Ku Titshamela-wexe—Ndlela Yo Tirha Handle Ko Kavanyetiwa
“Mi tinyiketa ku tirhela Hosi, mi nga anakanyi swin’wana.”—1 VAKORINTO 7:35.
1. Xana i mahungu wahi lama nga tsakisiki, lawa Pawulo a ma kumeke malunghana ni Vakreste va le Korinto?
MUAPOSTOLA PAWULO a a karhateka hi xiyimo xa vamakwavo vakwe va Vakreste va le Korinto, eGreece. Emalembeni ya kwalomu ka ntlhanu emahlweninyana, a a simeke vandlha emutini wolowo lowu fuweke, lowu dumeke hikwalaho ka mahanyelo ya wona layo biha. Sweswi, kwalomu ka 55 C.E., loko a ha ri le Efesa, eAsia Minor, u kume swiviko leswi nga tsakisiki leswi humaka eKorinto, swa mintlawa leyi avanaka yi landzela vanhu ni ku pfumeleriwa ka mahanyelo layo biha. Ku tlula kwalaho, Pawulo u kume papila leri humaka eka Vakreste va le Korinto lava kombelaka nkongomiso malunghana ni vuxaka bya rimbewu, vunghwendzha, vukati, ku hambana ka vatekani ni ku nghenela vukati nakambe.
2. Xana mahanyelo layo biha, lawa a ma hangalakile eKorinto, ma va khumbe njhani Vakreste lava a va ri emutini wolowo?
2 Mahanyelo layo biha lawa a ma hangalakile emutini wa Korinto, a ma vonaka ma khumba vandlha ra ndhawu yoleyo hi tindlela timbirhi. Vakreste van’wana a va pfumelela moya wa mahanyelo yo biha ni ku amukela ku tikhoma ka manyala, ni ku tikhoma loko biha. (1 Vakorinto 5:1; 6:15-17) Handle ko kanakana, van’wana hi ndlela leyi a va angula ha yona eka mintsako leyi ya ku tikhoma loko biha hi tlhelo ra rimbewu, leyi a yi tate muti wolowo, va kale va bumabumela ni ku papalata rimbewu hi laha ku heleleke, hambi ku ri eka mimpatswa leyi tekaneke.—1 Vakorinto 7:5.
3. Xana hi tihi timhaka leti Pawulo a vulavuleke ha tona eku sunguleni epapileni ra yena leri yaka eka Vakorinto?
3 Epapileni ro leha leri Pawulo a ri tsaleleke Vakorinto, u sungule a vulavula hi xiphiqo xa ku pfumaleka ka vun’we. (1 Vakorinto, tindzima 1-4) U va khutaze ku papalata ku landzela vanhu, leswi nga yisaka eka vupambuki lebyi vavisaka. A va fanele va va ni vun’we tanihi ‘vatirhi-kulobye’ va Xikwembu. Kutani u va nyike swiletelo leswi kongomeke malunghana ni ndlela leyi va faneleke va hlayisa vandlha ri tshama ri basile emahanyelweni ha yona. (Tindzima 5, 6) Endzhaku ka sweswo muapostola u kambisise papila ra vona.
Ku Titshamela Wexe Swa Bumabumeriwa
4. Xana Pawulo a a vula yini loko a ku “swi lulamile loko wanuna a nga tivani ni wansati”?
4 U sungule hi ku: “Loko ti ri timhaka leti mi nga ndzi tsalela tona, ndzi nga ku: Swi lulamile loko wanuna a nga tivani ni wansati.” (1 Vakorinto 7:1) Xiga lexi nge “a nga tivani ni wansati” laha xi vula ku papalata ku hlangana ni wansati hi nyama leswaku u titsakisa hi rimbewu. Tanihi leswi Pawulo ana se a byi sorile vumbhisa, laha se a a vulavula hi vuxaka bya rimbewu elunghiselelweni ra vukati. Hikwalaho, laha Pawulo a a bumabumela xiyimo xa ku titshamela wexe. (1 Vakorinto 6:9, 16, 18; ringanisa Genesa 20:6; Swivuriso 6:29.) U ye emahlweni, a tsala: “Ndzi byela lava nga si tekaka kumbe ku tekiwa, ni tinoni, leswaku swi nga va swi sasekile eka vona loko va titshamela ntsena kukotisa mina.” (1 Vakorinto 7:8) Pawulo a a nga tekanga, kumbexana a a feriwe hi nsati.—1 Vakorinto 9:5.
