Yimbelelelani Yehovha Swidzuniso
“Nḍi ta yimbelela Yehova, hikuv̌a o titlakusile ngopfu.”—EKSODA 15:1.
1. Hi tihi timfanelo ta Yehovha leti hi nyikaka xivangelo xa ku n’wi dzunisa?
PISALEMA 150 yi nyika swileriso swa 13 swa ku dzunisa Yehovha. Ndzimana ya yona yo hetelela yi ri: “Le’ŝi hefemulaka hikwaŝo a ŝi ḍunise Yehova. Ḍunisani Yehova!” Tanihi Timbhoni ta Yehovha, ha swi tiva leswaku Yehovha u fanele ku dzunisiwa. I Hosi ya Vuako Hinkwabyo, La-nge-henhla-henhla, Hosi leyi nga heriki, Muvumbi wa hina, Mupfuni wa hina. A nga ringani na munhu, u hlawulekile, a nga pimanisiwi na nchumu, a nga na ntangha, hi tindlela to tala. U ni vutlharhi hinkwabyo, u ni matimba hinkwawo, u ni vululami lebyi hetisekeke naswona i rirhandzu hi byakwe. U tlula van’wana hinkwavo hi vunene; wa tshembeka. (Luka 18:19; Nhlavutelo 15:3, 4) Xana u lulameriwe hi ku va hi n’wi dzunisa? Hakunene swi n’wi lulamerile!
2. Hi swihi swivangelo leswi hi nga na swona swa ku nkhensa Yehovha?
2 Yehovha a nga lulameriwi hi ku va hi n’wi gandzela ni ku n’wi dzunisa ntsena, kambe u lulameriwa ni hi xichavo ni ku nkhensa ka hina hikwalaho ka swilo hinkwaswo leswi a hi endleleke swona. I Munyiki wa “nyiko yin’wana ni yin’wana leyo saseka ni minkateko hinkwayo leyi hetisekeke.” (Yakobo 1:17) I Nseledyana ni Xihlovo xa vutomi. (Pisalema 36:9) Swilo hinkwaswo leswi hi swi kumaka tanihi rixaka ra vanhu swi huma eka yena, hikuva i Muvumbi wa hina Lonkulu. (Esaya 42:5) Nakambe i Munyiki wa mikateko hinkwayo ya moya leyi hi nyikiwaka yona hi moya lowo kwetsima, hi nhlengeletano yakwe ni Rito rakwe. Hi kota ku rivaleriwa swidyoho hikwalaho ka leswi a endleke N’wana wakwe a va nkutsulo wa hina. (Yohane 3:16) Hi ni ntshembo wa Mfumo wa ‘matilo lamantshwa ni misava leyintshwa laha ku lulama ku nga ta aka kona.’ (2 Petro 3:13) Hi ni vunghana lebyinene ni Vakreste-kulorhi. (Varhoma 1:11, 12) Hi ni ku dzuneka ni mikateko ya ku va Timbhoni takwe. (Esaya 43:10-12) Naswona hi ni lunghelo ra risima ra xikhongelo. (Matewu 6:9-13) Hakunene, hi ni swivangelo swo tala swa ku nkhensa Yehovha!
Tindlela Leti Hi Nga Dzunisaka Yehovha Ha Tona
3. Hi tihi tindlela tin’wana leti hi nga dzunisaka Yehovha ni ku n’wi nkhensa ha tona?
3 Xana hina tanihi malandza ya Yehovha lama tinyiketeleke, hi nga n’wi dzunisa ni ku n’wi nkhensa hi ndlela yihi? Hi nga swi endla hi ku hlanganyela evutirhelini bya Vukreste—hi nyikela vumbhoni hi yindlu na yindlu, hi endla maendzo yo vuyela, hi fambisa tidyondzo ta Bibele, ni ku nyikela vumbhoni eswitarateni. Nakambe hi nga n’wi dzunisa hi ku nyikela vumbhoni hi xitshuketa loko hi kuma nkarhi. Kutani, hi nga dzunisa Yehovha hi ku tikhoma ka hina lokunene, kun’we ni ndlela yo tenga ni leyi baseke leyi hi ambalaka ha yona ni leyi hi tilunghisaka ha yona. Timbhoni ta Yehovha hakanyingi ta bumabumeriwa hi ku veka xikombiso lexinene etimhakeni leti. Tlhandla-kambirhi, hi nga dzunisa Yehovha ni ku n’wi nkhensa hi xikhongelo.—Vona 1 Tikronika 29:10-13.
