Mhaka Leyi Ha Yona U Faneleke Ku Tsakela
‘KU TSAKELA yini?’ Ku hundzuka lokukulu loku nga ta endleka ematin’wini ya vanhu! Hulumendhe leyintshwa hi laha ku heleleke yo endliwa hi Xikwembu yi le kusuhi ni ku lawula xivono xa laha misaveni. (Daniel 2:44) Ku lawula loku ku ta khumba wanuna, wansati ni n’wana un’wana ni un’wana—hi leswinene kumbe hi leswo biha. Ku hundzuka loku xiyekaka ku ta endleka exikarhi ka rixaka leri boxiweke eka Matewu 24:34. Xisweswo, rungula ra ku hundzuka koloko ri lava ku tsakela ka xiviri ni loku tiyeke ka vanhu hinkwavo. Hakunene, swi ta va swi hoxile ku, ‘A ndzi tsakeli.’
Loko Vo Tala Va Kombise Ku Nga Tsakeli
Siku ra hina a hi nkarhi wo sungula lowu rungula ra nkoka ni ra xihatla ri tivisiweke ha wona leri faneleke ri pfuxe ku tsakela ka lava va rhamberiweke ku ri twa. Siku ra Nowa a ku ri nkarhi wun’wana wo tano. Hikwalaho ka vumunhu lebyo biha bya munhu, bya vunghwavava ni bya vukarhi enkarhini wolowo, Yehova Xikwembu u kunguhate ku herisa vanhu eka ndhambi ya misava hinkwayo. (Genesa 6:5-7, 13) Hambi swi ri tano, loko a nga si teka goza ro va herisa, u lunghiselele Nowa, muchumayeri wo lulama, leswaku a va tsundzuxa hi ta Ndhambi leyi taka ni xiendlo lexi a va fanele ku xi phikelela leswaku va ta hlayisiwa va hanya. Hambi leswi rungula rero a ri ri ra nkoka, vanhu lava tolovelekeke lava ri tweke “a va nga anakanyi nchumu.” (Matewu 24:39; Luka 17:26, 27; 2 Petro 2:5) A va tilawula, va nga swi lavi—va nga tsakeli! Hikwalaho ka leswi, va lahlekeriwe hi xin’wana ni xin’wana.
Xiyimo lexi fanaka xi ve kona emasikwini ya vaaki va miti leyi dumeke hi vunghwavava ya Sodoma na Gomora. Hambi leswi va tsundzuxiweke hi ku lovisiwa ka vona loku tshinelaka hikwalaho ka vuhomboloki bya vona lebyikulu, a va yingisanga. Na vona a va nga n’wi tsakeli munhu un’wana ni un’wana loyi a a ta kavanyeta mahanyelo ya vona. Wanuna Lota a ku ri yena ntsena.—Genesa 18:20-30; 19:1-29; Luka 17:28-30.
Xisweswo, rungula ra kona a ri nga tolovelekanga exikarhi ka vaaki va miti leyi. Kumbexana a va khathalela ngopfu leswi vaakelani va vona a va ta swi ehleketa hi vona loko va kombise ku tsakela. Kumbexana va chave leswaku a va ta boheka ku endla ku hundzuka evuton’wini bya vona loku a va nga swi lavi ku ku endla. Entiyisweni, va tsakele mahanyelo ya vona ya manyala. (Yuda 7) Kutani ku fika esikwini leri ku lovisiwa ka vona ku teke ha rona, a va ehleketanga nchumu naswona a va swi amukelanga leswi a swi ta humelela.
Lava Nga Tsakeriki eSikwini Ra Yesu
Loko N’wana wa Xikwembu, Yesu Kriste, a ri emisaveni, u rhume valandzeri vakwe ku twarisa mahungu lamanene ehenhleni ka hulumendhe ya Xikwembu ya le tilweni. (Matewu 10:7) Entiyisweni, u letele vadyondzisiwa vakwe hi mukhuva lowu a va fanele ku twarisa rungula leri ri nga tolovelekangiki ni ra nkoka emutini wihi na wihi ni magoza lawa a va fanele ku ma teka laha vini va tindlu va hlulekeke ku kombisa ku tsakela ka ntiyiso. N’wi yingiseli loko a ri karhi a ya emahlweni ni ku letela vadyondzisiwa vakwe: “Loko mi nghena endyangwini, xewetani. Loko swi lulamele ndyangu wolowo, ku rhula ka n’wina a ku te ehenhla ka wona; kambe loko swi nga wu lulamelanga, ku rhula ka n’wina a ku vuyele ka n’wina. Kutani loko va nga mi amukeli, kumbe loko va nga yingisi marito ya n’wina, humani endyangwini wolowo, kumbe emutini wolowo, mi phumunha ntshuri emilengeni ya n’wina.”—Matewu 10:12-14.
