“A Ku Na Munhu Loyi A Tshameke A Vulavula Hi Ndlela Leyi”

Yesu wa ha ri eYerusalema eNkhubyeni wa Titabernakela (kumbe Mitsonga). U tsakile hileswi ‘ntshungu wu nga ni ripfumelo eka yena.’ Hambiswiritano, leswi a swi va dyisi byi rhelela varhangeri va vukhongeri. Va rhuma varindzi, lava nga maphorisa ya vukhongeri leswaku va ya n’wi khoma. (Yohane 7:31, 32) Nilokoswiritano, Yesu a nga tumbeli.

Ematshan’weni ya sweswo, Yesu u ya emahlweni a dyondzisa hinkwako eYerusalema a ku: “Ndzi ta va na n’wina nkarhinyana ndzi nga si tlhelela eka loyi a ndzi rhumeke. Mi ta ndzi lava, kambe a mi nge ndzi kumi naswona laha ndzi nga ta va ndzi ri kona a mi nge swi koti ku ta.” (Yohane 7:33, 34) Vayuda a va n’wi twisisi kutani va vulavula va ri voxe va ku: “Xana munhu loyi u lava ku ya kwihi, laha hi nga ta ka hi nga n’wi kumi? Xana u lava ku ya eka Vayuda lava hangalakeke exikarhi ka Magriki ivi a dyondzisa Magriki? Xana u vula yini loko a ku, ‘Mi ta ndzi lava, kambe a mi nge ndzi kumi naswona laha ndzi nga ta va ndzi ri kona a mi nge swi koti ku ta’?” (Yohane 7:35, 36) Hambiswiritano, Yesu u vulavula hi ku fa ni ku pfuxiwa kakwe a ya etilweni naswona valala va yena a va nge swi koti ku n’wi landzela.

Siku ra vunkombo ra nkhuvo ra fika. Mixo wun’wana ni wun’wana hi siku ra nkhuvo, muprista u chela mati lama kiweke eXidziveni xa Silowama, lerova ma tala ma kondza ma fika etshakwini ra alitari leyi nga etempeleni. Loko a tsundzuxa vanhu hi mikhuva leyi, Yesu wa huwelela a ku: “Loko ku ri ni munhu loyi a nga ni torha, a a te eka mina a ta nwa mati. Loyi a pfumelaka eka mina, hilaha Tsalwa ri vuleke ha kona ri ku: ‘Swinambyana swa mati lama nyikaka vutomi swi ta khuluka swi huma eka yena.’”—Yohane 7:37, 38.

Yesu u vulavula hi leswi nga ta endleka loko vadyondzisiwa vakwe va hlawuriwa hi moya lowo kwetsima ivi va vitaneriwa ku ya hanya etilweni. Ku hlawuriwa loku ku endleka loko Yesu a file. Hi siku ra Pentekosta ya lembe leri landzelaka, swinambyana leswi swi sungula ku khuluka loko vadyondzisiwa lava hlawuriweke hi moya lowo kwetsima va chumayela ntiyiso eka vanhu.

Loko va angula eka leswi Yesu a swi dyondzisaka, van’wana va ri: “Hakunene loyi i Muprofeta,” va vula muprofeta lonkulu ku tlula Muxe loyi ku profetiweke ha yena. Van’wana va ri: “Loyi i Kreste.” Kambe van’wana va ri: “Xana Kreste a nga huma eGaleliya? Xana tsalwa a ri vuli leswaku Kreste u ta huma eka vana va Davhida eBetlehema, ku nga ximutana lexi Davhida a a tshama eka xona?”—Yohane 7:40-42.

Hikwalaho, ntshungu wu avanile. Hambileswi van’wana va lavaka leswaku Yesu a khomiwa, a nga kona loyi a n’wi khomaka. Loko varindzi va tlhelela eka varhangeri va vukhongeri va nga ri na yena Yesu, vaprista lavakulu ni Vafarisi va vutisa va ku: “Hikwalaho ka yini mi nga vuyanga na yena?” Varindzi va hlamula va ku: “A ku na munhu loyi a tshameke a vulavula hi ndlela leyi.” Varhangeri va vukhongeri, hi ku hlundzuka va va hlekula ni ku va poyila va ku: “Xana na n’wina se mi xisiwile? Xana ku ni murhangeri eka hina kumbe Mufarisi loyi a pfumel[aka] eka yena? Kambe Xikwembu a xi va tsakeli vanhu lava, lava nga wu tiviki Nawu.”— Yohane 7:45-49.

Loko Nikodema loyi a nga Mufarisi tlhelo xirho xa Sanedri a twa leswi, u vulavulela Yesu. Kwalomu ka malembe mambirhi ni hafu lama hundzeke, Nikodema u ye eka Yesu nivusiku a n’wi byela leswaku wa pfumela eka yena. Sweswi Nikodema u ri: “Xana nawu wa hina wa pfumela leswaku hi avanyisa munhu hi nga si n’wi yingisela ni ku tiva leswi a swi endleke?” Xana va ta n’wi hlamula njhani? Va ri: “Xana na wena u huma eGaleliya? Kambisisa Matsalwa kutani u ta swi vona leswaku a ku na muprofeta loyi a nga ta huma eGaleliya.”—Yohane 7:51, 52.

Matsalwa a ma vuli hi ku kongoma leswaku muprofeta u ta huma eGaleliya. Kambe Rito ra Xikwembu ri kombisa leswaku Kreste a a ta huma kona; ri profete leswaku “ku vonakala” a ku ta voniwa le “Galeliya wa matiko.” (Esaya 9:1, 2; Matewu 4:13-17) Ku tlula kwalaho, hilaha swi profetiweke hakona, Yesu u tswariwe eBetlehema naswona i wa rixaka ra Davhida. Hambileswi Vafarisi va swi tivaka kahle leswi, hi vona va hangalasaka mavunwa yo tala lawa vanhu va nga na wona hi Yesu.