Ntikelo Wo Yimbelela eVugandzerini Bya Ntiyiso

XANA u nga anakanya misava leyi nga riki na risimu? Ku nga ha twiwi vuyimbeleri byo tsakisa bya vana nakambe kumbe rito ro tsokombela ra nightingale kumbe bellbird? Ku nga ha twiwi ku hleka ko hola loku nyiketanaka ka magpie kumbe ku hleka loku twalaka ka kookaburra? Lexi tsakisaka, leswi a swi nge endleki. Kambe ku tiyimisela ko tano ku komba yin’wana ya tinyiko to tala ta Xikwembu eka munhu: nyiko ya risimu.

Yehova I Xikwembu Xa Risimu

Ha yini ku yimbelela ku tisa ntsako eka hina? Kahle-kahle, Yehova hi yexe wa tsaka naswona u tsakisiwile hi tinsimu to dzunisa ta swivumbiwa swakwe. Xana wa xi vona xiendlakalo xa loko tintsumi hinkwato ti huwelerile hi ntsako hikwalaho ka ku hlamarisa ka ntumbuluko wa Yehova wa laha misaveni? Kumbe xana u nga tivona u yime hi ku tsaka exikarhi ka varisi hi vusiku bya xixikana bya ku velekiwa ka Yesu tanihi munhu, ni ku tsakisiwa hi mpfumawulo wa vunyingi bya mavandla ya tintsumi loko ya yimbelela ya ku: “Ku kwetsima a ku ve eka Xikwembu ematilweni ya le henhla”?—Luka 2:13, 14; Yobo 38:7.

Ndlela yin’wana leyi Yehova a kombeke ha yona leswaku i Xikwembu xa risimu a ku ri hi ku endla vuyimbeleri byi va xiphemu xa vugandzeri bya ntiyiso eIsrayele. Endzhaku, Xikwembu nakambe xi hlavutele ku tirhisana lokukulu exikarhi ka vuyimbeleri ni vugandzeri bya ntiyiso eka xivono xa Nhlavutelo lexi nyikiweke muapostola Yohane. Eka xivono xin’wana xa vuprofeta khwayere leyikulu—ya 144 000 leyi tiyeke—yi yimbelela risimu lerintshwa ro saseka emahlweni ka xiluvelo xa Xikwembu.—Nhlavutelo 14:3.

Ku Yimbelela eMinkarhini YaLe Mahlweni Ka Vukriste

Mintirho leyikulu ni leyi chavisaka ya Xikwembu na yona yi susumetele malandza ya xona ya la misaveni ku sungula ku yimbelela. Vona mimbuyelo leyi nyanyulaka leyi ku yimbelela ku veke na yona eka Vaisrayele hi ku hatlisa endzhaku ka ku ntshunxiwa ka vona hi singita evukhumbini bya Egipta. Mbilu ya Muxe ni ta Vaisrayele-kulobye ti nyanyulekile loko va yimbelele risimu ra ku hlula va tsundzuka leswi Yehova a swi endleke eka Faro ni mavuthu yakwe.—Eksoda 15:1-21.

Endzhaku evurungurwini bya Israyele, siku leri xiyekaka ri fikile loko, ehansi ka vukongomisi bya Hosi Davhida, areka ya ntwanano yi fanele ku nghenisiwa endzeni ka thendhe leri vamberiweke yona hi ndlela yo hlawuleka. Mayana xiendlakalo xa matimu! A hi ku yimbelela loku xiyekaka ntsena kambe swichayachayani swa okhestra leswi nyanyulaka moya swi engetele ku tsakisa ka siku.—1 Tikronika 16:4-36.

Rirhandzu ra Davhida ra vuyimbeleri ni vutshila byakwe bya haripa swi kandziyise ku chivirika kakwe ko antswisa vuyimbeleri ni ku yimbelela evugandzerini bya ntiyiso. Eka Psalma 33:1, 3, hi twa xikombelo xa yena xa ntwelovusiwana xa leswaku vagandzeri va Yehova va yimbelela swinene eka Xikwembu hi timbilu ta vona hinkwato: “Ṭakelani Yehova, ṅwina la’v̌a lulameke! . . . Mi pfumisa timbila ni marito ya ṅwina!”

Ku Yimbelela eMinkarhini Ya Vukriste

Eminkarhini yo sungula ya Vukriste, ku yimbelela nakambe ku ve na xiphemu lexikulu evugandzerini bya ntiyiso. Yesu ni vaapostola vakwe va yimbelele kun’we endzhaku ka xilalelo emahlweni ka rifu ra Yesu. (Marka 14:26) Ekhotsweni Pawulo na Silasi va yimbelele swinene leswaku hinkwavo va swi twa. (Mintirho 16:25) Ku fana na Davhida muapostola Pawulo a a hisekela ku tirhisa risimu. Ku tlula kan’we, u khutaze vapfumeri-kulobye ku yimbelela tinsimu to dzunisa Yehova.—Vaefesa 5:18, 19; Vakolosa 3:16.

