Xiviko Xa Vahuweleri Va Mfumo
Matimba Ya Rito Ra Xikwembu Lama Hundzulaka
HI KU vula ka yena n’wini, a hamba a “n’wi sandza, ni ku n’wi xanisa, ni ku n’wi pfukela.” (1 Timotiya 1:13) Kambe u cincile! Ku hundzuka ka muapostola Pawulo a ku ri lokukulu swinene lerova endzhakunyana u kote ku vula a ku: “Tekelelani mina, kukotisa leswi na mina ndzi tekelelaka Kriste.”—1 Vakorinto 11:1.
Namuntlha, madzana ya magidi ya vagandzeri lava nga ni timbilu letinene emisaveni hinkwayo va le ku hundzukeni hi ndlela leyi fanaka. I yini lexi va pfunaka ku endla tano? Va amukela vutivi bya Rito ra Xikwembu, naswona va ri tirhisa evuton’wini bya vona. Ntokoto lowu landzelaka wu kandziyisa matimba lama hundzulaka ya Rito ra Xikwembu.
Le Slovenia mpatswa lowu dyuhaleke a wu tshama wu ri woxe ehandle ka ximutana. Nuna wa kona, Jože, a ri na kwalomu ka 60 wa malembe hi vukhale naswona a a ri ni xiphiqo lexikulu xa vundzendzele. Kambe, a ha tihlayisela nsati wakwe Ljudmila, la vabyaka. Siku rin’wana Jože u hlangane ni vahuweleri vambirhi va Mfumo. U rhambe Timbhoni leti ekaya rakwe, laha ti kumeke nsati wakwe. Loko a twa rungula ra Mfumo, mihloti ya ntsako yi xiririkile emarhameni ya Ljudmila. Na yena Jože u tsakisiwe hi leswi a swi tweke ivi a vutisa swivutiso swo tala. Endzhaku ko siyela mpatswa lowu tibuku to karhi ta Bibele, Timbhoni ti fambile.
Timbhoni ti kote ku tlhela ti vuya endzhaku ka n’hweti, naswona ti vone buku leyi nge U Nga Hanya Hi Masiku aParadeyisini eMisaveni ehenhla ka tafula. Loko a vutisiwe lomu a yi kumeke kona, Jože u te: “Ndzi vone xinavetiso eka tluka ra le ndzhaku ra wun’wana wa timagazini leti mi ndzi siyeleke tona. Hi loko ndzi tsalela hofisi ya n’wini eZagreb ndzi kombela buku leyi.” Loko va vona ku tsakela ka yena, va n’wi rhambele eXitsundzuxweni xa rifu ra Kreste lexi a xi tshinela lexi a xi ta khomeriwa eHolweni ya Mfumo. Lexi tsakiseke Timbhoni, u yile!
Hi ku hatlisa ku sunguriwe dyondzo ya Bibele, naswona u endle nhluvuko lowunene. Hi xikombiso, loko Jože a kombiwe eBibeleni leswaku “u nga ṭhuki u tiendlela šifaniso le’ši v̌atliweke, [kumbe] . . . [ku] ŝi nkhinsamela, ni loko ku ri ku ŝi tirela,” hi ku hatlisa u hlengelete swifaniso hinkwaswo leswi vatliweke swa vukhongeri leswi a swi ri endlwini yakwe, ku katsa ni swifaniso leswi mpfampfarhutiweke, kutani a swi cukumeta.—Eksoda 20:4, 5.
Torha ra ntiyiso wa moya leri Jože a ri na rona ri timuriwile. Khombo ra kona, a ha ri ni torha rin’wana. Se a swi ri na 18 wa malembe, a ri karhi a nwa nkombo wa tilitara ta vhinyo siku na siku. Hikwalaho ka leswi a a nwa ngopfu, a a nga ri na mhaka ngopfu ni ku languteka ka yena n’wini. Kambe endzhaku ka loko a dyondze hi langutelo ra Xikwembu malunghana ni ku tirhisiwa loko biha ka xihoko, u tiyimisele ku cinca.
Hakatsongotsongo u tikarhatele ku hlula xiphiqo xakwe xa ku nwa, a hlayisa rhekhodo ya leswaku u nwa kangani hi siku. Hi ku hatlisa a nga ha ri hlonga ra vhinyo. Etidyondzweni takwe ta Bibele, u tlhele a dyondza leswaku Vakreste va ntiyiso va fanele va hlayisa rihanyo ra vona vini. Hikwalaho ka sweswo, u nyike Timbhoni mali kutani a ku: “Fambani mi ya ndzi xavela swiambalo swihi na swihi leswi lavekaka leswaku ndzi ta fanelekela ku ya eminhlanganweni ya Vukreste ni le ntirhweni wa nsimu!” Timbhoni ti vuye ni swo rhangisa, masokisi, tintanghu, tihembe, tisudu, tithayi ni nkwama wa tibuku.
Endzhaku ko heta lembe a dyondza Bibele, Jože na Ljudmila va fanelekele ku famba ni Timbhoni entirhweni wo chumayela hi yindlu na yindlu. Endzhaku ka tin’hweti tinharhu va kombise ku tinyiketela ka vona eka Xikwembu hi ku khuvuriwa ematini entsombanweni wa muganga wa Timbhoni ta Yehovha. Hambileswi a a dyuharile, ni leswi rihanyo rakwe a ri nga nyawuli, Jože u hlanganyele nkarhi na nkarhi eku chumayeleni ka mahungu lamanene, ku fikela loko a fa hi May ya 1995, u tirhe hi ku tshembeka a ri nandza wa vutirheli evandlheni. Mihandzu leyinene leyi humesiweke evuton’wini bya wanuna loyi wo titsongahata ni nsati wa yena i vumbhoni bya matimba lama hundzulaka ya Rito ra Xikwembu!