Ku Va Mutirheli La Vekiweke—Hi Ndlela Ya Xikwembu!

MUENDZI a nga ha va a hlamarisiwile—kumbexana a pfilunganyiwile—hi leswi a swi tweke. Xivono a ku ri ntsombano wa Timbhoni ta Yehova. Nkulumo a yi nyikeriwa eka ntlawa wa vanhu lava a va ri kusuhi no khuvuriwa. Lexi hlamarisaka, xivulavuri xi byele lava tiyimiseleke ku khuvuriwa xi ku: “Ku va kona ka wena eka ntlawa lowu wa lava lavaka ku khuvuriwa ku kombisa ku navela ka wena ka ku va mutirheli la vekiweke wa Mfumo.”

‘Swi nga endlekisa ku yini sweswo xana?’ muendzi a nga ha va a vutisile. ‘Kasi nkhuvulo a hi wa vanhu lava kuleleke eVukristeni—ni swihlangi ke? Xana a swi teki malembe ya ndzetelo ni dyondzo leyi anameke leswaku u va mutirheli la vekiweke ke’? Kumbexana a wu ta ehleketa hi ndlela leyi fanaka. Kambe leswi Bibele entiyisweni yi swi vulaka mayelana ni nkhuvulo ni ku vekiwa swi nga ha ku hlamarisa.

Loko Munhu A Nga Si Khuvuriwa

Xo sungula, nkhuvulo a hi wa vanhu lava nga ri tolovelangiki rungula ra Vukriste. Bibele, eka Mintirho 8:12, yi komba leswaku vanhu eka lembe xidzana ro sungula a va khuvuriwa endzhaku ka loko “va pfumerile.” Matewu 28:19 na yona yi komba leswaku munhu u fanele a va ‘mudyondzisiwa’ ku sungula emahlweni ka nkhuvulo. Kutani munhu u va ‘mupfumeri,’ kumbe ‘mudyondzisiwa’ (‘la dyondzisiweke’) hi ndlela yihi? Hi dyondzo ya vukheta ya Bibele! Hi ndlela leyi, munhu u kuma vutivi lebyi faneleke bya Yesu na Yehova Xikwembu. (Yohane 17:3) Xichudeni xi va eka xiyimo xo ehleketa ku khuvuriwa ntsena loko se xi kume vutivi lebyi. Eka lembe xidzana ro sungula, Vakriste lava yimisiweke va nyikele ndzetelo wo tano eka lava ha ku hundzukaka.—Mintirho 8:31, 35, 36.

Emabandlheni ya Timbhoni ta Yehova namuntlha, malunghiselelo ma endliwa hi laha ku fanaka leswaku lava tsakelaka va tiphina hi dyondzo ya le kaya ya mahala ya Bibele. Munhu la nga ni mbilu leyinene hakantsongo-ntsongo u va la tlangelaka leswi a swi dyondzaka. U susumeteriwa ku avelana ni van’wana mintiyiso leyi a ha ku yi kumaka. (Varhoma 10:8-10) U sungula ku va kona minkarhi hinkwayo eminhlanganweni ya Vukriste, laha na kona a kumaka ndzetelo wa Bibele lowu engetelekeke. (Vaheveru 10:24, 25) Kutani endzhaku ka mavhiki kumbe tin’hweti to tala ta leswi, mupfumeri lontshwa u va na ku navela ko landza ndzayo ya Bibele eka Varhoma 12:1: “Loko swi ri tano vamakwerhu, ndza mi khongotela hikwalaho ka tintswalo ta Xikwembu, leswaku mi nyiketa vutomi bya n’wina hinkwabyo, mi va mhamba leyi hanyaka, leyi hlawulekeke, leyi amukelekaka eka Xikwembu; hi wona magandzelele ya n’wina ya xiviri.”

Hambi swi ri tano, vutivi byi ri byoxe a byi endli leswaku munhu a fanelekela ku endla ku tinyiketa loku. Munhu u fanele a tisola ivi a ‘hundzuka.’ (Mintirho 3:19) Ha yini ku laveka leswi xana? Entiyisweni, van’wana a va ri na mikhuva yo biha ya vutomi loko va nga si dyondza mimpimanyeto ya Xikwembu. Van’wana a va phutseriwe hi swilaveko swa vutianakanyi. Kambe leswaku va tinyiketa eka Xikwembu tanihi lava ‘hlawulekeke, lava amukelekaka,’ va fanele va kombisa ku tisola hikwalaho ka swiendlo leswi hundzeke. Va fanele va tisola swinene hi leswi va tirhiseke vutomi, rihanyo ni vuswikoti bya vona emintirhweni leyi nga riki ya matsalwa. Ku tisola ko tano ku fanele na kona ku fambisana ni goza leri faneleke ro tanihi ‘ku hundzuka’ ka xiviri, kumbe ku cinca ndlela ya vona ya vutomi.