5, 6. (a) Ha yini swi twisiseka leswaku Pawulo a a nga bumabumeli hanyelo ra vunghwendza? (b) Ha yini Pawulo a bumabumele ku titshamela wexe?
5 A swi kanakanisi leswaku Vakreste va le Korinto a va yi tiva filosofi ya Magriki, laha vanhu van’wana a va bumabumela ngopfu ku tilan’wa, kumbe ku titshika. Xana leswi swi nga ha va swi ri swona leswi endleke leswaku Vakorinto va vutisa Pawulo loko swi ‘fanerile’ leswaku Vakreste va papalata muxaka wihi na wihi wa vuxaka bya rimbewu? Nhlamulo ya Pawulo a yi nga kombisi langutelo ra filosofi ya Magriki. (Vakolosa 2:8) Ku hambana ni vafundhisi va Makhatoliki, ku hava laha a bumabumeleke vutomi bya ku tilan’wa, bya ku tshama endlwini ya tinghwendza kumbe endlwini ya tinani onge hi loko vanhu lava nga nghenelangiki vukati a va kwetsime ngopfu, naswona a va ta hoxa xandla eka ku ponisiwa ka vona vini hikwalaho ka mahanyelo ni swikhongelo swa vona.
6 Pawulo u bumabumele ku titshamela wexe “hikwalaho ka maxangu ya minkarhi leyi.” (1 Vakorinto 7:26) Kumbexana a a kombetela eminkarhini yo nonon’hwa leyi Vakreste a va langutane na yona, leyi a yi ta tlhela yi engeteriwa hi vukati. (1 Vakorinto 7:28) Xitsundzuxo xa yena eka Vakreste lava nga nghenelangiki vukati, hi lexi: “Swi nga va swi sasekile eka vona loko va titshamela ntsena kukotisa mina.” Eka lava feriweke hi vasati va vona, u te: “Xana a wu na nsati? U nga lavi nsati.” Malunghana ni Mukreste loyi a nga noni, u tsarile a ku: “A swi ta antswa eka yena loko a titshamela ntsena a nga tekiwi; sweswo i miehleketo ya mina, naswona ndza kholwa leswaku na mina ndzi ni Moya wa Xikwembu.”—1 Vakorinto 7:8, 27, 40.
A Swi Bohi Leswaku Munhu A Tshama A Nga Ngheneli Vukati
7, 8. I yini lexi kombisaka leswaku Pawulo a a nga sindzisi Mukreste wihi na wihi leswaku a nga ngheneli vukati?
7 A swi kanakanisi leswaku moya lowo kwetsima wa Yehovha a wu kongomisa Pawulo loko a nyikela ndzayo leyi. Mhaka ya yena hinkwayo ya vunghwendza ni vukati, yi kombisa ku ringanisela ni xirhalanganya xa kona. A nga swi endlanga mhaka ya ku tshembeka kumbe ku nga tshembeki. Ematshan’wini ya sweswo, i mhaka ya ku tihlawulela ka munhu, ni ku pfumelela ku nga ngheneli vukati eka lava nga swi kotaka ku tshama va tengile eka xiyimo xo tano.