4. Hi yihi yin’wana ya tindlela to saseka swinene leyi hi nga dzunisaka Tata wa hina wa rirhandzu ha yona?
4 Ku engetela kwalaho, yin’wana ya tindlela to saseka swinene leyi hi nga dzunisaka ha yona Tata wa hina wa le tilweni wa rirhandzu, i ku tlakusa yena ni timfanelo ta yena hi miloti ya tinsimu ta Mfumo. Vunyingi bya swiyimbeleri ni tinqambhi byi vula leswaku rito ra munhu i xichayachayana lexikulu xa vuyimbeleri. Vativi va vuyimbeleri bya tlasiki va rhandza ku tsala marito ya vuyimbeleri hikuva va kuma ku eneriseka lokukulu loko va yingisela rito ra munhu ri yimbelela.
5. Hi swihi swivangelo leswi endlaka leswaku ku yimbelela tinsimu ta Mfumo hi swi tekela enhlokweni?
5 Vona ndlela leyi Yehovha a faneleke a tsaka ha yona loko a yingisela vanhu va yimbelela, ngopfu-ngopfu loko va yimbelela tinsimu ta ku dzunisa ni ta ku nkhensa! Kutani, hakunene hi fanele hi swi languta swi ri swa nkoka ku yimbelela tinsimu ta Mfumo eminhlanganweni ya hina yo hambana-hambana—eminhlanganweni ya vandlha, etinhlengeletanweni ta swifundzha, etinhlengeletanweni ta masiku yo hlawuleka, emintsombanweni ya muganga ni le mintsombanweni ya matiko hinkwawo. Buku ya hina ya tinsimu yi tele hi miloti yo tsakisa swinene, vuxongi bya kona byi bumabumeriwe minkarhi yo tala hi vanhu va le handle. Loko moya wa ku yimbelela tinsimu ta Mfumo wu ya wu nghena eka hina, hi ya hi tsakisa van’wana swinene ni ku pfuneka.
Ku Yimbelelela Yehovha Swidzuniso eMinkarhini Ya Bibele
6. Vaisrayele va ku tlangele njhani ku kutsuriwa ka vona eLwandle ro Tshwuka?
6 Rito ra Xikwembu ri hi byela leswaku Muxe ni vanhu hinkwavo va Israyele va yimbelele hi ndlela yo hlula endzhaku ka loko va kutsuriwile eka vuthu ra Faro eLwandle ro Tshwuka. Risimu ra vona a ri sungula hi marito lawa: “Nḍi ta yimbelela Yehova, hikuv̌a o titlakusile ngopfu; o wisile lwandle e hantši ni mukhanḍiyi wa yona. Yehova i matimba ya mina, ni risimu ra mina; hi yena Mukuṭuri wa mina. Hi šona Šikwembu ša nga; nḍi ta ši ḍunisa.” (Eksoda 15:1, 2) Hi nga anakanya hi ku hiseka ni ntsako wa Vaisrayele loko va yimbelela marito wolawo endzhaku ka ku kutsuriwa ka mahlori!
7. I swiendlakalo swihi swin’wana leswi xiyekaka, leswi Matsalwa ya Xiheveru ma vulavulaka hi swona malunghana ni ku va Vaisrayele va dzunisa Yehovha hi risimu?
