Vantshwa—Xana Mi Ta Endla Yini Hi Vutomi Bya N’wina?

“Leswaku lava hanyaka va nga ha tihanyeli, kambe va hanyela loyi a feke . . . hikwalaho ka vona.”—2 VAKORINTO 5:15.

1. I xiga xihi xa ku nkhensa lexi vanhu va xi endleke, naswona hikwalaho ka yini?

‘NDZA nkhensa! Ndzi ku kolota vutomi bya mina!’ Vanhu lava va ponisiweke eka yindlu leyi tshwaka, kumbe eka ku nwela va vule sweswo eka vaponisi va vona. Naswona vantshwa va Vakriste lava tlangelaka va vule xivulwa xo tano eka vatswari va vona. A va nga kombeteli eka vutomi bya nyama lebyi va byi amukeleke eka vatswari va vona ntsena kambe ngopfu-ngopfu eka nkhathalelo wa rirhandzu ni vuleteri lebyi vekaka vantshwa endleleni yo amukela “leswi a nga hi tshembisa swona, vutomi lebyi nga heriki.”—1 Yohane 2:25.

2. Xana u fanele ku xiya xivutiso lexi nge, U ta endla yini hi vutomi bya wena hi ku twisisa rungula rihi?

² A ku ri rirhandzu leri susumeteke Yehova Xikwembu leswaku xi endla vutomi lebyi nga heriki, “vutomi bya xiviri,” byi kumeka eka un’wana ni un’wana wa hina. “Xi hi rhandzile, kutani xi rhumele N’wana wa xona ku va mhamba ya swidyoho swa hina.” (1 Timotiya 6:19; 1 Yohane 4:10) Nakambe, anakanya hi rirhandzu leri N’wana wa xona Yesu a ri kombiseke hi ku fa rifu ro vavisa leswaku hi kuma vutomi lebyi nga heriki! (Yohane 15:13) Hi mhaka ya leswi swi nga laha henhla, Xana u ta endla yini hi vutomi bya wena?

3. I yini leswi hakanyingi swi lawulaka leswi vanhu va endlaka swona hi vutomi bya vona?

³ Hakanyingi vantshwa va vutisiwa xivutiso lexi, hi xivumbeko lexi kumbe lexiya, hi vatsundzuxi va swichudeni exikolweni kumbe van’wana lava tsakelaka vumundzuku bya vona. I yini lexi nga ta lawula nhlamulo ya wena? Xana yi ta lawuriwa hi ku tsakela ka munhu hi xiyexe ntsena? Xana mhaka yo boha kungu yi ta va xitsundzuxo xa lava va lavaka leswaku u fikelela xiyimo lexi hlayisekeke emisaveni leyi? Kumbe xana leswi u nga ta swi endla hi vutomi bya wena swi ta lawuriwa hi ku khathalela lokukulu? Xitsundzuxo lexi huhuteriweke xi ri: “U ferile vanhu hinkwavo, leswaku lava va hanyaka va nga ha tihanyeli, kambe va hanyela loyi a feke, a tlhela a pfuxiwa eku feni hikwalaho ka vona.” (2 Vakorinto 5:15) Ina, i swinene swonghasi loko ndlela leyi hi tirhisaka vutomi bya hina ha yona yi kombisa ku nkhensa leswi Yesu Kriste ni Tata wakwe wa le tilweni va hi endleleke swona!

Vatlangi Lava Dumeke Ngopfu

4. I vamani swikombiso leswi dumeke ngopfu namuntlha?

⁴ Kambe, i vamani swivumbeko leswi dumeke ngopfu namuntlha, lava hi ntolovelo vantshwa va va tekelelaka tanihi swikombiso leswikulu? Xana a hi vanhu lava fumeke ni lava tivekaka ngopfu va misava, ku nga khathariseki mimpimanyeto ya vona ya mahanyelo? Loko u languta etikamareni ta vantshwa vo tala, i swifaniso swa vamani leswi u swi vonaka swi lenga-lenga emakhumbini? Hakanyingi hi leswiya swa vayimbeleri, vatlangi va tibayiskopo ni va mintlangu. Hi ntolovelo vantshwa va lorha hi ku fikelela ku humelela loku fanaka ka misava eka siku rin’wana kumbexana hi ku tekana ni un’wana la nga ni timfanelo ta miri ta vanhu lava. Ku vuriwa yini ha wena? Xana u lava yini evuton’wini?

