Mathwasana Ya Gilead Ma Nghenela Ndlela Ya Vutomi Leyi Vuyerisaka
“LEXI i xiendlakalo xo tsakisa swonghasi, ku thwasa ka ntlawa wa vu-90 wa Gilead!” Mutshami wa xitulu, Karl F. Klein wa Huvo leyi Fumaka, u sungule nongonoko wa ku thwasa hi marito wolawo. Loko a tsundzuka nkarhi lowu Xikolo xa Bibele xa Gilead xa Watchtower xi sunguleke ha wona, u engeterile: “I mani loyi a a ta va a anakanyile, le ndzhaku hi 1943, loko ntlawa wo sungula wa Gilead wu thwasa leswaku malembe ya 48 lama landzelaka a ha ha ta tlhela hi hlanganela ku thwasa ka ntlawa wun’wana nakambe—wa vu-90?”
Kambe, hi March 3, 1991, hi siku ro xa kahle ro kufumela eNew Jersey, ku tlula 4 000 wa vaendzi lava rhambiweke ni swirho swa ndyangu wa Bethele va hlengeletanile eHolweni ya Nhlengeletano ya Doroba-nkulu ra Jersey, entsungeni wa nambu ku suka eDoroba-nkulu ra New York, eka ku thwasa ka varhumiwa lava vantshwa. Loko va nga si nghenela vutomi bya vurhumiwa, mathwasana ma ta amukela ndzayo yo lelana eka rona siku leri ra ku thwasa ka vona.
Nongonoko wu pfule hi risimu. Endzhakunyana, hinkwavo lava a va ri kona a a va khumbiwile swinene loko Frederick W. Franz, muungameri wa Xikolo xa Bibele xa Gilead xa Watchtower, la nga ni malembe ya 97 hi vukhale, a nyikele xikhongelo xo pfula. Kutani, endzhaku ka marito yo pfula hi mutshami wa xitulu, mathwasana—na hinkwavo lava nga kona—va nyikele nyingiso lowukulu eka nongonoko wa tinkulumo to koma, leti tirhaka.
Max H. Larson wa Komiti ya le Fektri a a ri wo sungula ku vulavula, hi nhloko-mhaka leyi nge “Vatirhi-kulobye Na Yehova.” Endzhaku ko kokela nyingiso engalaveni yo ponisa leyi Nowa ni ndyangu wa yena va yi akeke, u te: ‘Namuntlha Yehova u hlengeleta ndyangu wa timiliyoni wa misava hinkwayo, naswona u tiyimisele ku hlayisa ndyangu lowu wa yena eka nhlomulo lowukulu.’ Njhani? Phela, hi ku tirhisa ngalava ya manguva lawa—paradeyisi ya moya! ‘N’wina,’ a tsundzuxa mathwasana, ‘mi ta ya eswiphen’wini swo hambana-hambana swa misava, laha mi nga ta va vatirhi-kulobye na Yehova eku akeni ka ngalava ya manguva lawa.’ Loko a va hlomisela leswi nga emahlweni, u te: ‘Swi ta lava ntirho eka n’wina. Swi ta lava ku lehisa mbilu. Mi ta hlangavetana ni swihinga. Laha hi laha mi nga ta lava vutshila lebyi ndzetelo wa n’wina wu mi nyikeke byona.’