8 Endzhakunyana ko vula leswaku “swi lulamile loko wanuna a nga tivani ni wansati,” Pawulo u engeterile: “Kambe hikwalaho ka leswi vuoswi byi nga tala, wanuna un’wana ni un’wana a a ve ni nsati loyi a nga wa yena, ni wansati un’wana ni un’wana a a ve ni nuna loyi a nga wa yena.” (1 Vakorinto 7:1, 2) Endzhaku ko byela vanhu lava nga nghenelangiki vukati ni tinoni leswaku “va titshamela ntsena kukotisa mina,” ku nga ri kungani u engeterile a ku: “Kambe loko va tsandzeka ku tikhoma, a va teke kumbe ku tekiwa, hikuva swa antswa ku teka kumbe ku tekiwa, ku tlula ku hisiwa hi ku navela.” (1 Vakorinto 7:8, 9) Nakambe, xitsundzuxo xa yena eka lava feriweke hi vasati va vona a xi ku: “U nga lavi nsati. Hambiswiritano, loko u teka, a wu dyohi.” (1 Vakorinto 7:27, 28) Xitsundzuxo lexi lexi ringaniseriweke xi kombisa ntshunxeko wo tihlawulela.
9. Hi ku ya hi Yesu na Pawulo, xana vukati ni ku titshamela wexe, i tinyiko leti humaka eka Xikwembu hi ndlela yihi?
9 Pawulo u kombise leswaku ku nghenela vukati ni ku titshamela wexe, hinkwaswo i tinyiko leti humaka eka Xikwembu. “A ndzi ta navela leswaku hinkwavo vanhu va nga fana na mina! Kambe un’wana ni un’wana ú ni nyiko leyi nga ya yena, leyi humaka eka Xikwembu, un’wana hi ndlela yo karhi, un’wana hi ndlela yo karhi.” (1 Vakorinto 7:7) A swi kanakanisi leswaku a ehleketa leswi vuriweke hi Yesu. Endzhaku ko vula leswaku vukati byi huma eka Xikwembu, Yesu u kombise leswaku ku titshamela wexe hi ku tirhandzela hikwalaho ka swilaveko swa Mfumo i nyiko yo hlawuleka: “A hi hinkwavo lava va nga amukelaka mhaka leyi, kambe yi nga amukeriwa ntsena hi lava va nyikiweke swona. Ku ni vatsheniwa lava nga velekiwa va ri tano emakhwirini ya vamana wa vona; ku ni vatsheniwa lava nga endliwa vatsheniwa hi vanhu; naswona ku ni lava nga titshena hi voxe hikwalaho ka Mfumo wa matilo. Loyi a kotaka ku amukela mhaka leyi, a a yi amukele!”—Matewu 19:4-6, 11, 12.
Ku Amukela Nyiko Ya Ku Titshamela Wexe
10. Xana munhu a nga yi ‘amukela’ njhani nyiko ya ku titshamela yexe?
10 Loko Yesu na Pawulo va vulavule hi ku titshamela wexe tanihi “nyiko,” a va nga vuli swona leswaku i nyiko leyi kumiwaka hi singita leyi nga ya vanhu vo karhi ntsena. Yesu u vule leswaku “a hi hinkwavo lava va nga amukelaka” nyiko yoleyo, naswona u khutaze lava nga swi kotaka ku endla tano leswaku va yi ‘amukela,’ ku nga leswi Yesu na Pawulo va swi endleke. Entiyisweni, Pawulo u tsarile a ku: “Swa antswa ku teka kumbe ku tekiwa, ku tlula ku hisiwa hi ku navela,” kambe a a vulavula hi lava “tsandzeka[ka] ku tikhoma.” (1 Vakorinto 7:9) Eka matsalwa yo sungula, Pawulo u kombise leswaku Vakreste va nga ku papalata ku hisiwa hi ku navela. (Vagalatiya 5:16, 22-24) Ku famba hi moya swi vula ku pfumelela moya wa Yehovha wu kongomisa goza rin’wana ni rin’wana ra hina. Xana vantshwa va Vakreste va nga swi kota ku endla leswi? Ina, loko va landzelela Rito ra Xikwembu swinene. Mupisalema u tsarile: “E džaha [kumbe nhwana] ri ta tengisa ku yini ku famba ka yena šana? Hi loko a ku šašameta ni rito ra wena.”—Pisalema 119:9.
