintsumi etilweni, eka swivandla leswi nga vonekiki. A ti ya lavi mahungu lama tsaleriweke mabandlha ya nkombo ya le Asia. Nhlamuselo ya xisekelo ya rito leri nge ‘ntsumi’ i ‘murhumiwa; mutwarisi wa mahungu.’ . . . Tanihi leswi tinyeleti leti to fanekisela ta nkombo ti voniwaka ti ri evokweni ra xinene ra Yesu, ti le ka vuhlayisi ni vulanguteri bya yena ni le hansi ka vukongomisi byakwe, ‘voko ra yena ra xinene’ ra matimba lama tirhisiweke ra swi kota ku va kongomisa ni ku va sirhelela. . . . Tanihi leswi ‘switlhoma-rivoni swa nkombo’ exivonweni xa ‘siku ra Hosi’ swi faniseleke mabandlha hinkwawo ya ntiyiso ya Vukriste ‘esikwini ra Hosi’ ra sweswinyana, ra xiviri ku sukela hi 1914 C.E., kutani ‘tinyeleti ta nkombo’ ti fanekisela valanguteri hinkwavo lava tswariweke hi moya, lava fanaka ni tintsumi, lava totiweke va mabandlha yo tano ya namuntlha.”b—Matluka 102-4.
10. I ‘xuma’ xihi lexi engetelekeke lexi vekiweke eka vuhlayisi bya nandza?
10 Valanguteri lava va totiweke evokweni ra xinene ra Kriste hinkwavo i xiphemu xa ntlawa wa “nandza” loyi A n’wi vekeke ehenhla ka “hinkwaswo leswi a swi fuweke.” Hikuva nandza wa N’wini u tiendle hi yexe leswaku a rhwexiwa vutihlamuleri lebyi kurisiweke ku sukela hi 1914, “hinkwaswo leswi a swi fuweke” swi fanele swi katsa swilo swo tala leswi engetelekeke eka nandza ku tlula enkarhini lowu hundzeke. Hi xikombiso, tanihi “vayimeri va Kriste,” masalela sweswi i vayimeri va Hosi leyi fumaka leyi lawulaka ehenhla ka Mfumo lowu simekiweke. (2 Vakorinto 5:20) Va endliwe valanguteri va swilo hinkwaswo swa moya leswi swi nga swa N’wini emisaveni. Va fanele va tirha eku hetisekeni ka vuprofeta lebyi tirhaka ku sukela eku simekiweni ka Mfumo. Leswi swi katsa ku chumayela “Evangeli leyi ya Mfumo . . . leswaku yi va vumbhoni eka vanhu va matiko hinkwawo.” (Matewu 24:14) Ku tlula hambi ku ri rini, va fanele va ya emahlweni va hundzula “vamatiko hinkwawo leswaku va va vadyondzisiwa,” xisweswo va hlengeleta “ntshungu lowukulu” lowu nga hlayiwangiki. (Matewu 28:19, 20; Nhlavutelo 7:9) Ina, swilo “leŝi ranḍekaka ŝa matiko hikwawo” i xiphemu xa ‘xuma’ lexi engetelekeke xa Kriste emisaveni.—Hagai 2:7.
11. (a) Xana ‘xuma’ lexi engetelekeke xi endla leswaku ku laveka yini? (b) I mani la kongomisaka ntirho, naswona njhani?
11 Hinkwaswo leswi swi vula ntirho lowu engetelekeke eka ntlawa wa “nandza,” xivandla lexikulu xa mintirho, lexi hi ku kongoma xi fikaka ni le ka “vanhu va matiko hinkwawo.” Xi tlhela xi lava yindlu-nkulu ni miako leyikulu ya marhavi leswaku yi langutela ntirho naswona yi gandlisa ni ku hangalasa tibuku to chumayela ni ta dyondzo ya munhu hi xiyexe. Tanihi le ka lembe xidzana ro sungula, ntirho lowu wu tirhiwa ehansi ka vufambisi lebyi hanyaka bya Yesu Kriste, loyi hi ku fanekisela a nga ‘exikarhi ka switlhoma-rivoni,’ kumbe mabandlha. U ma kongomisa hi ku tirhisa valanguteri lava totiweke, lava hi ku fanekisela a va tameleke “evokweni ra yena ra xinene.” (Nhlavutelo 1:13, 16) Tanihi le minkarhini yo rhanga ya Vukriste, ntlawa wa valanguteri lava va totiweke wu vumba Huvo leyi Fumaka leyi vonekaka ya bandlha ra Kriste emisaveni. ‘Voko ra yena ra xinene’ ra matimba lama tirhisiwaka ri kongomisa vavanuna lava va tshembekaka loko va ri karhi va langutela ntirho wa Mfumo.
