Ku Hanyisa Hi Ripfumelo—Ku Humelela Ka Kona Hi Kwihi Ke?

Kereke yi humesa mpfumawulo wa katara, mhalamhala, swigubu, tingomana ni swiphambati leswi bananisiwaka. Vavanuna, vavasati ni vana va cina ni ku yimbelela eka xiyimo xa ku hlanya xa mintlhaveko. Nsusumeto hi lowunene leswaku ku hanyisiwa ku sungula.

Loko la hanyisaka hi ripfumelo, a tiambexe hi tintambu to basa leti ncikinyaka, u sungula hi ku veka mavoko yakwe ehenhla ka munhu la lamaleke loyi a tsendzelekaka matlhelo hinkwawo. Endzhaku, munhu la feke mahlo, ni maglasi yakwe ya ntima lama funengetaka mahlo yakwe lama nga voniki. “I singita!” ku huwelela vahlaleri loko la lamaleke a sungula ku famba ni la feke mahlo a sungula ku vona . . .

SWIVONO swo fana ni lexi swi tolovelekile etikerekeni to tala ta Vantima leti hanyisaka hi ripfumelo. Hakunene, lava va hanyisaka hi ripfumelo va ni valandzeri vo tala eAfrika ni le matikweni man’wana hikwalaho ka ku tivula ka vona leswaku va nga tlhantlha swiphiqo hinkwaswo hi ku tirhisa xikhongelo ni ripfumelo eka Xikwembu. Xisweswo van’wana va ta eka lava va hanyisaka hi ripfumelo ni swirhalanganya swa timali. Naswona tanihi leswi evanhwini va Vantima ku pfumala vana hakanyingi ku nga xiphiqo, van’wana va ta eka lava va hanyisaka hi ripfumelo va langutele ku suseriwa vumhika.

Hambi swi ri tano, swiphiqo swa rihanyo swi yinga-yingisa mianakanyo ya lava va hanyisaka hi ripfumelo ku tlula nchumu wihi na wihi wun’wana. Hambi leswi swidzidzirisi swa vutshunguri swi tateke misava ya bindzu ni leswi matshalatshala lama bumabumelekaka ya endliwaka exivandleni xa vutshunguri ku horisa lava vabyaka munhu wa ha ri kule ni ku kuma nhlamulo ya xiphiqo xa vuvabyi. Van’wana lava hlaseriwaka hi vuvabyi va tirhise mintsengo leyikulu ya mali va lava ku hanyisiwa, kutani va hlangavetana ni ku tsandzeka. Manuku ke, a swi hlamarisi leswi hi ku tiyiseka, vo tala va hundzukelaka eka lava va hanyisaka hi ripfumelo!

Van’wana va vona onge ku hanyisa hi ripfumelo ku tirhile eka vona naswona a va voni ku himpfilitana exikarhi ka kona ni Vukriste. Hakunene, tanihi leswi vahanyisi hakanyingi va vulaka leswaku va tirha hi vito ra Yesu, a hi leswi nga tolovelekangiki eka valandzeri va vona ku va swirho swa vukhongeri lebyikulu ni kereke leyi hanyisaka hi ripfumelo. Kambe xana mugandzeri wa ntiyiso wa Xikwembu hi laha ku faneleke a nga tiendla la kumekaka eka loyi a hanyisaka hi ripfumelo? (Yohane 4:23) Naswona xana ku hanyisa kwihi na kwihi loku endliweke hi munhu wo tano ku huma eka Xikwembu hakunene?