7 Eka 1 Tikronika 16:1, 4-36, hi twa leswaku Yehovha u dzunisiwe hi ku yimbelela ni ku chaya tinanga ta vuyimbeleri loko Davhida a tisa Areka eYerusalema. A wu ri nkarhi wo tsakisa hakunene. Nakambe a ku yimbeleleriwa Yehovha swidzuniso, loku a ku fambisana ni tinanga loko Hosi Solomoni a nyiketela tempele eYerusalema. Eka 2 Tikronika 5:13, 14 hi hlaya leswi: “La’v̌a yimbaka tinanga ni la’v̌a yimbelelaka a v̌a fanela e ku yimbelela ŝiṅwe, hi rito riṅwe ku ḍunisa ni ku v̌onga Yehova; kutani, kaku loko v̌a yimba tinanga ni ŝiphambati, ni timbila tiṅwana ni loko v̌a yimbelela, v̌a ku: Ḍunisani Yehova, hikuv̌a i wa v̌unene, hikuv̌a tintŝalo ta yena ti kona hi masiku! Kav̌a loko yindlu, e yindlu ya Yehova yi tatiwa hi papa; kutani v̌aprista v̌a ṭanḍeka ku yima kona e ku tira ntiro hikwalaho ka papa; hikuv̌a ku twala ka Yehova a ku tatile yindlu ya Šikwembu.” Xana sweswo swi kombisa yini? Swi kombisa leswaku Yehovha a a yingisela ku dzunisa ka risimu naswona ku n’wi tsakisile, hi laha swi kombisiweke ha kona hi papa leri a ri nga si tshama ri voniwa. Endzhakunyana, tikhwayere timbirhi ti yimbelerile hi nkarhi wa ku pfuriwa ka marhangu ya Yerusalema emasikwini ya Nehemiya.—Nehemiya 12:27-42.
8. I yini lexi kombisaka leswaku Vaisrayele a va ku tekela enhlokweni ku yimbelela?
8 Entiyisweni, vuyimbeleri a byi ri xiphemu xa nkoka swinene xa vugandzeri etempeleni, lerova Valevhi va 4 000 a va hlawuleriwe ntirho wa vuyimbeleri. (1 Tikronika 23:4, 5) A va famba swin’we ni vayimbeleri. Vuyimbeleri, ngopfu-ngopfu vayimbeleri, a va ri ni xiphemu xa nkoka evugandzerini, ku nga ri ku kandziyisa timhaka ta nkoka ta Nawu, kambe a va tisa moya lowu faneleke wa vugandzeri. Byi pfune Vaisrayele leswaku va gandzela Yehovha hi ku hiseka. Xiya malunghiselelo ni nyingiso, leswi a swi laveka eka xiphemu lexi: “Nṭengo wa v̌ona, loko ku hlayiwa v̌amakwav̌o la’v̌a tiv̌aka tinsimu ta Yehova, hikwav̌o la’v̌a tiv̌aka ku yimbelela, a v̌a ri 288.” (1 Tikronika 25:7) Vona ndlela leyi a va swi languta swi ri swa nkoka ha yona ku yimbelelela Yehovha swidzuniso. A va leteriwile ku yimbelela naswona a va swi tiva!
9. Vuyimbeleri byi kandziyisiwa njhani eka Matsalwa ya Vukreste ya Xigriki?
9 Loko hi ta eka lembe xidzana ro sungula ra nguva ya hina, hi kuma yini? Yesu, evusikwini bya ku xengiwa kakwe, a ri ni timhaka to tika swinene emianakanyweni yakwe, u tlhele a vona xilaveko xa ku gimeta nkhuvo wakwe wa Paseka ni ku sungula Xitsundzuxo xa rifu rakwe hi ku yimbelelela Yehovha swidzuniso. (Matewu 26:30) Nakambe, hi hlaya leswaku “exikarhi ka vusiku,” Pawulo na Silasi, endzhaku ka ku biwa ni ku khotsiwa, “a va khongela, va dzunisa Xikwembu hi ku yimbelela tinsimu, kutani vabohiwa lavan’wana va va yingisa.”—Mintirho 16:25.
