Nthwasiso Wa Ntlawa Wa Vu-85 Wa Gilead—Xiendlakalo Lexi Tsakisaka
ENDZHAKU ka ku khanguriwa ka tempele kwalomu ka malembe ya 3 000 lama hundzeke, Solomoni “a tlherisa tiko e miṭongeni ya rona, v̌a ṭakile timbilwini ta v̌ona.” (2 Tikronika 7:10) Marito wolawo ma yi hlamusela kahle mintlhaveko ya vanhu lava tlulaka 4 000 loko va suka eHolweni ya Nhlengeletano ya Timbhoni ta Yehova eDoroba-nkulu ra Jersey hi September 11, 1988. A ku humelela yini? I ku thwasa ka ntlawa wa vu-85 wa Xikolo xa Bibele xa Gilead xa Watchtower.
Endzhaku ka risimu, nongonoko wu pfuriwe hi xikhongelo lexi humaka embilwini hi W. L. Barry, xirho xa Huvo leyi Fumaka. T. Jaracz, na yena wa Huvo leyi Fumaka, u tirhe tanihi mutshami wa xitulu wa siku. Jaracz u te: ‘Leswaku xiendlakalo lexi xi va lexi phyuphyisaka ni lexi akaka hakunene emoyeni, moya wa Yehova ni minkateko ya yena swa laveka.’ Hakunene, sweswo swi vonakile loko nongonoko wu ya emahlweni.
Endzhaku ka marito lama yo hoyozela, mathwasana ya amukele xitsundzuxo xo lelana hi nongonoko wa tinkulumo to koma, leti pfunaka. R. L. Rains wa Komiti ya le Bethele ku rhange yena a vulavula. Loko a seketela mhaka ya yena eka Genesa 12:1, 2, Rains u tsundzuxe swichudeni a ku: ‘Tikombiseni mi ri nkateko exiavelweni xa n’wina xa vurhumiwa.’ Kutani xana a va ta swi endlisa ku yini leswi? U kandziyisile a ku: ‘Hi mahanyelo ya n’wina loko mi fika kona.’ Endzhaku u kandziyise swivumbeko swimbirhi leswi nga ta pfuna swinene a ku: (1) Va fanele ku tsundzuka leswaku va ta fanela ku endla ku cinca ko karhi leswaku va titwananisa ni swiavelo swa vona leswintshwa; naswona (2) va fanele ku hlayisa vuxaka byo rhula ni van’wana.
Hi ndlela yo kufumela, leyi khutazaka, J. E. Barr wa Huvo leyi Fumaka u landzerile, a vulavula ni swichudeni hi nhloko-mhaka leyi nge “Hi Nyike Ripfumelo Leri Engetelekeke,” leyi seketeriweke eka Luka 17:5. Barr u khongoterile a ku: ‘Siku rin’wana ni rin’wana tsundzukani ku kombela Yehova ku mi nyika ripfumelo leri engetelekeke.’ Minkarhi hinkwayo va fanele ku tsundzuka xivangelo xa xiviri lexi ha xona Yehova a va rhumeke eswiavelweni swa vona. Barr u khutazile a ku: ‘Anakanyani matimba ya nhlengeletano ya Xikwembu leyi nga vonakiki kun’we ni leyi vonekaka leyi mi seketelaka minkarhi hinkwayo, vusiku ni nhlekanhi. U nga kombela nkarhi wun’wana ni wun’wana eswikhongelweni swa wena u ku, “Yehova, ndzi nyike ripfumelo leri engetelekeke.”’
Ku lava ku tiva ku pfuxiwile loko mutshami wa xitulu a tivise nhloko-mhaka ya xivulavuri lexi landzeleke, F. D. Songer wa Komiti ya Fektri leyi nge: “Rifuwo Lerikulu Ni Xilotlelo Xo Hlawuleka.” Songer u teke mhaka ya yena eka 1 Tikronika 9:26, 27 ni leswi vuriweke kwalaho mayelana ni varindzi va Valevhi. ‘Xikhundla xa vona a xi ri rifuwo lerikulu,’ ku hlamusele Songer. A va ri na xilotlelo—xitirho lexi hlamuselaka matimba lawa yo lawula enyangweni wo ya etindhawini leti kwetsimaka ta tempele. A va tshembeka, va pfula tinyangwa hi ku tshembeka mixo wun’wana ni wun’wana. Loko a dlayelela, Songer u byele mathwasana a ku: ‘Kavula, mi nyikiwe rifuwo lerikulu ni xilotlelo xo hlawuleka, lexi ha xona mpundzu wun’wana ni wun’wana mi nga ta pfulela, lava lavaka ku nghena eswivaveni swa vugandzeri bya ntiyiso. Hlayisani rifuwo rero kahle naswona mi tirhisa xilotlelo xexo hi ku tshembeka.’
