Mathwasana Ya Gilead Ma Amukela Nyiko Ya Ntirho Wa Vurhumiwa

HI MARCH 1, 1992, swirho wa 22 swa ntlawa lowu thwasaka wa vu-92 wa Xikolo xa Bibele xa Gilead xa Watchtower swi amukele nyiko—nyiko ya ntirho wa vurhumiwa. Loko a vulavula ni ntlawa lowu, Lloyd Barry wa Huvo leyi Fumaka u te: “Onge mi nga amukela nyiko yoleyo leyinene hi ntsako lowukulu, naswona onge mi nga yi tirhisa ku tisela van’wana ntsako.”

Vaendzi lava rhambiweke ni swirho swa ndyangu wa Bethele swo ringana 4 662 a va hlengeletane eka Holo ya Nhlengeletano ya Doroba-nkulu ra Jersey eka nongonoko wa nthwasiso, le New Jersey. Van’wana va 970 lava nga emiakweni ya New York ya Sosayiti ya Watchtower eBrooklyn, Wallkill ni le Patterson a va hlanganisiwe hi riqingho. Hinkwavo va yingisele hi vukheta loko mathwasana ma nyikiwa switsundzuxo leswinene leswi a swi ta ma pfuna ku vona nkoka lowukulu wa nyiko ya ntirho wa vurhumiwa ni ku yi tirhisa hi vutlhari.

Nongonoko wu pfuriwe hi ku yimbelela loku nyanyulaka ka risimu ra nomboro 155, leri nge “‘Amukelanani’!” Endzhaku ka sweswo, hinkwavo va khumbekile swinene loko Frederick W. Franz, muungameri wa Xikolo xa Gilead la nga ni malembe ya 98 hi vukhale, a nyikele xikhongelo lexi humaka embilwini. Kutani, mutshama-xitulu, Carey Barber wa Huvo leyi Fumaka, u amukele hinkwavo eka nongonoko wa nthwasiso ivi a ku: “A ku si tshama ku va ni xilaveko lexikulu xa varhumiwa va Gilead ku fana ni namuntlha.” Endzhaku ka marito ya yena, u nyikele nongonoko wa tinkulumo to koma, leti pfunaka.

Curtis Johnson wa Komiti ya Ndyangu wa Bethele u rhange a vulavula, a nyikela nkulumo leyi nge “Khathalelani Ntanga Wa N’wina.” Makwerhu Johnson u vule leswaku loko varhumiwa lava vantshwa va fika eswiavelweni swa vona, un’wana ni un’wana wa vona u ta va ni ntanga wa moya lowu a faneleke ku wu hlakulela. (1 Vakorinto 3:9) Vanhu va Yehova emisaveni hinkwayo i ntanga wa moya lowu humesaka vululami ni ku dzuneka emahlweni ka matiko hinkwawo. (Esaya 61:11) Xivulavuri xi kandziyisile xi ku, ‘ndlela leyi u khathalelaka ntanga wa wena wa moya ha yona enkarhini lowu taka yi ta khumba ku humelela ka wena exiavelweni xa wena xa vurhumiwa.’ I yini lexi nga ta va pfuna leswaku va khathalela ntanga wa vona wa moya hi ndlela leyinene? ‘Yehova u ta va rirhangu ro sirhelela ntanga wa wena wa moya. Loko u tiyimisele ku hlakulela mintirho leyinene, n’wi tshinelele hi xikhongelo kutani u tirha hi ku pfumelelana ni swikhongelo swa wena.’

Ku landzele Lloyd Barry, a vulavula hi nhloko-mhaka leyi nge, “Titsakeleni eHosini Masiku Hinkwawo.” (Vafilipiya 4:4) Leswi a nga ni malembe lama tlulaka 25 ya ntokoto wa vurhumiwa eJapani, u ve ni swiringanyeto swo karhi leswi tirhaka swo pfuna mathwasana ku tsakela nyiko ya ntirho wa vurhumiwa. U te: ‘Mi ta kuma leswaku ntsako lowu mi nga na wona entirhweni wa Xikwembu wu mi pfuma ku hlula mintshikilelo yo tala kumbexana ni swiphiqo swo tala swa miri leswi mi nga ta hlangavetana na swona.’ (Swivuriso 17:22) U tsundzuxe mathwasana leswaku ma nga ha hlangavetana ni matshamelo ni swiyimo leswi hambaneke ngopfu ni leswi va swi toloveleke. Va nga ha fanela ku dyondza ririmi lerintshwa. ‘Mi ta boheka ku tirha hi matimba eku dyondzeni ka ririmi. Kambe loko se mi kota ku vulavula hi ku ntshunxeka ni vanhu hi ririmi ra vona, leswi na swona swi ta engetela ntsako wa n’wina.’