Hi Ku Tirhisa Moya
12, 13. (a) Hikwalaho ka ku engeteleka lokukulu, i swivutiso swihi leswi tlakukaka? (b) Xana Kriste u tirhisa moya hi ndlela yihi leswaku a tata xilaveko xa valanguteri exikarhi ka vadyondzisiwa va yena emisaveni?
12 Leswi “tinyimpfu tin’wana” sweswi ti nga nhlayo leyi nga ehenhla ka timiliyoni tinharhu, leti hleriweke ti va 52 000 wa mabandlha, swi le rivaleni leswaku masalela lawa ya totiweke ya lava mpfuno eku hlayiseni ka xuma xa N’wini xa laha misaveni. Lava nga ehansi ka 9 000, ku katsa ni vamakwerhu vo tala va xisati, va dya swifanekiselo swa Xitsundzuxo, kutani a ku na mulanguteri hambi a ri un’we la totiweke eka bandlha rin’wana ni rin’wana. Xana leswi swi vula leswaku Yesu Kriste a nga languteri mabandlha laha ku nga riki na “ntsumi” leyi tswariweke hi moya, kumbe ‘nyeleti’?
13 Doo! Hi laha hi voneke ha kona eka xihloko lexi nga hundza, eka lembe xidzana ro sungula Kriste u fambise bandlha rakwe hi ndlela leyi hanyaka hi ku tirhisa moya lowo kwetsima. Namuntlha u tirhisa swirho leswi tswariweke hi moya swa Huvo leyi Fumaka ku veka valanguteri lava hlawuriweke exikarhi ka “tinyimpfu tin’wana.” Lava va fanele ku fikelela swilaveko leswi fanaka ni swa vakulu lava totiweke, hi laha swi xaxametiweke ha kona eka matsalwa yo tanihi 1 Timotiya 3:1-7 na Tito 1:5-9. Timfanelo leti ta Matsalwa ti tsariwe ehansi ka vukongomisi bya moya lowo kwetsima. Swibumabumelo ni ku vekiwa swi endliwa endzhaku ka xikhongelo naswona ehansi ka vukongomisi bya moya lowo kwetsima. Eka vakulu vo tano lava nga totiwangiki xitsundzuxo xa Pawulo xi tirha hi matimba lama ringanaka: “Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona.”—Mintirho 20:28.
14. (a) Xana vuprofeta bya Esaya 32:1, 2 ana se byi hetiseke hi ndlela yihi? (b) Xana vakulu hinkwavo va fanele va titsongahata ehansi ka ‘voko ra xinene’ ra Kriste hi ndlela yihi?
14 Xisweswo, eka makume ya magidi ya mabandlha, Hosi yo lulama leyi fumaka Yesu Kriste u tirhisa “tinyimpfu tin’wana” tanihi “tihosana” ku sirhelela “tinyimpfu” ta yena eka moya, swidzedze ni dyandza ra swa moya. (Esaya 32:1, 2) Ku fana na Davhida wa khale, vakulu, hambi va ri lava totiweke kumbe “tinyimpfu tin’wana,” va khongela eka Yehova va ku: “Moya wa wena a wu nḍi fambise ndleleni ya ku lulama!” (Psalma 143:10) Naswona Yehova u twa xikhongelo xa vona. Hi ku tirhisa N’wana wa Yena, U va nyika moya wa Yena, naswona Yesu u tirhisa ndlela leyi leswaku a fambisa vadyondzisiwa va yena emisaveni hi ndlela leyi hanyaka. Entiyisweni, vakulu hinkwavo va fanele va titsongahata ‘evokweni ra xinene ra Kriste’ ra vulawuri, vuleteri ni vukongomisi, leswi a swi endlaka hi ku tirhisa moya ni swirho leswi tswariweke hi moya swa Huvo leyi Fumaka.
Hi Ku Tirhisa Tintsumi
15. I tindlela tihi tin’wana leti Kriste a nga na tona exiyin’weni xa yena leswaku a fambisa vadyondzisiwa va yena emisaveni hi ndlela leyi hanyaka?
15 Xihloko lexi hundzeke xi boxe leswaku tintsumi a ti tirhisiwa eka lembe xidzana ro sungula ku kongomisa ni ku ntshunxa Vakriste vo sungula ni ku va pfuna entirhweni wa vona wo chumayela. Xana a swi ta twala ku ehleketa leswaku Hosi ya hina leyi fumaka Yesu Kriste a ya ha tirhisi tintsumi ku fambisa vadyondzisiwa va yona namuntlha hi ndlela leyi hanyaka? A swi nga ta va leswi nga twariki ntsena kambe a swi ta tlhela swi va leswi nga riki swa matsalwa.