Endzhaku, M. G. Henschel wa Huvo leyi Fumaka u vulavule ehenhleni ka nhloko-mhaka leyi nge “Hambetani Mi Landzelela Ntila Wa Marito Ya Vutomi.” Loko a kombetela eka 2 Timotiya 1:13, 14, Makwerhu Henschel u hlamusele leswaku xitsundzuxo xo lela xa Pawulo eka Timotiya a xi ri lexi nge: ‘Tirhisa ntila lowu wa marito ya vutomi lama u ma amukeleke eka mina naswona u hlayisa leswi ku fana ni xuma, rifuwo.’ Mathwasana, na wona, ya amukele rifuwo. Hi tin’hweti ta ntlhanu leti hundzeke, va dyondze Bibele ni timhaka leti yelanaka ni vutirheli. Henschel u hlamuserile a ku: ‘Vuleteri lebyi, ntila lowu wa marito ya vutomi, i nchumu lowu Xikwembu xi wu vekeke emavokweni ya n’wina leswaku mi wu tirhisa, ku nga ri eka n’wina ntsena, e-e, kambe ni le ka van’wana.’
Xana i xitsundzuxo xihi xo lelana lexi valeteri vambirhi va xikolo va nga na xona eka swichudeni swa vona ke? J. D. Redford u ve wo sungula ku vulavula ehenhleni ka nhloko-mhaka leyi nge “Amukelani Swihoxo Swa N’wina.” Redford u xiye leswaku hambi leswi hi swi tivaka leswaku ‘hinkwerhu ha hoxa hi minkarhi yo tala,’ loko hi hehliwa hi ku endla xihoxo, hi voyamele eku tisirheleleni. (Yakobo 3:2) Redford u te: ‘Ku ala ku amukela swihoxo swa hina swi fana ni ku tivula lava hetisekeke.’ Ku amukela swihoxo swa hina i ndlela ya vutlhari. Hi ndlela yihi? Xivulavuri xi hlamuserile xi ku: ‘A nga kona la nga hlayisaka ku xiximiwa hi van’wana loko a phikelela leswaku a nga hoxanga hambi a kongomane ni xihoxo lexi nga erivaleni. Xana munhu a nga n’wi tshembisa ku yini munhu loyi a n’wi tivaka kahle leswaku a nga lahla hambi ku ri ntiyiso leswaku ntsena a nyika xivumbeko xa leswaku u lulamile? Ku amukela swihoxo swi aka matimba eka hina, ku tixixima. Kambe ku tsandzeka ku endla tano i vutoya, naswona swi tirha ku hi tsanisa emahanyelweni.’ Ku tirhisa xitsundzuxo xo tano lexi pfunaka handle ko kanakana swi ta pfuna mathwasana ku hanyisana ni van’wana.
U. V. Glass, muleteri lon’wana ni muamukeri exikolweni, u seketele xitsundzuxo xa yena xo hetelela emhakeni ya Bibele ya Gidiyoni, loyi Yehova a n’wi tirhiseke ku kutsula Israyele emavokweni ya Vamidiyani. (Vaavanyisi, tindzima 6-8) Gidiyoni u kombise leswaku ku tshemba ka yena Yehova a ku nga hoxanga, hikuva loko vanhu va lave ku n’wi veka hosi, u arile, a ku: “Yehova, hi yena l’a nga ta mi fuma.” (Vaavanyisi 8:23) Glass u te: ‘Na n’wina mi nga tinaveleli ku tlakusiwa. Mi tikombisile. Kambe leswi a swi vuli swona leswaku hi n’wina mi lwaka. I Yehova loyi a mi seketelaka.’
Xivulavuri xo hetelela mixo wolowo a ku ri A. D. Schroeder wa Huvo leyi Fumaka, naswona a swi vonaka loko a vulavula leswaku Xikolo xa Gilead xi le kusuhi ni mbilu ya yena. A swi twala hikuva—a a ri muamukeri loko xikolo xi sunguriwa hi 1943. Makwerhu Schroeder u hlamusele nhloko-mhaka leyi nge “Kumiwa U Ri La Tshembekaka,” leyi seketeriweke eka 1 Vakorinto 4:2. Xana ku va la tshembekaka swi katsa yini? Schroeder u hlamuserile a ku: ‘Swi vula ku tala ka munhu hi ripfumelo emaritweni ni switshembiso leswi vangamaka swa Yehova Xikwembu. Nakambe swi vula leswaku munhu u ni ntiyiso, u tiyile, u tshembekile eka Yehova.’ Xana swi kona swikombiso swa van’wana lava ana se va kumiweke va ri lava tshembekaka? A ku ri ni vavasati ni vavanuna va le mahlweni ka Vukriste lava boxiweke eka Vaheveru ndzima 11; Yesu Kriste; ni vaapostola ni vadyondzisiwa van’wana lava totiweke va lembe xidzana ro sungula C.E. Endzhaku ko kokela nyingiso eka swikombiso swin’wana swa manguva lawa, Makwerhu Schroeder u vutisile a ku: ‘Ku vuriwa yini hi hina?’ U engeterile a ku: ‘U nga ha va u tshembekile kumbe u nga tshembekanga. Hambi hi va lava totiweke kumbe va ntshungu lowukulu, hinkwerhu ka hina, mintlawa hamimbirhi, hi fanele ku tshembeka hi laha ku fanaka eku vitaniweni ka hina.’