5, 6. (a) Ha yini ku nga vuriwaka leswaku ku humelela ka misava ku tsandzeke ku tisa ku aneriseka ka ntiyiso? (b) Xihlovo xa ku aneriseka ka xiviri i yini?

⁵ Loko u fikelele ku humelela ka misava ka tindhuma leti naveriwaka, xana hakunene u ta tsaka ni ku aneriseka? Un’wana wa vatlangi va xisati lava humelelaka ngopfu va Hollywood u te: “Ndzi nantswe rifuwo ni swilo hinkwaswo leswi vonekaka. A swi vuli nchumu. Ku ni mutivi wa miehleketo loyi a hlambaka eka damu rin’wana ni rin’wana laha, a ha ha vuli ku dlaya vukati ni vana lava vengaka vatswari va vona.”—Eklesiasta 5:10; 1 Timotiya 6:10.

⁶ Xichudeni xa xitsutsumi lexi humelelaka, muhluri wa ntlawa wa vavasati wa mphikizano lowukulu wa 10 wa tikhilomitara hi 1981 eNew York, u heleriwe hi ntshembo lerova a ringeta ku tisunga. Endzhaku ka sweswo u tsarile a ku: “Ndzi dyondzile mintiyiso leyo tala ehenhleni ka vutomi eka tin’hweti ti nga ri tingani leti hundzeke. Wun’wana hi leswaku ku aneriseka ka xiviri a ku kumiwi hi tindlela leti vanhu vo tala va ti phikelelaka eka ku hetiseka ni ku ti fikelela. Ku aneriseka ka mina a ku tanga hi ku va ndzi ri xichudeni xa vutlhari, nghwazi ya xitsutsumi xa tiko kumbe ku va ni xivumbeko lexi kokaka mahlo.” Ina, vanhu va fanele ku dyondza leswaku ku aneriseka ka ntiyiso ku huma ntsena eka ku va ni vuxaka bya munhu hi xiyexe na Xikwembu, lexi ku nga xona ntsena xi nga lunghiselelaka ku rhula ni ntsako swa xiviri.—Psalma 23:1, 6; 16:11.

7. Malunghana ni ku xiya ku aneriseka ka xiviri, xana dyondzo ya kholichi ni ku humelela ka misava i swa nkoka hi ndlela yihi?

⁷ Kutani, entiyisweni a wu fanelanga u lava ku tekelela lava va yinga-yingaka ntsena leswaku va kuma ndhuma ni rifuwo. Hambi va ri vatsari va nkarhi na nkarhi va xiya ku tsandzeka ka ku humelela ka misava leswaku yi tisa ku aneriseka ka ntiyiso. Mutsari wa mahungu Bill Reel u tsarile a ku: “U thwasa ekholichi ni milorho ya vumundzuku. Lexi khomisaka gome, yo tala ya mintshembo ya wena yi hundzuka nkuma. A ndzi lavi ku ku heta matimba, kambe hi ku fanana u nga ha twa ntiyiso: Loko u kuma swilo leswi u swi navelaka, loko u swi kuma, ni loko u fikelela ku humelela loku u ku phikelelaka, loko u swi fikelela, swi nge ku anerisi. Ematshan’wini ya sweswo, eminkarhini yoleyo loko u langutela ku swi tlangela hi ku hlula, u ta titwa u nga ri na nchumu ematshan’wini yo va la hetisekeke, u ri na gome ematshan’wini yo va la tsakeke, u hlundzukile ematshan’wini ya ku rhula.”—New York Daily News, May 26, 1983.

