Ku Titshamela-wexe—Ndlela Leyi Vuyerisaka Ya Vutomi
“O nṭhunšekile; a nga tekana ni loyi a ṅwi ranḍaka, kambe a ku v̌e e Hosini. Hambi ŝi ri tano, hi nomu wa mina, nḍi ri: Loko a tiṭhamela ntsena, a nga ṭaka ku tlurisa.”—1 VAKORINTO 7:39, 40, Bibele ya Xitsonga.
1. Hambi hi titshamela hexe kumbe hi tekile, xana hi kolota Yehova yini?
YEHOVA u faneriwa hi vugandzeri bya moya hinkwawo eka hinkwavo lava tinyiketeleke eka yena. Hambi hi tekile kumbe hi titshamela hexe, hi fanele ku rhandza Xikwembu hi mbilu ya hina hinkwayo, moya, mianakanyo ni matimba. (Marka 12:30) I ntiyiso, Mukriste la titshameleke yexe u ni swihinganyeto swintsongo ku tlula lava hlanganisiweke exibohweni xa vukati. Kambe xana nandza la nga nghenangiki evukatini wa Yehova a nga tsaka hakunene?
2, 3. (a) Entiyisweni, xana Pawulo u te yini eka 1 Vakorinto 7:39, 40? (b) I swivutiso swihi leswi lavaka ku khathaleriwa?
2 Muapostola Pawulo u hlamula a ku ina. Mayelana ni lava va tshameke va teka kambe lava swiyimo swa vona swi cinceke, u tsarile a ku: “Wansati ú bohiwile eka nuna wa yena loko nuna a ha hanya; kambe loko nuna wa yena a fa, ú ntshunxekile, a nga ha tekiwa hi loyi a lavaka ku tekiwa hi yena, [kambe a ku ve eHosini]. Hambi swi ri tano, a swi ta antswa eka yena loko a titshamela ntsena a nga tekiwi; sweswo i miehleketo ya mina, naswona ndza kholwa leswaku na mina ndzi ni Moya wa Xikwembu.”—1 Vakorinto 7:39, 40.
3 Tanihi leswi Pawulo a kombisaka leswaku vanhu lava titshameleke voxe va nga tsaka, i vamani lava va nga ha xiyisisaka ku titshamela voxe kahle, kumbexana nkarhinyana lowuntsongo? I yini lexi vangaka ntsako wa Vakriste lava nga tekangiki? Hakunene, xana ku titshamela wexe ku nga va ndlela leyi vuyerisaka ya vutomi hi ndlela yihi?
Malembe Lama Vuyerisaka Ya Ku Titshamela-wexe
4. I yini leswi nga ntiyiso hi malembe ya vujaha ni vunhwana?
4 Solomoni Hosi ya vutlhari u khutazile a ku: “Anakanya Muv̌umbi wa wena hi masiku ya v̌untŝha bya wena, ku nga si ta masiku ya khombo [ya vudyuhari], ku nga si fika ni malembe lawa u nga ta v̌ula ha wona, u ku: A nḍa ha ṭakisiwi ha wona.” (Eklesiasta 12:1) Malembe ya vujaha ni ya vunhwana hi ntolovelo i nkarhi wa matimba lama xiyekaka ni rihanyo lerinene. Kutani, swi fanela swonghasi leswaku swilo leswi swi tirhisiwa entirhweni wa Yehova handle ka ku kavanyetiwa! Ku tlula kwalaho, malembe lawa yo sungula i nkarhi wo kuma ntokoto evuton’wini, wo kurisa matimba. Kambe lowu nakambe i nkarhi lowu vantshwa va misava va tokotaka nyanyuko. Hi xikombiso, xiya mimbuyelo ya nkambisiso lowu katsaka 1 079 wa vanhu exikarhi ka malembe ya 18 na 24. Va ve ni avhareji ya “mintokoto leyi nyanyulaka” ya nkombo ha un’we-un’we naswona nkarhi na nkarhi va vule leswaku ntokoto wa vona wa sweswinyana a ku ri rirhandzu ra ntiyiso, hayi nyanyuko.
