Nhlohlorhi Yin’wana Ya Nkoka eDyondzweni Ya Bibele

RAVUMUNE, October 1, 1987, a ku ri xiendlakalo xin’wana edyondzweni ya Bibele hi laha yi nyikeriweke ha kona hi Sosayiti ya misava hinkwayo ya Timbhoni ta Yehova. Ri funghe ku khanguriwa ka Xikolo lexintshwa xo Letela Vatirheli. Ntlawa wo sungula wa vamakwerhu lava titshameleke voxe va 24 wu vikele vuleteri lebyi hlawulekeke eHolweni leyikulu ya Nhlengeletano ya Pittsburgh eCoraopolis, Pennsylvania. Vini va tindlu lava nga ni musa exikarhi ka Timbhoni endhawini yoleyo va pfule makaya ya vona leswaku va amukela swichudeni leswi enkarhini wa swona wa vuleteri bya nhungu wa mavhiki.

Swichudeni swi tsarisiwile nimixo, swi amukela tibuku ta swona kun’we ni swiletelo swo sungula. Hi 7:30 madyambu wolawo, Holo ya Nhlengeletano a yi tele hi 1 518 wa Timbhoni leti nyanyulekeke leti tiyimiseleke ku hlanganyela eku pfuriweni ka ximfumo ka xikolo lexi xintshwa.

Albert Schroeder, xirho xa Huvo Leyi Fumaka ya Timbhoni ta Yehova, u tirhe tanihi mutshami wa xitulu. Endzhaku ka risimu na xikhongelo, u vitane Robert Dawson, mulanguteri wa muti wa Pittsburgh. Makwerhu Dawson u amukele 24 wa swichudeni ePittsburgh hi malwandla ivi a bumabumela vini va tindlu va 13 lava tinyiketeleke ku va lunghiselela byetlelo. U tsundzuxe lava endzeriweke leswaku a ku ta va lunghelo ra vona ku kombisa rirhandzu leri amukelaka, leri pfumelaka, leri langutelaka ni ku tiyisela swilo hinkwaswo. (1 Vakorinto 13:7) U tsundzuxe swichudeni leswaku, tanihi vapfhumba, va fanele ku kombisa ku tlangela, ku titsongahata ni ku pfuna. Hi ndlela leyi, vuxaka lebyi hetaka nkarhi wo leha byi nga va kona.

Endzhaku swichudeni swi tivisiwile, xin’wana ni xin’wana xi nyika vito ra xona ivi xi vula ni laha a xi huma kona ni leswaku ntirho wa xona wa vutomi a wu ri wihi entirhweni wa Yehova. Van’wana a va huma ePuerto Rico, Argentina, Canada na le Hong Kong, lavan’wana a va huma exiyengeni xa le vuxeni bya United States. Handle ka Xinghezi, van’wana va vona va vulavula Xipaniya, Xifurwa, Xintariyana, kumbe Xichayina.

Ku ya emahlweni mutshami wa xitulu u vitane James Hinderer tanihi un’wana wa valeteri. Loko a seketela tinhlamuselo takwe eka Matewu 7:24, 25, Makwerhu Hinderer u kandziyise ntikelo wo landzelela hi ku endla swilo, hi ku endla leswi dyondziweke. Xisweswo, swichudeni a swi ta va swi aka “yindlu” ya swona ehenhla ka ribye ematshan’wini ya misava leyi khukhulekaka.

Randall Davis, muleteri un’wana, u ye emahlweni a vulavula ni swichudeni. Loko a seketela tinhlamuselo takwe eka Esaya 54:13, u xiye leswaku a va ta dyondzisiwa hi Yehova leswaku va ta swi kota ku nghenisa dyondzo eka van’wana. A va ta fanela ku tiseketela swinene hi “mupfuni” wa ntiyiso, moya lowo kwetsima wa Yehova Xikwembu.—Yohane 14:26.

Albert Schroeder u hambete a vulavula hi ndlela leyi madyambu wolawo ya n’wi tsundzuxeke xiendlakalo xin’wana edyondzweni ya Bibele. U tsundzuke February 1, 1943, loko swichudeni swa dzana, valeteri va mune (ku katsa na yena) ni vapfhumba lava humaka eBrooklyn va hlengeletanile eSouth Lansing, New York, leswaku ku pfuriwa Xikolo xa Bibele Xa Watchtower xa Gilead. Malembe lama tlulaka 44 ku sukela enkarhini wolowo, Xikolo xa Gilead xi katekisiwile hi Yehova, hi laha swi voniwaka hi ku hangalasiwa ka varhumiwa lava leteriweke hi Bibele lava tlulaka 6 000 emisaveni hinkwayo. Makwerhu Schroeder endzhaku u xiye tinhloko-mhaka to hambana-hambana leti nga ta dyondzisiwa eXikolweni xo Letela Vatirheli. Exikarhi ka tona leti ku na Tidyondzo ta Bibele, Nhlengeletano ya le Tilweni (leyi yisaka mianakanyo yo tala eka vutihlamuleri bya valanguteri ni malandza ya vutirheli), Vulawuri bya Xikwembu ni ku Vulavula eRivaleni. Nakambe u yise mianakanyo eka tibuku to hambana-hambana, ku katsa na leyi nge Reasoning From the Scriptures. Eku heteleleni, Makwerhu Schroeder u xiye ku hetiseka ka Esaya 45:23, a vula leswaku vakaneti va vukhongeri, entiyisweni, a va nkhinsama hi matsolo ya vona eka Xikwembu hi mhaka ya leswi a va boheka ku xiya leswaku Timbhoni ta Yehova ti na ntiyiso eswivandleni swa vutshunguri, nawu ni mahlayelelo ya Bibele.