8. I xivangelo xihi xa nkoka lexi nga kona xa ku nga phikeleli ntirho-vutomi wa misava?

⁸ Kambe eka hina lava hi xalamukeleke nkoka wa swiendlakalo swa misava eku twisisekeni ka vuprofeta bya Bibele, ku na swivangelo leswikulu ngopfu swa ku ka hi nga rhangisi ntirho-vutomi wa misava evuton’wini. (Matewu 24:3-14) Hi nga ha tifanisa ni munhu loyi a vonaka muako ni mfungho lowu nge: “Khampani Leyi Yi Heleriwa Hi Ntirho.” Xana hi ta lava ku thoriwa kwalaho? Kavula a swi tano! Naswona loko hi tirhela khampani yo tano, hi ta lava ku thoriwa kun’wana hi vutlhari. Ina, mfungho wu le rivaleni hinkwako-nkwako eka mafambiselo ya misava leyi: “Ya Heleriwa Hi Ntirho—Makumu Ma Tshinele!” Ina, “Misava ya hundza,” Bibele ya hi tiyisekisa. (1 Yohane 2:17) Kutani, hi vutlhari, hi nge tekeleli lava va katsekeke eka yona swinene tanihi swikombiso leswikulu.

Xitsundzuxo Lexi Nga Ta Landzeriwa

9. I xitsundzuxo xihi xa misava lexi lava va vonakaka va lava leswinene ha wena va nga ha xi nyikaka?

⁹ Vutomi bya wena a byi vumbiwi hi lava u va xiyaka va ri na ndhuma ntsena kambe hakanyingi na hi maxaka ni vanghana lava, hi laha va swi vekaka ha kona, ‘va lavaka leswinene eka wena.’ Va nga ha ku: ‘U fanele ku tihanyisa.’ Kutani va nga ha ku tsundzuxa leswaku u kuma dyondzo ya kholichi kumbe yunivhesiti leswaku u tilunghiselela ntirho lowu hakelaka swinene. Va nga ha xiya va ku: ‘Mutsari wa Bibele Luka a a ri dokodela, naswona muapostola Pawulo a a leteriwe hi mudyondzisi wa Nawu Gamaliyele.’ (Vakolosa 4:14; Mintirho 5:34; 22:3) Kambe, kambisisa xitsundzuxo xo tano hi vukheta.

10. I xitsundzuxo xihi lexi Luka na Pawulo va xi lunghiseleleke, naswona ku nga vuriwa yini ehenhleni ka ntirho wa vona lowu rhangelaka Vukriste?

¹⁰ Dokodela Luka a nga khutazanga Vakriste leswaku va landzela khale ka xikombiso xa ntirho wa yena wa vutomi hi ku va dokodela; ematshan’wini ya sweswo, Luka u namarhele vutomi bya Yesu ni vaapostola vakwe leswaku a va tekelela. Entiyisweni Luka u ve dokodela a nga si dyondza ha Kriste kambe endzhaku ka sweswo u rhangise vutirheli byakwe bya Vukriste evuton’wini. Xiyimo a xi fana ni xa Pawulo. Ematshan’wini yo khutaza van’wana leswaku va n’wi tekelela tanihi leswi a tekeleleke Gamaliyele, Pawulo u tsarile a ku: “Tekelelani mina, kukotisa leswi na mina ndzi tekelelaka Kriste.” Kutani Pawulo u langute vutivi bya Kriste hi laha ku tlakukeke lerova a vula leswaku hi xiringaniso u xiye khale ka ku phikelela ka yena “swi ri leswi nga ha pfuniki nchumu.”—1 Vakorinto 11:1; Vafilipiya 3:8.

11. (a) Xana Petro u byela Yesu yini, naswona hikwalaho ka yini? (b) Xana Yesu u hlamule hi ndlela yihi?