5. Malunghana ni vukati, i swivutiso swihi swa munhu hi xiyexe leswi muntshwa a faneleke ku swi khathalela?
5 Tinhlayo ta ku hambana, ku dlaya vukati ni mindyangu leyi hahlukeke swi kombisa ku nga khutaziwi ka vukati bya xihatla. Ematshan’wini yo tsutsumela ku gangisana, ku tolovelana ni xiboho xa vukati, Vakriste lavantshwa va endla kahle ku ehleketa hi ndlela leyi va nga tirhisaka malembe ya vona yo sungula entirhweni lowu nga kavanyetiwangiki wa Yehova hi ku kongoma. Loko u kambisisa swiyimo swa wena tanihi muntshwa, u nga ha vutisa swivutiso swo tanihi leswi kahle: Manuku xana ndzi kurile emintlhavekweni naswona ndzi tiyimisele ku anakanya hi xiboho xa vukati hi xiviri? Xana ndzi ni ntokoto lowu aneleke evuton’wini leswaku ndzi va munghana lonene wa vukati? Xana ndzi nga rhwala vutihlamuleri bya vukati naswona kahle-kahle bya ndyangu lowu nga ni vana kahle? Hikwalaho ka ku tinyiketela ka mina eka Yehova, xana a ndzi fanelanga ku n’wi nyika matimba ni ntamu wa vuntshwa handle ka swihinganyeto leswi yelanaka ni vukati?
Mimbuyelo Ya Ku Titshamela-wexe Loku Tengeke
6, 7. (a) I mimpfuno yihi yin’wana leyi hi ntolovelo yi tsakeriwaka hi Vakriste lava nga nghenangiki evukatini? (b) Malunghana ni leswi, i yini leswi murhumiwa la nga tekangiki eAfrika a swi vuleke?
6 Vakriste lava nga nghenangiki evukatini va tsakela ntshunxeko eka ku kavanyetiwa naswona va nga kuma ‘swo tala swo swi endla entirhweni wa Hosi.’ (1 Vakorinto 7:32-34; 15:58) Ematshan’wini yo yisa mianakanyo eka munhu un’we wa rimbewu leri hambaneke, munhu la titshamelaka yexe u ni minkarhi yo tala yo kula eka rirhandzu ra Vukriste eka vo tala ebandlheni, ku katsa ni lava dyuhaleke ni van’wana lava lavaka mpfuno wa rirhandzu. (Psalma 41:1) Hi ntolovelo, vanhu lava titshameleke voxe va ni nkarhi lowu engetelekeke wo dyondza ni ku anakanyisisa hi Rito ra Xikwembu. (Swivuriso 15:28) Va ni nkarhi lowukulu ngopfu wo hlakulela vuxaka lebyikulu na Yehova, va dyondza ku titshega hi yena ni ku lava vukongomisi bya yena hi laha ku heleleke. (Psalma 37:5; Vafilipiya 4:6, 7; Yakobo 4:8) Wanuna la nga tekangiki la tirheleke Yehova hi malembe yo tala tanihi murhumiwa eAfrika u te:
7 “Vutomi eswimitanini swa Afrika a byi olova emalembeni lawa, ku ri hava swihinganyeto swo tala ngopfu swa nhluvuko wa manguva lawa. Ku ri hava swihinganyeto leswi, ndzi ve ni nkarhi lowu engetelekeke wo dyondza ni ku anakanyisisa hi Rito ra Xikwembu. Leswi swi ndzi hlayise ndzi tiyile. Ina, vutomi bya vurhumiwa byi ve nkateko ni nsirhelelo wa xiviri ku lwisana ni swilo leswi vonekaka. Eka madyambu lama tsakisaka ya ku hisa ku ve ni nkarhi lowunene wo anakanyisisa ni ku ehleketa hi ntumbuluko wa Yehova ni ku tshinela ekusuhi ka yena. Ntsako wa mina lowukulu ngopfu wu ta madyambu man’wana ni man’wana loko mianakanyo ya mina ya ha phaphamile, naswona loko ndzi ri ndzexe ndzi nga heta nkarhi wo karhi ehansi ka matilo lama nga ni tinyeleti ndzi famba ni ku vulavula na Yehova. Leswi swi ndzi tshinete ekusuhi na Yehova.”