Daniel Sydlik, xirho xa Huvo leyi Fumaka, sweswinyana wa ha ku endzela eJapan ni le Costa Rica ni varhumiwa van’wana va nkarhi wo leha. Loko a sungula nhloko-mhaka leyi nge “Ndlela Ya N’wina I Ndlela Ya Vutomi Leyi Vuyerisaka,” u avelane na vona swiringanyeto swin’wana leswi pfunaka leswi a nga swi kuma eka varhumiwa lava va humeleleke. U hlamuserile: makwerhu un’wana wa xisati u hundzisele switsundzuxo swin’wana leswi mana wa yena a nga n’wi nyika swona: ‘Rhandza vutirheli bya nsimu. Endla xinghana ni vanhu. Avelana vutomi bya wena ni van’wana, kutani swi ta vula ntsako eka wena.’ Makwerhu un’wana wa xisati u te: ‘Hi malembe yo tala, ndzi xiye leswaku loko hi nga languteli swo tala ngopfu eka van’wana, a hi nge tsanisiwi hi ku olova. Xiendlo xin’wana ni xin’wana xa tintswalo ni ku ehleketelela lexi hi kongomaka xi vula swo tala eka hina.’ Ku tirhisa xitsundzuxo xo tano lexi tirhaka handle ko kanakana swi ta pfuna mathwasana ku va varhumiwa lava humelelaka hi voxe.
“Lehisela hinkwavo timbilu,” ku vula 1 Vatesalonika 5:14. Leon Weaver wa Komiti ya Ndzawulo ya Ntirho u hlamusele ndzimana leyi loko a ri karhi a vulavula ehenhleni ka nhloko-mhaka leyi nge “Lehisani Mbilu Emintirhweni Ya N’wina Hinkwayo.” I vamani lava katsekaka eka “hinkwavo” lava hi faneleka ku va lehisela mbilu? Xivulavuri xi hlamurile: ‘Lava mi nga ta hlangana na vona evutirhelini bya nsimu. Vamakwerhu ebandlheni ra n’wina lerintshwa. Varhumiwa-kuloni. Lava nga erhavini. Munghana wa wena. Wena n’wini.’ Hikwalaho ka yini hi fanele ku lehisa mbilu emintirhweni ya hina hinkwayo? Xivulavuri xi hlamuserile, ‘vamakwerhu, ku lehisa mbilu swi hunguta ntshikilelo ni ku vilela. Ku lehisa mbilu swi tisa ku rhula. Ku lehisa mbilu swi hlayisa ntshembo wu hanyile. Ku lehisa mbilu swi hi pfuna ku hlayisa ntsako wa hina entirhweni.’
Albert D. Schroeder, xirho xa Huvo leyi Fumaka ni muamukeri wo sungula wa swichudeni wa Xikolo xa Gilead, u landzerile. Loko a vulavula hi nhloko-mhaka leyi nge “Hambetani Mi Landzela Xikombiso Xa N’wina—Yesu Kriste,” u seketele tinhlamuselo ta yena eka Vafilipiya ndzima 2. Ndzimana 5 yi ri: ‘Hlayisani langutelo leri ra mianakanyo eka n’wina hi laha a ri ri xiswona eka Kriste Yesu.’ Xivulavuri xi hlamuserile, ‘leswi swi kombisa leswaku hi fanele ku va ni ku ehleketa loku ringaniseriweke, tanihi leswi Yesu hi yexe a a ri na ku ehleketa loku ringaniseriweke.’ Loko a sungula ndzimana ya 6, u landzelerise hi nkambisiso lowu tsakisaka, a kombisa leswaku xo sungula Pawulo u nyikele vumbhoni bya leswaku Yesu a a ri na ku ehleketa loku ringaniseriweke (tindzimana 6-8) kutani a xaxameta tindlela leti Yehova a nga n’wi hakela ha tona hikwalaho ka ndlela ya yena yo yingisa (tindzimana 9-11). U hetelele hi ku, ‘Lexi i xiphemu xa lunghelo ra n’wina ku chumayela hi Hosi Yesu Kriste, ku pfuna van’wana leswaku va va ni langutelo ra mianakanyo leri fanaka ni leri a a ri na rona.’
