Swivutiso Swa Vahlayi

◼ I yini ‘mbewu ya Xikwembu’ leyi vuriwaka eka Malakia 2:15?

Ndzimana leyi yo bohana xiphemu xa yona xi hlayekisa leswi: “A ku na uṅwe I’a nga endlisaka ŝeŝo, loko ku anakanya ku sele ka yena. Kambe i yini loko uṅwe o endle ŝeŝo? A lav̌e mbewu e ka Šikwembu.” “Mbewu” hi laha ku twalaka yi vula rixaka ra Israyele wa khale, leri enkarhini lowu ndzimana leyi yi tsariweke hi wona a ri ri ekhombyeni ra ku thyakisiwa ka vukhongeri.

Malakiya u profetile enkarhini wa ku onhaka ka mahanyelo ya tiko. Vavanuna van’wana va Israyele a va nga teki ‘vanhwanyana va swikwembu swimbe tanihi vavasati’ ntsena kambe a va cukumeta vasati va vona va xiviri va Vayuda, ‘vasati va vuntshwa bya vona,’ leswaku kumbexana va teka vasati lavantsongo va vahedeni. Kambe, a hi hinkwavo vavanuna va Israyele va endleke ‘swilo leswi swa manyala.’ (Malakia 2:11, 13, 14; Deuteronoma 7:3, 4) Kahle-kahle loko a kombetela eka vanhu lava aleke ku tshova ntwanano wa vona wa vukati ni vagandzeri-kulobye va Yehova, Malakiya u tsarile: “A ku na uṅwe I’a nga endlisaka ŝeŝo, loko ku anakanya ku sele ka yena.”

Ku “anakanya” i moya lowo kwetsima wa Xikwembu, lowu xi wu cheleke eka tiko. Hambi swi ri tano, Vaisrayele lava nga yingisiki, a va kaneta, naswona a va hlundzukisa moya wolowo. (Esaya 63:10; Mintirho 7:51-53; ringanisa Vaefesa 4:30.) Vayuda van’wana a va tshembeka eka milawu ya Xikwembu, naswona hi ku yingisa ka vona va hlayise leswi ‘saleke swa moya.’ Vagandzeri lava vo tshembeka a va nga lavi ku titsakisa ka vona vini ka vutianakanyi. Hi munhu wo tano, Malakiya u tsarile: “Kambe i yini loko uṅwe ntsena o endle ŝeŝo? A lav̌e mbewu e ka Šikwembu.” “Mbewu” leyi a ku ri rixaka ra Israyele wa khale, leri Malakiya a vuleke leswaku ‘ri tumbuluxiwe hi Xikwembu.’ ‘Ku tumbuluxa’ loku ku humelele loko Yehova a nghenise Vaisrayele eka ntwanano na yena eNtshaveni ya Sinayi, a va endla ‘rifuwo rakwe ro hlawuleka’ ni “tiko leri hlawuriweke.” “Mbewu” ya ntiyiso ya Abrahama leyi a yi ta katekisa vanhu va misava hinkwayo a yi ta ta hi tiko leri.—Malakia 2:10; Eksoda 19:5, 6; Genesa 22:18.

Hambi swi ri tano, Vaisrayele a va fanele ku hlayisa vukhongeri byi tengile hi ku nga tekelani ni vanhu va matiko lama a ma nga gandzeli Yehova. Ku delela Xikwembu ka vanhu vo tano a ku ta onha, tanihi leswi ku nga voniwaka eka xiyimo xa nkarhi wa Ezra. Kutani Vaisrayele va ‘teke vanhwanyana van’wana va vona [vamatiko lama va rhendzeleke] va va tekanisa ni majaha ya vona, kutani rixaka ra ku kwetsima, ri [ve]leri hlanganisiweke ni vamatiko.’ (Ezra 9:2) ‘Vubihi lebyi byikulu’ lebyi fanaka byi humelele enkarhini wa masiku ya Nehemiya, ntangha ya Malakiya. Vavanuna va Vayuda lava tshembekaka eka Xikwembu va vone khombo ra le rivaleni ra moya eka vona ni le ka vana lava velekiweke eka nhlangano wo tano. A ku ri na khombo ro susiwa eka vugandzeri bya Yehova hi wansati loyi a nga tinyiketangiki eka Yena. Nehemiya u vike leswaku exikarhi ka Vayuda volavo lava tekeke vamatiko, ‘ku hava vana va vona lava a va tiva ku vulavula Xiyuda.’—Nehemia 13:23-27.

Vayuda lava nga tshembekiki a va lava ntsako wa vona vini ku nga khathariseki ku onhaka ka vun’we bya vukhongeri eka rixaka ra vona, ‘mbewu ya Xikwembu.’ A swi hlamarisi leswi Malakiya a tsundzuxeke: “Tiv̌oneleni e mimoyeni ya ṅwina; u nga ṭhuki u endla hi ku kanganyisa wansati wa v̌untŝha bya wena.” (Malakia 2:15) Vayuda lava tshembekaka va rindze mimoya ya vona, kumbe langutelo, leswaku va tshama va tshembekile eka vasati va vona va Vayuda. Vavanuna lava va vone nkoka lowu tlakukeke wa ku tenga ka vukhongeri bya “tiko leri hlawuriweke” ra vona. A va navela leswaku vana va vona va hlaya Rito ra Xikwembu ivi va kula va rhandza Yehova, swi tiyisa vukhongeri bya rixaka.

Vakriste lava tinyiketeke namuntlha va fanele ku va ni xihatla lexi fanaka eka mimoya ya vona, kumbe langutelo ro fuma. Loko va tekile, vanhu lava va fanele ku papalata ku cukumeta vanghana va vona hi ku kanganyisa. Kutani Mukriste la nga yexe u fanele ku hlayisa xitsundzuxo xa muapostola Pawulo xo teka ‘ntsena eHosini,’ a nghenela vukati ni mbhoni yin’wana leyi tinyiketeke, leyi khuvuriweke ya Yehova.—1 Vakorinto 7:39.