Ku Yimbelela Swidzuniso—I Xiphemu Xa Nkoka Xa Vugandzeri Bya Hina
10. Hi swihi swileriso leswi Rito ra Xikwembu ri swi nyikaka malunghana ni ku xi dzunisa hi risimu?
10 Xana swa endleka nkarhi wun’wana u vona onge ku yimbelela tinsimu ta Mfumo a hi swa nkoka leswaku u swi khathalela hi mbilu hinkwayo? Loko swi ri tano, xana a wu fanelanga u tlhela u kambisisa mhaka leyi, hi ku xiya nkoka lowu Yehovha Xikwembu na Yesu Kreste va swi langutaka ha wona ku yimbelela swidzuniso? Phela, Rito ra Xikwembu ri tele hi swileriso swa ku dzunisa Yehovha ni ku n’wi yimbelelela swidzuniso! Hi xikombiso, eka Esaya 42:10, hi hlaya leswi: “Yimbelelani Yehova e risimu le’rintŝha, yimbani ŝiḍuniso ŝa yena e makuṅwini ya misav̌a, ṅwina mi fambaka lwandle, na ṅwina mi hanyaka ka rona, ṅwina ŝihlale ni v̌aaki v̌a ŝona.”—Nakambe vona Pisalema 96:1; 98:1.
11. Hi yihi ndzayo leyi muapostola Pawulo a yi nyikeke malunghana ni ku yimbelela?
11 Muapostola Pawulo a a swi tiva leswaku ku yimbelela swi nga hi tsakisa, kutani u hi tsundzuxe kambirhi emhakeni leyi. Eka Vaefesa 5:18, 19 hi hlaya leswi: “Mi tala Moya. Khongotelanani hi tipisalema ni tinsimu, mi yimbelela swa Moya; twarisani [Yehovha] hi tinsimu ni tipisalema, mi [n’wi] dzunisa hi timbilu ta n’wina hinkwato.” Naswona eka Vakolosa 3:16, hi hlaya leswi: “Rito ra Kriste a ri tshame ka n’wina, ri andza. Dyondzisanani, mi khongotelana hi vutlhari hinkwabyo, mi twarisa Xikwembu hi ku yimbelela tipisalema, ni tinsimu, ni ku yimbelela swa Moya, mi ri karhi mi nkhensa etimbilwini ta n’wina.”
12. Hi swihi swikombiso leswi hi nga na swona swa tinsimu ta hina leti hi pfunaka ku dyondzisana ni ku khongotelana?
12 Xiya leswaku nkarhi hinkwawo Pawulo u phindha-phindha mhaka ya ku yimbelela, loko a boxa ‘tipisalema, swidzuniso swa Xikwembu, tinsimu ta moya, ku yimbelela mi nkhensa etimbilwini ta n’wina.’ Nakambe, u sungula marito yakwe lama yaka eka Vakolosa hi ku vula leswaku hi ndlela leyi “dyondzisanani, mi khongotelana.” Naswona sweswo ha swi endla hakunene, hi laha swihloko swa tinsimu ta hina swi kombisaka ha kona—“Ntumbuluko Hinkwawo, A Wu Dzunise Yehovha!” (risimu 5), “Tiyani, Mi Nga Tsekatseki!” (risimu 10), “Tsakelani Ntshembo Wa Mfumo!” (risimu 16), “Mi Nga Va Chavi!” (risimu 27), “Dzunisani Yehovha Xikwembu Xa Hina!” (risimu 100), ku nyika swikombiso swi nga ri swingani ntsena.
13. “Nandza la tshembekaka, wa vutlhari” u wu kombise njhani nkoka wa ku yimbelela, tanihi xiphemu xa vugandzeri bya hina?
