Mathwasana Ya Gilead Ma Khutaziwa Ku Hlakulela Vutshila Bya Ku Vulavurisana Lokunene

HI SONTO, March 4, 1990, ku tlula vanhu va 4 100 a va tate Holo ya Nhlengeletano ya Timbhoni ta Yehova eDoroba-nkulu ra Jersey eka nthwasiso wa ntlawa wa vu-88 wa Xikolo xa Bibele xa Gilead xa Watchtower. Mathwasana ya 24 a ma huma eka matiko ya 6 naswona sweswi ma rhumeriwe eka matiko yo ringana 13.

Nongonoko wu sungule hi 10:00 a.m. Endzhaku ka risimu, George Gangas, loyi sweswi a nga na malembe lama tlulaka 90 hi vukhale ni xirho xa Huvo leyi Fumaka, u pfule hi xikhongelo lexi humaka embilwini eka Yehova. Endzhaku ka leswi, mutshami wa xitulu, C. W. Barber, loyi na yena a nga xirho xa Huvo leyi Fumaka a tlhela a va thwasana ra ntlawa wa vu-26 wa le Gilead, hi ku komisa u hlamusele ku cinca kun’wana ka xihatla exivonweni xa misava. U hetelele hi ku vula leswaku: “A ku si tshama ku va ni nkarhi wo nyanyula swonghasi wo nyikela vumbhoni bya vukulukumba bya Yehova ni ku lulama ka yena ku fana ni lowu.” Kutani u hambete a tivisa swivulavuri swin’wana swa nongonoko wa nimixo.

Vernon Wisegarver, xirho xa Komiti ya le Fektri eBrooklyn, u hlawule nhloko-mhaka leyi nge “Vana Ni Vutshila Entirhweni Wa Wena.” Loko a nyikele xifaniso xa mufuri wa le ximutanini la fuleke nketani yo tsindziyela, a yi bohelela eka nsoma (anchor), yi ponisa vutomi bya hinkwavo lava a va ri exikepeni hi nkarhi wa bubutsa, u fanisa mathwasana ya Gilead ni mufuri. Hi ku dyondzisa vanhu Bibele, va ta va pfuna ku aka nketani yo ponisa vutomi ya timfanelo ta ku chava Xikwembu, hi ku tirhisa vutshila lebyi va byi kumeke eka ndzetelo wa vona wa le Gilead. U khutaze mathwasana ku hambeta va kurisa vutshila bya vona byo dyondzisa ni ku yima emahlweni ka Hosi leyikulu eka hinkwato tanihi “vatirhi va vutshila.”

La landzeleke, John Barr, xirho xa Huvo leyi Fumaka, u vulavule hi nhloko-mhaka leyi nge “Nantswani Mi Va Mi Vona Leswaku Yehova I Lonene.” Marito ya yena a ma sekeriwe eka Psalma 34:8, leyi nge: “Nantŝani, mi v̌a mi v̌ona leŝaku Yehova i lonene ŝonghasi! Ku katekile munhu l’a tšhav̌elaka ka yena.” U va tsundzuxile: “Nantswani hinkwaswo exiavelweni xa n’wina xa vurhumiwa. Ringetani hinkwaswo. Mi nga swi chavi. Kutani mi ta swi kota ku tokota vunene bya Yehova hi ndlela leyi mi nga si tshamaka mi byi tokota ha yona. Mi nga hlawuli. Mi nga vuli mi ku, ‘a ndzi swi lavi leswi.’ Swi nantsweni.”

Charles Woody, xirho xa Komiti ya Ntirho ya le Brooklyn, u vulavule hi mhaka ya yena leyi a yi hlawuleke, “Ku Titeka Hi Ndlela Leyi Ringaniseriweke.” U te: “Hi tsakela ku va ni lava va titekaka hi ndlela leyi ringaniseriweke, lava va nga lavangiki tindlela ta vona hi minkarhi hinkwayo, lava hatlisaka va bumabumela ni ku aka van’wana, ni lava hambi loko va ri na vutivi, va nga endleki van’wana va titwa onge a va na byona.” U ye mahlweni a ku: “Tanihi varhumiwa mi ta lava ku kokela vanhu entiyisweni, ku nga ri ku va tlherisa. Ku titsongahata ka n’wina ku ta va ka nkoka leswaku mi endla leswi.”

