Ku Tsana Ka Vanhu Ku Twarisa Matimba Ya Yehovha

“Un’wana ni un’wana a a ndzi teka ndzi ri mutirheli wa nkarhi hinkwawo la tsakeke ni la nga ni xinghana. Nkarhi na nkarhi a ndzi pfuna van’wana hi swiphiqo swa vona. Kambe hi nkarhi lowu fanaka, a ndzi titwa onge ndza fa endzeni. Mianakanyo leyi kavanyetaka ni ku karhateka emianakanyweni a swi ndzi vavisa swinene. Ndzi sungule ku titwa ndzi hambanisiwa ni vanhu. A ndzi lava ku tshama ekaya ndzi etlele. Ku ringana tin’hweti to tala, ndzi kombele Yehovha leswaku a ndzi pfumelela ndzi fa.”—Vanessa.

HI LAHA swi kombisiweke hakona laha henhla, swi tolovelekile leswaku minkarhi yin’wana malandza ya Yehovha ma hlangavetana ni vuyelo bya ku hanya ‘eminkarhini leyi yo nonon’hwa ku langutana na yona.’ (2 Timotiya 3:1) Van’wana va nga ha hetiwa matimba. (Vafilipiya 2:25-27) Loko ku khomiwa hi gome ku hambeta, ku nga hi heta matimba, hikuva Bibele yi ri: “Loko u ṭana sikwini ra khombo, matimba ya wena maṭanana.” (Swivuriso 24:10) Ina, loko hi ri ni gome hi lava matimba—kumbexana lawa muapostola Pawulo a ma vuleke ‘matimba lama tlulaka ya ntolovelo.’—2 Vakorinto 4:7.

Yehovha Xikwembu i xihlovo xa matimba lama nga pimiwangiki. Leswi swa vonaka loko hi xiyisisa ntumbuluko wa yena. (Varhoma 1:20) Hi xikombiso, anakanya hi dyambu. Misava yi sivela ku hisa ka dyambu loku taka hi matimba lamakulu swinene ya kwalomu ka 240 wa tibiliyoni. Kambe, nhlayo leyi yi kombisa hafu ya magidi ya timiliyoni ta matimba lama humesiwaka hi dyambu. Naswona dyambu i ritsongo loko ri ringanisiwa ni tinyeleti letikulu. Exikarhi ka leswi ku na Rigel, ku nga nyeleti leyi nga eka nhlengeleto wa Orion lowu nga kula minkarhi ya 50 ku tlula dyambu ra hina ni ku humesa matimba lamakulu ku tlula minkarhi ya 150 000!

Mutumbuluxi wa swihlovo swo tano swa matimba swa le tilweni hi byakwe u fanele a ri ni “ntamu lo’wukulu.” (Esaya 40:26; Pisalema 8:3, 4) Entiyisweni, muprofeta Esaya u vule leswaku Yehovha “a nga karali, a nga heri matimba.” Naswona Xikwembu xi tiyimisele ku avelana matimba ya xona ni vanhu hinkwavo, lava hikwalaho ka ku tsana ka vumunhu, va vonaka onge va hela matimba. (Esaya 40:28, 29) Ndlela leyi xi endlaka leswi ha yona yi kombisiwe emhakeni ya muapostola Pawulo wa Mukreste.

Ku Langutana Ni Miringo

Pawulo u byele Vakorinto malunghana ni xirhalanganya lexi a fanele a xi tiyiselela. U xi vitane “riphantsu enyameni.” (2 Vakorinto 12:7) “Riphantsu” leri ri nga ha va ri ve xiphiqo xa rihanyo, kumbexana ku nga voni kahle. (Vagalatiya 4:15; 6:11) Kumbexana Pawulo a nga ha va a vula vaapostola va mavunwa ni vakavanyeti van’wana lava tlhontlheke vuapostola byakwe ni ntirho wakwe. (2 Vakorinto 11:5, 6, 12-15; Vagalatiya 1:6-9; 5:12) Ku nga khathariseki leswaku a ku ri yini, ‘riphantsu leri ra le nyameni’ ri kombe Pawulo maxangu, naswona u khongele hi ku phindha-phindha leswaku ri susiwa.—2 Vakorinto 12:8.

