Mathwasana Ya Le Gilead—“Varhumiwa Va Xiviri!”

“XANA murhumiwa i yini?” Xivutiso xexo xi tlakusiwe hi muhleri wa phepha-hungu kwalomu ka malembe-khume ya mune lama hundzeke. Mutsari loyi u vule leswaku varhumiwa va ntiyiso hi vona va hundzuleke vanhu ni ikhonomi. Hambi swi ri tano, hi Sonto, March 5, 1995, le Holweni ya Nhlengeletano ya Timbhoni ta Yehovha ya Doroba-nkulu ra Jersey, ku nyikeriwe nhlamulo leyi hisaka, leyi nga tolovelekangiki. A ku humelela yini kwalaho? Ku thwasa ka ntlawa wa vu-98 wa Xikolo xa Bibele xa Gilead xa Watchtower—xikolo lexi rhumeleke varhumiwa eswiphen’wini hinkwaswo swa misava!

Endzhaku ka risimu ni xikhongelo xo pfula, Albert D. Schroeder wa Huvo leyi Fumaka u amukele hinkwavo lava a va ri kona va 6 430 hi ndlela leyi kufumelaka. Eka xingheniso xakwe, Makwerhu Schroeder u swi veke erivaleni leswaku hikwalaho ka yini mathwasana ya Gilead ma hambanile ni vanhu van’wana lava na vona va tivitaneke varhumiwa. U te: “Bible i buku-mpfuno leyikulu ya le Gilead.” Mathwasana ya le Gilead ma leteriwa leswaku ma va vadyondzisi va Rito ra Xikwembu hayi vakondleteri va vanhu. Xisweswo va faneleka hi ndlela leyi hlawulekeke leswaku va khathalela swilaveko swa moya swa vanhu va le matikweni mambe.

Swivulavuri hi ku landzelelana swi boxe tindlela to tala leti ha tona mathwasana ya le Gilead ma nyikelaka vumbhoni bya leswaku i varhumiwa va “xiviri.” Charles Molohan u vulavule na vona hi xihloko lexi nge “Hambetani Mi Veka Mihandzu Leyinene Tanihi Varhumiwa.” Hi ku tirhisa marito ya muapostola Pawulo, eka Vakolosa 1:9, 10, Makwerhu Molohan u tsundzuxe mathwasana leswaku tin’hweti ta vona ta ntlhanu leti hundzeke va ri eGilead ti va pfune leswaku va kula “hi tlhelo ra ku tiva Xikwembu.” Leswi swi ta va pfuna leswaku va veka mihandzu hi tindlela timbirhi: hi ku kombisa mihandzu ya moya wa Xikwembu na hi ku avela van’wana mintiyiso ya Bibele.

Daniel Sydlik wa Huvo leyi Fumaka u landzerile a ri ni xihloko lexi tlhontlhaka mianakanyo lexi nge “U Nga Veki Vutomi Bya Wena eKhombyeni.” U boxe xivutiso xa Yesu: “Kumbe munhu ú ta humesa yini ku xava vutomi bya yena xana?” (Matewu 16:26) Makwerhu Sydlik u te: “Vanhu va xavise vutomi bya vona, leswaku va ta hanya vutomi byo olovanyana.” Kambe, lava nga ni ripfumelo leri hanyaka a va nge tsani loko va langutane ni miringo. Marito ya Yesu ma kombisa leswaku munhu u fanele a tiyimisela ku “humesa,” leswi vulaka leswaku, a pfumela ku lahlekeriwa hi xo karhi, leswaku a ta kuma moya-xiviri kumbe vutomi byakwe. Varhumiwa lavantshwa va khutaziwe leswaku va nyika Yehovha moya-xiviri wa vona hinkwawo, va endla ntirho wakwe hi matimba hinkwawo!