Lyman Swingle, xirho xa Huvo leyi Fumaka, u landzerile a vulavula hi nhloko-mhaka leyi nge “Tindzima Leti Landzelaka, Xana Ti Ta Hi Byela Yini?” U sungule hi ku vula leswaku: “Namuntlha mi sungula ndzima leyintshwa evuton’wini bya n’wina. Xana mi ta tsala yini eka tindzima leti ku sukela sweswi ku ya enkarhini lowu taka?” U va tsundzuxile: “Xin’wana ni xin’wana lexi mi xi endlaka xi fanele xi tisa xichavo ni ku dzuneka eka Yehova,” kutani u engeterile: “Tiyisekani leswaku swiboho swa n’wina swi sekeriwe eRitweni ra Xikwembu. Tsundzukani Swivuriso 3:7, leyi nge: ‘U nga tiv̌oni v̌utlhari.’ Kumekani mi ri lava tshembekeke eku hetisiseni ka swiavelo swa n’wina.” U hetelele hi ku vula a ku: “Ha tshemba leswaku a mi nge heti ku tsala marungula ya vutomi bya n’wina, hi leswaku mi ta hanya hi laha ku nga heriki.”

La landzeleke, Jack Redford, un’wana wa valeteri va xikolo, u khutaze mathwasana: “Vanani Magandzelo Lama Hanyaka.” U sungule hi ku vula a ku: “Ntirho wa vurhumiwa i vutomi bya ku tinyiketela. . . . Ha mi rhandza hikwalaho ka moya wa n’wina wa ku tinyiketa.” Loko a tshaha eka Vafilipiya 2:17, laha muapostola Pawulo a vuleke leswaku u nyikeriwile tanihi magandzelo lama nwiwaka, leswi vulaka leswaku a tiyimiserile ku tinyiketela tanihi gandzelo leri hanyaka, u vutisile: “Kambe varhumiwa hakanyingi va fana ni magandzelo lama nwiwaka hi ndlela yihi?” Kutani u hlamusele mintokoto mimbirhi mayelana ni varhumiwa lava tinyiketeleke ku tlula leswi a swi laveka. Un’wana u endle switina swa 16 000 hi mavoko ya yena kutani a aka Holo yo sungula ya Mfumo etikweni leri a averiwe rona. Ntokoto wun’wana i wa makwerhu wa xisati la fambeke ni nuna wa yena emakhwatini, laha swiyimo swa rihanyo a swi ri swa xikhale. Vamakwerhu va xisati va kwalaho hinkwavo va n’wi tsakerile hikuva va xiye leswaku u tinyikele tanihi ‘gandzelo leri hanyaka.’ Kambe endzaku xivulavuri xi tsundzuxe swichudeni leswaku gandzelo a hi ra nkoka loko ri nga fambisani na ku titsongahata. Loko a tirhisa mhaka ya Hosi Sawulo na Vaamaleke, u khutazile: “Minkarhi hinkwayo tsundzukani leswaku ku titsongahata ka antswa ku tlula gandzelo. Mi nga ringeri ku fuwa ha Yehova. Minkarhi hinkwayo endlani leswi a mi byelaka ku swi endla.”

Endzhaku mutshami wa xitulu u tivise muleteri un’wana wa xikolo, Ulysses Glass. Makwerhu Glass u sungule hi ku vula leswaku: “Ntlawa wa vu-88 a wu ri ntlawa lowu tsakeke naswona wu tano. Mintlawa leyi yin’wana yi tsakile na yona. Kutani ke, ha yini ntsako wa n’wina wu xiyeka?” U kombise leswaku ntsako “a hi xikongomelo kambe i vuyelo bya mintirho leyinene. I endlelo ro xi fikelela leri tisaka hakelo.” U tshahe mutsari loyi vutomi bya yena byi cinceke hi ku vona xiga lexi nge: “Ku humelela i riendzo, hayi laha u yaka kona.” Mutsari u vule leswaku u ta tshika ku pimanisa ntsako hi ku fika laha a yaka kona ematshan’wini yo languta vutomi bya yena hinkwabyo tanihi riendzo leri yaka emahlweni. U te: “A ku na ndlela yo ya kuma ntsako.” “Ntsako i ndlela.” Kutani makwerhu Glass u vule leswaku ntlawa lowu wu wu twisisile mongo wa marito wolawo. U hetelele hi marito lama nga eka Psalma 84 kutani a ku: “Hambetani mi famba etindhawini leti cheletiweke kahle. Ku nga khathariseki swiphiqo leswi mi nga ta hlangavetana na swona, onge ntsako wa lava rhandzekaka ni ku chava Yehova wu nga hambeta wu va wa n’wina.”