Ku landzele Eldor Timm wa Komiti ya le Fektri, a nyikela nkulumo leyi nge “Tshama U Langute eHakelweni.” Hakelo i yini xana? Vutomi lebyi nga heriki! Leswaku hi ta byi kuma mahlo ya hina ma fanele ma tshama ma langute eka byona. Xivulavuri xi hlamusele ku fana ni ku hambana ko karhi, exikarhi ka Vakriste lava nga emphikizanweni wa vutomi ni vatsutsumi lava nga emimphikizanweni yo tsutsuma ya lembe xidzana ro sungula. Tanihi vatsutsumi, Vakriste va fanele va tiletela swinene, va yingisa milawu ni ku susa swilo leswi va tikaka. Kambe ku hambana ni vatsutsumi va xiviri, Vakriste va le ka mphikizano wa vutomi hinkwabyo naswona va lava hakelo leyi nga heriki. Ematshan’wini ya leswaku ku wina munhu un’we, hinkwavo lava tsutsumaka mphikizano wa vutomi ku fikela emakumu va ta yi kuma hakelo. Makwerhu Timm u hetelele hi ku: ‘Leswaku hi kuma hakelo ya vutomi, hi fanele hi va ni ku rhula na Yehova, Munyiki wa hakelo. Naswona leswaku hi va ni ku rhula na Yehova, hi fanele hi va ni ku rhula ni vamakwerhu va hina.’

Milton Henschel wa Huvo leyi Fumaka u landzerile ni nkulumo leyi nge, ‘Hi Nchavelelo Wa Matsalwa, Hi Ni Ntshembo.’ (Varhoma 15:4) Loko xivulavuri xi sungula xi te, ‘ku ringana tin’hweti ta ntlhanu leti hundzeke, a mi ri bizi ni Bibele. Vuxaka byi kurisiwile. Mi ni ntshembo lowu tiyeke. Leswi mi yaka eka swiavelo swa n’wina, hi kombela mi tsundzuka leswaku ha yini ntshembo wa n’wina wu tiye swonghasi. Hi leswi mi namarheleke swinene Matsalwa.’ Ku nyikela xikombiso xa mhaka ya Bibele lexi nyikaka ntshembo, xivulavuri xi kombetele eka Vaavanyisi tindzima 6 ku ya ka 8, leti hlamuselaka ndlela leyi Gidiyoni a rhumiweke ha yona ku kutsula Israyele eka ntshikilelo wa Vamidiyani. Endzhaku ko hlamusela mhaka ni leswi yi swi fanekiselaka esikwini ra hina, u xiyile: ‘Loko u ri ni nkarhi wo hlaya Matsalwa ni ku anakanyisisa hi swilo leswi, swa ku phyuphyisa. U kuma xivindzi.’

Hinkwavo a va hisekela ku twa leswaku valeteri-nkulu vambirhi va swichudeni, va swi khomele switsundzuxo swihi swo lela. Jack Redford u rhange a vulavula hi nkulumo leyi nge, “Endlani Swilo Leswinene.” U tsundzuxe mathwasana: ‘EGilead mi leteriwe khwatsi leswaku hi swihi leswi lulameke hi ku ya hi Matsalwa. Sweswi mi ya eka swiavelo swa n’wina swa vurhumiwa leswi nga ni mintlhontlho. Naswona ha swi tiva leswaku kumbexana mi ta kuma swiphiqo leswikulu. Ku nga khathariseki swilo leswi, naswona ku nga khathariseki mintlhaveko ya n’wina, ha swi tiva leswaku mi nga endla swilo leswinene.’ I yini lexi nga ta pfuna? Hi xikombiso, ku va ni langutelo lerinene hi van’wana. Xivulavuri xi te: ‘Mi nga languteli ku hetiseka eka ku nga hetiseki.’ Ku va ni langutelo lerinene eka swiyimo swo tika na swona swi nga pfuna. U xiyile, ‘hinkwerhu hi ni minkarhi ya ntsako ni ya swiphiqo evuton’wini. Un’wana ni un’wana a nga swi kota ku tamela minkarhi ya ntsako. I ndlela leyi u tamelaka swiphiqo ha yona leyi nga ta kombisa loko u ta swi kota ku tiyisela ntirho wa vurhumiwa kumbe e-e.’—Yakobo 1:2-4.

Mutsarisi wa xikolo, Ulysses Glass, u hlawule nkulumo leyi nge, “Hi Wihi Ntshembo Wa Nkarhi Lowu Taka?” Hi rito ra vutswari, u khutaze mathwasana ku hlayisa ntshembo wa vona wu ri lowu vangamaka swinene. (Swivuriso 13:12) U hlamuserile a ku, ‘ku sungula ka ku helela hi ntshembo a ku vonaki hi ku olova, swiyimo swi nga hi endla hi va lava khomekeke ngopfu hi swa hina ematshan’wini ya vuxaka bya hina ni Xikwembu. Hi nga ha titwa hi vabya kumbe hi vona onge van’wana va hi khome hi ndlela yo biha. Van’wana va nga ha va ni swilo swo tala leswi vonakaka ku tlula leswi hi nga na swona kumbe va nga va ni mimbuyelo leyi antswaka evutirhelini, kutani hi va ni mavondzo hi ndlela yo karhi. Loko hi pfumelela swilo swo tano leswaku swi hi hlula ha kantsongo-ntsongo, hi ku hatlisa ntiyiso wa ntshembo wa Mfumo wu ta suka embilwini ni le mianakanyweni ya hina, naswona hi nga ha tshika ku hambeta ni mphikizano wa vutomi.’ Xana ku nga endliwa yini? ‘Hi fanele hi lwa swinene loko hi lava ku pfuxeta ntshembo wa hina. Hi fanele hi tata mianakanyo ni timbilu ta hina hi switshembiso swa ntiyiso swa Xikwembu kutani hi yisa nyingiso wa hina lowu heleleke eka Mfumo wa Xikwembu. Naswona hi fanele hi vuyetela ku vulavurisana ka hina na Yehova, hikuva leswi entiyisweni swi ta hi tisela ntsako.’

