Xana U Tlangela Swilo Leswo Hlawuleka?
“Ringetani hi matimba ku hanya hi ku rhula ni vanhu hinkwavo, mi ringeta ni ku hlawuleka, hikuva ehandle ka ku hlawuleka a ku na munhu na un’we la nga ta vona Hosi. Mi vona leswaku . . . ku nga vi na un’we la hundzukaka muoswi kumbe la nga riki na mhaka ni [swilo leswo hlawuleka], ku fana na Esawu la nga xavisa vuhosi bya yena ku kuma mpandzwanyana wa swakudya.”—VAHEVERU 12:14-16.
1. I ku pfumaleka kwihi ka ku tlangela loku vanhu vo tala va ku kombisaka, kambe Vakriste va hambane hi ndlela yihi?
YEHOVA XIKWEMBU xa hina i Munyiki la hananaka swinene. U nyika swilaveko swa swivumbiwa swa yena hinkwaswo mahala. Hambi swi ri tano, vunyingi bya vanhu, va anakanya kantsongo hi leswi. A va n’wi nkhensi Yehova hambi ku ri ku amukela xikweleti xa vona lexikulu eka yena. Hi tlhelo rin’wana, Vakriste a va byi honisi vunene bya Yehova. Va n’wi xixima hi mhaka ya leswi a swi endlaka hikwalaho ka vona. Hikwalaho ka ku tinyiketela ka vona eka yena, Yehova u byarhise vanhu vakwe swilo swo tala swo hlawuleka leswi nga tsakeriwiki hi vanhu hi ntolovelo. Leswi i swilo swa nkoka, leswi hlayisiweke tanihi leswi kwetsimaka naswona swi yelana na vugandzeri bya Yehova. Wa swi tiva leswaku swilo leswi swo hlawuleka i yini xana? Naswona xana u ni ku swi tlangela loku enteke, loku humaka embilwini?—Psalma 104:10-28; Matewu 5:45; Nhlavutelo 4:11.
2. I mani loyi a kombiseke ku pfumaleka loku xiyekaka ka ku tlangela?
2 A hi vanhu va Xikwembu hinkwavo lava swi tlangeleke kahle swilo leswo hlawuleka. Hi xikombiso, Esawu n’wana wa Isaka, u tsandzekile emhakeni leyi. Pawulo u vulavule ha yena loko a tsalela Vakriste lava totiweke va Vaheveru. Endzhaku ko khutaza vanhu lava ku “ringeta hi matimba ku hanya hi ku rhula ni vanhu hinkwavo,” u va tsundzuxe ku tiyiseka leswaku ku nga tshuki exikarhi ka vona ku va ni ‘muoswi kumbe la nga riki na mhaka na swilo leswo hlawuleka, ku fana na Esawu la nga xavisa vuhosi bya yena hi ku kuma mpandzwanyana wa swakudya.’—Vaheveru 12:14-16.
3, 4. Xana a ku ri wahi malunghelo lama hlawulekeke ya vukulukumba lama Esawu a ma xaviseleke Yakobo hi mpandzwa wa murhu?
3 A ku ri wahi malunghelo lawa ya ku va mativula? Yehova u tshembise Abrahama, kokwa wa Esawu, leswaku eka yena ni vatukulu va yena n’wana eku heteleleni a a ta velekiwa loyi a a ta va Rixaka ra xitshembiso, Mesiya, kumbe Kriste. Hi ku tirhisa Rixaka leri matiko hinkwawo a ya ta kota ku tikatekisa, leswi a swi ta va yisa eku ntshunxiweni ka vona eka xidyoho ni rifu.—Genesa 22:15-18; Vagalatiya 3:16.
4 Esawu, mativula ya Isaka, a a ri na lunghelo ra ku va xirho xa nxaxamelo lowu a wu ta humesa Rixaka rero. Lexi a xi ri xiphemu xa vukulukumba bya yena. Kambe lexi n’wi khomiseke tingana, rhekhodo ya Bibele yi ri: “Esau a sanḍise ŝeŝo e v̌ukulukumba bya yena.” U byi xavise hi mpandzwa wun’we wa murhu wa tinyawa ni vuswa a nga swi xiyi. Entiyisweni, a hi lavi ku tekelela ku pfumala ka yena ku tlangela. Ku ri na sweswo, hi fanele ku kurisa langutelo ra Yakobo, makwavo wa Esawu. A a ri wa vumbirhi eka nxaxamelo wa vukulukumba, lebyi a byi xaveke hikwalaho ka ku pfumala ka makwavo wa yena ku tlangela ka le rivaleni. Yakobo xisweswo u tiyise leswaku lunghelo ra ku va kokwa wa Rixaka leri tshembisiweke ri hundziseriwe hi un’wana loyi a tekeke nchumu lowu wo hlawuleka wu ri wa nkoka.—Genesa 25:27-34.