11. Xana ‘ku famba hi ku pfumelelana ni moya’ swi vula yini?
11 Leswi swi katsa ku tivonela eka mianakanyo ya vutilawuri leyi haxiwaka hi minongonoko yo tala ya TV, tibayisikopo, swihloko swa timagazini, tibuku ni marito ya tinsimu. Mianakanyo yo tano yi voyamele eka swa nyama. Muntshwa wa Mukreste wa rimbewu rihi kumbe rihi loyi a lavaka ku amukela mhaka ya ku titshamela yexe, u fanele a “landza swa Moya, [a] kota ku yingisa hi ku hetiseka swileriso leswo lulama swa Nawu. Hikuva lava hanyaka hi ku yingisa ntumbuluko wa laha misaveni, va ni mianakanyo leyi fumiwaka hi swa ntumbuluko lowu; kambe lava hanyaka hi ku yingisa Moya, va ni mianakanyo leyi fumiwaka hi swa Moya.” (Varhoma 8:4, 5, xiitaliki i xerhu.) Swilo wa moya swi lulamile, swi tengile, swa rhandzeka, a swi na xisandzu. Vakreste, lavatsongo ni lavakulu, va endla kahle loko va ‘tshama va ri karhi va swi anakanya swilo leswi hinkwaswo.’—Vafilipiya 4:8, 9.
12. Xana i yini leswi katsekaka swinene eku amukeleni ka nyiko ya ku titshamela wexe?
12 Ku va munhu a amukela nyiko ya ku titshamela wexe hakanyingi i mhaka yo va munhu a veka mbilu ya yena eka pakani yoleyo, ni ku khongelela mpfuno eka Yehovha leswaku a kota ku yi landzela. (Vafilipiya 4:6, 7) Pawulo u tsarile: “Loko wanuna a yima a tiyile embilwini ya yena, a nga ri na lexi xi n’wi sindzisaka kambe a kota ku tikhoma hi yexe, ú ta va a endla swona loko a tiboha embilwini ya yena ku tshamisa sweswo a [hlayisa vutengi byakwe bya rimbewu]. Hikokwalaho, loyi a [nyikelaka vunhwana bya yena bya rimbewu evukatini], ú endla swona; kambe loyi a nga [byi nyikeliki], ú endla leswi antswaka ku tlula swona.”—1 Vakorinto 7:37, 38, ringanisa NW.
Ku Titshamela Wexe Hi Xikongomelo
13, 14. (a) Xana i ku fanisa kwihi loku muapostola Pawulo a ku endlaka exikarhi ka Vakreste lava nga nghenelangiki vukati ni lava byi ngheneleke? (b) Xana Mukreste loyi a nga nghenelangiki vukati u ‘endla ku antswa’ ntsena ku tlula lava ngheneleke vukati loko a endlisa ku yini?
13 Ku titshamela wexe kahle-kahle a hi nchumu wa risima. Kutani, swi nga va leswi “antswaka” hi ndlela yihi? Kahle-kahle, swi titshege hi ndlela leyi munhu a wu tirhisaka ha yona ntshunxeko lowu swi n’wi nyikaka wona. Pawulo u tsarile: “Ndzi lava leswaku mi nga vi na swivilelo. Loyi a nga tekangiki ú tikarhatela swa Hosi, ku vona hilaha a nga tsakisaka Hosi hakona; kambe loyi a tekeke ú tikarhatela swa misava, ku vona hilaha a nga tsakisaka nsati wa yena hakona, kutani ú kokeriwa hala ni hala. Wansati loyi a nga tekiwangiki, kumbe wanhwana, ú tikarhatela swa Hosi, leswaku miri ni moya wa yena swi va leswi hlawulekeke; kambe wansati loyi a tekiweke ú tikarhatela swa misava leyi, ku vona hilaha a nga tsakisaka nuna wa yena hakona. Ndzi vula leswi ku mi pfuna, ku nga ri ku mi sivela-sivela, kambe ku endlela leswaku swilo hinkwaswo swi famba swinene, mi tinyiketa ku tirhela Hosi, mi nga anakanyi swin’wana.”—1 Vakorinto 7:32-35.
