Swivutiso Swa Vahlayi
◼ Ha yini va nga ri vangani va Timbhoni ta Yehova va hlanganyela eka xinkwa ni vhinyo eku tlangeriweni ka Xilalelo xa Hosi xa lembe na lembe?
Leswi i mhaka ya leswi Timbhoni ta Yehova, ku hambana ni tikereke ta Vujagana, ti amukelaka dyondzo ya Bibele ya leswaku nhlayo yintsongo ya vanhu yi ta kuma vutomi bya le tilweni kutani lavan’wana hinkwavo va malandza lama tshembekaka ya Xikwembu va ta hakeriwa hi vutomi lebyi nga heriki emisaveni.
Tikereke i khale ti karhi ti dyondzisa leswaku tilo i hakelo ya hinkwavo lava tsakisaka Xikwembu; lavan’wana hinkwavo va ya endzilweni wa tihele. Bibele a yi vuli swona. Matsalwa ya komba kahle leswaku i vanhu van’wana ntsena, tanihi vaapostola, lava nga ta fuma na Kriste etilweni. Yesu u vule leswaku lava i “ntlhambinyana.” Bibele yi vula leswaku va endla 144-000. (Luka 12:32; Nhlavutelo 14:3, 4) Vo tala lava tirheleke Yehova hi ku tshembeka ni lava a va amukeriwa hi yena va fe Yesu a nga si pfula ndlela ya vutomi bya le tilweni. (Matewu 11:11; Vaheveru 10:19-21) Kutani endzhaku ka ku hlawuriwa ka “ntlhambinyana,” timiliyoni ta van’wana ti ve Vakriste va ntiyiso. Eka hinkwavo vanhu lava tshembekaka lava nga riki va “ntlhambinyana,” Bibele yi va khomele langutelo ra vutomi lebyi nga heriki eparadeyisini leyi pfuxetiweke ya la misaveni. (Psalma 37:20, 29; Nhlavutelo 21:4, 5) Kambe ha yini vanhu vo tano na vona va nga hlanganyeli eka xinkwa ni vhinyo? Yesu u kombe leswaku ku hlanganyela eka swifanekiselo enkarhini wa Xilalelo xa Hosi a ku ri ka lava vitaneriweke vutomi bya le tilweni ntsena, lava va nga eka ntwanano lowuntshwa.
Kavula, ripfumelo eka gandzelo ra Yesu i ra risima eka hinkwavo lava nga ta kuma ku rivaleriwa hi Xikwembu ni vutomi lebyi nga heriki, hambi vutomi etilweni kumbe vutomi aparadeyisini emisaveni. Kriste u kombe leswi eka Yohane 6:51-54: “Hi mina vuswa lebyi hanyaka lebyi xikeke hi le tilweni; loko munhu a dya vuswa bya kona, ú ta hanya hi laha ku nga heriki, . . . vuswa lebyi byi nga ta nyikiwa hi mina, i nyama ya nga; ndza yi nyika leswaku misava [ya vanhu lava kutsulekaka] yi va ni vutomi . . . Loyi a dyaka nyama ya nga ni ku nwa ngati ya nga, ú ni vutomi lebyi nga heriki.”
Kambe, swa xiyeka leswaku Yesu u vule marito wolawo eka lava tlulaka vadyondzisiwa va yena. Siku endzhaku ka loko a phamele magidi hi hlori, ntshungu wu tile eka Yesu endhawini ya Kapernawume. Ntshungu lowu wu n’wi nghenise eka bulo leri katseke marito ya yena eka Yohane 6:51-54. Kutani Yesu ngopfu-ngopfu a a nga byeli vadyondzisiwa loko a vule leswaku a a ri “vuswa lebyi humaka etilweni” byo fanekisela lebyi nga nyikelaka malangutelo ya vutomi lama tiyiselaka ku tlula manna leyi dyiweke emananga.—Yohane 6:24-34.
Eku xiyeni ka ntokoto wolowo wa khale emananga, tsundzuka lava humeke aEgipta va ya emananga. A ku ri ‘vana va Israyele, vavanuna va 600 000 hi milenge, ku nga hlayiwi vana ni lavo tala va matiko.’ (Eksoda 12:37, 38; 16:13-18) “La’v̌o tala v̌a matiko” lava va katse ni Vaegipta lava a va teke Vaisrayele ni Vaegipta van’wana lava a va tihlanganise na Israyele. Vaisrayele ni “la’vo tala v̌a matiko” a va lava manna leswaku va hanya. Hambi swi ri tano, xana “la’v̌o tala v̌a matiko,” a va ri ni malangutelo lama fanaka ni ya Vaisrayele? E-e, a va nga ri na wona. Hambi leswi a va ta gandzela exikarhi ka Vaisrayele ivi va tshemba ku nghena eTikweni leri Tshembisiweke, a va nga ta va tihosi kumbe vaprista ehansi ka ntwanano wa Nawu. Kutani ku dya manna ya xiviri emananga a ku nyikanga un’wana ni un’wana malangutelo lama fanaka.