¹¹ Tsundzuka, nyanyuko wu nga vangela hambi va ri lava va ku rhandzaka leswaku va nyika xitsundzuxo lexi nga nyawuriki. Hi xikombiso, loko Yesu a vulavule hi leswi a swi n’wi rindzerile enkarhini wa vutirheli byakwe eYerusalema, muapostola Petro u hlamurile a ku: ‘Titwele vusiwana, Hosi swilo leswi swi nga ka swi nga humeleri.’ Petro a a rhandza Yesu naswona a a nga lavi leswaku a xaniseka. Hambi swi ri tano, Yesu u tshinye Petro hikuva U xiyile leswaku ku hetisisa ku rhandza ka Xikwembu swi ta katsa ku xaniseka ni ku dlayiwa hi vakaneti.—Matewu 16:21-23.

12. I xitsundzuxo xihi lexi vanhu lava nga ni makungu lamanene va nga ha xi nyikaka vantshwa naswona hikwalaho ka yini?

¹² Hi ku fanana, vatswari van’wana kumbe vanghana va nga ha ku heta matimba eka ndlela yo tinyiketela. Hikwalaho ka nyanyuko wa xitsundzuxo lexi nga riki na vutlhari, va nga ha kanakana ku ku khutaza leswaku u teka xiavelo xa vutirheli bya vuphayona bya nkarhi hinkwawo, ku tirha tanihi murhumiwa, kumbe ku endla ntirho wo tirhandzela ehofisini ya rhavi ra Timbhoni ta Yehova. Va nga ha ku: ‘Ha yini u nga teki ematshan’wini ya sweswo ivi u tshama ekusuhi na hina?’ Kumbe, ‘Wa swi tiva, ntirho wa nonon’hwa eBethele. Kumbexana swa antswa leswaku u tshama na hina.’ Hi marito man’wana, hi laha Petro a swi vekaka ha kona, “Titwele vusiwana.”

13. (a) I langutelo rihi leri lulamisiweke leri Petro a ri kombiseke? (b) I yini lexi katsekaka eka ku va Mukriste wa ntiyiso?

¹³ Hambi ya ri malandza ya Yehova minkarhi yin’wana ya fanele ku lulamisa ku ehleketa ka wona. Petro a a fanele ku endla tano, naswona hi langutelo leri lulamisiweke, u tsarile a ku: “Mi vitaneriwe swona, hikuva Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landza hi le ndzhaku.” (1 Petro 2:21) Ku hanya vutomi bya Vukriste bya ntiyiso swi katsa ku tinyiketela, ina, hambi ku ri ku xaniseka. A hi ntirho wo olova, kambe hi lowu hi vitaneriweke wona tanihi Vakriste. Ku wu amukela swi katsa ‘ku nga ha tihanyeli, kambe hi hanyela loyi a hi feleke.’ (2 Vakorinto 5:15) Ku tshama hi languta swikombiso leswikulu leswinene swi ta hi pfuna ku tirhisa vutomi bya hina hi ndlela leyi yo tinyiketela.

Swikombiso Leswikulu Swo Swi Languta

14. I xikombiso xihi lexi Yesu a xi lunghiseleleke?

¹⁴ Xikombiso lexi u faneleke ku xi languta ngopfu-ngopfu hi lexi Yesu a xi lunghiseleleke. Tanihi munhu la hetisekeke, a a ta va a ve xitsutsumi, xiyimbeleri, dokodela, kumbe qgweta lerikulu leri misava yi tshameke yi ri tiva. Kambe mianakanyo ya yena a yi kongomisiwe eka ku tsakisa Tata wakwe wa le tilweni, hambi loko Yesu a ha ri muntshwa. (Luka 2:42-49) Endzhakunyana u te: “Ndzi fanele . . . ndzi ya twarisa Evangeli ya Mfumo wa Xikwembu, hikuva ndzi rhumeriwe swona.” (Luka 4:43) Eka ximumu lexi nga hundza papila leri nga eka magazini wa kereke lowu nge Ministry ri hlamuserile ri ku: “Muponisi wa hina u rhandze ku suka eka lavo tala, ivi A famba hi yindlu na yindlu—a hlota mimoya. Muhlaleri un’we wa moya a ku ri ntsako wa Yena. Kutani a a ta chululela ntiyiso—rirhandzu ra Xikwembu.”—Luka 10:1-16.