Leswaku va ya emahlweni ni ku pfuna mupfumeri lontshwa, vakulu va Vukriste va lunghiselela ku hlangana na yena kutani va heta nkarhi va pfuxeta tidyondzo ta xisekelo ta Bibele. Xo sungula, leswi swi tiyisekisa vakulu leswaku Mukriste lontshwa u kume vutivi lebyi kongomeke bya swikongomelo swa Xikwembu. Kavula, mpfuxeto na wona wu tikomba wu ri lowu pfunaka swinene eka xichudeni. Loko swi laveka, timhaka tin’wana leti a ti nga twisisiwangi kahle ta hlamuseriwa.

Minkhuvulo hi ntolovelo yi khomiwa hi nkarhi wa mintsombano kumbe tinhlengeletano ta Timbhoni ta Yehova. Eminkarhini yo tano, nkulumo leyi hlawuriweke ya nyikeriwa eka lava tiyimiseleke ku khuvuriwa. Va tsundzuxiwa leswaku nkhuvulo a wo va ku nghenela vukhongeri lebyintshwa ntsena. Yesu u te: “Loko munhu a lava ku ndzi landza, a a titshike, a tirhwexa [mhandzi ya] yena, kutani a ndzi landza.”—Matewu 16:24.

Lava tiyimiseleke ku khuvuriwa va tsundzuxiwa nakambe hi leswi nkhuvulo wu vulaka swona hi ku enta. Tsalwa ra 1 Petro 3:21 hakanyingi ra hlayiwa: “Nkhuvulo wu yelana ni mhaka leyi; sweswi wa mi ponisa ku nga ri hi ku susa thyaka emirini kambe ku ri hi ku tinyiketa eka Xikwembu hi ripfalo leri tengeke. Nkhuvulo wa mi ponisa hi mhaka ya ku pfuka ka Yesu Kriste eku feni.” Laha, Petro u fanisa nkhuvulo ni ntokoto wa Nowa wa ku pona mati ya Ndhambi. Hambi leswi mati wolawo a ma ri lama dlayaka eka vaaki vo biha va misava, ma tikombe ma ri lama ponisaka vutomi eka Nowa tanihi leswi ma n’wi rhwaleke hi ku hlayiseka engalaveni. Hi ku fanana, nkhuvulo wu ‘ponisa’ Vakriste emisaveni leyi yo biha. Loko un’wana, exisekelweni xa ripfumelo ra yena emimbuyelweni ya rifu ni ku pfuxiwa ka Yesu Kriste, a khuvuriwa, munhu wo tano, hi ndlela yin’wana, u le xiyin’weni xa ku ‘pona’ emahlweni ka Xikwembu. A nga ha tekiwi tanihi xiphemu xa rixaka lero homboloka leri avanyiseriweke ndzoviso.—Vona Mintirho 2:40.

Kutani ke, ku khuvuriwa a hi goza leri faneleke ku tekiwa hi mahika, hi laha hakanyingi swi humelelaka ha kona eminhlanganweni ya mpfuxeto ya vukhongeri. Lexi xi kandziyisaka leswi i mhaka ya leswaku loko vadyondzisiwa lavantshwa va nga si khuvuriwa hi xiviri, mutirheli la langutelaka nkhuvulo u va vutisa swivutiso swimbirhi leswi tlhontlhaka. Tinhlamulo ta vona to pfumela i “ku vula hi nomu” ka ripfumelo ra vona enkutsulweni ni mhaka ya leswaku va tinyikete hi ku helela eka Yehova. (Varhoma 10:9, 10) Sweswi va wu lulamerile nkhuvulo wa mati.

Ku Vekiwa Tanihi Vatirheli Va Mfumo

Ku nghenisiwa hi ku helela ematini i xikombiso lexi fanelekaka xa ku tinyiketa ka vona eka Xikwembu. Loko va ha ri endzeni ka mati, onge hi loko va file emahanyelweni ya vona ya khale. Loko va huma ematini, onge hi loko sweswi va hanya endleleni leyintshwa ya ku tinyiketa ka munhu hi xiyexe ka ku tirhela Xikwembu.—Ringanisa Varhoma 6:2-4.

Hambi swi ri tano, ku vekiwa ku hlangana njhani ni goza ra nkhuvulo xana? Xiya leswi Cyclopædia of Biblical, Theological, and Ecclesiastical Literature (1877), Vholumo VII, tluka 411 ya M’Clintock na Strong, yi swi vulaka: “Ku vekiwa swi vula ku hlawuriwa kumbe ku averiwa ka munhu xivandla xa vutirheli, loku fambisanaka ni nxaxamelo wa swiendlakalo kumbe loku nga hava. (Xi-italiki i xerhu.) Leswi swi vula leswaku a ku na xilaveko xa nkhuvo lowukulu kumbe setifikheti leswaku u vekiwa ku va mutirheli wa Vukriste.

