Xiviko Xa Vahuweleri Va Mfumo

Ku Nyikela Vumbhoni Ku Tswala Mihandzu Ekaya Ni Le Xikolweni

VUTOMI bya Mukreste byi katsa ku endlela van’wana leswinene, ngopfu-ngopfu ku avelana na vona mahungu lamanene ya Mfumo wa Xikwembu. Swivuriso 3:27 yi ri: “U nga ali ku endla le’ŝinene e ka loyi u nga ni fanelo ka yena, loko ŝi ri mandleni ya wena.” Le Argentina muntshwa la nga Mbhoni, loyi a nga ni lembe ra vunharhu exikolweni xa le henhla a a lava ku avelana mahungu lamanene ya Mfumo ni munghana wakwe wa le xikolweni. Ku endla ka yena tano, ku ve ni vuyelo lebyinene ngopfu.

Siku rin’wana muntshwa la nga Mbhoni, u byele munghana wakwe leswaku a hi vukhongeri hinkwabyo lebyi lulameke. Loko jaha leri ri vule leswaku a ri si tshama ri endla nchumu xo biha, Mbhoni yi te: “Ni Xikwembu a wu xi endleli nchumu.” Leswi swi endle leswaku muntshwa loyi a ehleketa. Endzhakunyana Mbhoni leyi yi hlamusele leswaku lawa i masiku ya makumu ni leswaku loko munhu a ta amukeriwa hi Xikwembu, u fanele ku kuma vutivi lebyi kongomeke bya Bibele a tlhela a byi tirhisa. Munghana wakwe wa le xikolweni u pfumerile. Kambe xana ndyangu wa ka vona a wu ta pfumela leswaku a va na dyondzo ya Bibele? Ku endlela leswaku munghana wakwe a va ni nchumu wo anakanya ha wona, Mbhoni leyi yi n’wi kombele leswaku a ya hlaya buku leyi nge U Nga Hanya Hi Masiku aParadeyisini eMisaveni.

Ku hundze nkarhinyana, kutani munghana wakwe a tshika xikolo. A nga twelelanga nchumu mayelana na yena ku ringana nkarhi wo tlula lembe. Kutani, siku rin’wana muntshwa la nga Mbhoni u hlamarile ku kuma riqingho leri a ri huma eka munghana wakwe loyi a vuleke leswaku se wa swi vona leswaku vuprofeta bya Bibele bya hetiseka hakunene. Hi ku hatlisa Mbhoni yi hlele ku dyondza Bibele na yena.

Loko a ye ekaya ka khale ka munghana wakwe loyi a nghena na yena xikolo, u xiye leswaku vatswari va munghana wakwe a va karhateka malunghana ni leswi jaha ra vona a ri swi sungula. Hambi ku ri ndzisana ya xinuna ya munghana wakwe a yi ehleketa leswaku buti wa yona u sungula ku penga. Kutani vatswari va nghenise ndzisana yakwe ya xinuna edyondzweni leyi landzeleke. Endzhaku ka kwalaho, jaha leri ri ye ri ya vikela vatswari ri ri karhi ri khavaxela mihloti, ri vule leswaku buti wa rona a a nga pengi, leswi endleke leswaku mana wa rona a bokoxela a ku: “A ndza ha ri na xiphiqo xin’we, kambe sweswi ndzi na swimbirhi!”

Hikwalaho, eka dyondzo leyi landzeleke, yena hi byakwe a a ri kona naswona u pfumerile leswaku vafana lava a va nga pengi. Endzhakunyana, yena swin’we ni nuna wakwe va lunghiseleriwe dyondzo ya Bibele. Hi ku hatlisa ndyangu hinkwawo wu sungule ku va kona eminhlanganweni ya vandlha eHolweni ya Mfumo. Hi ku famba ka nkarhi, vakokwa wa yena na vona va sungule ku dyondza Bibele naswona va sungule ku ya eminhlanganweni. Ku sukela kwalaho, jaha leriya ro sungula ri khuvuriwile. Ri tekile, naswona rona ni nsati wa rona i vahuweleri lava hisekaka.

Ku tlula kwalaho, hi ku nyikela vumbhoni bya xitshuketa exikolweni, muntshwa wa Mbhoni u pfune vanhu van’wana vambirhi lava a nghena na vona xikolo kun’we ni manana ni sesi wa un’wana wa vona leswaku va sungula ku dyondza Bibele. Loko va hlanganile, vanhu va 11 va dyondze ntiyiso wa Bibele hikuva muntshwa wa Mbhoni a nga tshikanga ku endla leswinene eka lava a nghenaka na vona xikolo. Mawaku vuyelo byo tsakisa swonghasi! Entiyisweni, “ku katekile tiko le’ri Yehova a nga Šikwembu ša rona!”—Pisalema 144:15.