5. I swilo swihi leswo hlawuleka leswi hi nga ta swi xiya, naswona hi nga papalata ku swi ba hi makatla hi ndlela yihi?
5 Ebandlheni ra Vukriste, Yehova u endle leswaku swilo swo tala swo hlawuleka swi va kona leswaku swi hi hlayisa hi tiyile emoyeni naswona swi hi hlomisela ntirho wa yena kahle. A hi buleni hi swo talanyana swa leswi. Manuku ke, ha un’we-un’we, hi nga anakanyisisa hi swona ivi hi tiyisa ku swi tlangela ka hina leswaku hi ta ka hi nga swi bi hi makatla.
Vito Ra Yehova Ni Nkutsulo—Swi Hlawuleke Ngopfu
6. Hi tihi tindlela leti hi nga kombaka leswaku a hi ku honisi ku hlawuleka ka vito ra Yehova ha tona?
6 Xo sungula eka nxaxamelo wa hina wa swilo leswo hlawuleka i vito ra Yehova. Xana vito leri ri tlakuke ku fika kwihi emiehleketweni ni le mbilwini ya wena? Loko a nyika xikhongelo xa xikombiso, Yesu u rhange hi ku: “Vito ra wena a ri hlawuleke.” (Matewu 6:9) Loko hi khuvuriwa, hi va van’wana va Timbhoni ta Yehova. (Esaya 43:10, 11) Mayana ku xiximeka konghasi! Naswona loko hi vulavula hi vunene bya Yehova ni swikongomelo swakwe leswinene, van’wana va sungula ku n’wi tiva hi vito rakwe ra xiviri, ivi na vona va lava ku n’wi tirhela. Kambe loko munhu a honisa ku vulavula ha yena kumbe, lexi nyanyisaka, a katseka eku endleni ka leswo biha, leswi swi tisa ndzhukano evitweni lerinene ra Yehova ni ku twala lokunene. Timbhoni leti tshembekaka ta Vukriste ta Yehova ti lwela ku hlawulekisa vito rakwe lero kwetsima nkarhi hinkwawo emahlweni ka van’wana hi leswi ti swi vulaka ni ku swi endla.—Levitika 22:31, 32; Deuteronoma 5:11.
7. Ha yini hi fanele ku kombisa ku tlangela lokukulu ka nkutsulo ni gandzelo ra Kriste?
7 Lexikulu enxaxamelweni wa swilo leswo hlawuleka ku ni gandzelo ra nkutsulo. Xana gandzelo ra Kriste ri na nkoka wo tanihi kwihi eka wena? Hi le xisekelweni xa ripfumelo leri heleleke ntsena eka gandzelo leri ra munhu la hetisekeke laha swidyoho swa hina swi nga rivaleriwaka kona. (1 Yohane 2:1, 2) Pawulo u vulavula hi bandlha leri totiweke tanihi leri nga ‘xaviwa hi ngati ya n’wana wa [Xikwembu].’ (Mintirho 20:28; ringanisa 1 Petro 1:17-19.) Yesu, N’wana la nga swakwe wa Xikwembu, u tshike xiyimo xakwe etilweni, a hanya emisaveni exikarhi ka vavanuna ni vavasati lava dyohaka, kutani manuku a nyiketa vutomi bya yena lebyi hetisekeke bya munhu hi rifu ra nhlomulo emhandzini ya nxaniso leswaku hi ta va ni vutomi lebyi nga heriki. (Matewu 20:28) A ku ta va mpimo wa ku pfumala ku nkhensa loko munhu a nga kombi ku tlangela loku enteke ka siku na siku ka nyiko leyi yi vangamaka ya Xikwembu.—Vaheveru 10:28, 29; Yuda 4, 5.
