Swivutiso Swa Vahlayi

◼ Xana Pawulo a a kombetela eka Yehova kumbe eka Yesu loko a tsarile a ku: ‘Hosi yi te ka mina: “Matimba ya mina ma hetiseka laha ku nga ni ku tsana kona”’?

Swi tikomba onge muapostola Pawulo a a kombetela eka Hosi Yehova. Hi ku xiya mongo wa marito ya Pawulo, a hi nge voni ntsena leswaku leswi swi vangiwa hi yini kambe hi nga entisa ku tlangela ka hina vuxaka exikarhi ka Xikwembu ni n’wana wa xona. Pawulo u tsarile:

“Kutani ku endlela leswaku ndzi nga tikurisi ngopfu, . . . ndzi nghenisiwile riphantsu enyameni, yi nga ntsumi ya Sathana, leswaku yi ndzi himetela. Ndzi khongerile Hosi kanharhu hi mhaka ya xilo xexo, leswaku xi suka ka mina. Kambe Hosi yi te ka mina: ‘Tintswalo ta mina eka wena ti ringene; hikuva matimba ya mina ma hetiseka laha ku nga ni ku tsana kona.’ Hikokwalaho ndzi ta tsaka ngopfu ku tidzunisa hi ta ku tsana ka mina, leswaku matimba ya Kriste ma ta aka eka mina.”—2 Vakorinto 12:7-9.

Riphantsu enyameni ya Pawulo ku nga ha va ku ve ku karhata ka mahlo kumbe vaapostola va mavunwa lava va tlhontlheke vuapostola byakwe. (Vagalatiya 4:15; 6:11; 2 Vakorinto 11:5, 12-15) Hambi ku nga va xihi, xi ringete ku sivela Pawulo kumbe ku n’wi tshikisa ku titlakusa evutirhelini bya yena. Xisweswo u kombele kanharhu leswaku ri susiwa. Kambe u kombele mani, naswona i mani a hlamuleke hi ku vulavula hi “matimba ya mina”?

Tanihi leswi ndzimana yi vulavulaka hi “matimba ya Kriste,” swi nga ha vonaka onge Pawulo u kombele Hosi Yesu. Handle ko kanakana, u na wona matimba naswona a nga ma nyika vaapostola va yena. (Marka 5:30; 13:26; 1 Timotiya 1:12) Entiyisweni, N’wana wa Xikwembu “u tamele ntumbuluko hinkwawo hi rito ra yena ra matimba.”—Vaheveru 1:3; Vakolosa 1:17, 29.

Hambi swi ri tano, Hosi Xikwembu i xihlovo lexikulu xa matimba, lawa xi nga ma nyikaka vagandzeri va xona naswona xa va nyika. (Psalma 147:5; Esaya 40:26, 29-31) Matimba yo tano yo huma eka Xikwembu ya endle leswaku Yesu a swi kota ku endla swihlamariso nakambe ya ta n’wi endla a swi kota ku teka goza. (Luka 5:17; Mintirho 10:38) Hi ku fanana, vaapostola va Yesu ni vadyondzisiwa va amukele matimba ma huma eka Yehova. (Luka 24:49; Vaefesa 3:14-16; 2 Timotiya 1:7, 8) Leswi swi katse na Pawulo, loyi a tirheleke “hi ku nyika ka tintŝalo ta Šikwembu, leti [muapostola a] ti nyikiweke hi mitiro ya matimba ya šona.”—Vaefesa 3:7, Bibele ya Xitsonga.

Leswi Pawulo a kombeleke ku suseriwa ‘riphantsu enyameni ya yena, ntsumi ya Sathana,’ swi le rivaleni leswaku a a langute eka Hosi Xikwembu leswaku xi endla leswi, Yehova tanihi loyi swikhongelo swi kongomisiwaka eka yena. (Vafilipiya 4:6; Psalma 145:18) Nakambe, ku khutaza ka Yehova ka Pawulo hi ndlela yo karhi hi marito lama nge, “matimba ya mina ma hetiseka laha ku nga ni ku tsana kona,” a ku bakanyeli Kriste etlhelo. Matimba lama humaka eka Hosi Xikwembu ma nga hlamuseriwa tanihi “matimba ya Kriste [lawa a] ma ta aka eka [Pawulo],” hikuva ‘Kriste i matimba ya Xikwembu ni vutlhari bya xona.’ (1 Vakorinto 1:24) Xisweswo, 2 Vakorinto 12:7-9 yi hi pfuna ku yi tlangela ku antswa ndlela ya nkoka swinene leyi Yehova a tirhisaka N’wana wa yena ha yona ku hetisisa ku rhandza ka le henhla.