8. Malunghana ni ku titshamela-wexe, i yini leswi vuriweke hi makwerhu wa xisati la nga tekiwangiki la nga ni malembe yo tala ya ntirho eyindlu-nkulu ya Sosayiti?
8 Nakambe, leswi xiyekaka i nhlamuselo ya makwerhu loyi wa xisati la titshameleke yexe la nga ni malembe yo tala ya ntirho eyindlu-nkulu ya Sosayiti ya Watch Tower loyi a nge: “Ndzi hlawule ku hanya vutomi byo titshamela ndzexe entirhweni wa mina eka Yehova. Xana ndzi va ni xivundza? Doo. Hakunene, minkarhi ya mina ndzi ri ndzexe yi le xikarhi ka yin’wana yo vangama ngopfu. Ndzi nga vulavula na Yehova hi xikhongelo. Ndzi nga tsakela ku anakanyisisa ni dyondzo ya munhu hi xiyexe handle ka ku kavanyetiwa. . . . Ku titshamela ndzexe a swi engetelanga swintsongo entsakweni wa mina.”
9. I malunghelo wahi man’wana ya ntirho lama Mukriste la titshamelaka yexe a nga ha swi kotaka ku ma tsakela?
9 Munhu loyi a titshamelaka yexe nakambe a nga amukela malunghelo ya ntirho lawa ya nga va pfulekeriki vanhu lava tekaneke lava nga ni vutihlamuleri bya ndyangu. Hi xikombiso, ku nga ha va ni minkarhi yo nghenela vutirheli bya nkarhi hinkwawo tanihi phayona endhawini leyi xilaveko xa vahuweleri va Mfumo xi kuleke eka yona. Kumbe jaha leri nga tekangiki ri nga ha va ni lunghelo ro tirha tanihi xirho xa ndyangu wa Bethele eyindlu-nkulu kumbe ehofisini ya rhavi ya Sosayiti ya Watch Tower. Wansati lontshwa la nga tekiwangiki a nga ha swi kota ku joyina makwerhu wa xisati la kuleke la titshameleke yexe entirhweni wa vuphayona ebandlheni ra ka vona kumbe rin’wana leri nga ni nsimu leyi lavaka ku hlanganisiwa. Ha yini u nga kaneli timhaka to tano ni mulanguteri wa xifundza? Tanihi Mukriste la nga nghenangiki evukatini, tiendle la kumekaka eka ntirho lowu engetelekeke leswaku u dzunisa Yehova naswona u ta ku katekisa hi xitalo.—Malakia 3:10.
Swikombiso Swa Khale
10. I mani la nyikeleke xikombiso lexikulu xa nandza wa Yehova la nga tekangiki, naswona ha yini u ehleketa leswaku ku titshamela yexe ka yena a ku ri loku pfunaka?
10 Xikombiso lexikulu xa nandza la nga tekangiki wa Yehova a ku ri Yesu Kriste. A a godzomberiwe hi ku endla ku rhandza ka Xikwembu hi laha ku heleleke. Yesu u te: “Swakudya swa mina, i ku endla ku rhandza ka Loyi a ndzi rhumeke, ni ku heta ntirho wa yena swinene.” (Yohane 4:34) A a ri bizi swonghasi—a chumayela, a hanyisa lava vabyaka ni swin’wana! (Matewu 14:14) Yesu a a tsakela vanhu hi xiviri naswona a a chavelela eka vavanuna, vavasati ni vana. Hakunene, u famba-fambile hi vutirheli byakwe, van’wana va fambe na yena eka swiendlakalo swin’wana. (Luka 8:1-3) Kambe ntirho wolowo a wu ta nonon’hwa ngopfu swonghasi loko a a heleketiwa hi wansati ni vana lavantsongo! Handle ko kanakana, ku titshamela-wexe a wu ri mpfuno emhakeni ya Yesu. Namuntlha, Mukriste la titshameleke yexe a nga ha tsakela mimpfuno leyi fanaka, ngopfu-ngopfu loko a rhamberiwe ku twarisa mahungu ya Mfumo etindhawini ta le kule kumbe ta khombo.