Karl Klein wa Huvo leyi Fumaka u nyikele nkulumo yo thwasisa. Nhloko-mhaka ya yena a yi ku, “Ha Yini Hi Fanele Ku Titsongahata?” Naswona hi yihi nhlamulo ya xivutiso xexo? U hlamuserile emaritweni ya yena yo pfula, ‘hikuva i xilo lexinene ni lexi lulameriweke ku endliwa, ni lexi nga vutlhari ni rirhandzu ku xi endla.’ Vayingiseri va khumbiwile swinene loko a hlamusele swikombiso swa mune swa ku titsongahata leswi hi endlaka kahle loko hi swi landzela: (1) Yehova Xikwembu, loyi entiyisweni a titsongahateke loko a tirhisana na Abrahama na Muxe (Genesa 18:22-33; Tinhlayo 14:11-21; Vaefesa 5:1); (2) Yesu Kriste, loyi ‘a titsongahateke ni ku yingisa ku yisa eku feni emhandzini ya nxaniso’ (Vafilipiya 2:5-8; 1 Petro 2:21); (3) muapostola Pawulo, loyi a ‘tirheleke Hosi hi ku titsongahata lokukulu’ (Mintirho 20:18, 19; 1 Vakorinto 11:1); ni (4) ‘lava hi rhangelaka,’ vo tanihi muungameri wo sungula wa Sosayiti, Makwerhu Russell, loyi a tshameke a tsala a ku: “Ntirho lowu Hosi yi tsakeleke ku tirhisa vuswikoti bya hina lebyi nga nyawuriki, a ku nga ri ntirho wo sungula leswintshwa, a ku ri wa ku pfuxeta, ku lunghisa ni ku twananisa.” (Vaheveru 13:7) Makwerhu Klein u kombise swivangelo swin’wana swa matimba swa ku titsongahata. Entiyisweni, ku yingisela xitsundzuxo xa ku titsongahata swi ta pfuna mathwasana leswaku ma tirhisa nyiko ya ntirho wa wona wa vurhumiwa hi vutlhari!

Endzhaku ka marito wolawo, mutshama-xitulu u tivise marungula lama humaka eswiphen’wini swo hambana-hambana swa misava. Sweswi ku fike nkarhi wa leswaku mathwasana ma amukela tidiploma ta wona. Ma huma ematikweni ya nkombo—Canada, Finland, Furwa, Mauritius, Netherlands, Sweden ni le United States. Kambe swiavelo swa vona swa vurhumiwa swi va yisa eka matiko ya 11—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey ni le Venezuela.

Endzhaku ko wisa, nongonoko wa ni ndzhenga wu sungule hi Dyondzo ya Xihondzo xo Rindza leyi komisiweke, leyi fambisiweke hi Joel Adams wa Komiti ya Ndzawulo ya Ntirho. Endzhaku ka sweswo, mathwasana ma chumbute mintokoto yo karhi ya ntirho wa nsimu leyi ma yi tsakeleke hi nkarhi wa xikolo. Eku heteleleni, drama leyi nge, Ha Yini U Xixima Lunghiselelo Ra Le Tilweni? yi nyikeriwile leswaku yi dyondzisa vayingiseri hinkwavo, kun’we ni mathwasana.

Entiyisweni, mathwasana lawa ma ye eka swiavelo swa wona swa matiko mambe ma ri ni xitsundzuxo ni xikhutazo lexi nga ta ma pfuna ku tirhisa nyiko ya ntirho wa vurhumiwa ku tisa ntsako, ku nga ri eka wona ntsena kambe ni le ka van’wana.

[Chati leyi nga eka tluka 22]

Tinhlayo Ta Ntlawa

Nhlayo ya matiko lama yimeriweke: 7

Nhlayo ya matiko lawa va averiweke eka wona: 11

Nhlayo ya swichudeni: 22

Avhareji ya malembe: 33,4

Avhareji ya malembe entiyisweni: 16,7

Avhareji ya malembe evutirhelini bya nkarhi hinkwawo: 11,8

[Xifaniso lexi nga eka tluka 23]

Ntlawa Wa Vu-92 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayini ti hlayeriwe ku sukela emahlweni ku ya endzhaku naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.