15. (a) Ha yini ku chumayela hi yindlu na yindlu ku ri ntlhontlho? (b) I yini lexi kombisaka leswaku vutirheli bya yindlu na yindlu bya vantshwa bya humelela?

¹⁵ Entiyisweni, ku chumayela hi yindlu na yindlu a swi olovi. Swi lava dyondzo yo chivirika leswaku u twisisa mahungu lamanene ya Mfumo ni ntirho wo tala wo lunghiselela timhaka leti twalaka. Nakambe, ntirho lowu wu lava xivindzi, tanihi leswi vo tala va vini va tindlu va nga tsakeriki, naswona van’wana va kariha. Kambe, vutirheli bya yindlu na yindlu bya n’wina lavantshwa byi va ni vuyelo lebyi hlamarisaka, hi laha swi tshahiweke ha kona eka magazini wa kereke wa le Italy wa La Voce. Mutsari u te: “Mina, ndzi rhandza Timbhoni ta Yehova,” leti, u hlamuserile, “ti taka ni ku ku endzela ekaya.” U te: “Lava ndzi va tivaka va hava xisandzu, va vulavula kahle; nakambe i vanhu vo xonga naswona i vantshwa. Vuxongi ni vuntshwa, loko swi kombisiwa, i nkucetelo lowukulu.”

16. (a) Vantshwa va faneriwa hi ku bumabumeriwa eka ntirho wihi? (b) Xana nhlengeletano ya Timbhoni ta Yehova yi nga ringanisiwa ni tikereke eka ku endla ntirho wa nkoka ngopfu emisaveni hi ndlela yihi?

¹⁶ Entiyisweni, n’wina vantshwa lava mi amukelaka Kriste tanihi xikombiso xa n’wina mi faneriwa hi ku bumabumeriwa! Ku tlula 12 000 wa vantshwa lava nga ni malembe ya 25 ni le hansi, va le ntirhweni wa vuphayona eUnited States, naswona makume ya magidi ya lava va engetelekeke ya phayona kun’wana. (Psalma 110:3) Tiyiseka leswaku ku hava ntirho wun’wana lowu u nga wu endlaka lowu wu nga wa nkoka ngopfu! Hambi a ri mutsari eka magazini wa kereke lowu tshahiweke laha henhla u te: “Xikwembu xi ri ntirho lowu wu nga wa nkoka ngopfu i ku endza hi yindlu na yindlu—ku hlota mimoya,” kambe u ye emahlweni a ku, “U ri yini ehenhleni ka leswi? Xana i maendzo mangani lawa mina na wena hi ma endlaka? A ndzi vonanga vo tala va boxa muxaka wa ntirho lowu EVUTIRHELINI.” Xana hi nge tsaki leswi hi hlanganyelaka ni nhlengeletano leyi yi kandziyisaka xilaveko xo tekelela xikombiso xa Yesu xo chumayela?

17. Xana Timotiya u hetisise yini loko kahle-kahle a ha ri muntshwa, naswona i yini lexi kombisaka leswaku a a ta va a ha ri ntsongo ngopfu enkarhini wolowo?

¹⁷ Tanihi leswi leswi u nga ta swi endla evuton’wini bya wena swi kuceteriwaka ngopfu hi lava u va navelaka, kurisa ku navela loku nyikeriweke hi Timotiya lontshwa. Loko a velekiwile hi ku hatlisa emahlweni ka rifu ra Yesu, tanihi muntshwa Timotiya u siye ndyangu wa ka vona ivi a joyina muapostola Pawulo eka riendzo ra yena ra vumbirhi ra vurhumiwa. Tin’hweti ti nga ri tingani endzhakunyana ntlawa wu sindzise Pawulo na Silasi ku baleka eTesalonika, kambe hayi loko va nga si endla vadyondzisiwa. (Mintirho 16:1-3; 17:1-10, 13-15) Hi ku hatlisa endzhaku ka sweswo Pawulo u rhumele Timotiya endhawini yoleyo ya khombo leswaku a ya chavelela vadyondzisiwa lava emiringweni ya vona. (1 Vatesalonika 3:1-3) Entiyisweni Timotiya a a ri eku heleni ka malembe yakwe ya kondlo-a-ndzi-dyi enkarhini wolowo, tanihi leswi eka 12 kumbe 14 wa malembe endzhakunyana Pawulo a a ha vulavula ehenhleni ka “vuntshwa” bya yena. (1 Timotiya 4:12) Xana a wu naveli xivindzi, ku tinyiketela ka muntshwa wo tano?