“Vanani Vaentisi Va Pawulo” a ku ri nhloko-mhaka leyi hlawuriweke hi xivulavuri lexi landzelaka, Karl Klein wa Huvo leyi Fumaka. U kombe ndlela leyi muapostola Pawulo hi ku phindha-phindha a kombeleke van’wana ku n’wi tekelela. U swi kotile ku endla leswi, hikuva a a tekelela Kriste. (1 Vakorinto 11:1) Swichudeni swi tsundzuxiwe ku tekelela Pawulo eka vutivi ni vutshila byakwe byo tirhisa Matsalwa, eku chumayeleni kakwe ka xivindzi ni ku chivirika, eku pfumaleni kakwe vutitivi, eku titsongahateni kakwe ni ku tiveka ehansi ni le ku tiyiseleni kakwe.

Theodore Jaracz, loyi na yena a nga xirho xa Huvo leyi Fumaka, manuku u nyikele nkulumo yo nyikela, “Xikolo Lexintshwa—Xa Xikongomelo Xihi?” U sungula hi ku xiya leswaku lava va tinyiketeke exikolweni lexi va pfumerile ku tirha kwihi na kwihi laha va nga lavekaka kona ensin’wini ya misava hinkwayo. Leswi ku nga ni Timbhoni leti tlulaka timiliyoni tinharhu ni kotara eka mabandlha lama tlulaka 54 000, ku na xilaveko lexikulu xa vavanuna lava fanelekaka vo risa, vo dyondzisa ni ku rhangela entirhweni lowukulu wo vula evhangeli. Khale ka khaleni, Yehova u vhumbe leswaku a a ta lunghiselela “tinyiko e šikari ka v̌anhu.” (Psalma 68:18) U endle leswi eminkarhini ya vaapostola, hambi ku ri hi laha swi phofuriweke ha kona hi muapostola Pawulo eka Vaefesa 4:8-11. Namuntlha, Yehova nakambe u lunghiselela ‘tinyiko hi vavanuna’ naswona u letela van’wana va vona hi ku tirhisa xikolo lexi xintshwa.

Makwerhu Jaracz nakambe u vule leswaku hambi leswi swichudeni hinkwaswo swi nga na vuswikoti bya ntumbuluko, Kriste a nga byi kurisa. Kambe sweswo swi lava matshalatshala naswona xivulavuri xi phofule ku tiyiseka ka leswaku swichudeni swa 24 a swi ta va matshalatshala wolawo. U kombise leswaku ku nga ka ku nga vi na ku hambuka eka mimpimanyeto leyo lulama ya Yehova ivi a vula leswaku lava va rhangelaka va nga pfuna hi xikombiso xa vona xa munhu hi xiyexe ni nkucetelo. Eswiyengeni swo tala swa misava, ku na xilaveko lexikulu xa vavanuna lava fanelekaka ku amukela vutihlamuleri bya nhlengeletano. Xilaveko lexi xi katsa ni mabandlha lamakulu lama ma nga ha vaka ma ri na nkulu un’we kumbe vambirhi ni nhlayo yintsongo ya malandza ya vutirheli. Kutani swi le rivaleni leswaku ha yini Xikolo xo Letela Vatirheli xi boheke ku simekiwa—i xa ku letela vakulu ni malandza ya vutirheli lava nga tekangiki ku tirha kwihi na kwihi ensin’wini ya misava hinkwayo. Hikwalaho ka vuleteri bya vona, va ta hlomiseriwa ku antswa leswaku va khathalela ku andza tanihi varisi.

Timbhoni ta Yehova hinkwato ti nga nyikela minkhenso eka Xikwembu hi ku endla leswaku Xikolo xo Letela Vatirheli xi koteka. Eku heteleleni, Makwerhu Jaracz u te: “Ndza tiyiseka leswaku hinkwerhu ka hina hi hlanganile hi mianakanyo ni mintlhaveko eka Yehova hi laha swi vekiweke ha kona eka Psalma 79:13: ‘Kutani hina, tiko ra wena, ntlhambi lowu u wu risaka, hi ta ku nkhensa hi laha ku nga yiki helo, ni vatukulu va hina, va ta tama va vula ku dzuneka ka wena.’” Manuku, hi risimu na xikhongelo, xiendlakalo lexi xi tsundzukekaka ni lexi tsakisaka xi fike emakumu.