Eka vugandzeri bya manguva lawa bya Vukriste, na kona vuyimbeleri byi na xiphemu lexikulu. Hi 1905 buku leyi nge Hymns of the Millennial Dawn yi humesiwile. Tluka ra nhloko-mhaka ri hlamusela tinsimu ta yona ta 333 tanihi “Nhlengeleto Lowunene wa Tipisalema na Tinsimu ni Tinsimu ta Moya to Pfuna Vanhu va Xikwembu eku Yimbeleleni ni le ku Beni ka Miloti eTimbilwini ta Vona eka Hosi.”

Kutani hi 1928 buku ya tinsimu leyi pfuxetiweke leyi nga ni tinsimu ta 337 yi humesiwile. A yi ku Songs of Praise to Jehovah, kutani rito ra yona ro rhanga ri te: “Tinsimu leti ti ta kumeka ti twanana ni mintiyiso ya Xikwembu leyi sweswi yi faneleke ku twisiseka.” Hambi swi ri tano, loko malembe ya ri karhi ya hundza ni ku vonakala ka ntiyiso ku andza, swi vile erivaleni leswaku tin’wana ta tinsimu leti a ti kuceteriwe hi mianakanyo leyi humaka eka vukhongeri byo hemba. Tlhandla-kambirhi, tinsimu ta Mfumo to khutaza ku chumayeriwa ka mahungu lamanene a ti laveka, loko ku twarisa ka le rivaleni ku tinyika matimba.—Matewu 24:14; Vaheveru 13:15.

Hi 1944 Kingdom Service Songbook yi humesiwile, ni tinsimu ta 62. Malembe ya makume mbirhi endzhaku, hi 1966, buku leyi nge Singing and Accompanying Yourselves With Music in Your Hearts (Yimbelelani Mi Vuvutela eTimbilwini ta N’wina) yi humesiwile. Leri a ri ri na tinsimu ta Mfumo ta 119 hi Xinghezi leti hlanganiseke timhaka hinkwato ta ku hanya ni vugandzeri bya Vukriste, ku katsa ni ku veka vumbhoni eka van’wana ni ku dzunisa Yehova Xikwembu na Yesu Kriste.

Kwalomu ka malembe ya makume mbirhi ya hundzile, lawa eka wona ku vonakala ka ntiyiso ku hambeteke ku andza. (Swivuriso 4:18) Xilaveko xa buku yin’wana ya tinsimu xi vonakile. Kutani hi 1984 ku humesiwe buku ya tinsimu hi Xinghezi leyi nge Sing Praises to Jehovah. Yi na tinsimu ta Mfumo ta 225, leti nga ni marito na miloti leswi hi ku helela swi qambiweke hi malandza lama tinyiketeke ya Yehova lama humaka eka swiphemu hinkwaswo swa misava.

Tirhisa Vuyimbeleri Bya Mfumo Hi Xitalo

Xifaniso lexi kombisiweke eka tluka ro hetelela emakumu ka buku leyi ya tinsimu ya sweswinyana xi hi susumetela ku tirhisa vuyimbeleri bya Mfumo hi xitalo eminhlanganweni ya Vukriste. Vayimbeleri va le tempeleni lava leteriweke lava kombisiweke kwalaho kunene va tlakusa timbilu ta vona ni marito ya vona va yimbelelela Xikwembu.—1 Tikronika 25:7.

Na hina hi laha ku fanaka hi nga yimbelela eminhlanganweni ya hina ya Vukriste, hi pfula milomu ya hina ivi hi yimbelela swi suka etimbilwini ta hina. Hambi swi ri tano, a hi hinkwerhu hi endlaka sweswo. Kumbexana ku tinyungubyisa swi hi vangela ku hupha ntsako wa vuyimbeleri eka Yehova handle ko karhateka, ku nga khathariseki muxaka wa rito leri hi nga na rona. Hi nga ha karhateka swinene hi langutelo leri endliwaka eka lava va yimeke ekusuhi. Muxe a a ri na xiphiqo lexi fanaka—hayi hi ku yimbelela kambe hi ku vulavula. Nhlamulo leyi Yehova a n’wi nyikeke yona yi nga hi pfuna loko hi lava ku tshika ku yimbelela hikwalaho ko pfumala vuswikoti. Yehova u vutise Muxe: “I mani l’a endleke nomu wa munhu? . . . Šana a hi mina Yehova?” (Eksoda 4:11) Hakunene, Yehova u ta yingisa hi ku tsaka loko hi tirhisa vuswikoti byihi na byihi lebyi a hi nyikeke byona byo yimbelela ku dzuneka kakwe hi matimba!