11, 12. I swikombiso swihi leswinene leswi tshaheriweke vavasati lava nga tekiwangiki lava tirhelaka Yehova namuntlha?
11 Kambe van’wana na vona va kuma ku titshamela-wexe swi pfuna ni ku vuyerisa. N’wana wa Yefta wa wanhwana u hetisise ku hlambanya ka tata wakwe hi ku tirhandzela hi ku titshamela yexe eka vandla leri kandziyisaka ngopfu vukati ni vana. U kume ntsako entirhweni wa yena eka Yehova, naswona swa xiyeka swonghasi leswaku van’wana va n’wi khutazile nkarhi na nkarhi. Ina, “hi malembe hikwawo, v̌anhwana v̌a Israel v̌a ya hi mune wa masiku hi lembe riṅwana ni riṅwana e ku ya yimbelela ṅwana Yefta, mu-Gilead”! (Vaavanyisi 11:34-40) Hi ku fanana, Vakriste lava tekeke ni van’wana va fanele ku bumabumela ni ku khutaza vavasati lava titshamelaka voxe lava tirhelaka Yehova namuntlha hi ku chivirika.
12 Mune wa vana va Filipi va tintombhi “va profetile.” (Mintirho 21:8, 9) Vavasati lava va nga tekiwangiki va fanele va kume ku aneriseka entirhweni wa vona lowu ngingiritekaka eka ku dzunisa Yehova. Hi ku fanana, vavasati vo tala lava titshamelaka voxe namuntlha va ni lunghelo leri vuyerisaka ro tirha tanihi maphayona, kumbe vahuweleri va Mfumo va nkarhi hinkwawo. Entiyisweni, va faneriwa hi ku bumabumeriwa tanihi xiphemu xa ‘vuthu lerikulu ra vavasati lava twarisaka mahungu lamanene.’—Psalma 68:11.
13. Xana mhaka ya Pawulo yi kombisisa ku yini leswaku ku titshamela-wexe ku nga va ndlela leyi vuyerisaka ya vutomi?
13 Muapostola Pawulo u kume ku titshamela-wexe swi pfuna. U fambe magidi-gidi ya tikhilomitara evutirhelini byakwe naswona u hlangavetane ni ku nonon’hweriwa lokukulu, makhombo yo tala, ku pfumala vurhongo, ndlala leyikulu. (2 Vakorinto 11:23-27) Handle ko kanakana, hinkwaswo leswi a swi ta nonon’hwa ni ku tshikelela loko Pawulo a a tekile. Ku tlula kwalaho, swi vonaka onge a a ta va a nga vanga ni malunghelo yakwe tanihi “muapostola wa vamatiko” loko a a kurisa ndyangu. (Varhoma 11:13) Ku nga khathariseki miringo leyi a hlangavetaneke na yona, Pawulo u ve ni vumbhoni bya munhu hi xiyexe bya leswaku ku titshamela-wexe ku nga va ndlela leyi vuyerisaka ya vutomi.