Hambiswiritano, Yehovha a nga xi pfumelelanga xikombelo xa Pawulo. Ematshan’weni ya sweswo, u byele Pawulo a ku: “Tintswalo ta mina eka wena ti ringene.” (2 Vakorinto 12:9) Xana Yehovha a a vula yini hi leswi? Kahle-kahle, loko hi xiyisisa ntirho wa Pawulo wa nkarhi lowu nga hundza wa ku xanisa Vakreste, a ku ri tintswalo leti nga fanelangiki leti endleke leswaku a va ni vuxaka ni Xikwembu—a ha ha vuli ku va muapostola!a (Ringanisa Zakariya 2:8; Nhlavutelo 16:5, 6.) Yehovha a nga ha va a byele Pawulo leswaku lunghelo ra ku va mudyondzisiwa a ri “ringene.” A ri nga ta fambisana ni ku susiwa ka swiphiqo swakwe swa vutomi hi singita. Entiyisweni, ku nonon’hweriwa kun’wana ku nga ha tisiwa hikwalaho ka malunghelo lama engetelekeke. (2 Vakorinto 11:24-27; 2 Timotiya 3:12) Eka xiendlakalo xin’wana ni xin’wana, Pawulo a a fanele a tiyisela “riphantsu enyameni” yakwe.

Kambe, leswi a swi vuli swona leswaku Yehovha a fularhela Pawulo. Ematshan’weni ya sweswo, u te eka yena: “Matimba ya mina ma hetiseka laha ku nga ni ku tsana kona.” (2 Vakorinto 12:9) Ina, hi rirhandzu Yehovha a ta nyika Pawulo matimba yo langutana ni xiyimo xakwe. Xisweswo, “riphantsu enyameni” ya Pawulo ri hundzuke xikombiso xa xiviri. Ri n’wi dyondzise ku titshega hi matimba ya Yehovha ematshan’weni yo tshemba matimba ya yena n’wini. Entiyisweni Pawulo u yi dyondze kahle dyondzo leyi, hikuva endzhaku ka malembe yo hlayanyana u tsalele Vafilipiya a ku: “Ndzi dyondzile ku kolwa hi leswi ndzi tikumaka ndzi ri ka swona. Ndzi nga endla hinkwaswo hi matimba ya Loyi a ndzi tiyisaka.”—Vafilipiya 4:11, 13.

Ku vuriwa yini hi wena? Xana u tiyisela muxaka wo karhi wa “riphantsu enyameni,” kumbexana vuvabyi kumbe xiyimo xo karhi evuton’wini lexi ku vilerisaka swinene? Loko swi ri tano, u nga heli mbilu. Hambiloko Yehovha a nga xi susi xirhalanganya hi singita, a nga ku nyika vutlharhi ni matimba yo langutana na xona loko u hambeta u rhangisa swilaveko swa Mfumo evuton’wini.—Matewu 6:33.

Loko vuvabyi kumbe ku dyuhala swi ku sivela ku endla swo tala hilaha a wu ta lava hakona entirhweni wa Vukreste, u nga heli matimba. Ematshan’weni yo languta ndzingo wa wena wu ri lowu hungutaka ntirho wa wena eka Yehovha, wu langute wu ri nkarhi wo kurisa ku titshega ka wena hi yena. Nakambe tsundzuka, leswaku ntikelo wa Mukreste a wu pimiwi hi ntirho lowu a wu endlaka, kambe hi ku ya hi ripfumelo ni ku enta ka rirhandzu rakwe. (Ringanisa Marka 12:41-44.) Ku rhandza Yehovha hi moya-xiviri wa wena hinkwawo swi vula ku n’wi tirhela hi ku ya hi vuswikoti bya wena hinkwabyo—ku nga ri bya munhu un’wana.—Matewu 22:37; Vagalatiya 6:4, 5.