Hi loko ku landzela William Van de Wall wa Komiti ya Ndzawulo ya Ntirho, a vulavula hi xihloko lexi nge “Muapostola Pawulo—Xikombiso Lexi Faneriwaka Hi Ku Tekeleriwa.” Makwerhu Van de Wall u te: “Pawulo u sungule ntirho wa vurhumiwa eka lembe-xidzana ro sungula.” Xisweswo, hi laha ku fanelaka ku kandziyisiwe tindlela ta mune leti eka tona muapostola Pawulo a vekeleke varhumiwa va namuntlha xikombiso lexinene: (1) Ku karhateka ni rirhandzu ra xiviri ra Pawulo hi vanhu, (2) ku humelela ka yena evutirhelini, (3) ku titsongahata ka yena ku n’wi endle a nga tikurisi, (4) ku titshega ka yena swinene hi Yehovha.

“Pfumelela Yehovha A Ku Kambisisa eXiavelweni Xa Wena Lexintshwa” a ku ri nhloko-mhaka leyi ndlandlamuxiweke hi Lyman A. Swingle wa Huvo leyi Fumaka. Hi ku tirhisa ndzimana ya siku, ku nga Pisalema 139:16, Makwerhu Swingle u vule leswaku, tanihi varhumiwa lavantshwa, va ta langutana ni swiphiqo eswiavelweni swa vona ni leswaku Yehovha hi yena a tivaka ntlhantlho wa swona. U khongoterile a ku: “Yanani eka yena, mi vulavula na yena loko mi ri ni swiphiqo. Ringetani ku kuma leswaku ku rhandza kakwe hi kwihi.”

John E. Barr wa Huvo leyi Fumaka yena u vulavule hi nhloko-mhaka leyi nge “Ripfumelo Ra N’wina Ri Karhi Ra Kula Swinene.” (2 Vatesalonika 1:3) Eka Luka 17:1, hi hlaya leswaku Yesu u te: “Loko swi ri swikhunguvanyiso a swi nga pfumaleki.” Van’wana va khunguvanyisiwe hi vumunhu bya varhumiwa-kulobye. Kambe Makwerhu Barr u khuthaze varhumiwa leswaku va va ni ripfumelo leri lavekaka leswaku va kota ku rivalela. Ina, a ku ri emhakeni yo fana ni leyi laha vadyondzisiwa va Yesu va kombeleke va ku: “Hi engetelele ku pfumela.” (Luka 17:2-5) Ripfumelo ra varhumiwa nakambe ri nga ringiwa hi mindzulamiso yo karhi ya nhlengeletano. Makwerhu Barr u vutisile: “Xana hi na rona ripfumelo ra ku swi amukela sweswo, kumbexana swi ta hundzuka swihinga leswikulu?”

Hi loko ku landzela swikhutazo swo huma eka valeteri vambirhi va le Gilead. Jack Redford u kombele mathwasana leswaku ma tshama ma ri ni langutelo lerinene. U rungule hi ta murhumiwa un’wana loyi a tshikeke xiavelo xakwe hikwalaho ko vungunyiwa hi varhumiwa-kulobye. Hambi swi ri tano, Matsalwa ma hi tsundzuxa leswaku hi nga hlundzukisiwi hi swilo leswi nga vuliki nchumu. (Eklesiasta 7:9) U khongoterile a ku: “Vanani ni langutelo lerinene, mi rivalela lava mi tshamaka na vona swihoxo ni ku nga hetiseki ka vona.”

U. V. Glass, mutsarisi wa le Gilead, u vutisile a ku: “Xana mi tiyimiserile ku langutana ni ‘nkarhi swin’we ni swiyimo leswi nga rindzeriwangiki’”? (Eklesiasta 9:11) Makwerhu Glass u te: “Ndlela ya hina yo hanya yi nga cinca rini na rini, naswona ku cinca kun’wana ku nga ha va loku vavaka swinene.” Varhumiwa van’wana va tikume va langutane ni ku tsana ka rihanyo, vuvabyi ni swiphiqo swa ndyangu va nga swi rindzelanga, leswi boheke van’wana leswaku va siya swiavelo swa vona. Makwerhu Glass u te: “Ku nga khathariseki leswaku hi xihi xiendlakalo lexi nga rindzeriwangiki lexi nga ku welaka, ha swi tiva leswaku Yehovha wa swi vona naswona wa karhateka. Loko hi titshega hi yena, ha swi tiva leswaku hi ta hlula!”