13 Hi ku pfumelelana ni swileriso leswi, “nandza la tshembekaka, wo tlhariha” u hlele leswaku minhlangano ya hina—minhlangano ya vandlha, tinhlengeletano ta swifundzha, masiku ya tinhlengeletano to hlawuleka, mintsombano ya muganga ni mintsombano ya matiko hinkwawo—yi pfula yi tlhela yi pfala hi tinsimu ta Mfumo. (Matewu 24:45) Ku engetela kwalaho, ku hleriwa ni leswaku tinsimu ti yimbeleriwa minkarhi yin’wana exikarhi ka minhlangano leyi. Tanihi leswi hakanyingi minhlangano ya hina yi sungulaka hi ku yimbeleriwa ka risimu ra Mfumo, xana a hi fanelanga hi tikarhatela ku fika ka ha ri na nkarhi minhlangano yi nga si sungula leswaku hi hlanganyela eka xiphemu xexo xa vugandzeri bya hina? Naswona tanihi leswi minhlangano yi pfalaka hi vuyimbeleri, xana a hi fanelanga hi tshama ku fikela eka risimu ro pfala ni xikhongelo lexi landzelaka endzhaku ka rona?
14. Xana hi ni swikombiso swihi swa tinsimu leti fanelaka, leti hlawuleriwaka minongonoko ya hina?
14 Tinsimu ta minhlangano ya hina ti hlawuriwa kahle leswaku ti pfumelelana ni nongonoko. Hi xikombiso, eMintsombanweni ya Muganga ya “Dyondzo Ya Xikwembu” ya 1993, risimu ra 191, “Endla Ntiyiso Wu Va Wa Wena,” leri khutazaka Vakreste leswaku va lwisana na Sathana, misava ni nyama leyi nga ni vudyoho, ri yimbeleriwe endzhaku ka tinkulumo tinharhu leti a ti vulavula hi valala lava. Hi ku fanana, risimu ra 164, “Vana—Tinyiko Ta Risima Leti Humaka Eka Xikwembu,” leri tameleke switsundzuxo swa vatswari, ri yimbeleriwe endzhakunyana ka nkulumo leyi kombisaka ndzhwalo wa vatswari wo letela vana va vona. Risimu ra 70 leri nge, “Fana Na Yeremiya,” ri yimbeleriwe emahlweni ka nxaxamelo wa tinkulumo leti seketeriweke eka vuprofeta bya Yeremiya. Naswona endzhaku ka nxaxamelo wa swiphemu swo hambana-hambana swa vutirheli bya hina bya Mfumo, ku landzele risimu ra 156 leri nge, “Ndza Swi Rhandza,” ku nga risimu leri vulavulaka ngopfu hi vutirheli. Ku tirhisiwa vukheta lebyi fanaka loko ku hlawuriwa tinsimu ta Dyondzo ya Xihondzo xo Rindza, Nhlangano wa Ntirho ni Xikolo xa Vutirheli bya le Tilweni. Kutani loko vakulu va nyikela nkulumo ya le rivaleni, va kombisa risimu leri faneleke ri tirhisiwa ku pfula nongonoko, va fanele va hlawula risimu leri fanelaka nhloko-mhaka ya nkulumo ya vona.
15. Xana mutshama-xitulu wa nhlangano a nga ku pfuxa njhani ku tsakela eka risimu leri nga ta yimbeleriwa?
15 Loko a tivisa risimu leri nga ta yimbeleriwa, mutshama-xitulu a nga ha pfuxa ku tsakela eka risimu, hi ku boxa xihloko kumbe nhloko-mhaka ya rona. A hi yimbeleli tinomboro kambe hi yimbelela swihloko leswi sekeriweke eMatsalweni. Nakambe swi nga pfuna vandlha ku tsakela risimu, loko ku boxiwa tsalwa leri nga ehansi ka xihloko. Kutani, maritonyana yo koma ma nga ha fanela, tanihi ku vula leswaku hinkwerhu hi fanele ku kuma mongo wa risimu.