Loko “riphantsu enyameni” ya wena ri katsa xiyimo lexi hlomulaka mbilu evuton’wini, xo tanihi rifu ra murhandziwa wa wena, landzela xikhutazo xa Bibele lexi nge: “Nyiketa Yehova e timhaka ta wena, o ta ku seketela; a nga ka a nga pfumeli ni siku riṅwe l’a lulameke a ṭekaṭekisiwa.” (Pisalema 55:22) Wansati wa Mukreste la vitaniwaka Sylvia u swi endlile leswi. Endzhaku ka malembe ma nga ri mangani hi ku landzelelana ka wona, u feriwe hi nuna wakwe endzhaku ka vukati bya malembe ya 50 kun’we ni swirho swin’wana swa kaye swa le ndyangwini—leswi katsaka switukulwana swimbirhi. Sylvia u ri: “Loko a ku nga ri Yehovha, a ndzi ta rila ndzi nga lawuleki. Kambe ndzi kuma nchavelelo lowukulu hi xikhongelo. A ndzi tshama ndzi ri karhi ndzi burisana na Yehovha. Ndza swi tiva leswaku u ndzi nyika matimba yo tiyisela.”

Vona ndlela leyi swi tiyisaka nhlana ha yona ku tiva leswaku “Xikwembu lexi ku chavelela hinkwako ku humaka eka xona” xi nga nyika lava rilaka matimba yo tiyisela! (2 Vakorinto 1:3; 1 Vatesalonika 4:13) Loko hi tlangela mhaka leyi, hi nga twisisa mahetelelo ya Pawulo emhakeni leyi. U tsarile: “Ndzi amukela hi ku tsaka ku tsana, ni maxangu, ni ku karhateka, ni ku xanisiwa, ni mahlomulo, hikwalaho ka Kriste; hikuva loko ndzi tsanile, hi kona ndzi nga ni matimba.”—2 Vakorinto 12:10.

Ku Langutana Ni Ku Nga Hetiseki

Hinkwerhu ka hina hi tswariwe ni ku nga hetiseki loku humaka eka vatswari va hina vo sungula. (Varhoma 5:12) Hikwalaho ka sweswo, hi le nyimpini yo lwisana ni ku navela ka nyama leyi nga ni vudyoho. Vona ndlela leyi swi tshovaka mbilu ha yona ku xiya leswaku mikhuva ya “munhu wa khale” yi ni matimba swinene eka hina ku tlula hilaha a hi ehleketa hakona! (Vaefesa 4:22-24) Eminkarhini yo tano hi nga ha titwa hilaha muapostola Pawulo a titweke hakona, la tsaleke a ku: “Mina hi xiviri xa mina ndzi tsakela Nawu wa Xikwembu; kambe eswirhweni swa mina ndzi kuma nawu wun’wana, lowu lwaka ni nawu lowu wu fambisaka mianakanyo ya mina; wu ndzi endla mubohiwa enawini wa ku dyoha lowu fumaka swirho swa mina.”—Varhoma 7:22, 23.

Ni laha hi nga kombela matimba lama humaka eka Yehovha. Loko u lwisana ni ku tsana ka munhu hi xiyexe, u nga tshiki ku hundzulukela eka yena hi xikhongelo, u kombela ndzivalelo wakwe hi mbilu hinkwayo ku nga khathariseki leswaku u ta fanela ku ya kangani eka yena ni xiphiqo lexi fanaka. Hikwalaho ka tintswalo takwe leti nga fanelangiki, Yehovha, la “pimaka timbilu” ni loyi a vonaka ku enta ka vutshembeki bya wena, u ta ku nyika ripfalo leri baseke. (Swivuriso 21:2) Hi ku tirhisa moya wa yena lowo kwetsima, Yehovha a nga ku nyika matimba leswaku u tlhela u lwisana ni ku tsana ka nyama.—Luka 11:13.

Nakambe hi lava matimba lama humaka eka Yehovha loko hi langutane ni ku nga hetiseki ka van’wana. Hi xikombiso, Mukreste-kulorhi a nga ha vulavula na hina ‘hi ndlela ya vuhunguki leyi tlhavaka kukotisa tlhari.’ (Swivuriso 12:18) Leswi swi nga hi vavisa swinene, ngopfu-ngopfu loko ku ri munhu loyi hi vonaka swi nga n’wi fanelanga. Hi nga ha khunguvanyeka swinene. Van’wana va tirhise ku khunguvanyisiwa loko tano tanihi xivangelo xo fularhela Yehovha—ku nga xihoxo lexikulu ku tlula hinkwaswo!