Endzhaku ka marito ya Makwerhu Schroeder, mutshami wa xitulu u hundzisele marungula lama amukeriweke ku huma ematikweni yo hambana-hambana. Manuku nkarhi wu fikile wa leswaku swichudeni swi amukela tidiploma ta swona. Swichudeni swa 22 a swi huma ematikweni ya tsevu—Canada, Finland, Jarimani, Great Britain, Sweden ni le United States. Hambi swi ri tano, swiavelo swa vona swi ta va yisa ematikweni ya 11 yo hambana-hambana—Belize, Dominica, Ecuador, EI Salvador, Hong Kong, Lesotho, Pakistan, Paraguay, Puerto Rico, Senegal ni le Taiwan. Kutani i yini lexi mathwasana ma nga na xona ku xi vula esikwini ra wona ro thwasa ke? Xin’wana xa swichudeni xi hlaye papila leri kongomisiweke eka Huvo leyi Fumaka ni ndyangu wa Bethele, leri hi ku komisa ri nga te: “Hi tlhela hi nkhensa hinkwenu ka n’wina hi ku endla tin’hweti leti ta ntlhanu ti va leti tsundzukekaka swinene evuton’wini bya hina hinkwabyo.”
Endzhaku ko wisa, W. L. Van De Wall wa Komiti ya Ndzawulo ya Ntirho u sungule nongonoko wa ndzhenga hi ku fambisa Dyondzo ya Xihondzo xo Rindza Ieyi komisiweke. Endzhaku ka leswi, swichudeni swi nyikele nongonoko wo koma, swi phindha mintokoto yi nga ri yingani leyi tsakisaka—naswona nkarhi wun’wana a yi hlekisa—leyi swi veke na yona loko swi ri karhi swi nyikela vumbhoni eDoroba-nkulu ra New York. Kutani, hinkwavo lava a va ri kona, ku katsa ni ntlawa wa vu-85, va tiphine hi nongonoko wo hlawuleka lowu nga ni xihloko lexi nge “Ku Tolovelana Ku Antswa Ni Varhumiwa Va Hina Lava Chivirikaka.” Hi ku tirhisa ti-slide ni leswi rhekhodiweke, vahlaleri a va swi kota ku vona—ni ku twa—varhumiwa van’wana va khale.
Tanihi ku dlayelela loku fanelekaka, swichudeni swi nyikele drama ya Bibele hi swiambalo swa kona swi kandziyisa xilaveko xa ku endla ku rhandza ka Xikwembu hi ku gingiriteka. Endzhaku ka risimu ro hetelela, hinkwavo a va khumbekile swinene loko F. W. Franz, muungameri wa Sosayiti ya Watchtower la nga ni malembe ya 95 hi vukhale, a nyikele xikhongelo xo pfala lexi humaka embilwini. Endzhaku ka leswi, hinkwavo “va ye emakaya ya vona, va tsakile naswona va titwa va hanyile embilwini.”
Xikolo xa Bibele xa Gilead xa Watchtower lexi sunguleke hi 1943 xi letela ni ku rhumela varhumiwa eswiphen’wini hinkwaswo swa misava. Eka mintlawa yo sungula ya 35, xikolo a xi ri ePurasini ra Mfumo ra Sosayiti ya Watchtower, ekusuhi na South Lansing, New York. Eka ntlawa wa vu-36, lowu sunguleke hi February 6, 1961, xikolo lexi xi yisiwe eyindlu-nkulu ya Sosayiti eBrooklyn, New York, laha xi tirheke ku fikela sweswi. Hambi swi ri tano, loko ku sunguriwa ntlawa wa vu-86 hi October 17, 1988, xikolo xi rhurhiseriwa eMapurasini ya Watchtower, ekusuhi na Pine Bush, eNew York.
[Bokisi leri nga eka tluka 21]
Tinhlayo Ta Ntlawa:
Avhareji ya malembe: 29,1
Avhareji ya malembe entiyisweni: 13,4
Avhareji ya malembe evutirhelini bya nkarhi hinkwawo: 9,1
Nhlayo ya vamakwerhu va xinuna lava nga tekangiki: 2
Nhlayo ya mimpatswa leyi tekaneke: 10
[Xifaniso lexi nga eka tluka 23]
Ntlawa Wa vu-85 Lowu Thwasaka Wa Xikolo Xa Bibele Xa Gilead Xa Watchtower
Eka nxaxamelo lowu nga laha hansi, tilayeni ti hlayeriwe ku sukela emahlweni ku ya endzhaku naswona mavito ya xaxametiwe ku suka eximatsini ku ya exineneni eka layeni yin’wana ni yin’wana.
(1) Johnston, Y.; Kuismin, S.; Ugarte, Z.; Williams, Z.; Grischkewitz, G. (2) Powers, E.; D’Angelo, L.; Honsberger, J.; Williams, J.; James, J. (3) Kuismin, V.; Grischkewitz, U.; Ugarte, R.; Rogerson, A.; Lantunen, K.; James, D. (4) Rogerson, M.; Johnston, R.; D’Angelo, T.; Honsberger, T.; Powers, T.; Danielson, M.