Tlangela Vunene Bya Yehovha Hi Ku Yimbelela
16. Xana hi nga wu kumisa ku yini moya wa tinsimu ta hina?
16 Tanihi leswi marito ya tinsimu ta hina ta Mfumo ma nga ni nkoka, hi fanele ku xiyisisa marito loko hi ri karhi hi ti yimbelela. Hi fanele hi kuma moya wa risimu rin’wana ni rin’wana. Tin’wana, to tanihi leti vulavulaka hi rirhandzu, ku nga mbhandzu wa moya, ti khumba mbilu. (Vagalatiya 5:22) Hi ti yimbelela hi tinghitsi ni ntamu. Tin’wana i ta ntsako naswona hi fanele hi ringeta ku ti yimbelela hi tsakile. Kasi tin’wana i tinsimu ta matimba, ta ku hlula, kutani ti fanele ku yimbeleriwa hi ku hiseka ni xivindzi lexikulu. Eka Xikolo xerhu xa Vutirheli bya le Tilweni, hi tsundzuxiwe leswaku hi va ni matimba ni ku hiseka eka marungula ya hina. Ku kombisa tinghitsi, matimba ni ku hiseka loko hi yimbelela tinsimu ta hina i swa nkoka ku tlurisa.
17. (a) Hi xihi xisolo lexi vekiweke ehenhla ka Vaisrayele lava nga tshembekiki lexi hi nga laviki leswaku xi tirha eka ndlela leyi hi yimbelelaka ha yona? (b) Xana vuyelo byi va byihi loko xitsundzuxo xa tinsimu ta hina hi xi tekela enhlokweni?
17 Loko hi yimbelela tinsimu ta Mfumo kasi mianakanyo ya hina yi le ka swilo swin’wana, naswona hi nga swi twisisi leswi marito ma vulaka swona, xana hi ta va hi nga fani ni Vaisrayele lava nga tshembekiki lava soriweke hi mhaka ya leswi, loko va dzunisa Xikwembu hi milomu ya vona, timbilu ta vona a ti ri ekule swinene na xona? (Matewu 15:8) A hi lavi leswaku ndzayo yoleyo yi tirha eka ndlela leyi hi yimbelelaka tinsimu ta Mfumo ha yona, a swi tano ke? Loko hi yimbelela tinsimu ta hina ta Mfumo hi mbilu hinkwayo, hi ta khutazeka hina ni lava nga ekusuhi na hina, ku katsa ni lavantshwa. Ina, loko hinkwavo lava yimbelelaka eTiholweni ta hina ta Mfumo a va xi tekela enhlokweni xitsundzuxo lexi tameriweke hi tinsimu leti, a xi ta va xikhutazo lexikulu xa ku hiseka evutirhelini ni ku papalata mintlhamu ya vudyoho.
18. Xana ku yimbeleriwa ka tinsimu ta Mfumo ku ve ni nkucetelo wihi eka wansati un’wana?
18 Nkarhi na nkarhi, vanhu va le handle va tsakisiwa hi vuyimbeleri bya hina bya tinsimu ta Mfumo. Xihondzo xo Rindza xi tshame xi humesa mhaka leyi: “Leswaku vuyimbeleri [byerhu] byi nga nyika vanhu vutivi lebyi kongomeke bya Yehovha Xikwembu swi kombisiwe hi ntokoto wa wansati loyi a khuvuriweke eNhlengeletanweni ya 1973 leyi nge ‘Ku Hlula Ka Xikwembu,’ eXitediyamu xa Yankee, edorobeni ra New York. A a endzele Holo ya Mfumo ya ndhawu ya ka vona ro sungula, naswona a lo titela, a a tshama ku fikela loko minhlangano hayimbirhi yi hela. Loko vandlha ri yimbelela . . . ‘Tshama U Langute Hakelo!,’ u tsakisiwe ngopfu hi marito ni ndlela leyi a ma yimbeleriwa ha yona kutani a tibyela leswaku laha hi lomu a a lava ku va kona. Endzhaku ka sweswo u tshinelele un’wana wa Timbhoni kutani a kombela dyondzo ya Bibele, naswona [u] endle nhluvuko lowunene ku kondza a va mbhoni ya Yehovha ya Mukreste.”