Nakambe, anakanya hi laha Pawulo na Silasi va yimbeleleke swinene ha kona loko va ri ekhotsweni. Ku hava ku chava kwalaho, naswona a va ri hava swichaya-chayani swo va seketela, hambi ku ri buku ya tinsimu yo yi landzela. Anakanya xiendlakalo xa kona: “Exikarhi ka vusiku, Pawulo na Silasi a va khongela, va yimbelelela Xikwembu tinsimu, kutani vabohiwa lavan’wana va va yingisa.” (Mintirho 16:25) Xana leswi a ku ri hi leswi Pawulo kumbe Silasi a va ri na marito ya ku yimbelela lama leteriweke? A swi tano. Ku tiyimisela ka vona lokukulu a ku ri ku yimbelela swinene naswona swi huma embilwini! I yini lexi hi tikarhataka ngopfu hi xona loko hi yimbelela tinsimu to dzunisa?

Hinkwerhu Hi Nga Antswisa

Xitsundzuxo xa xiyimbeleri Davhida xa fanela laha: “Yimbelelani ka yena e risimu le’rintŝha! Mi pfumisa timbilu ni marito ya ṅwina!” (Psalma 33:3) Sweswo hi swona leswi Yehova a swi rindzelaka eka malandza yakwe hinkwawo—ku hava swin’wana, ku hava xo tlula ku ‘endla leswi hi swi kotaka.’ Loko hi endla sweswo, hi nga rindzela leswaku Yehova a katekisa matshalatshala ya hina ni ku hi tsakisa—futhi nkarhi wun’wana lexi nga ta hi hlamarisa—hi ta swi kota ku antswisa.a

Hi leswi swiringanyeto swin’wana leswi tirhaka leswi nga pfunaka ku antswisa mpimo wa vuyimbeleri bya n’wina: Ringeta ku yingisela tinsimu letintshwa ta Mfumo hi ku phindha-phindha, u tirhisa vuyimbeleri bya tithepi leti rhekhodiweke kumbe tirhekhodo laha swi kotekaka kona. Eka van’wana, ku yimbelela tinsimu ekaya kumbe eka minhlangano leyintsongo ni vapfumeri-kulobye swi tikombe swi pfuna kun’we ni ku tsakisa. Eminhlanganweni ya bandlha i swa nkoka leswaku swichayachayani swi tlangiwa hi laha ku twakalaka ku ringana leswaku swi ta twiwa hi hinkwavo lava yimbelelaka. Leswi swi endla leswaku swi va olovela lava yimbelelaka ku landzelela risimu ni ku kurisa ntshembo wa vona. Loyi a tivisaka risimu u fanele ku vula xihloko xa rona, kumbexana a xiya ku faneleka ka rona naswona hayi nomboro ntsena.

Vatswari, xana mi khutaza vana va n’wina ku yimbelela tinsimu ta Mfumo hi ku chivirika naswona swi suka etimbilwini ta vona? Mindyangu leyi khutazeke vana va yona ku yimbelela swi huma embilwini, na hi ku twisisa, hi minkarhi yo tala yi kume leswi ku ri mpfuno lowunene eku kuleni ka moya.

Mimbuyelo Yi Tele

Ku na mimbuyelo yo tala eku yimbeleleni swinene naswona swi suka embilwini. Ku katseka ka hina ka munhu hi xiyexe evugandzerini bya le rivaleni ka tiya. Lava yimeke ekusuhi va khutaziwa ku yimbelelela ehenhla loko va twa ku yimbelela ka hina loku nga khomiseki tingana. Bandlha hinkwaro nakambe ra vuyeriwa, hikuva mpfumawulo lowu kurisiweke wa tlulela!

Tlhandla-kambirhi, ku yimbelela loku nga ni matimba ku nyikela vumbhoni lebyinene eka lava va vaka kona eminhlanganweni ro sungula. Lava hundzaka hi le Tiholweni ta hina ta Mfumo, kun’we ni vaakelani lava tshamaka ekusuhi, va tsakisiwa hi ku yimbelela ka hina lokunene, hi laha handle ko tipfinyinga vabohiwa lavan’wana va tweke Pawulo na Silasi ha kona. Leswi swi endle leswaku vayingiseri van’wana va lava ku tiva swo tala hi ta ntiyiso.

Xa nkoka swinene, ku yimbelela ka hina loku antswisiweke ku ta tisa ku dzuneka lokukulu eka Yehova, Musunguri wa vuyimbeleri na ku yimbelela, loyi a faneriwaka hi ku dzunisiwa hi risimu ehenhla ka hinkwaswo leswin’wana.

[Nhlamuselo ya le hansi]