Vuxaka Bya Hina Na Yehova Ni Nhlengeletano Yakwe
8. Xana vuxaka bya hina na Yehova byi na nkoka wo tanihi kwihi?
8 Leswi swi hi fikisa eka mhaka yin’wana leyi hlawulekeke ngopfu, vuxaka bya hina na Yehova. Hi fanele ku byi tsakela swonghasi vuxaka lebyi hi nga na byona ni Tata wa hina wa le tilweni. Loko hi ‘titshineta kusuhi na Xikwembu, xi ta tshinela kusuhi na hina.’ (Yakobo 4:8) Xa hi rhandza swinene, naswona xi lava leswaku hi xi rhandza hi timbilu ta hina hinkwato. (Matewu 22:37, 38; Yohane 3:16) Davhida u nyike n’wana wakwe Solomoni ndzayo leyinene ehenhleni ka vuxaka bya yena na Yehova. Lexi katsekaka eka leswi i xitsundzuxo lexi nge: “Na wena, Solomon, ṅwana nga, tiv̌a Šikwembu ša tata wa wena, u ši tirela hi mbilu le’yi tengeke ni ku ṭaka ka moya; hikuv̌a Yehova [u] kamba timbilu hikwato, kutani a tiv̌isisa makungu hikwawo ya ku anakanya. Kungaku loko u ṅwi lav̌isisa, u ta ṅwi kuma; kambe loko u ṅwi ṭhika, o ta ku tšukumeta hi laha ku nga heriki.” (1 Tikronika 28:9) Kutani “tshamani erirhandzwini ra Xikwembu. Langutelani musa wa Hosi ya hina Yesu Kriste lowu yisaka evuton’wini lebyi nga heriki.”—Yuda 21.
9. Hi tihi tindlela leti hi kombisaka leswaku a hi ri honisi lunghelo ra ku va xirho xa nhlengeletano ya Yehova ha tona?
9 Xana u tlhela u tlangela lunghelo lero hlawuleka swonghasi ra ku va xirho xa nhlengeletano ya Yehova? Hinkwerhu hi fanele ku tsundzuka leswaku hi le ka yona hikwalaho ka tintswalo leti nga fanelangiki ta Yehova ntsena. Loko munhu a vonaka a nga tlangeli ivi a va mudyohi la nga hundzukiki, u ta lahlekeriwa hi lunghelo leri. Pawulo u tsundzuxile a ku: “Hikwalaho, loyi a anakanyaka leswaku wa ha yimile, a a tivonele leswaku a nga wi.” (1 Vakorinto 10:6-12) Pawulo u nyike xitsundzuxo lexi endzhaku ko vulavula hi Vaisrayele va 23 000 lava herisiweke hikwalaho ka ku gandzela swifaniso ni vunghwavava. Hi nga kombisa ku tlangela ka hina ka ku hlawuleka ka nhlengeletano ya Yehova hi ku endla xiphemu xa hina ha un’we-un’we ku yi hlayisa yi basile eka swilo swa thyaka, vunghwavava, madzolonga, mabindzu ni ku titwa ka vukulu na rivengo. (2 Vakorinto 7:1; 1 Petro 1:14-16) Hi nga tirhela eku tiyiseni ka xiboho hi xiya fambiselo ra le tilweni na ntirhisano ni lava va rhangelaka.—1 Vatesalonika 4:3-8; 5:12, 13.
Rito Ra Xikwembu, Milawu Ni Ntshembo Wa Mfumo
10. Hi swi komba hi ndlela yihi leswaku hi ma tlangela hi laha ku taleke Matsalwa yo Kwetsima?
10 Rito ra Xikwembu leri huhuteriweke, ku nga Bibele Leyo Kwetsima, na rona ri hlawulekile. Ri na marito ya Xikwembu, swiletelo, ndzayo, switshembiso, tinhlavutelo, ina, hinkwaswo leswi hi swi lavaka ku ‘tilulamisela ntirho wun’wana ni wun’wana lowunene.’ (2 Timotiya 3:16, 17) Xana hi nga komba ku tlangela ka leswi hi ndlela yihi? Xo sungula, hi ku ri dyondza ni ku tirhisa leswi hi swi dyondzaka evuton’wini bya hina. Manuku ke, hi ku hlayisa khwatsi “swakudya hi nkarhi wa kona” leswi seketeriweke eBibeleni leswi Yehova a swi nyikelaka hi “nandza lowo tshembeka, lowa vutlhari.” (Matewu 24:45) Naswona hi langutelo lerinene, hi fanele ku hlayisa tikopi ta hina ta munhu hi xiyexe ta Bibele, kun’we ni tibuku ta Vukriste leti hi ti tirhisaka entirhweni wa hina wo chumayela, ti hlayisekile ni ku basa. Swi nga tisa ndzhukano eka Yehova loko hi huma hi ya veka vumbhoni ivi hi tirhisa Bibele leyi phutseriweke hi vusopfa kumbe leyi nga vonakiki.