16, 17. I xikombiso xihi lexi hi nga na xona xa leswaku Kriste u tirhisa tintsumi eka ku tshovela “vana va mfumo” ni le ka ku hlengeleta “tinyimpfu tin’wana”?
16 Hi ku ya hi xifaniso xa Yesu xa mavele ni mfava, nkarhi wo tshovela wu ta ta eku “heleni ka minkarhi,” leyi sunguleke hi 1914. Hi nkarhi wa ku tshovela, “vana va Mfumo” va ta hambanisiwa ni “vana va Lowo biha.” Xana N’wini u ta tirhisa vamani leswaku va tshovela? “Vatshoveri vona i tintsumi.” Kriste u engeterile a ku: “N’wana-wa-Munhu u ta rhuma tintsumi ta yena, ti ta humesela ehandle ka Mfumo wa yena vakhunguvanyisi hinkwavo ni lava endlaka leswo biha.” (Matewu 13:37-41) Yesu u tirhisa tintsumi leswaku a sirhelela vamakwavo emisaveni.
17 Kambe ku vuriwa yini hi “tinyimpfu tin’wana”? Xana Kriste u tirhisa tintsumi leswaku ti va hlengeleta? Hakunene! Xifaniso xa yena xa tinyimpfu na timbuti xi ri: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.” (Matewu 25:31, 32) Kriste u tirhisa tintsumi ta yena entirhweni lowu wo hlawula. Tanihi leswi ntsumi yi kongomiseke magoza ya Filipi eka ndhuna ya Muitopiya, kutani ku na vumbhoni byo tala namuntlha bya leswaku Kriste u tirhisa tintsumi ta yena ku kongomisa magoza ya Timbhoni takwe eka vanhu lava fanaka ni tinyimpfu. Vanhu vo tala va pfumele mhaka ya leswaku va khongelele mpfuno Mbhoni yi nga si gongondza enyangweni wa vona.—Mintirho 8:26, 27.
Ntshembo Lowu Heleleke Eka Vukongomisi Bya Kriste
18, 19. Exisekelweni xa leswi humeleleke eka lembe xidzana ro sungula, i yini lexi hi tiyisekaka ha xona?
18 Hi lembe xidzana ro sungula, swiyimo a swi tiyisanga hi swoxe minkarhi hinkwayo eka ku tirhisa ka Kriste huvo leyi fumaka eYerusalema leswaku a tlhantlha xiphiqo xo karhi. Loko Pawulo a ri yexe en’walungwini wa Asia Minor naswona a lave ku tiva nsimu leyi a nga ta yi sungula, Kriste u teke goza hi moya. (Mintirho 16:6-10) Namuntlha Timbhoni ta Yehova ta tshemba leswaku un’wana ni un’wana wa vamakwavo loyi a susiwaka swa xinkarhana ehansi ka vukongomisi bya Huvo leyi Fumaka hikwalaho ka nxaniso wa ha ri ehansi ka vufambisi bya Kriste lebyi hanyaka, hi ku tirhisa vuseketeri bya moya ni tintsumi.
19 Le ndzhaku eka minkarhi yo sungula ya Vukriste, makungu man’wana lama bohiweke hi huvo leyi fumaka ya nga ha va ya nonon’hwile ku twisiseka nkarhi wun’wana. A swi kanakanisi leswaku leswi a swi ri tano loko Pawulo a tlhele a rhumeriwa eTarso kumbe loko a rhumeriwe etempeleni endzhaku ka riendzo ra yena ra vunharhu ra vurhumiwa. (Mintirho 9:30; 21:23-25) Kambe, entiyisweni Kriste a a seketela makungu yo tano. (Mintirho 22:17-21; 23:11) Namuntlha hi nga tiyiseka leswaku xin’wana ni xin’wana lexi Kriste a xi pfumelelaka ku humelela exikarhi ka vadyondzisiwa va yena emisaveni xi na xikongomelo xin’wana lexikulu, tanihi le ka lembe xidzana ro sungula.
20. Hi khorwisiwile hi yini, naswona ku tiyimisela ka hina hi kwihi?
20 Xisweswo, loko hi hlaya eBibeleni leswaku Kriste “hi yena nhloko ya miri, hi leswaku ya Kereke,” ha khorwiseka leswaku a hi Nhloko ya vito ntsena. (Vakolosa 1:18) Ha swi tiva, hi ku ya hi ntokoto, leswaku i Nhloko ya xiviri, leyi gingiritekaka. Loko hi hlaya buku ya Mintirho naswona hi vona ndlela leyi Kriste a kongomiseke timhaka ha yona exikarhi ka Vakriste vo sungula, hi ta xiya leswaku u tirhisa tindlela to fana namuntlha. Hi vona vumbhoni bya ku tirhisa ka Kriste moya lowo kwetsima, tintsumi ni “nandza lowo tshembeka, lowa vutlhari” ni Huvo ya yena leyi Fumaka, leswaku a veka vakulu lava fanelekaka emoyeni. Hi ku tshemba vukongomisi lebyinene bya Kriste bya swilo, hi tiyimisele ku ya emahlweni hi “vulavula ntiyiso” ni ku kula hi rirhandzu “eka Kriste, yena loyi a nga nhloko.”—Vaefesa 4:15.
