Xiviko Xa Vahuweleri Va Mfumo
Ntiyiso Wa Bibele Wa “Tirha”
MISAVA leyi yi heta nkarhi wo tala ni mali yi ringeta ku lawula swiendlo swa vanhu vo biha. Milawu ya endliwa yi lwisana ni vugevenga byo tanihi ku tirhisiwa loko biha ka swidzidzirisi, vukhamba ni ku dlaya; kambe milawu leyi a yi endli vanhu vo biha va va lavanene. Hi tlhelo rin’wana, Rito ra Xikwembu, Bibele, ri na matimba lama hundzulaka, naswona vanhu lava tirhisaka milawu ya yona ni mimpimanyeto va va lavanene, lava tshembekaka ni vanhu lava titsongahataka.—Varhoma 12:2.
◻ Hi xikombiso, Timbhoni timbirhi eAustralia ti endle riendzo ro vuyela eka vavanuna va nga ri vangani lavantsongo, lava nga tirhiki. Loko va nghena endlwini laha vavanuna a va ri kona, va nghene eka kamara leri nga ni xinyami, leri tateke hi musi. Kwalaho a ku ri na swibya swa mbangi etafuleni ni vatlangi vo tala va rock va longoloke ni makhumbi. Ku lulama ni tlhelo lerin’wana ra kamara a ku ri tiambrufaya letikulu ta katara ya gezi. A ku ri kamara ro dyondzela bende ya rock. Va swi kotile ku sungula dyondzo ya Bibele ni vanharhu va vavanuna lava a va ri vamakwavo. Malembe ma nga ri mangani emahlweni mana wa vona a a dyondza Bibele ni Timbhoni, naswona hi ku pfuniwa hi buku leyi nge U Nga Hanya Hi Masiku aParadeyisini eMisaveni, a a dyondzisile vafana lava hi ta xitshembiso xa Xikwembu xa paradeyisi ya nkarhi lowu taka. Kutani ndyangu wu rhurhile, naswona dyondzo yi yimile. Sweswi, hi rirhandzu ra vona ra ntiyiso leri pfuxetiweke, hi ku hatlisa va joyiniwile edyondzweni ya vona hi vanghana vambirhi.
Hi tin’hweti tinharhu, un’wana wa vona a a veka vumbhoni, naswona endzhaku ka n’hweti u joyiniwile hi van’wana vambirhi. Va tshike bende, naswona exikarhi ka tin’hweti ta mune, hinkwavo hi vanharhu ka vona a va hlanganyela entirhweni wo chumayela. Sweswi, mana wa vona, makwavo lontsongo wa xinuna, ni makwavo lonkulu wa xisati la tekiweke va sungule ku dyondza Bibele. Hi ku anghwetla endzhaku ka kwalaho munghana un’wana u kombele dyondzo ya Bibele. Mayana ntsako wonghasi ku vona ntlhanu wa vona va khuvuriwa hi siku rin’we enhlengeletanweni ya xifundza! Van’wana vambirhi va lunghiselela ku khuvuriwa, loko manana ni wanhwana va hambeta va endla nhluvuko lowunene. Entiyisweni, Rito ra Xikwembu ra tirha.
◻ Wanuna eArgentina a a ri na mutirhi loyi a a loloha ni ku va mbabva naswona a a n’wi kolota mali yo tala. Siku rin’wana mutirhi u nyamalarile. Kutani, malembe endzhaku, exitarateni ekusuhi ni kaya rakwe wanuna u hlanganile ni khale ka mutirhi wakwe. Mutirhi wa khale u n’wi xewetile, ivi a ku: “A ndzi ri karhi ndzi ya ekaya ka wena ku ya ku tlherisela mali leyi ndzi ku kolotaka yona. Hi leyi mali ya wena. Ndza nkhensa swinene ngopfu, naswona ndzi kombela ku rivaleriwa hi ku nga yi tlherisi hi ku hatlisa.” Hi ku hlamala, wanuna u n’wi vutisile leswaku ha yini a endlile leswi. U hlamurile: “Sweswi ndzi dyondza Bibele, naswona ndzi un’wana wa Timbhoni ta Yehova. Bibele yi vula leswaku a hi fanelanga ku kolota mani na mani nchumu wihi na wihi handle ka rirhandzu. Hi yona mhaka leyi ndzi tlheriseke leswi swi nga swa wena.” Wanuna u vutisile: “I matimba wahi lawa Bibele yi nga na wona yo humesa ku hundzuka ko tano eka munhu?” Dyondzo ya Bibele yi sunguriwile na yena, kutani sweswi na yena u dyondza ntiyiso, hinkwavo hikwalaho ka ku hundzuka lokukulu loku ntiyiso wa Bibele wu ku endleke eka khale ka mutirhi wa yena.
Vanhu vo tala va timbilu letinene eArgentina va amukela ntiyiso lowu hundzulaka wa Bibele naswona va cinca ndlela ya vona ya vutomi, tanihi laha ntokoto lowu landzelaka wu kombaka ha kona.
◻ “Siku rin’wana loko hi gongondzile enyangweni loko hi ri entirhweni,” ku hlamusela Mbhoni, “hi twile mukhosi wu huma endzeni ka yindlu. Loko a hlamula ku gongondza ka hina, wanuna u humile—a hlundzuke ngopfu swinene. Hi sungule ku hlamusela xikongomelo xa pfhumba ra hina, kambe u xungete ku hi hlongola ekaya kakwe. Hi hambete hi vulavula hi ku rhula. Hakantsongo-ntsongo u vohlile. Hi ku xiya leswi, hi n’wi hlamusele swo tala hi ta xikongomelo lexi hlamarisaka xa Yehova hi vanhu. Hi ku tsakisiwa hi leswi, wanuna u tshinerile eka hina hi ku hlamala a ku: ‘Xikwembu xi mi rhume la.’ Kutani u hi rhambele endlwini. Kwalaho, lava a va hlengeletanile ekhonweni, a ku ri ‘nsati’ ni vana va yena, va rila. Kutani u tisorile: ‘Loko mi tile, a ndzi ri kusuhi ni ku tidlaya ni ndyangu wa mina. A ndzi na ntshembo! Ndzi lahlekeriwe hi ntirho, kutani sweswi va ta hi hlongola endlwini ya hina, naswona ndzi na swikweleti swo tala swo swi hakela.’”
Ntokoto lowu wu ve ni makumu lama tsakisaka. Makwerhu wa xisati u kumele nuna loyi ntirho, naswona u kume yindlu yin’wana, yena ni “nsati” wa yena va sungule ku dyondza Bibele naswona va tekanile endzhaku ko tshama swin’we malembe ya 15.
Ntiyiso wa Bibele wa “tirha” hi laha mintokoto leyi yi kombaka ha kona, naswona wu nga endla sweswo eka un’wana ni un’wana la nga ni mbilu yo titsongahata loyi a nga ta dyondza Bibele ivi a yi tirhisa.
[Marito lama tshahiweke exihlokweni lama nga eka tluka 7]
“Rito ra Xikwembu ra hanya ni ku tirha.”—VAHEVERU 4:12