I marito wahi yo lelana lawa valeteri va xikolo va ma khomeleke swichudeni swa vona? Jack D. Redford u vulavule hi nhloko-mhaka leyi nge “Vuswikoti Byo Anakanya Byi Ta Mi Hlayisa.” (Swivuriso 2:10, 11) U hlamuserile ‘Leswi mi fambaka sweswi, ntsako wa n’wina a wu nge titshegi eka leswaku u mani kumbe u na yini kumbe hambi ku ri yinhla ya leswaku u thwasana ra le Gilead. Ntsako wa n’wina wu ta titshega hi ndlela leyi mi ehleketaka ha yona. Loko mi tirhisa ku twisisa ka n’wina kutani mi tirhisa vutivi bya n’wina, mi ta tsaka.’ Loko a kombisa nkoka wa vuswikoti byo anakanya, u hlamuserile: ‘Ku hambana exikarhi ka xiendlo lexinene ni xiendlo lexo biha i ku anakanya. Leswi u swi anakanyaka swi lawula leswi u swi endlaka.’ J. D. Redford u hetelele hi marito lawa ya xikhutazo eka swichudeni: ‘Ku na vanhu vo tala vo tlhariha swinene emisaveni lava nga swi kotiki ku anakanya, naswona ku na vanhu vo tala va vutlhari lebyi tolovelekeke lava hundzukeke vatshila eku anakanyeni. Kutani kuma vutshila byebyo. Tiyimisele ku tirhisa mianakanyo ya wena. Tirhisa vutivi bya wena. Langutana ni swiphiqo. Hanyisana kahle ni vanhu van’wana. Xixima vuhosi. Tswala mihandzu entirhweni wa wena. Tiyisela exiavelweni xa wena.’
Ulysses V. Glass, muamukeri wa swichudeni exikolweni, u hlawule nhloko-mhaka leyi nge “Yehova U Seketela Voko Ra Hina,” leyi sekeriweke eka Psalma 37:23, 24. U xiyile: ‘Ndzi fanele ndzi bumabumela ntlawa lowu, ehenhleni ka ku tsakela ka wona ku dyondza.’ U va tsundzuxe hi yin’wana ya mimpfuno leyi Yehova a yi nyikeleke ku va seketela—ku nga Rito ra Xikwembu, nandza wo tshembeka, wa vutlhari ehansi ka nkongomiso wa Yesu leswaku a nyikela nhlamuselo ni ku twisisa eMatsalweni, etibukwini, eminhlanganweni ni le tinhlengeletanweni to hambana-hambana. U ye emahlweni a ku: ‘Swipfuno leswi mi nga swi tirhisa etidyondzweni ta n’wina,’ swi fana ni nxongotelo ni nhonga ya moya. Ha swi lava leswaku hi tiya emoyeni, nakambe swi hi pfuna ku vulavula hi ku titshemba eku hundziseleni ka Rito ra Xikwembu eka van’wana.’ Eku heteleleni a a ri na marito lawa ya xitsundzuxo eka swichudeni: ‘Loko timbilu ta n’wina ti tele hi rirhandzu ro rhandza vanhu, lava nga ni timbilu letinene va ta angula hi ndlela leyinene. Mi ta humelela evutirhelini bya n’wina, naswona mi ta swi tiva leswaku Yehova u seketela voko ra n’wina.’
Xivulavuri xo hetelela eka nongonoko wa ni mixo a ku ri Carey W. Barber wa Huvo leyi Fumaka, loyi a hlawuleke nhloko-mhaka leyi nge “Nghenani Hi Nyangwa Leyo Khuma.” Loko a hlamusela Luka 13:23, 24, u te: ‘Vo tala va lava mikateko ya vutomi, kambe i vantsongo swinene lava tsakelaka ku tinyiketela hi ku gingiriteka leswaku va yi kuma.’ Ku vuriwa yini hi hina? ‘I swinene eka hina ku tivutisa, “Xana xifaniso lexi xa nyangwa yo khuma xi vula yini eka mina hi ndzexe?”’ Lava va tsandzekaka ku nghena hi nyangwa leyo khuma, va tsandzeka, kambe hayi hikwalaho ka ku va swi nga koteki, kambe hikuva va nga lavi ku tinyiketela. Xivulavuri xi hlamuserile, ‘Yehova a nga lavi swo tala eka hina.’ ‘Hi mpfuno wa Yehova,’ a hetelela, ‘onge hinkwerhu ka hina hi nga tinyiketela hi laha ku heleleke ku manyukuta hi matimba eka nyangwa leyo khuma ku ya emisaveni leyintshwa ya vutomi lebyi nga heriki, ku rhula, ntsako ni ku tsaka ku ya eku dzunisiweni loku nga heriki ka Yehova!’
