Xiviko Xa Vahuweleri Va Mfumo

Ku Hlangana Nakambe Loku Tsakisaka eBrazil

Eka varhumiwa va 67 lava leteriweke eGilead lava sweswinyana va tirhaka eBrazil, 63 va hlanganile ehofisini ya rhavi ivi va vumba xifaniso lexi xa matimu. Ku hlangana nakambe loku ko tsakisa ku humelele hi November 18, 1986, enkarhini wa riendzo ra A. D. Schroeder, xirho xa Huvo Leyi Fumaka ya Timbhoni ta Yehova eBrooklyn, New York.

A ku ri malembe ya 41 emahlweninyana ku ya kwalomu ka siku leri—hi November 17, 1945—laha mathwasani mambirhi ya ntlawa wo sungula ya xikolo xa Bibele xa Gilead xa Watch Tower ma teke eBrazil. Eka un’wana wa vona, Charles Leathco (endzhaku, eximatsini xa le xikarhi), loku a ku ri ku hlangana nakambe loku hlawulekeke hikuva yena ni muendzi Charlotte Schroeder a va ri vanghana va ntlawa eGilead, naswona Makwerhu Schroeder a a ri un’wana wa valeteri va vona.

Ku sukela eka ntlawa wolowo wo sungula, ntsengo wa varhumiwa va 258 va tile eBrazil. Exikarhi ka vona a ku ri ni vaaka-tiko va Brazil va 16. Un’wana wa vona, Augusto Machado (eximatsini xa le mahlweni), u dyondze ntiyiso eka murhumiwa wo sungula, a ya eGilead kutani a tlhelela eBrazil. U tirhe ehofisini ya rhavi eka malembe ya 30 lama hundzeke naswona sweswi i mufambisi wa Komiti ya Rhavi. Hambi leswi vo tala va varhumiwa va nga ha tirheki kona ensin’wini leyi ya varhumiwa, ntirho lowunene lowu va wu endleke wa ha ri kona. Hi 1945 a ku ri ni vahuweleri va Mfumo va 344 ntsena etikweni rero; sweswi Brazil yi hundze nhlohlorhi ya 200 000, yi vike nhlohlorhi ya 201 226 wa vahuweleri hi February 1987.

Mawaku ntsako lowu a wu ri kona eka varhumiwa va le Brazil, lavantsongo ni lavakulu, ku tsundzuka ntirho hinkwawo lowu hlamarisaka wa malembe ya 41 lama hundzeke eka ku hlangana loku nakambe.