Swikombiso Swa Manguva Lawa
14. I mintokoto yihi leyi tsakeriweke hi makhaliphotiya, lava vunyingi bya vona a va ri lava titshameleke voxe?
14 Ku fana na Pawulo ni Vakriste van’wana vo rhanga lava nga tekangiki, nhlayo ya vanhu va Xikwembu lava hlanganyeleke entirhweni wa vukhalipotiya (ku sukela hi 1881 ku ya emahlweni) a va ri vanhu lava titshameleke voxe va ri hava mindyangu leyi titshegeke hi vona. Va yile emitini, emadorobeni ni le tindhawini ta le makaya leti nga tolovelekangiki hi ku tirhandzela, va lava lava nga ni timbilu letinene naswona va fambisa tibuku ta Bibele eka vona. Ku famba ku nga ha va hi xitimele, xikanyakanya, golonyi leyi kokiwaka hi tihanci, kumbe movha. Vo tala, va fambe hi yindlu na yindlu hi ku tsaka. (Mintirho 20:20, 21) “Minkarhi yin’wana a va xavisa [tibuku ta Bibele] hi ntshovelo wa le purasini, tihuku, murhu ni swin’wana ni swin’wana leswi a va ta swi tirhisa kumbe va swi xavisela van’wana,” ku tsundzuke mbhoni yin’wana ya Yehova, ya engetela yi ku: “Minkarhi yin’wana, endhawini leyi nga ni miti leyi hangalakeke, va etlele na van’wamapurasi ni varimi nivusiku, naswona minkarhi yin’wana a va etlela hambi ku ri eswitlatini . . . Vanhu lava vo tshembeka [lava vo tala va vona a va nga tekangi] va hambetile hi malembe na malembe ku kondza vudyuhari byi va fikela.” Entiyisweni, un’wana wa vona a a vulavulela makhalipotiya wolawo ya khale hinkwawo loko a tsarile a ku: “A hi ri vantshwa naswona hi tsakile entirhweni, hi tsakela ku tirhisa matimba ya hina eku tirheleni ka Yehova.”
15. Eka maphayona yo tala lama nga tekangiki, i nyangwa wihi lowu yisaka eka ntirho lowu engetelekeke lowu pfulekeke kwalomu ka 45 wa malembe lama hundzeke?
15 Maphayona yo tala, kumbe vahuweleri va Mfumo va nkarhi hinkwawo, va minkarhi ya sweswinyana na vona a va nga tekangi. Hakanyingi a va veka vumbhoni etindhawini ta le tlhelweni, va pfune ku sungula mabandlha lamantshwa, naswona va tsakele mikateko yin’wana entirhweni wa Yehova. Eka van’wana va vona, nyangwa lowu nyanyulaka lowu yisaka entirhweni lowukulu wu pfulekile loko Xikolo xa Bibele xa Watchtower xa Gilead xi sungula ku tirha hi 1943 loko Nyimpi ya Vumbirhi ya Misava ya ha karihile. (1 Vakorinto 16:9) Ina, vo tala va maphayona wolawo lama nga tekangiki va amukele ku leteriwa ka vurhumiwa exikolweni xa Gilead naswona hi ku hatlisa a va hangalasa rungula ra Mfumo etindhawini letintshwa. Va nga tikiwi hi vutihlamuleri bya vukati, va tiendle lava kumekaka entirhweni wa Yehova, naswona van’wana va mathwasana wolawo yo rhanga va ha titshamele voxe naswona va gingiriteka exivandleni xa vurhumiwa kumbe eswivandleni swin’wana swa ntirho wa nkarhi hinkwayo.
16. I vumbhoni byihi lebyi nga kona bya leswaku swirho leswi nga nghenangiki evukatini swa ndyangu wa Bethele swi kume ku titshamela-wexe ku ri ndlela leyi vuyerisaka ya vutomi?
