A A Tsakela Nawu Wa Yehovha

ALBERT D. SCHROEDER, xirho xa Huvo leyi Fumaka ya Timbhoni ta Yehovha, u hete pfhumba ra yena ra laha misaveni hi Ravunharhu, March 8, 2006. A a ri ni malembe ya 94 hi vukhale naswona u hete malembe yo tlula 73 a ri evutirhelini bya nkarhi hinkwawo.

Makwerhu Schroeder u tswaleriwe eSaginaw, Michigan, le U.S.A., hi 1911.a Loko a ha ri n’wana, kokwa wa yena wa xisati la tswalaka mana wa yena u n’wi dyondzise swo tala malunghana ni Bibele, naswona u n’wi dyondzise ku rhandza ku hlaya Rito ra Yehovha. U dyondze Xilatini, Xijarimani ni vunjhiniyara bya gezi eYunivhesiti ya le Michigan. Hambiswiritano, loko ku tlangela ka yena Matsalwa ku ri karhi ku kula, u tshike ku ya mahlweni ni tidyondzo takwe ivi a nghenela ntirho wa nkarhi hinkwawo wo chumayela hi Mfumo. Hi 1932 u ve xirho xa ndyangu wa Bethele wa le Brooklyn, eNew York.

Hi 1937 loko Makwerhu Schroeder a ri ni malembe ya 26, u vekiwe ku langutela ntirho wa Timbhoni ta Yehovha eBritain. Ku hisekela ka yena ntirho wo chumayela ku khutaze vo tala kwalaho leswaku va nghenela ntirho wa nkarhi hinkwawo. Jaha rin’wana leri a a tolovelane na rona eBethele ya le London a ku ri John E. Barr. Endzhaku va tirhe swin’we malembe yo tala va ri swirho swa Huvo leyi Fumaka.

Ntirho lowu Makwerhu Schroeder a wu endleleke Timbhoni ta Yehovha wu xiyiwile emalembeni ya nyimpi. Hi August 1942 u hlongoriwile eBritain. Endzhaku ka riendzo leri nga tsakisiki va tsemakanya Lwandle ra Atlantic hi nkarhi wa nyimpi, u fike eBrooklyn hi September.

Hi nkarhi wolowo, malandza ya Yehovha se a ma langutele leswaku ku ta endliwa ntirho lowukulu endzhaku ka Nyimpi ya Vumbirhi ya Misava. Makwerhu Schroeder u hlamarile a tlhela a tsaka loko a kuma xiavelo xa yena lexi landzelaka—ku ya pfuneta eku hleleni ka tikhoso leti dyondzisiwaka eka Xikolo xa Bibele xa Giliyadi xa Watchtower. U hete malembe yo hlayanyana a ri muleteri exikolweni xexo, a pfuneta eku leteleni ka varhumiwa. Swichudeni leswi a swi dyondziseke eGiliyadi ivi swin’wana endzhakunyana a swi dyondzisa eXikolweni xa Vutirheli bya Mfumo a swi n’wi rivali. A a swi tsakela ku dyondzisa swichudeni swa yena ku rhandza milawu ya Xikwembu naswona a a kandziyisa nkoka wa ku tiva Yehovha.

Hi 1956, Makwerhu Schroeder u tekane na Charlotte Bowin, naswona hi 1958 ku velekiwe Judah Ben n’wana wa vona wa mufana. Makwerhu Schroeder a a ri wanuna tlhelo tatana lonene la nga Mukreste. Hi 1974 u sungule ku va xirho xa Huvo leyi Fumaka, laha ku twisisa ka yena a ku tlangeriwa swinene. A a ri wanuna la nga ni musa a tlhela a titsongahata, ku tlula kwalaho, a a lava ku twarisa vito lerikulu ra Xikwembu. Ha tiyiseka leswaku Makwerhu Schroeder u kume hakelo ya yena ya le tilweni tanihi Mukreste la totiweke loyi hakunene a a ‘tsakela nawu wa Yehovha.’—Pisalema 1:2.

[Nhlamuselo ya le hansi]