Nkulumo leyi nga ni xihloko lexi nge “Ku Hlawuleriwa Ntirho Wa Vurhumiwa” yi chapute nxaxamelo wa ni mixo wa tinkulumo. Theodore Jaracz wa Huvo leyi Fumaka u hlamule xivutiso lexi vutisiweke eku sunguleni, lexi nge “Xana Murhumiwa I Yini?” Leswaku a nyikela nhlamulo, u hlamusele Mintirho tindzima 13 na 14 malunghana ni ntirho wa vurhumiwa wa Pawulo na Barnaba. Entiyisweni, ntirho wolowo a wu nga ri wa ku tlhantlha swiphiqo swa vanhu, kambe a wu ri wa ku ‘twarisa mahungu lamanene.’ (Mintirho 13:32) Makwerhu Jaracz u vutisile a ku: “Xana ma pfumela leswaku Pawulo na Barnaba va swi kombisile leswaku murhumiwa wa xiviri u fanele a va njhani?” Murhumiwa la nga ni ntokoto swinene wa le Mexico, Robert Tracy, u vitaniwile leswaku a ta phofula yin’wana ya mintokoto yakwe leyi tsakisaka mbilu, tanihi muvuri wa evhangeli.

Nongonoko wa ni mixo wu fikelele maninginingi ya wona loko Makwerhu Schroeder a nyika mathwasana ya 48 tidiploma ta wona. Lava a va ri kona va tsakile ku twa mavito ya matiko ya 21 lawa varhumiwa va averiweke eka wona: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, na Venezuela.

Endzhaku ka nkarhi wo wisa wa ni nhlikanhi, lava a va ri kona va tlhele va tsombana ivi va tiphina hi dyondzo leyi hisaka ya Xihondzo xo Rindza, leyi a yi fambisiwa hi Robert P. Johnson wa Ndzawulo ya Ntirho. Swirho swa ntlawa wa vu-98 hi swona a swi hlamula swivutiso. Hi loko ku landzela ntlhandlamano wa mimbulavurisano leyi fambisiweke hi swirho swa valeteri va le Gilead. Vayingiseri va khutazekile swinene loko mathwasana ma ri karhi ma vula mintokoto ya wona ya le nsin’wini ni ku phofula ndlela leyi ma titwaka ha yona hi swiavelo swa wona swa le matikweni mambe.

Ku ringana malembe ya tsevu ni hafu, Gilead a yi kumeka le miakweni ya Sosayiti ya Watchtower ya le Wallkill, New York. Kambe hi April 1995, xikolo xi rhurhisiwe xi ya eka Ntsindza lowuntshwa wa Dyondzo wa Watchtower le Patterson, New York. Xana ndyangu wa Bethele le Wallkill wu titwise ku yini hi ku cinca loku? Eka nthwasiso lowu, ku vulavuriwe ni vo hlayanyana lava humaka le Wallkill. Marito ya vona lama humaka embilwini ma swi veke erivaleni leswaku swichudeni swa Gilead swi va pfunile swinene. Ina, vavanuna lava ni vavasati lava tinyiketeleke hi ku swi rhandza, i varhumiwa va xiviri—va titsongahata, va tinyiketele hi ku helela, va swi tsakela hi mbilu hinkwayo ku pfuna van’wana.

Loko nthwasiso wu hela, hinkwavo lava a va ri kona a va tiyiseka leswaku Xikolo xa Gilead xi ta ya emahlweni hi laha ku humelelaka, xi endla leswi xi swi endleke eka malembe yo tlula 50 lama hundzeke—xi humesa varhumiwa va xiviri!

[Bokisi leri nga eka tluka 18]

Tinhlayo Ta Ntlawa:

Nhlayo ya matiko lama yimeriweke: 8

Nhlayo ya matiko lawa va averiweke eka wona: 21

Nhlayo ya swichudeni: 48

Avhareji ya malembe: 32,72

Avhareji ya malembe entiyisweni: 15,48

Avhareji ya malembe evutirhelini bya nkarhi hinkwawo: 10,91

[Xifaniso lexi nga eka tluka 18]

Ntlawa Wa Vu-98 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku sukela emahlweni ku ya endzhaku naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.