11. Ha yini hi nga fanelanga ku teka milawu ya Yehova leyi hlawulekeke yi nga ri nchumu?
11 ERitweni ra Xikwembu ku ni milawu leyi hlawulekeke ya Yehova. Xana minkarhi hinkwayo u yi languta tanihi leyi hlawulekeke, kumbe hi minkarhi yin’wana u voyamela eku yi tekeleni ehansi ke? Milawu ya Yehova yi fana ni swikombo, mimfungho ni mindzilakana ya vuhlayiseki egondzweni ro ya evuton’wini. Loko hi yi yingisa, hi ta famba hi ku hlayiseka ivi eku heteleleni hi fika laha hi yaka kona emisaveni leyintshwa ya Yehova; kambe loko hi teka swileriso ni switsundzuxo swa Yehova hi ku olova, hi yimeriwe hi nhlomulo.—Psalma 119:10, 11, 35, 101, 102; Swivuriso 3:1-4.
12. Xana ntshembo wa hina wa Mfumo i nchumu wo hlawuleka hi ndlela yihi?
12 EBibeleni, hi tlhela hi dyondza hi nchumu lowo hlawuleka lowu fanelaka ku rhandzeka etimbilwini ta hina: ntshembo wa hina wa Mfumo. Loko a vulavula hi Abrahama la tshembekaka, Pawulo eka Vaheveru 11:10 u ri: “Mhaka hi leswaku a a langutele muti [Mfumo wa Xikwembu] lowu nga ni masungulo, lowu muaki ni muendli wa wona xi nga Xikwembu.” Xana u ni ntshembo lowu fanaka lowu tiyeke, lowu tiyiselaka eka Mfumo wa Xikwembu? Xana ripfumelo ra wena ri tiye lerova mbilu ya wena a yi pfumeleli ku kanakana, naswona ku chivirika ka wena ku tshama ku nga tsananga loko u yimele swikongomelo swa Xikwembu ku hetiseka hi nkarhi lowu faneleke?—Matewu 24:20-22, 33, 34, 42.
Ku Hlengeletana Loku Hlawulekeke Ni Malunghelo
13. Hikwalaho ka yini hi nga fanelanga ku honisa mimpfuno ya minhlangano ya Vukriste?
13 Pawulo u layile a ku: “Hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona.” Leswi swi kombisa leswaku minhlangano ya hina ya Vukriste i lunghiselelo rin’wana leri hlawulekeke leri nga faneriki ku tekeriwa ehansi. Eminhlanganweni, hi amukela dyondzo ya nkoka ni xinghana lexi kufumelaka lexi hi xi lavaka hi xihatla. Laha na kona hi nga ‘twarisa ntshembo wa hina erivaleni’ hi ku vulavula eplatifomo loko hi kuma nkarhi ni ku nyika tinhlamulo nkarhi na nkarhi. (Vaheveru 10:23-25) Naswona leswi Holo ya Mfumo ku nga laha minhlangano ya hina yo tala yi khomeriwaka kona, xana u nyikela mali nkarhi na nkarhi ni ku tirha hi matimba ku yi endla leswaku yi tshama yi hlayisekile kahle?—Eksoda 35:21.