16 Vakriste vo tala lava nga tekangiki va tirhe malembe yo tala tanihi swirho swa ndyangu wa Bethele eyindlu-nkulu ya Sosayiti ya Watch Tower kumbe emarhavini ya yona kun’wana emisaveni. Xana va kume ku titshamela wexe ku ri ndlela leyi vuyerisaka ya vutomi? Ina, hakunene. Hi xikombiso, makwerhu wa xinuna la titshameleke yexe loyi a tirheke eBethele ya le Brooklyn malembe yo tala u xiyile a ku: “Ntsako wa ku vona timiliyoni ta timagazini ni tibuku tin’wana leti tameleke rungula ra Rito ra Xikwembu ti hangalakela emakun’wini ya misava ku ve vuyelo lebyi hlamarisaka hi koxe.” Endzhaku ka malembe ya 45 ya ntirho wa le Bethele, makwerhu un’wana wa xinuna la nga tekangiki u te: “Masiku hinkwawo ndzi kombela mpfuno ni vutlhari byo tihlayisa ndzi hanyile emoyeni kun’we ni le nyameni naswona ndzi tiyile eka Tata wa hina la rhandzekaka wa le tilweni hi xikhongelo leswaku ndzi ta hambeta ndzi endla ku rhandza ka yena loko kwetsima. . . . Hakunene ndzi tsakele ndlela ya vutomi leyi tsakisaka, leyi vuyerisaka ni leyi katekeke.”
Ku Hlayisa Ku Titshamela-wexe Loku Tengeke
17. Hi yihi mimpfuno mimbirhi yo hlayisa ku titshamela-wexe loku tengeke?
17 Leswaku vutomi byo titshamela-wexe byi nga vuyerisa swi vonaka eka swikombiso swa Bibele ni swa manguva lawa. Kavula, eka nkarhi wihi na wihi lowu vutomi bya wena byi hetiwaka eka xiyimo xo titshamela-wexe, u fanele ku ‘tshama u tiyile embilwini ya wena.’ (1 Vakorinto 7:37) Kambe i yini lexi nga ku pfunaka ku hlayisa ku tenga loko u nga tekangi? Xihlovo lexikulu xa mpfuno i Yehova, “L’a yingisaka mikhongelo.” (Psalma 65:2) Kutani swi endle mukhuva ku n’wi kombela nkarhi na nkarhi. “Chivirikani eku khongeleni,” mi kombela moya wa Xikwembu ni mpfuno wa xona eka ku kombisa mihandzu ya wona, leyi katsaka ku rhula ni ku tikhoma. (Varhoma 12:12; Luka 11:13; Vagalatiya 5:22, 23) Kutani, nakambe hi langutelo ra xikhongelo, anakanyisisa nkarhi na nkarhi naswona u tirhisa xitsundzuxo xa Rito ra Xikwembu minkarhi hinkwayo.
18. Xana 1 Vakorinto 14:20 yi hlamusela ku tshama ka munhu a tengile tanihi munhu la titshameleke-wexe hi ndlela yihi?
18 Mpfuno wun’wana wo hlayisa ku titshamela-wexe loku tengeke i ku papalata xin’wana ni xin’wana lexi pfuxaka nyanyuko wa rimbewu. Entiyisweni, leswi swi katsa swifaniso swa vanhu lava nga ambalangiki ni ku tirivatisa loko biha. Pawulo u te: “Loko ku ri ka leswo biha mi fanele ku fana ni swihlangi, kambe mi va lava kuleke emiehleketweni.” (1 Vakorinto 14:20) U nga lavi vutivi kumbe ntokoto malunghana ni vubihi, kambe hi mpfuno wa Xikwembu tshama u nga ri na ntokoto naswona u tengile tanihi n’wana malunghana ni leswi hi vutlhari. Hi nkarhi lowu fanaka, tsundzuka leswaku rigangugangu ni swidyoho a swi fanelanga emahlweni ya Yehova.