18. Hikwalaho ka yini Pawulo a a ta rhuma Timotiya eKorinto?

¹⁸ Malembe ya ntlhanu endzhaku ka xiavelo xa Timotiya xo tiyisa vamakwavo eTesalonika, Pawulo u tsalele Vakorinto a ri aEfesa: “Hikokwalaho, ndza mi khongotela leswaku mi tekelela mina. Hi swona leswi endlaka leswaku ndzi mi rhumela Timotiya, . . . ú ta mi tsundzuxa mahanyele ya mina eka Kriste Yesu, hi laha ndzi ma dyondzisaka ha kona hinkwako.” (1 Vakorinto 4:16, 17) Muntshwa Timotiya, ana se a a tirhe malembe ya ntlhanu na Pawulo, a a tolovelane swinene ni tindlela ta Pawulo to dyondzisa. A a tiva ndlela leyi Pawulo a vekeke rungula ha yona aEfesa, ku katsa ni ndlela leyi a va dyondziseke ha yona “erivaleni ni le mindyangwini.” (Mintirho 20:20, 21) Loko a leteriwe kahle etindleleni to tano to chumayela mawaku mpfuno lowunene lowu Timotiya a a ta va wona emabandlheni!

19. Xana Pawulo u vule yini ehenhleni ka Timotiya eka melembe lama tlulaka khume endzhaku ka loko va sungule ku tirha swin’we?

¹⁹ Malembe yan’wana ya ntlhanu kumbe tsevu ya hundza, naswona Pawulo u le khotsweni eRhoma. Timotiya, loyi yena a ha ku ntshunxiwaka sweswinyana ekhotsweni, u na yena. (Vaheveru 13:23) Anakanya xivono: Kahle-kahle a tirhisa Timotiya tanihi matsalani wakwe, Pawulo u rhekhoda papila leri yaka eka Vafilipiya. A vulavula hi ku anakanyisisa, Pawulo u ya emahlweni a ku: “Ndzi ni ku tshemba eka Hosi Yesu leswaku ku nga ri khale ndzi ta rhuma Timotiya a ta le ka n’wina, . . . Ndzi hava un’wana loyi a fanaka na yena, loyi a hisekelaka ku mi pfuna hi mbilu hinkwayo ya yena. . . . Kambe ku tshembeka ka Timotiya ma ku tiva, ni hi laha a nga tirhisana na mina ha kona entirhweni wa Evangeli, a fana ni n’wana la tirhaka swin’we ni tata wa yena.”—Vafilipiya 1:1; 2:19-22.

20. I yini lexi endlaka Timotiya a va xikombiso lexi navelekaka ngopfu eka vantshwa?

²⁰ Entiyisweni, Timotiya lontshwa i xikombiso lexi navelekaka! A a ri munghana wa ntiyiso, la tshembekaka eka Pawulo, a xaniseka na yena eka hinkwaswo, a n’wi seketela entirhweni wo chumayela, naswona a swi lava ku tirha hambi ku ri kwihi laha a a rhumiwa kona. U nyikele leswi vuriwaka vutomi lebyi tolovelekeke ekaya, kambe mayana ntsako ni ku aneriseka ka vutomi byakwe leswi ntirho wa Xikwembu wu n’wi tiseleke swona! Timotiya hakunene a a ‘nga ha tihanyeli, kambe a a hanyela Kriste loyi a n’wi feleke.’ (2 Vakorinto 5:15) Xana u susumeteriwa ku tekelela xikombiso xa yena?