Hambiswiritano, ku va ni langutelo leri ringaniseriweke swi ta hi pfuna leswaku hi languta ku tsana ka van’wana hi moya lowunene. A hi fanelanga hi langutela ku hetiseka eka vanhu lava nga hetisekangiki. “A ku na munhu l’a nga dyohiki,” Solomoni wanuna wa vutlhari wa hi tsundzuxa. (1 Tihosi 8:46) Arthur, Mukreste la totiweke la tirheleke Yehovha hi ku tshembeka ku ringana malembe-xikhume ya nkombo, u te: “Ku tsana loku malandza-kulorhi ma nga na kona ku endla leswaku hi kombisa vutshembeki bya hina, ku ringa ntamu wa hina wa Vukreste. Loko hi pfumelela leswi vanhu va swi vulaka kumbe leswi va swi endlaka swi kavanyeta ku tirhela ka hina Yehovha, hi ta va hi tirhela vanhu. Hambiswiritano, na vona vamakwerhu va fanele va rhandza Yehovha. Loko hi languta swilo leswinene eka vona, hi ta hatlisa hi swi vona leswaku entiyisweni a va hombolokanga.”

Matimba Ya Ku Chumayela

A nga si tlhandlukela etilweni, Yesu u byele vadyondzisiwa vakwe a ku: “Mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.”—Mintirho 1:8.

Hi ku landza marito ya Yesu, ntirho lowu sweswi wu endliwa hi Timbhoni ta Yehovha ematikweni ya 233 emisaveni hinkwayo. Loko ti hlanganile, ti heta tiawara to tlula gidi ra timiliyoni lembe na lembe ti ri karhi ti pfuna van’wana leswaku va kuma vutivi bya Yehovha. A hi minkarhi hinkwayo swi olovaka ku endla ntirho lowu. Ematikweni man’wana ntirho wa ku chumayela hi Mfumo wu yirisiwile kumbe ku siveriwa. Nakambe, xiyisisa leswaku i vamani lava endlaka ntirho lowu—vanhu vo tsana, lava nga hetisekangiki, lava un’wana ni un’wana wa vona a nga ni swiphiqo ni swivilelo swa yena n’wini. Kambe ntirho wu ya emahlweni, naswona hikwalaho ka sweswo, emalembeni manharhu lama nga hundza, vanhu lava tlulaka miliyoni va nyiketele vutomi bya vona eka Yehovha ni ku kombisa ku tinyiketela koloko hi nkhuvulo wa mati. (Matewu 28:18-20) Entiyisweni, ntirho lowu wu hetisisiwa hi matimba ya Xikwembu ntsena. Yehovha u vule leswi hi ku tirhisa muprofeta Zakariya: “Ku nga ka ku nga v̌i hi nyimpi ni matimba, kambe hi Moya wa mina.”—Zakariya 4:6.

Loko u ri muhuweleri wa mahungu lamanene, na wena wa hlanganyela—hambiloko swi vonaka swi ri switsongo—entirhweni wolowo lowukulu. Ku nga khathariseki ‘mitwa’ leyi u faneleke u yi tiyisela, u nga tiyiseka leswaku Yehovha a nge “rivali ntirho wa [we]na ni rirhandzu leri [u] ri kombeke hi vito ra [ye]na.” (Vaheveru 6:10) Hikwalaho hambeta u titshega hi Xihlovo xa matimba hinkwawo leswaku u kuma nseketelo. Tsundzuka, hi nga kota ku tiyisela hi matimba ya Yehovha ntsena; matimba yakwe ma endliwe ma hetiseka hi ku tsana ka hina.

[Nhlamuselo ya le hansi]

[Xifaniso lexi nga eka tluka 26]

Ntirho wo chumayela wu hetisisiwa hi matimba ya Yehovha ntsena