19. I matsalwa wahi lama kombetelaka eka tindlela tin’wana to tshama u tengile tanihi munhu la titshamelaka yexe?
19 Nakambe u ta pfuniwa ku tshama u tengile tanihi munhu la nga tekangiki hi ku xiya swinakulobye swa wena. (1 Vakorinto 15:33) Papalata ku tolovelana ni lava va endlaka rimbewu ni vukati swilo leswikulu evuton’wini ni le mabulwini ya vona. Papalata mafenya layo biha hi tindlela hinkwato! Pawulo u tsundzuxile a ku: “Kutani vuoswi, ni thyaka hinkwaro, ni makwanga, a swi laveki, ni ku kumbuka swi nga kumbukiwi exikarhi ka n’wina. Mi nga tirhisi marito ya ku rhuketela, ni ya vuphukuphuku, ni ya mafenya, hikuva a ma laveki; tirhisani ntsena marito lama nkhensaka Xikwembu!”—Vaefesa 5:3, 4.
Vumundzuku Lebyi Vuyerisaka
20. Ku tirhisa malembe ya munhu ya ku titshamela-yexe hi ndlela leyinene entirhweni wa Yehova swi ta hetelela hi yini?
20 Ku tirhisa malembe ya wena tanihi Mukriste la nga tekangiki hi ndlela leyinene entirhweni wa Yehova ku ta tisa ku aneriseka ni ku rhula ka mianakanyo ka sweswi. Ku endla tano nakambe swi ta engetela ku kula ni ku tiya ka wena emoyeni. Loko u tshama u ri wexe hikwalaho ka mhaka ya Mfumo ku kondza ku hela mafambiselo lawa yo biha ya swilo, Yehova a nge ya rivali matshalatshala ya wena yo tinyiketela entirhweni wa yena wo hlawuleka.
21. Loko wo teka endzhaku ka nkarhi wo titshamela-wexe loku tengeke ni loku vuyerisaka, xana u nga ha nghenela xiboho xa vukati na yini?
21 Loko u phikelela timhaka ta Mfumo hi ku chivirika tanihi wanuna la nga tekangiki kumbe wansati la nga tekiwangiki, u ta tsakela mikateko leyo tala. (Swivuriso 10:22) Kutani loko wo teka endzhakunyana evuton’wini, u ta nghenela xiboho xa vukati hi ntokoto lowukulu ni xisekelo lexi fuweke xa moya. Ku tlula kwalaho, hi ku landzela xitsundzuxo xa Matsalwa, u ta hlawula munghana la hlayisaka vutshembeki la tinyiketeleke la nga ta ku pfuna ku tirhela Xikwembu hi ku tshembeka. Sweswi, u nga kuma ku titshamela-wexe ku ri ndlela leyi vuyerisaka ya vutomi entirhweni wa Yehova, Xikwembu xa hina xa rirhandzu.
Xana U Nga Hlamula Njhani?
◻ Exikarhi ka malandza ya Yehova, xana hi yihi mimbuyelo yin’wana ya ku titshamela-wexe loku tengeke?
◻ I swikombiso swihi swa Matsalwa leswi nga kona ku kombisa leswaku ku titshamela-wexe ku nga vuyerisa?
◻ Eminkarhini ya manguva lawa, i swikombiso swihi swa ku titshamela-wexe loku vuyerisaka leswi hi nga na swona?
◻ I yini lexi nga pfunaka Mukriste ku tshama a tengile loko a nga nghenanga evukatini?
[Bokisi leri nga eka tluka 19]
Mimpfuno Eku Hlayiseni Ka Ku Titshamela-wexe Loku Tengeke
◆ Khongelela moya wa Xikwembu ni mpfuno wa yena eku kombiseni ka mihandzu ya wona nkarhi na nkarhi
◆ Anakanyisisa naswona tirhisa xitsundzuxo xa Rito ra Xikwembu nkarhi na nkarhi
◆ Papalata swifaniso swa vanhu lava nga ambalangiki ni ku tirivatisa loko biha
◆ Xiyaxiya swinakulobye swa wena
◆ Papalata mabulo ya thyaka ni mafenya layo biha
[Swifaniso leswi nga eka tluka 18]
N’wana wa Yefta wa wanhwana, muapostola Pawulo ni malandza man’wana ya Yehova va kume ku titshamela-wexe ku ri ndlela leyi vuyerisaka ya vutomi. Xana u nga endla tano?