Kutani ku te xivumbeko xa nkulumo ya ni mpundzu, leyi a yi nyikeriwa hi xirho xin’wana xa Huvo leyi Fumaka, Karl Klein, la hlawuleke nhloko-mhaka leyi nge “Ku Hlakulela Ku Vulavurisana Ka Vukriste.” U sungule hi ku tsundzuxa hinkwavo leswaku Yehova hi lonkulu eka vavulavurisani hinkwavo. N’wana wa yena la nga swakwe, Rito, u tirhisiwe tanihi Muvulavuleri Lonkulu wa Yehova, naswona u vule ku rhandza ni swileriso swa Xikwembu eka swivumbiwa swa le misaveni. Loko Yesu a ha ri laha misaveni, mintshungu yi hlamarisiwile hi ndlela ya yena yo dyondzisa. A va nga si tshama va twa munhu a vulavula ku fana na yena. Eka Matewu 28:19, 20, Yesu u khutaze vadyondzisiwa va yena ku va vavulavurisani lavanene hi ku ya emisaveni, va dyondzisa milawu ya yena eka van’wana ni ku va endla vadyondzisiwa na vona.

Kutani ke, loko a vulavula hi ku kongoma ni varhumiwa va mundzuku, Makwerhu Klein u vule leswaku ku ni swivumbeko swa mune leswi varhumiwa va faneleke va swi khuthalela eku hlakuleleni ka vutshila byo vulavurisana: exikarhi ka nuna ni nsati, ni van’wana ekaya ka varhumiwa, ni lava va nga eka hofisi ya rhavi laha va averiweke kona, ni lava va hlanganaka na vona entirhweni wa nsimu. Makwerhu Klein u te: “U sungula ku vulavula u nga si pfula nomu wa wena.” “Mahanyelo ni ku tilunghisa ka n’wina swi koka ku tsakela eka n’wini wa muti.” Nakambe u nyikele swikombiso swi nga ri swingani ku kombisa yinhla ya yena kutani a hetelela hi swikhutazo leswi: “Titsongahateni. Hlayisani mintila yo vulavurisana yi pfulekile. Lwelani ku va vavulavurisani vo antswa.”

Endzhaku ka loko marungula ya hlayiwile, tidiploma ta ku va fundza ti nyikiwe xichudeni xin’wana ni xin’wana hi mutshami wa xitulu. Kutani ntlawa wu tise xiboho lexi kongomisiweke eka Huvo leyi Fumaka ni ndyangu wa Bethele, lexi hlayiweke hi Paul Angerville wa le Guadeloupe.

Nongonoko wa ni ndzhenga wu sungule hi Dyondzo ya Xihondzo xo Rindza. Endzhaku ka sweswo, swichudeni swi sungule nongonoko lowu nyikeke vayingiseri nkarhi wo vona swin’wana hi moya wa ntlawa wa vona, ku vona mintlangu ya vona ya xinghana emakamareni ya vona, ni ku yingisela mintokoto ya vona yo tala ya le vutirhelini bya nsimu ku sukela va fika eGilead tin’hweti ta ntlhanu leti hundzeke. Eku heteleleni, a ku ri na drama leyinene leyi a yi ri na nhloko-mhaka leyi nge Ku Endla Leswi Lulamake Emahlweni Ya Yehova. Drama a yi tlangiwa hi vahuweleri vo huma eBandlheni ra Lyndhurst, New Jersey. Siku ri hele hi risimu ro pfala, ri landzela hi xikhongelo hi Fred Franz, Presidente wa Sosayiti wa 96 wa malembe hi vukhale.

[Bokisi leri nga eka tluka 27]

TINHLAYO TA NTLAWA

Nhlayo ya matiko lama yimeriweke: 6

Nhlayo ya matiko lama va averiweke eka wona: 13

Nhlayo ya vamakwerhu lava nga tekangiki: 2

Nhlayo ya mimpatswa leyi tekaneke: 11

Nhlayo ya swichudeni: 24

Avhareji ya malembe: 32.7

Avhareji ya malembe entiyisweni: 14

Avhareji ya malembe evutirhelini bya nkarhi hinkwawo: 9

[Xifaniso lexi nga eka tluka 26]

Ntlawa Wa Vu-88 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayini ti hlayeriwe ku sukela emahlweni ku ya endzhaku naswona mavito ya xaxametiwe ku suka eximatsini ku ya exineneni eka layeni yin’wana ni yin’wana. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.