Hanyela Misava Leyintshwa Ya Xikwembu

21. Ha yini hi nga vulaka leswaku Timotiya a a ri na mianakanyo ya moya?

²¹ Entiyisweni, Timotiya a a hanyela misava leyintshwa ya Xikwembu. A a nga anakanyi hi swilo swa nkarhi wolowo ntsena kambe hi ku tirhisa vutomi byakwe leswaku a humesa mimpfuno leyi nga heriki. (Matewu 6:19-21) Tanihi leswi Tata wa Timotiya a a ri Mugriki naswona kahle-kahle a a nga ri mupfumeri, a nga ha va a khutaze Timotiya ku phikelela dyondzo leyi tlakukeke ni ntirho wa vutomi wa misava. Kambe hikwalaho ka ku letela ka vukwembu loku humaka eka mana wakwe ni kokwa wakwe, vutomi bya Timotiya a byi phutseriwe hi bandlha ra Vukriste. U phikelele timhaka ta moya, kahle-kahle u titshamele yexe nkarhi wo lehanyana, kutani a fanelekela ku tirha na muapostola Pawulo.—2 Timotiya 1:5.

22. Xana broxara ya School yi tlakusa mahanyelo lama fanaka ni ya Timotiya namuntlha hi ndlela yihi?

²² Ku vuriwa yini ha wena? Xana u ta tirhisa vuntshwa bya wena hi ndlela leyi Timotiya a endleke ha yona? Broxara leyi nge School and Jehovah’s Witnesses a yi kombetela eka mahanyelo yo tano loko yi hlamuserile malunghana ni vantshwa va Timbhoni yi ku: “Pakani ya vona leyikulu evuton’wini i ku tirha tanihi mutirheli wa Xikwembu hi laha ku humelelaka, naswona va tlangela ku dyondza tanihi mpfuno eka mhaka yoleyo. Kutani hi ntolovelo va hlawula tidyondzo leti pfunaka ku va seketela emisaveni ya manguva lawa. Xisweswo, vo tala va nga ha teka tidyondzo ta nkarhi wo wisa kumbe va va kona exikolweni xa nkarhi wo wisa. Loko va tshika xikolo va navela ku kuma ntirho lowu wu nga ta va pfumelela ku heta nkarhi wo tala wa nkarhi wa vona wo wisa lowukulu, vutirheli bya Vukriste.”

23. Ha yini swi fanele swi nga nonon’hwi eka vantshwa va Vakriste ku hlamula xivutiso lexi nge, Ndzi ta endla yini hi vutomi bya mina?

²³ Eka wena loyi hakunene u tlangelaka leswi Yehova Xikwembu ni N’wana wa yena va ku endleleke swona, swi nge ku nonon’hweli ku hlamula xivutiso lexi nge, Ndzi ta endla yini hi vutomi bya mina? Ematshan’wini yo tihanyela ni ntsako wa munhu hi xiyexe, u ta tirhisa vutomi bya wena ku endla ku rhandza ka Xikwembu. U ta hanya, hi laha Timotiya a endleke ha kona, tanihi munhu wa moya.

Swivutiso Swa Mpfuxeto

◻ Ha yini Vakriste va nga fanelanga ku rhangisa mintirho-vutomi ya misava evuton’wini?

◻ I xitsundzuxo xihi xo hoxa lexi van’wana va xi nyikeke, kambe hi nga dyondza yini eka nhlamulo ya Yesu eka Petro?

◻ Yesu na Timotiya va lunghiselele swikombiso leswinene ngopfu eka vantshwa hi tindlela tihi?

◻ I yini leswi katsekaka eka ku va ni mianakanyo ya moya?

[Xifaniso lexi nga eka tluka 12]

Luka, hambi leswi a a ri dokodela la leteriweke, u rhangise timhaka ta Vukriste evuton’wini