Leswi i swa nkoka ku swi tsundzuka loko u ri karhi u kombisa leswi Yesu a swi vuleke eka vadyondzisiwa vakwe kwalomu ka lembe endzhaku ka loko a vule marito lama nga eka Yohane 6:51-54. Eka xiendlakalo lexi xa le ndzhaku, Yesu a a hlamusela xiendlo lexintshwa lexi katsaka xinkwa ni vhinyo ya xiviri leswi a swi ta fanekisela nyama ni ngati yakwe. Loko a sungula nkhuvo wa Xilalelo xa Hosi, Yesu u te eka valandzeri vakwe lavakulu: “Xinwelo lexi i ntwanano lowuntshwa engatini ya mina leyi halatiwaka hikwalaho ka n’wina.” Eka ntlawa lowuntsongo lowu fanaka wa vaapostola, u engeterile: “Hi n’wina lava mi tiyiseleke na mina emiringweni ya mina. Hi laha Tata wa mina a ndzi nyikeke Mfumo ha kona, na mina ndzi mi nyika wona; mi ta dya ni ku nwa etafuleni ra mina, eMfun’weni wa mina; kutani mi ta tshama eswiluvelweni, mi avanyisa tinxaka leta 12 ta Israyele.”—Luka 22:20, 28-30.
Xiya eka marito lawa ya le ndzhaku leswaku vanhu lava a va ta dya xinkwa xa xiviri ni ku nwa vhinyo ya xiviri tanihi swifanekiselo leswi fanekiselaka miri ni ngati ya Yesu a ku ri vadyondzisiwa lava nga eka “ntwanano lowuntshwa.” Vanhu vo tano nakambe a va ta va eka ntwanano wun’wana, lowu Yesu a wu endlaka na vona leswaku va ta avelana vuhosi ‘emfun’weni wakwe.’ Entiyisweni, Yesu a a kombetela laha eka lava a va ta ‘endliwa mfumo ni vaprista va Xikwembu xa hina, ku fuma tanihi tihosi ehenhla ka misava.’ (Nhlavutelo 5:10) Eka lembe xidzana ro sungula, Xikwembu xi sungule ku hlawula lava 144 000 lava a va ta hlanganyela eMfun’weni wa le tilweni. Vakriste eKorinto a va ri va ntlawa wolowo, hikuva va hlamuseriwe tanihi vanhu lava ‘kwetsimisiweke swin’we na Kriste Yesu, lava vuriwaka vahlawuriwa.’ (1 Vakorinto 1:2; ringanisa Varhoma 1:7; 8:15-17.) “Vahlawuriwa” vo tano a va ta hlanganyela eka Xilalelo xa Hosi, va hlanganyela hi ku tlangela eka xinkwa xo fanekisela ni le ka vhinyo leyi vulaka “ntwanano lowuntshwa lowu endliwaka hi ngati ya [yena].”—1 Vakorinto 11:23-26.
Namuntlha ka ha ri ni masalela mantsongo ntsena lama hanyaka emisaveni ya lava hlawuleriweke vutomi bya le tilweni hi Xikwembu. I vanhu vo tano ntsena lava va nga eka “ntwanano lowuntshwa” lava pfumeleriwaka ku hlanganyela eka swifanekiselo, xinkwa ni vhinyo, hi nkarhi wa ku tlangeriwa ka Xitsundzuxo xa lembe na lembe.
Kavula, Vakriste va ntiyiso hinkwavo namuntlha lava langutelaka ku hanya hi laha ku nga heriki emisaveni ehansi ka vuhosi bya Mfumo va swi tiva leswaku leswi swa koteka hi ku va na ripfumelo eka gandzelo ra Yesu. Hi laha Yesu a byeleke ntshungu ha kona, hi yena “vuswa lebyi hanyaka lebyi xikeke hi le tilweni.” (Yohane 6:51) Kambe, sweswo a swi vuli swona leswaku lava va nga ni ntshembo wa la misaveni va fanele ku hlanganyela hi xiviri eka swifanekiselo swa xiviri swa Xitsundzuxo, hikuva a va kona eka “ntwanano lowuntshwa,” naswona a va kona eka ntwanano na Yesu wo va ‘emfun’weni wakwe, va tshama eswiluvelweni.’
Kahle-kahle, ntlawa lowu wukulu lowu nga ni mintshembo ya la misaveni a wu hlanganyeli eka swifanekiselo, xinkwa ni vhinyo. Kambe leswi a swi kombi ku pfumala ripfumelo kumbe ku tlangela miri ni ngati ya Yesu. Entiyisweni, hikwalaho ka ku tlangela ka vona lokukulu ka gandzelo ra yena ni langutelo leri tsakisaka ra laha misaveni eka vona, hi laha ku heleleke va va kona lembe na lembe tanihi vahlayisi lava xiximekaka eku tlangeriweni ka Xilalelo xa Hosi. Hi ndlela leyi, va kombisa ripfumelo ra vona vini ni ku nyika vumbhoni byo tsakisa bya leswaku masalela ya “ntlhambinyana” ni vunyingi bya “tinyimpfu tin’wana” va le ka vun’we lebyi kufumelaka.—Yohane 10:16.