19. Hi xihi xikhutazo xo hetelela lexi nyikeriwaka emhakeni yo yimbelela tinsimu ta hina ta Mfumo hi mbilu hinkwayo?
19 Eka minhlangano ya hina yo tala, a hi yingani minkarhi leyi vayingiseri va phofulaka ku titwa ka vona ni ku tlangela ka vona. Kambe hinkwerhu hi nga kombisa ndlela leyi hi titwaka ha yona hi vunene bya Yehovha hi ku hlanganyela eku yimbeleleni ka tinsimu ta Mfumo hi mbilu hinkwayo. Handle ka sweswo, xana loko hi hlengeletana hi va hi nga tsakanga? Kutani hi fanele hi titwa hi navela ku yimbelela! (Yakobo 5:13) Hakunene, loko hi byi tlangela swinene vunene bya Yehovha ni musa wakwe lowu nga fanelangiki, hi ta n’wi yimbelelela swidzuniso leswi humaka embilwini.
U Hlamurisa Ku Yini?
◻ Hi swihi swivangelo-nkulu swimbirhi swa ku dzunisa Yehovha?
◻ Hi tihi tindlela tin’wana to hambana-hambana leti hi nga dzunisaka Yehovha ha tona?
◻ Hi yihi yin’wana ya tindlela to saseka swinene leyi hi nga dzunisaka Yehovha ha yona?
◻ Hi swihi swikombiso swa Matsalwa swa ku dzunisa Yehovha hi risimu?
◻ Xana tinsimu ta hina ta Mfumo hi nga ti yimbelela njhani hi mbilu hinkwayo?
[Bokisi leri nga eka tluka 11]
Tiphine Hi Tinsimu Teto!
Swi tikomba onge van’wana a swi va tikelanga ku dyondza to tala ta tinsimu leti. Hambi swi ri tano, mavandlha man’wana a ma karhatekanga hi ku yimbelela tinsimu leti. Kumbexana leswi lavekaka ku nga ha va ku endla matshalatshala ya ku dyondza leti vonakaka ti nga tolovelekanga. Loko tinsimu teto se ti toloveriwile, vandlha hakanyingi ri ti rhandza swinene ku tlula leti olovaka ku ti dyondza. Kutani hinkwavo evandlheni va nga ti yimbelela hi xivindzi. Ina, va nga tiphina hi tinsimu teto!
[Bokisi leri nga eka tluka 12]
Yimbelelani Tinsimu Ta Mfumo eSwinkhubyaneni Swa Ku Titsakisa
Ku yimbelela ka hina tinsimu ta Mfumo a ku fanelanga ku helela eHolweni ya Mfumo. Pawulo na Silasi va yimbelelele Yehovha swidzuniso va ri ekhotsweni. (Mintirho 16:25) Naswona mudyondzisiwa Yakobo u te: “Xana ku ni loyi a tsakeke? A a yimbelele tinsimu ta ku dzunisa.” (Yakobo 5:13) Eswinkhubyaneni swa ku titsakisa un’wana ni un’wana wa tsaka. Kutani ha yini mi nga yimbeleli tinsimu ta Mfumo? Leswi swi nga tsakisa ngopfu loko vuyimbeleri byi fambisana ni piyano kumbe katara. Handle ka sweswo, ku ni tikhasete leti tlangiwaka hi piyano ta tinsimu ta hina ta Mfumo; mindyangu yo tala ya Timbhoni yi na yona albamu ya tikhasete leti. A ti hi pfuni ku yimbelela ntsena, kambe machayelo ya tona loko hi ri karhi hi fambisana na tona ma tsakisa swinene.
[Xifaniso lexi nga eka tluka 8, 9]
Endzhaku ka ku kutsuriwa ka vona eLwandle ro Tshwuka, Vaisrayele va kombise ntsako wa vona hi risimu
[Xifaniso lexi nga eka tluka 10]
Ku yimbelela hi ntsako i xiphemu xa vugandzeri bya Vukreste namuntlha