Xana U Nghenisiwe “Mutwa Enyameni”?

¹ Hi ni ku navela lokukulu ko hetisisa ntirho wa hina wo chumayela mahungu lamanene hi ku ya hi vuswikoti lebyi hi nga na byona. Hambiswiritano, vunyingi bya vamakwerhu va hina va xinuna ni va xisati lava rhandzekaka, swa va nonon’hwela ku hlanganyela hi xitalo hikwalaho ka mavabyi kumbe ku lamala loku va nga na kona, loku endlaka va nga swi koti ku endla swo tala hilaha va swi rhandzaka hakona. Eka vona, ku nga ha va ntlhontlho lowukulu ku tiyisela mintlhaveko ya ku hela matimba, ngopfu-ngopfu loko va vona van’wana exikarhi ka vona va gingiriteka swinene evutirhelini.—1 Kor. 9:16.

² Xikombiso Xo Xi Tekelela: Muapostola Pawulo u boheke ku tiyisela “mutwa enyameni.” U kombele Yehovha kanharhu leswaku a susa xihinga lexi xi n’wi kayakayisaka, lexi a vuleke leswaku i “ntsumi ya Sathana” leyi tshamelaka ku n’wi makala. Kambe, hambileswi a xaniseka, Pawulo u tiyiserile ni ku hambeta ni vutirheli bya yena. A nga tiputanga vusiwana kumbe ku hundzuka munhu la tshamelaka ku vilela. U tikarhatele ku endla ntsena leswi a swi kotaka. Xilotlelo xa ku humelela ka yena leswaku a tiyisela a ku ri xitiyisekiso lexi lexi humaka eka Xikwembu: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” Ku tsana ka Pawulo ku hundzuke ntamu loko a dyondze ku amukela xiyimo xa yena ni ku titshega hi Yehovha ni moya lowo kwetsima leswaku a kota ku tiyisela.—2 Kor. 12:7-10.

³ Ndlela Leyi U Nga Tiyiselaka Ha Yona: Xana ku tsana ka vumunhu ku endla leswaku ntirho lowu u wu endlelaka Xikwembu u nga wu endli hi ku ntshunxeka? Loko swi ri tano, tekelela langutelo ra Pawulo. Hambiloko vuvabyi bya wena kumbe vulema swi nga tshunguriwi hilaha ku heleleke eka mafambiselo lawa ya swilo, u nga tshemba Yehovha hilaha ku heleleke, loyi a twisisaka swilaveko swa wena naswona u ta ku nyika “matimba lama tlulaka lama tolovelekeke.” (2 Kor. 4:7) Tirhisa mpfuno lowu u nyikiwaka wona evandlheni, u nga tihambanisi ni van’wana. (Swiv. 18:1) Loko u kuma swi nonon’hwa ku hlanganyela entirhweni wa yindlu ni yindlu, lavisisa tindlela leti humelelaka ta ku nyikela vumbhoni bya xitshuketa kumbe ta ku nyikela vumbhoni hi riqingho.

⁴ Hambiloko mutwa enyameni wu ku sivela ku endla leswi a wu kota ku endla swona evutirhelini, u nga titwi u cukumetiwile. Ku fana na Pawulo, u nga “nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu,” u endla leswi matimba ni swiyimo swa wena swi ku pfumelelaka ku endla swona. (Mint. 20:24) Loko u tikarhatela ku hetisisa vutirheli bya wena, swi tive leswaku Yehovha wa tsaka swinene.—Hev. 6:10.