Endzhaku ka marito lawa, mutshami wa xitulu u yise marungula lama amukeriweke ku suka eswiphen’wini swo hambana-hambana swa misava. Sweswi nkarhi wu fikile wa leswaku mathwasana ma amukela tidiploma ta wona. Swichudeni swi huma ematikweni ya tsevu—Canada, Finland, Jarimana, Great Britain, Switzerland ni le United States. Hambi swi ri tano, swiavelo swa vona, swi ta va yisa ematikweni yo tanihi Argentina, Benin, Bolivia, Dominican Republic, Papua New Guinea, Peru, St. Lucia na le Taiwan. Kutani ke, xana mathwasana a ma ti twisa ku yini hi siku ra wona ro thwasa? Epapileni leri khumbaka leri rhumeriweke eka Huvo leyi Fumaka ni le ndyangwini wa Bethele, hi ku komisa va te: “Ha wu tshemba nseketelo wa Huvo leyi Fumaka, ndyangu wa Bethele ni nhlengeletano hinkwayo ya Yehova. Loko hi langutana ni miringo emahlweni, nseketelo wolowo i nchumu wun’wana lowu hi nga ta wu tlangela. Hikwalaho ka sweswo entiyisweni ha tlangela.”
Endzhaku ko wisa, nongonoko wa ni ndzhenga wu sungule hi Dyondzo leyi komisiweke ya Xihondzo xo Rindza, yi fambisiwe hi Karl A. Adams. Endzhaku ka sweswo swichudeni swi kombise mintokoto ya vutomi bya xiviri ya ku tiyimisela ku fikelela mbilu eku dyondziseni ka Rito ra Xikwembu. Eku heteleleni, hinkwavo lava a va ri kona, ku katsa na mathwasana ya ntlawa wa vu-90, va tsakele drama leyi a yi ri na xihloko lexi nge Papalata Mivilelo Ya Vutomi, leyi nga tlangiwa hi vahuweleri va kwalaho.
Mutshami wa xitulu, Karl Klein, u vulavulele hinkwavo loko hi marito ya yena yo hetelela a te: “Entiyisweni swi ve swinene eka hina ku va kwala hi siku leri ra vunharhu ra March 1991!” Kutani nongonoko lowu wo tsakisa wu hele hi risimu ro pfala, ri landzeriwa hi xikhongelo hi Harold J. Dies.
[Bokisi leri nga eka tluka 27]
Tinhlayo Ta Ntlawa
Nhlayo ya matiko lama yimeriweke: 6
Nhlayo ya matiko lawa va averiweke eka wona: 10
Nhlayo hinkwayo ya swichudeni: 24
Avhareji ya malembe: 31.2
Avhareji ya malembe entiyisweni: 15
Avhareji ya malembe evutirhelini bya nkarhi hinkwawo: 11
[Xifaniso lexi nga eka tluka 26]
Ntlawa Lowu Thwasaka Wa vu-90 Wa Xikolo Xa Bibele Xa Gilead Xa Watchtower
Eka nxaxamelo lowu nga laha hansi, tilayini ti hlayeriwe ku suka emahlweni ku ya endzhaku naswona mavito ma xaxametiwe ku suka eximatsini ku ya exineneni eka layini yin’wana ni yin’wana. (1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio, A.; Nizan, D. (4) Miller, L.; Noack, J.; Hair, L.; Kleeman, W.; Skogen, D.; Diehl, S.; Nutter, W.