Vutomi Ni Vutirheli Bya Yesu

Va Hluleka Ku N’wi Khoma

LOKO Nkhuvo wa Mintsonga wa ha ya emahlweni, varhangeri va vukhongeri va rhuma malandza ku khoma Yesu. A nga ringeti ku tumbela. Yesu u ya emahlweni a dyondzisa erivaleni, a ku: “Ndza ha ta va na n’wina nkarhinyana, kutani endzhaku ka swona ndzi ta ya eka Loyi a ndzi rhumeke. Mi ta ndzi lava, kambe a mi nga ndzi kumi; ni laha ndzi nga ta va kona, mi nga ka mi nga ti.”

Vayuda a va twisisi, kutani va vutisana: “Ú lava ku ya kwihi munhu loyi, lomu hi nga ta tsandzeka ku n’wi kuma kona xana? Xana ú lava ku ya eka Vayuda lava hangalakeke exikarhi ka vamatiko, ni ku dyondzisa vamatiko xana? Xana ú vula yini, loko a ku: ‘Mi ta ndzi lava, kambe a mi nga ndzi kumi’, ni loko a ku: ‘Laha ndzi nga ta va kona, mi nga ka mi nga ti’?” Yesu, kavula, u vulavula hi ku tshinela ka rifu rakwe ni ku pfuxeriwa etilweni, laha valala va yena va nga ta ka va nga n’wi landzi.

Siku ra vunkombo ni ro hetelela ra nkhuvo ra fika. Mixo wun’wana ni wun’wana wa nkhuvo, muprista u halata mati, lama a ma humesaka exidziveni xa Silowama, leswaku ya khulukela etshakwini ra altari. Hi ku fanana loko a tsundzuxa vanhu hi vumbhoni lebyi bya siku na siku, Yesu u ri: “Loko munhu a ri ni torha, a a te ka mina a ta nwa. Hi laha Tsalwa ri vuleke ha kona, ‘milambu ya mati lama hanyaka yi ta khuluka yi huma embilwini ya loyi a pfumelaka eka mina.’”

Entiyisweni, laha Yesu u vulavula hi ta mimbuyelo leyikulu loko moya lowo kwetsima wu ta chuluriwa. Lembe leri landzelaka ku chululeriwa loku ka moya lowo kwetsima ka humelela hi Pentekosta. Kwalaho, milambu ya mati lama hanyaka ya khulukela emahlweni loko vadyondzisiwa va 120 va sungula ku pfuna vanhu. Kambe ku sukela kwalaho, a ku na moya hi ku twisisa ka leswaku ku hava vadyondzisiwa va Kriste lava totiwaka hi moya lowo kwetsima ni lava vitaneriwaka vutomi bya le tilweni.

Loko va hlamula dyondzo ya Yesu, van’wana va sungula ku: “Loyi hi yena Muprofeta hakunene,” entiyisweni va kombetela eka muprofeta lonkulu ku tlula Muxe loyi a tshembisiweke ku ta. Van’wana va ri: “Loyi, hi yena Mesiya.” Kambe van’wana va kaneta: “Xana Mesiya a nga huma eGaleliya ke? Xana Tsalwa a ri vulanga leswaku Mesiya ú ta huma erixakeni ra Davida, a velekiwa eBetlehema, emutini lowu Davida a a tshama ka wona xana?”

Kutani ku pfuka ku hambana exikarhi ka ntshungu. Van’wana va lava leswaku Yesu a khomiwa, kambe ku hava ni un’we loyi a yisaka voko eka yena. Loko malandza ya tlhela ya nga ri na yena Yesu, vaprista lavakulu ni Vafarisi va vutisa: “Hikwalaho ka yini mi nga vuyanga na yena ke?”

“A ku si va na munhu ni siku ni rin’we la vulavulaka ku fana ni munhu loyi,” ku hlamula malandza.

Hi ku hlundzuka, varhangeri va vukhongeri va sungula ku sandza, va n’wi hembela ni ku n’wi duvulela. Va hleka: “Xana na n’wina mi xiseteriwile xana? I mani eka vakulukumba ni le ka Vafarisi loyi a tshamaka a pfumela eka yena xana? Kambe loko va ri vanhu va ntshungu wolowo, lava nga tiviki Nawu, va rhukaniwile.”

Hikwalaho ka leswi, Nikodema, Mufarisi ni mufumi wa Vayuda (hi leswaku, xirho xa Sanedri), a nga chavi ku vulavulela Yesu. U nga tsundzuka leswaku endzhaku ka malembe mambirhi ni hafu, Nikodema u tile eka Yesu nivusiku ivi a kombisa ripfumelo eka yena. Sweswi Nikodema u ri: “Xana Nawu wa hina wu nga avanyisa munhu, a nga si yingisiwa, ni leswi a swi endleke swi nga si tiviwa xana?”

Vafarisi va hlundzukisiwa ku tlula mpimo leswi un’wana wa vona a lwelaka Yesu. “Xana na wena u huma eGaleliya ke?” va vutisa hi ku kariha. “Lavisisa swinene u ta vona leswaku ku hava muprofeta la humaka eGaleliya.”

Hambi leswi Matsalwa ya nga vuleki hi ku kongoma leswaku muprofeta a a ta huma hi le Galeliya, ya kombetela eka Kriste tanihi loyi a taka a huma kona, ya vula leswaku “ku vonakala lokukulu” a ku ta voniwa eka xifundza lexi. Kutani ku hambana ni mianakanyo leyi hoxeke, Yesu u velekeriwe eBetlehema, naswona a a ri ntukulu wa Davhida. Leswi Vafarisi kahle-kahle va nga swi tiviki leswi, hi ku fanana va ni vutihlamuleri eku hangalaseni ka mianakanyo leyi hoxeke leyi vanhu va nga na yona hi Yesu. Yohane 7:32-52; Esaya 9:1, 2; Matewu 4:13-17.

◆ Ku humelela yini mixo wun’wana ni wun’wana wa nkhuvo, naswona Yesu a nga wu kokerisa ku yini nyingiso eka leswi?

◆ Ha yini malandza ya hluleka ku khoma Yesu, naswona varhangeri va vukhongeri va hlamurisa ku yini?

◆ Nikodema i mani, i langutelo rihi leri a nga na rona hi Yesu, naswona u khomisiwa ku yini hi Vafarisi-kulobye?

◆ I vumbhoni byihi byi nga kona bya leswaku Kriste a a ta ta a huma hi le Galeliya?