14. I yini lexi nga ta hi pfuna ku tlangela leswaku vutirheli bya hina bya Vukriste i rifuwo leri hlawulekeke ke?
14 Lunghelo leri Vakriste va nga na rona ra ku chumayela mahungu lamanene Pawulo u ri fanisa ni ku ‘tamela timbita ta vumba.’ (2 Vakorinto 4:1, 7) Ina, vutirheli bya Vukriste na byona i xilo xo hlawuleka lexi hi xi tlangelaka swinene. Hambi leswi vo tala va vanhu lava hi va chumayelaka va nga tsakeriki, hi fanele ku hambeta hi titsundzuxa lunghelo leri tlakukeke leri hi nga na rona ra ku byela van’wana hi ta Yehova ni swikongomelo swa yena. Xisweswo hi ta hetisisa xileriso xa hina xa ku chumayela mahungu lamanene ya Mfumo wa Xikwembu ni ku endla vadyondzisiwa. (Matewu 24:14; 28:19, 20) Ku hlalela vadyondzisiwa lavantshwa loko va endla nhluvuko i xivangelo xin’wana xa ntsako. (1 Vatesalonika 2:19, 20) Loko hi tlangela vutirheli, hi nge vi lava nga humiki hi masiku kumbe lava tsanaka eku twariseni ka mahungu lamanene.
15. Ha yini ku khathalela malunghelo enhlengeletanweni ya Yehova ku nga fanelanga ku tekiwa hi ku vevuka?
15 Malunghelo enhlengeletanweni ya Yehova na wona ya hlawulekile. Entiyisweni, malunghelo yo tano i ntshembo lowu hlawulekeke. (Ringanisa Mintirho 20:28.) Hambi loko vutihlamuleri byi katsa vuungameri, vurisi, ku dyondzisa, kumbe ntirho wun’wana eka Vakriste-kulorhi, byi nyika vukhathaleri lebyikulu. Hambi loko ntirho wu vonaka wu nga nyawuli, u nga wu teki hi ku olova, kambe wu endli khwatsi, hi ku tiyimisela, onge hi loko u wu endlela Yehova. Tsundzuka, “loyi a tshembekeke eka leswintsongo, ni ka leswikulu ú ta tshembeka.”—Luka 16:10.
Vukati Ni Ndyangu
16. Hi tihi tindlela leti hi nga kombisaka leswaku hi xiya vukati ni ndyangu swi ri swilo leswo hlawuleka ha tona?
16 Loko u xaxameta swilo leswo hlawuleka, u nga rivali ku nghenisa vukati ni ndyangu. I ntiyiso, lava nga riki Vakriste na vona va tekana, kambe Vakriste va languta vukati byi ri lebyi hlawulekeke, lebyi katsekaka eku gandzeleni ka vona Yehova. (Ringanisa 1 Petro 3:1-7.) Xana va komba ku xixima nchumu lowu wo hlawuleka hi ndlela yihi? Bibele eka Vaheveru 13:4 yi ri: “Ku tekana a ku ve loku xiximiwaka hi vanhu hinkwavo, vukati byi nga onhiwi hi ku kanganyisana, hikuva Xikwembu xi ta avanyisa timbhisa ni vaoswi.” Yesu u tsundzuxe leswaku ku hambeta u languta wansati hi ku n’wi navela a swi ta yisa eku endleni ka vuoswi embilwini. (Matewu 5:27, 28) Loko u hlawula ku teka, endla tano hi ku xiximeka. Manuku ke, u nga tshuki u tekela vukati bya wena ehansi. Aka rirhandzu ra ntiyiso ni ku xixima loku enteke siku na siku. Loko u ri na vana, ‘va kurisi hi ku va laya ni ku va dyondzisa ta Yehova.’ Hi ndlela leyi ndyangu wa wena wu ta va “lowo kwetsima.”—Vaefesa 6:4; 1 Vakorinto 7:14.
Moya Lowo Kwetsima Wa Yehova Ni Xikhongelo
17. Ha yini hi nga swi koti ku honisa moya lowo kwetsima wa Xikwembu?
17 Hi lava malunghiselelo ya Yehova hinkwawo, naswona mpfuno wun’wana wa nkoka lowu humaka eka Yehova i moya lowo kwetsima. (Yohane 14:26) A hi ti tivi minkarhi hinkwayo tindlela leti Yehova a tirhisaka moya wa yena lowo kwetsima ha tona hikwalaho ka hina, kambe nchumu wun’wana i wa xiviri: Hi nge koti ku endla nchumu handle ka wona. Hi fanele hi khongelela moya lowo kwetsima leswaku wu hi pfuna ku twisisa tidyondzo ta ntiyiso ni ku tiyisela miringo. Hi lava leswaku wu hi pfuna ku hlakulela mihandzu ya moya. (Vagalatiya 5:22, 23) Naswona ha tshinyiwa eka Vaefesa 4:30 leswaku hi ‘nga khomisi Moya lowo Kwetsima tingana’, hi katseka eka swilo leswi sivelaka ku tirha ka wona eka hina. Onge hi nga tlangela moya lowo kwetsima wa Yehova nkarhi na nkarhi.