14 Mukreste loyi a titshameleke yexe loyi a tirhisaka xiyimo xa yena xo ka a nga nghenelanga vukati leswaku a landzela tipakani ta vutianakanyi, a nga endli ‘ku antswa’ ku tlula Vakreste lava ngheneleke vukati. U tshama a ri yexe, ku nga ri “hikwalaho ka Mfumo,” kambe hikwalaho ka swivangelo swa yena n’wini. (Matewu 19:12) Wanuna kumbe wansati loyi a nga nghenelangiki vukati u fanele a “tikarhatela swa Hosi,” a tikarhatela ku “tsakisa Hosi,” ni ‘ku tinyikela ku tirhela Hosi handle ko kavanyetiwa.’ Leswi swi vula ku nyikela nyingiso wa hina lowu heleleke eku tirheleni ka Yehovha na Kreste Yesu. Hi ku endla tano, hi kona laha ntsena Mukreste loyi a nga nghenelangiki vukati a endlaka ku ‘antswa’ ku tlula Vakreste lava ngheneleke vukati.
Ku Tirha Handle Ko Kavanyetiwa
15. Xana hi yihi yinhla-nkulu leyi Pawulo a kanelaka ha yona eka 1 Vakorinto ndzima 7?
15 Mhaka hinkwayo leyi Pawulo a vulavulaka ha yona eka ndzima leyi hileswaku: Hambileswi vukati byi amukelekaka ehansi ka swiyimo swo karhi, naswona van’wana va swi tsakelaka ku byi nghenela, handle ko kanakana ku titshamela wexe swa vuyerisa eka wanuna kumbe wansati wa Mukreste, loyi a lavaka ku tirhela Yehovha a nga kavanyetiwi ngopfu. Kasi munhu loyi a ngheneleke vukati u “kokeriwa hala ni hala,” Mukreste loyi a nga nghenelangiki vukati u ntshunxekile leswaku a nyikela nyingiso eka “swilo swa Hosi.”
16, 17. Xana Mukreste loyi a nga nghenelangiki vukati, a nga swi khathalela njhani “swilo swa Hosi” hi ndlela yo antswa?
16 Xana i yini swilo swa Hosi, leswi Mukreste loyi a nga nghenelangaki vukati a nga kotaka ku nyikela nyingiso eka swona hi ndlela leyi ntshunxekeke, ku tlula vanhu lava ngheneleke vukati? Eka xiendlakalo xin’wana, Yesu u vulavule hi ‘swilo swa Xikwembu’—swilo leswi Mukreste a nga taka a nga swi nyiki Khezari. (Matewu 22:21) Swilo leswi swi khumba ngopfu vutomi bya Mukreste, vugandzeri bya yena ni vutirheli bya yena.—Matewu 4:10; Varhoma 14:8; 2 Vakorinto 2:17; 3:5, 6; 4:1.
17 Hi ntolovelo vanhu lava nga nghenelangiki vukati va ntshunxekile leswaku va nyikela hi nkarhi wa vona entirhweni wa Yehovha, leswi nga pfunaka vumoya bya vona ni mpimo wa vutirheli bya vona. Va nga heta nkarhi wo tala eka dyondzo ya munhu hi xiyexe ni ku anakanyisisa ha yona. Vakreste lava nga nghenelangiki vukati, hakanyingi va nga kota ku va ni nkarhi wa ku hlaya Bibele ku antswa eka xiyimiso xa vona, ku tlula leswi lava ngheneleke vukati va nga endlisaka xiswona. Va nga lunghiselela minhlangano ni ntirho wa nsimu ku antswa. Hinkwaswo leswi swi ‘pfuna vona vini.’—1 Vakorinto 7:35.
