Vumundzuku Lebyi Vangamaka Bya Misava eHansi Ka Mfumo Wa Xikwembu

BIBELE yi vula leswaku “ku pfumela i ku tshemba loku tiyeke ehenhla ka swilo leswi languteriweke.” (Vaheveru 11:1) Tanihi leswi hi swi voneke eka xihloko lexi hundzeke, malembe lama tlulaka 500 Kriste a nga si velekiwa, Xikwembu xi endle leswaku ebukwini ya Daniyele ku tsariwa xivono xa vuprofeta xa ku humelela ni ku wa ka mimfumo ya misava ku sukela esikwini ra Daniyele ku ta fika eka ra hina. Ku pakanisa ka vuprofeta lebyi ka hi tiyisekisa, ku hi nyika xivangelo xa matimba xa ripfumelo, leswaku vuprofeta hinkwabyo bya Daniyele na byona byi ta hetiseka ni leswaku ku nga ri khale Mfumo wa Xikwembu ehansi ka Yesu Kriste wu ta siva tihulumendhe ta vanhu.

Mawaku ku cinca loku swi nga ta vula kona eka vanhu! Loko xi langutele nkarhi wolowo, Xikwembu hi xoxe xi ri: “Vonani, ndzi endla swilo hinkwaswo swi va leswintshwa.” (Nhlavutelo 21:5) Ku languta byin’wana bya vuprofeta lebyi huhuteriweke lebyi byi hi nyikaka xivono xa nkarhi wolowo wo tsakisa swi ta hi pfuna ku vona ndlela leyi swilo swi nga ta va “leswintshwa” ha yona, hi laha ku nga ta va ni ku hambana loku heleleke ni leswi hi swi vonaka namuntlha ehansi ka mfumo wa munhu. Hakunene, leswi Bibele yi swi vulaka hi vumundzuku bya misava ya hina ni hi vutomi eka yona a hi leswi nga hlamarisiki. Xiya:

Vugevenga ni vukarhi swi ta hela. “La’v̌o biha v̌a ta susiwa, . . . lo’wo biha a nga ka a nga ha v̌i kona.” Lava hanyaka “v̌a ta ṭhama uṅwana ni uṅwana e hansi ka nkuwa, ni le hansi ka vinya ya yena, ku nga ri na loyi a v̌a pfušaka; hikuv̌a nomu wa Yehova wa tinyimpi wu vurisile.”—Psalma 37:9, 10; Mikea 4:4.

Mintlawa ya xin’wana-manana ni vutiko, ni tinyimpi leti swi ti vangaka, swi ta va swi nga ha ri kona. “Tiko ri nga ka ri nga ha lwi ni riṅwana, kutani a ku nga ha dyonḍisiwi ku lwa.”—Esaya 2:4.

Ku pfumaleka ka tindlu, ku pfumala makaya ni ku pfumaleka ka mintirho swi ta va swilo swa nkarhi lowu hundzeke. Esaya u vhumbile: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. . . . Kutani v̌ahlawuriwa v̌a mina v̌a ta ṭakela ntiro wa mav̌oko ya v̌ona.”—Esaya 65:21, 22.

Tindlala leto chavisa, to fana ni leti sweswinyana ti hehleke swiphemu swa Afrika, ti ta siviwa hi swakudya swo tala swa vanhu hinkwavo. “Ku ta v̌a ni nḍalo ya koro la misav̌eni ni le tihlohlorini ta tinṭhav̌a.” “Misav̌a yi humesile mihanḍu ya yona, Šikwembu, Šikwembu ša hina ši ta hi katekisa.”—Psalma 72:16; 67:6, 7.

Ku engetela, ku ta va ni rihanyo ni vutomi leswi hi nga ta tsakela minkateko leyi ha swona. Hambi ni le nkarhini wa vutirheli bya Yesu bya la misaveni, swi vuriwe hi ku tiya leswaku “lavo-fe-mahlo va tlhela va vona, swilema swa famba, vanhlokonho va basisiwa, lavo-fe-tindleve va twa.” Hambi swi ri tano, xitshembiso lexikulu ku tlurisa xi ta tirha: “[Xikwembu] xi ta hlangula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Luka 7:22; Nhlavutelo 21:4.

Mawaku ku hundzuka loku hlamarisaka! I ntshunxeko muni wonghasi lowu leswi hinkwaswo swi nga ta wu tisela vanhu lava kayakayaka! Hi ku khutaza leswaku u tinyikela hi wexe hambi ku ri sweswi eka Mfumo wa Xikwembu, leswaku na wena u ta tshovela mimpfuno leyi nga ta tisiwa hi ku hundzuka loku tsemaka nguva ka vuhosi bya misava.

[Xifaniso lexi nga eka tluka 7]

Vanhu lava sweswi va hanyaka va nga rindzela minkateko leyi hlamarisaka—ku hela ka nyimpi, vugevenga, vusweti, vuvabyi, ni rifu. Xana u nga tsakela vumundzuku byo tano?