18. Hikwalaho ka yini xikhongelo ku ri lunghelo leri hlawulekeke?
18 Nchumu wo hetelela wo hlawuleka lowu hi nga ta bula ha wona, ku nga xikhongelo, entiyisweni a hi wuntsongo hi ntikelo. Mayana lunghelo leronghasi leri hi nga na rona ra ku vulavula ni Mufumi wa hinkwako-nkwako, Yehova! Kahle-kahle, hi fanele ku n’wi tshinelela hi xichavo, hi ku xixima, ku nga ri hi ku tilawula. Hi nga tiyiseka leswaku u ta yingisa ni ku hlamula swikhongelo swa hina leswi nyikeriwaka hi ku twanana ni ku rhandza ka yena. “Mi nga vileli ha nchumu; kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi kombela mi ri karhi mi nkhensa.” (Vafilipiya 4:6) Xikhongelo xi ta endla leswaku hi tlangela swilo leswo hlawuleka.
19. I minkateko yihi leyi taka eka lava va swi tlangelaka kahle swilo leswo hlawuleka?
19 Hi bule hi 13 wa swilo leswo hlawuleka ntsena leswi hi nga fanelangiki ku swi tekela ehansi. Swo tala leswi engetelekeke swi nga ha boxiwa. Loko hi tlangela swilo swo tano, hi ta hlayisa vuxaka lebyinene na Yehova, Xikwembu xa hina, ivi hi kuma nkateko wa yena wa siku na siku. I ku rhula muni konghasi ka miehleketo loku leswi swi ku tisaka, kun’we ni ripfalo lerinene! U nga tshuki u honisa vuxaka byebyo bya nkoka! Rhandza Yehova hi mbilu, mianakanyo, moya ni matimba ya wena hinkwawo, kutani u ta ku rhandza minkarhi hinkwayo. (1 Yohane 4:16) Ku hava lexi nga herisaka xiboho xexo xa rirhandzu handle ka ku nga tshembeki ka wena n’wini.—Varhoma 8:38, 39.
20. Xana hi nga famba hi laha ku humelelaka egondzweni leri yisaka evuton’wini emisaveni leyintshwa ya Yehova hi ndlela yihi?
20 Nakambe a hi tshameni hi khomekile entirhweni wa Mfumo, hi ma khathalela kahle malunghelo hinkwawo ivi hi tlangela malunghiselelo hinkwawo ya moya. Hi timbilu leti taleke hi ku nkhensa, onge hi nga xalamukela ku yingisa milawu ni switsundzuxo leswo hlawuleka hinkwaswo swa Yehova, hi ri karhi hi tlangela leswaku swi endleriwe ku hi kongomisa hi ku hlayiseka egondzweni ro ya evuton’wini. Naswona, loko hi ri karhi hi hambeta hi famba egondzweni lero khuma ro ya evuton’wini, swa vonaka leswaku Yehova a nge hi hlayisi hi hanya enhlomulweni lowukulu ntsena kambe u ta hi nyika vutomi lebyi nga heriki ni minkateko leyi nga riki na makumu emisaveni ya yena leyintshwa, leyi sweswi yi tshineleke swinene. Hinkwaswo leswi hikwalaho ka leswi hi tlangeleke swilo leswo hlawuleka.
I Tinhlamulo Tihi Leti A Wu Ta Ti Nyika?
◻ Xana hi nga papalata ku teka vito ra Yehova ni gandzelo ra nkutsulo swi nga ri nchumu hi ndlela yihi?
◻ I yini lexi nga kombisaka leswaku a hi byi tlangeli vuxaka bya hina na Yehova ni nhlengeletano ya yena?
◻ Hi swihi swilo swin’wana leswi kombisaka ku tlangela ka hina ka Rito ni milawu ya Xikwembu, ni ntshembo wa Mfumo?
◻ Xana hi nga swi kombisa hi ndlela yihi leswaku a hi yi tekeli ehansi minhlangano ya Vukriste ni malunghelo ya le tilweni?
◻ Hi swihi swilo swin’wana leswo hlawuleka leswi engetelekeke leswi hi faneleke ku hlakulela ku tlangela loku enteke ha swona?