18. Xana vamakwerhu vo tala va xinuna, lava nga nghenelangiki vukati, va nga swi kombisa njhani leswaku va lava ku tirhela Yehovha ‘handle ko kavanyetiwa’?
18 Vamakwerhu vo tala va xinuna lava nga tekangiki lava ana se va nga malandza ya vutirheli, va ntshunxekile ku byela Yehovha va ku: “Hi mina loyi, nḍi rume.” (Esaya 6:8) Va nga endla swikombelo swo ya eka Xikolo xa Ndzetelo wa Vutirheli, lexi endleriweke malandza ya vutirheli ni vakulu lava nga tekangiki, lava ntshunxekeke ku tirha laha xilaveko xi nga xikulu kona. Hambi ku ri vamakwerhu lava nga ntshunxekangiki leswaku va sukela mavandlha ya ka vona, va nga tiendla va kumeka leswaku va tirhela vamakwavo va vona, va ri malandza ya vutirheli kumbe vakulu.—Vafilipiya 2:20-23.
19. Xana vamakwerhu vo tala va xisati lava nga nghenelangiki vukati, va katekisiwe njhani, naswona hi yihi ndlela yin’we leyi va nga vaka nkateko emavandlheni ha yona?
19 Vamakwerhu va xisati lava nga tekiwangiki, lava nga riki na vanuna lava nga ta bula na vona ni ku va phofulela ta le mbilwini, va nga ‘hoxa mindzhwalo ya vona eka Yehovha hi vutlhari swinene.’ (Pisalema 55:22; 1 Vakorinto 11:3) Leswi i swa nkoka ngopfu-ngopfu eka vamakwerhu va xisati, lava hikwalaho ko rhandza Yehovha, va nga tekiwangiki. Loko hi ku famba ka nkarhi va ta tekiwa, ku ta va ‘eHosini ntsena,’ leswi vulaka leswaku, hi munhu loyi a tinyiketeleke eka Yehovha ntsena. (1 Vakorinto 7:39) Vakulu va tlangela swinene hi ku va ni vamakwerhu va xisati lava nga tekiwangiki emavandlheni ya ka vona; hakanyingi lava va endzela ni ku pfuna lava vabyaka ni lava dyuhaleke. Leswi swi tsakisa hinkwavo lava katsekaka.—Mintirho 20:35.
20. Xana Vakreste vo tala va swi kombisa njhani leswaku va lava ‘ku tinyiketa ku tirhela Hosi handle ko kavanyetiwa’?
20 Vantshwa vo tala va Vakreste va hlele swiyimo swa vona leswaku “[va] tinyiketa ku tirhela Hosi, [va] nga anakanyi swin’wana.” (1 Vakorinto 7:35) Va tirhela Yehovha va ri vatirheli lava nga maphayona ya nkarhi hinkwawo, varhumiwa, kumbe eka tin’wana ta tihofisi ta marhavi ya Sosayiti ya Watch Tower. Naswona vona ndlela leyi va nga ntlawa lowu tsakeke ha yona! Wa nga vona ndlela leyi vukona bya vona byi phyuphyisaka ha yona! Phela, emahlweni ya Yehovha na Yesu, va ‘kotisa mathonsi ya mberha.’—Pisalema 110:3, ringanisa NW.
Ku Hava Xihlambanyo Xo Tshama U Ri Nghwendza Hilaha Ku Nga Heriki
21. (a) Ha yini swi twisiseka leswaku Pawulo a a nga khutazi ku endla xihlambanyo xa vunghwendza? (b) Xana a a kombisa yini loko a vulavula hi ku “rhumbuka ka vuntshwa”?