[Tinhlamuselo ta le hansi]
a Leswaku u kuma nhlamuselo leyi teleke ya mahungu lawa ya nkombo ni ku tirha ka wona, vona buku leyi nge “Then Is Finished the Mystery of God,” ndzima 7 ku ya ka 14, leyi humesiweke hi Watchtower Bible and Tract Society of New York, Inc.
b Nkandziyiso wa Xihondzo xo Rindza xa Xinghezi wa December 15, 1971, wu lulamise yinhla leyi ku ya emahlweni, wu ku: “Handle ko kanakana, a hi nkulu un’we, murhangeri, mulanguteri kumbe murisi, kambe ‘huvo hinkwayo ya vakulu’ a yi ri leyi Hosi leyi kwetsimisiweke, Yesu Kriste, a yi vuleke ‘ntsumi’ leyi a yi fanekiseriwa hi nyeleti ya le tilweni. . . . ‘Huvo ya vakulu’ (kumbe vurhangeri) le Efesa a yi fanele ku tirha tanihi nyeleti eka ku chululela ku vonakala ka moya ka le tilweni, ebandlheni leri ehenhla ka rona moya wo kwetsima wu va endleke varisi.”
Tinhla-nkulu To Ti Tsundzuka
◻ I vumbhoni byihi lebyi hi nga na byona bya leswaku Kriste u landzelele swinene mintirho ya mabandlha ya lembe xidzana ro sungula?
◻ I mani loyi Kriste a n’wi vekeke ehenhla ka xuma xa yena hinkwaxo, naswona leswi swi katsa yini?
◻ I vamani lava fanekiseriwaka hi tinyeleti ta nkombo evokweni ra xinene ra Kriste?
◻ Xana Kriste u tirhisa moya lowo kwetsima, tintsumi ni Huvo leyi Fumaka leyi totiweke eku fambiseni ka bandlha ra yena namuntlha hi ndlela yihi?
◻ Ha yini hi ta va ni tshembo lowu heleleke eka vukongomisi bya Kriste bya swilo namuntlha?
[Bokisi leri nga eka tluka 20]
Miringo leyi taka hikwalaho ka nyimpi, mindzhundzunuko kumbe nxaniso lowu kongomeke ni minsivelo ya vafumi swi nga ha endla leswaku swi nga koteki eka wena ku yisa vugandzeri bya Vukriste emahlweni hi ndlela leyi hleriweke hi xitalo. Swiyimo swi nga ha tlhekeka swi endla leswaku swi nga koteki ku khoma minhlangano leyikulu ya bandlha. Ku vulavurisana na hofisi ya rhavi ku nga ha yimisiwa swa xinkarhana. Maendzo ya mulanguteri wa xifundza ya nga ha kavanyetiwa. Tibuku letintshwa swi nga endleka ti nga fiki. Loko swin’wana swa swilo leswi swi humelela eka wena, xana u fanele ku endla yini?
Nhlamulo hi leyi: Ehansi ka swiyimo, endla leswi u nga swi kotaka, hi laha u nga kotaka ha kona, endleleni ya vugandzeri byo tenga. Dyondzo ya munhu hi xiyexe yi fanele yi koteka. Mintlawa leyintsongo leyi ya vamakwerhu hakanyingi ya hlangana eka dyondzo ya le kaya. Tibuku leti dyondziweke enkarhini lowu hundzeke ni Bibele hi yoxe swi nga tirhisiwa tanihi xisekelo xa minhlangano. U nga nyanyuki kumbe ku vilela. Hi ntolovelo, hi nkarhi wo koma xivumbeko xo karhi xa ku vulavurisana ni vamakwerhu lava nga ni vutihlamuleri xi ta simekiwa. Huvo leyi Fumaka yi lava tindlela to vulavurisana ni vamakwerhu.
Kambe hambi loko u tikuma u hambanisiwile ni vamakwenu hinkwavo va Vukriste, tsundzuka leswaku a wu hambanisiwanga na yena Yehova ni N’wana wa yena Yesu Kriste.—Organized to Accomplish Our Ministry, tluka 168.
[Xifaniso lexi nga eka tluka 17]
Kriste u le xikarhi ka mabandlha hi ku fanekisela, a tamele valanguteri evokweni ra yena ra xinene