“Swi Amukele”

¹ Siku rin’wana loko Yesu a vulavula ni vadyondzisiwa va yena malunghana ni vukati, u vule leswaku ku titshamela wexe i ‘nyiko.’ Kutani a ku: “Loyi a nga swi amukelaka a a swi amukele.” (Mat. 19:10-12) Endzhaku ka malembe yo hlayanyana, muapostola Pawulo u tsarile a hlamusela ndlela leyi ku titshamela wexe swi vuyerisaka ha yona a tlhela a khutaza van’wana ku tekelela xikombiso xa yena xo ti tshamela yexe. (1 Kor. 7:7, 38) Namuntlha, vanhu vo tala va swi ‘amukerile’ ku titshamela voxe naswona va vuyeriwa. Hi tihi tindlela tin’wana leti va vuyeriwaka ha tona?

² Ku Tirha Handle Ko ‘Kavanyetiwa’: Pawulo u xiye leswaku ku titshamela wexe hi swona swi n’wi nyikeke nkarhi wo tirhela Yehovha a “nga rivatiwi hi nchumu.” Hilaha ku fanaka ni namuntlha, makwerhu la nga tekangiki a nga tivekela pakani yo ya eXikolweni xa Ndzetelo wa Vutirheli naswona munhu la nga tekangiki u ntshunxekile ku nghenela ntirho wa vuphayona, ku dyondza ririmi rimbe, ku ya tirha laha ku nga ni xilaveko lexikulu, ku ya tirha eBethele kumbe ku tirhisiwa eka mintirho yin’wana yo hlawuleka. A nga ha va ni nkarhi wo tala wo dzika eka dyondzo ya munhu hi xiyexe ni ku anakanyisisa ni ku vulavula na Yehovha hi xikhongelo lexi sukaka embilwini. Munhu loyi a nga byi nghenelangiki vukati hakanyingi u ni nkarhi wo tala wo pfuna van’wana. Mintirho leyi hinkwayo yi “pfuna” loyi a yi endlaka.—1 Kor. 7:32-35; Mint. 20:35.

³ Ku tirhela Xikwembu hi ndlela leyi, handle ko kavanyetiwa, swa vuyerisa swinene. Endzhaku ka malembe ya 27 a ri eKenya, makwerhu un’wana waxisati la nga tekiwangiki u tsarile a ku: “A ndzi ri ni vanghana vo tala ni ntirho wo tala wo wu endla! A hi endla swilo swin’we hi tlhela hi endzelana. . . . A ndzi kota ku tirhisa ntshunxeko lowu, lowu engetelekeke, wa ku titshamela ndzexe leswaku ndzi tshama ndzi khomekile hi ntirho wa nsimu naswona leswi swi ndzi tisele ntsako lowukulu.” U engeterile a ku: “Loko malembe ma ri karhi ma famba, vuxaka bya mina na Yehovha byi ye byi kula.”

⁴ Tirhisa Ku Titshamela Wexe Hi Ndlela Leyi Vuyerisaka: Yesu u vule leswaku munhu u fanele a hlakulela nyiko ya ku titshamela yexe “hikwalaho ka mfumo wa matilo.” (Mat. 19:12) Tanihi nyiko yin’wana ni yin’wana, ku titshamela wexe ku fanele ku tirhisiwa hi ndlela leyinene leswaku ku tisa ntsako ku tlhela ku vuyerisa. Hi ku wu tirhisa kahle nkarhi lowu vanhu va vaka na wona loko va titshamela voxe, ni ku titshega hi Yehovha leswaku va kuma vutlhari ni matimba, vanhu vo tala lava nga byi nghenelangiki vukati va sungule ku vona leswaku swa pfuna ku amukela nyiko leyi.