Xiya leswaku Yesu u letele vadyondzisiwa vakwe ku “phumunha ntshuri emilengeni [ya vona]” loko va huma endyangwini kumbe emutini laha a ku ri hava ku tsakela ni kuntsongo eka Mfumo wa Yehova. A a vula yini hi xitsundzuxo lexi? Ku phumunha ritshuri ra milenge ya munhu ku kombise ku tirhula ndzhwalo kumbe vutihlamuleri bya vuyelo lebyi n’wini wa yindlu a nga ta xaniseka ha byona hikwalaho ka ku pfumala ku tsakela eka rungula ra Xikwembu. Swi vule leswaku valandzeri va Yesu a va suka hi ku rhula kutani va tshika yindlu yoleyo kumbe muti eka vuyelo lebyi eku heteleleni a byi ta ta byi huma eka Xikwembu.
Kombisa Ku Tsakela—Swi Vula Vutomi Bya Wena!
Swa tsakisa ku xiya leswaku Yesu Kriste u ringanise ku amukela ka siku ra hina ni lokuya ka masiku ya Nowa ni ya Sodoma na Gomora. (Matewu 24:37-39; Luka 17:26-30) Vunghwavava ni vukarhi a swi tele emasikwini ya Nowa ni le masikwini ya Lota. Kunene, munhu wo lulama Lota a a xaniseka ni ku va ni gome loko a vona vuhomboloki ni ku tinyiketela ku tlula mpimo emahanyelweni layo biha ya vaaki va Sodoma na Gomora.—2 Petro 2:6-8.
Kambe, loko Yesu a vulavula hi siku ra Nowa ni siku ra Lota, u yisa mianakanyo ya hina, hayi eka vunghwavava ni vukarhi bya minkarhi yoleyo, kambe, ematshan’wini ya sweswo, etimhakeni ta siku na siku—ku dya, ku nwa, ku teka, ku tekiwa, ku xava, ku xavisa, ku aka ni ku byala. U kombise leswaku vo tala a va nga ta ri amukela rungula ra mahungu lamanene ya Mfumo wa Xikwembu kambe a va ta va lava khomekeke hi timhaka ta siku na siku ta vutomi ivi xisweswo va nga kombisi ku tsakela leswi Yehova a kunguhataka ku swi endla. Rungula i ra ntikelo wa ku fa kumbe ku hanya. Ku hluleka ku yingisa swi ta va leswi lovisaka. Ku ka u nga anakanyi nchumu kumbe ku kombisa ku pfumala ku tsakela i xidyoho lexikulu.—Ringanisa Matewu 6:31, 32.
Lexikulu ku fikela kwihi ke? Yesu u ye emahlweni a hlamusela a ku: “Hi Siku ra ku Avanyisiwa Xikwembu xi ta kombisa musa eka vanhu va Sodoma na Gomora ku tlula vanhu va muti wolowo” lava kalaka va nga yingisanga kumbe ku kombisa ku tsakela. (Matewu 10:15, Today’s English Version) Loko munhu a kombisa ku tsakela, a yingisa ni ku pfumela rungula, hambi loko a nga ha va wo biha ni wo kariha, a nga cinca vumunhu byakwe ivi a kuma tintswalo emahlweni ya Yehova leswaku a faneleka tanihi mufumiwa wa Mfumo, hambi ku ri hi laha Vakriste vo sungula eKorinto va endleke ha kona.—1 Vakorinto 6:9-11.
Eka mabulo ya yena hinkwawo ni vadyondzisiwa vakwe, Yesu Kriste u va khutaze ku yingisa, ku yingisisa, ku kombisa ku tsakela rungula ra nkoka ra Mfumo wa Xikwembu. Leswaku a pfuxa mianakanyo ya lava a vulavuleke na vona, u tsundzuxe a ku: “Tivoneleni hi laha mi yingisaka ha kona.” “La nga ni tindleve to yingisa, a a yingise!” “Ndzi yingiseni hinkwenu mi twisisa.” “Yingisani, mi twisisa.”—Luka 8:18; Marka 4:9; 7:14; Matewu 15:10.
Hikwalaho ke, nkarhi lowu taka loko un’wana wa Timbhoni ta Yehova a ta ekaya ka wena, swi ta pfuna wena ku: ‘Nghena, ndza tsakela.’