21 Yinhla-nkulu eka ndzayo ya Pawulo hileswaku Vakreste va ta va va endla leswi ‘lulameke’ loko va amukela mhaka ya ku titshamela voxe evuton’wini bya vona. (1 Vakorinto 7:1, 8, 26, 37) Hambiswiritano, a nga va khutazi nikatsongo leswaku va endla xiboho xa vunghwendza. Ku hambana ni sweswo, u tsarile: “Loko munhu a anakanya leswaku a nga hanyi hi ndlela ya kona eka [vutengi bya yena bya rimbewu, NW], ni loko ku navela ka yena ku ri lokukulu, a a endle hilaha a rhandzaka hakona loko swi fanele ku va tano. A va tekane, ku hava ku dyoha eka swona.” (1 Vakorinto 7:36) Rito ra Xigriki leri nge (hy·peʹra·kmos) leri hundzuluxeriweke ri va “ku rhumbuka ka vuntshwa,” (NW) hi ku kongoma ri vula “ku fikelela xiyimo xa le henhla swinene” naswona ri kombetela eka ku hundza nkarhi lowu nsusumeto wa rimbewu wu nga wukulu ha wona. Kutani, lava va heteke malembe yo hlayanyana va nga si nghenela vukati, naswona hi ku famba ka nkarhi va lava ku nghenela vukati, va ntshunxekile leswaku va tekana ni mupfumeri-kulobye hi mbilu yo basa.—2 Vakorinto 6:14.
22. Ha yini swi pfuna hi matlhelo hinkwawo, leswaku Mukreste a nga tsutsumeli ku nghenela vukati a ha ri ntsongo swinene?
22 Malembe lawa muntshwa wa Mukreste a ma hetaka a ri karhi a tirhela Yehovha handle ko kavanyetiwa, i vuvekisi bya vutlhari. Ma n’wi pfumelela leswaku a kuma vutivi lebyi tirhaka, ntokoto ni vutlhari. (Swivuriso 1:3, 4) Munhu loyi a tshameke a ri yexe hikwalaho ka Mfumo, endzhaku ka nkarhi u va a ri exiyin’weni lexinene ngopfu, loko se a vona leswaku u ehleketa hi vutihlamuleri bya vukati kumbe byo va mutswari.
23. Xana i yini leswi van’wana lava ehleketaka ku nghenela vukati va faneleke va swi tsundzuka, kambe i xivutiso xihi lexi nga ta kambisisiwa eka swihloko leswi landzelaka?
23 Vakreste van’wana lava heteke malembe yo hlayanyana va ri karhi va tirhela Yehovha entirhweni wa nkarhi hinkwawo va nga nghenelanga vukati, hi vukheta va hlawula munghana wa vona wa vukati loyi va nga ta tekana na yena enkarhini lowu taka, hi xikongomelo xo lava ku hambeta ni ntirho wa nkarhi hinkwawo. Leswi swi bumabumeriwa ngopfu. Van’wana va nga ha anakanya ku nghenela vukati va ri ni langutelo ra ku nga pfumeleli vukati byi sivela ntirho wa vona hi ndlela yo karhi. Kambe, xana Mukreste la ngheneleke vukati u fanele a titwa a ntshunxekile ku langutana ni ntirho wa yena eka Yehovha, kukota loko a ha titshamele yexe? Xivutiso lexi xi ta kambisisiwa eka swihloko leswi landzelaka.
Mpfuxeto
◻ Ha yini muapostola Pawulo a vone ku ri ni xilaveko xo tsalela vandlha ra le Korinto?
◻ Ha yini hi swi tiva leswaku Pawulo a a nga bumabumeli hanyelo ra vunghwendza?
◻ Xana munhu a nga ku ‘amukela’ hi ndlela yihi ku titshamela yexe?
◻ Xana vamakwerhu va xisati lava titshameleke voxe, va nga vuyeriwa hi ndlela yihi?
◻ Xana vamakwerhu va xinuna lava titshameleke voxe, va nga vuyeriwa njhani eka ntshunxeko wa vona wo tirhela Yehovha ‘handle ko kavanyetiwa’?