Kambe Bibele ya swi dyondzisa leswi ke? Xiya Yesu Kriste. A swi kanakanisi leswaku a a ri mutirheli la hlawulekeke wa Xikwembu. Hambi swi ri tano, xana u ve na wona nkhuvo wo karhi lowukulu wo n’wi veka emahlweni ko sungula ntirho wa yena wo chumayela ke? Xana a a ri na xona setifikheti lexi n’wi hlawulaka tanihi mutirheli ke? Hi leswi hambanaka swinene. A ku ri endzhaku ko khuvuriwa ka yena ematini ntsena laha Xikwembu xi vuleke ku amukela ka xona ka Yesu tanihi N’wana wa xona kutani Xi n’wi veka tanihi mutirheli.—Marka 1:9-11; Luka 4:18-21.

Ku vuriwa yini hi Vakriste va lembe xidzana ro sungula xana? Ku hava xiviko xa ku veka loku bombisiweke ku tlula mpimo eka vatirheli lava vo sungula va Vukriste. Rhekhodo leyi nga eka Mintirho hi ku phindha-phindha yi vulavula hi ntirho wa minkhuvulo ya vapfumeri ntsena. Leswi a swi landziwa hi ku hlanganyela ka vona hi ku chivirika evutirhelini bya le rivaleni.—Vona Mintirho 2:41-47; 8:36-39; 22:14-16.

Hi byihi vumbhoni lebyi vatirheli vo tano a va ri na byona bya ku vekiwa ka vona ke? Pawulo eka 2 Vakorinto 3:1-3, u ri: “Xana ho tlhela hi sungula ku titivisa ke? Xana hi fanele ku kuma mapapila lama hi tivisaka eka n’wina, kumbe lama humaka eka n’wina ku fana ni leswi van’wana va endlisaka swona ke? E-e! Hi n’wina mi nga papila ra hina, leri tsariweke etimbilwini ta hina, leri tiviwaka ni leri nga hlayiwaka hi vanhu hinkwavo. Swa vonaka swinene leswaku n’wina mi papila ra Kriste, leri humesiweke hi hina, leri tsariweke ku nga ri hi inki kambe hi Moya wa Xikwembu lexi hanyaka; a ri tsariwanga ematambeni ya maribye, kambe ri tsariwe etimbilwini ta vanhu.” Ku tirha ka moya wa Xikwembu etimbilwini ta vona lava dyondzisiweke ku humesa vumunhu lebyinene bya Vukriste, lebyi nga hlayiwaka hi vahlaleri hinkwavo. Lebyi a ku ri vumbhoni lebyi eneleke leswaku Xikwembu hakunene xi veke lava hlanganyelaka eku dyondziseni ka vadyondzisiwa lava lavantshwa.

Ku Tikarhata Ka Munhu Hi Xiyexe eVutirhelini

Hi ku fanana namuntlha, mutirheli u voniwa hi mintirho ya yena. U chivirikela ku ‘tikarhata hi matimba’ evutirhelini bya yena. (Luka 13:24) U languta vutirheli bya yena tanihi lunghelo lerikulu leri humaka eka Xikwembu. A nga ri languteli hansi.—1 Timotiya 1:12-16.

Ku chumayela hi Mfumo i xiboho xo sungula eka vatirheli vo tano. Mintirho hinkwayo yi fanele yi hungutiwa leswaku va ta swi kota ku ‘hetisisa vutirheli bya vona hi xitalo.’ (2 Timotiya 4:2, 5) Kavula, va fanele ku khathalela swilaveko swa vona vini kun’we ni swa mindyangu ya vona swa nyama. Hambi swi ri tano, va ‘eneriseka hi swakudya ni swo ambala.’ A va yi pfumeleli mintirho ya vona vini kumbe ku navela ka vona vini leswaku ku va hambanisa ni vutirheli bya vona. (1 Timotiya 5:8; 6:7, 8; Vafilipiya 2:20-22) Va tiyiseka hi swilo “leswi nga swinene ku tlula swin’wana.” (Vafilipiya 1:10) Va hisekela ku veka xikombiso lexinene xa Yesu Kriste emahlweni ka vona, loyi vutomi bya yena a byi rhendzeriwe hi ku chumayela hi Mfumo.—Luka 4:43; Yohane 18:36, 37.

Hambi swi ri tano, loko munhu a khuvuriwa tanihi mutirheli la vekiweke, kahle-kahle u le minkarhini yo sungula ya ntirho wa yena eka Xikwembu. I ntiyiso, u byi kumile vutivi bya Kriste Yesu na Yehova Xikwembu. Nakambe u endle ku cinca ko tala evuton’wini bya yena leswaku vutirheli bya yena bya Vukriste byi nga sandziwi. (2 Vakorinto 6:3) Mukriste loyi a ha ku khuvuriwaka wa ha ri na nhluvuko lowukulu lowu a faneleke ku wu endla. Ku khuvuriwa ka yena, loku vulaka ku vekiwa ka yena, ko va xikombiso xo sungula xa ku kula ka yena tanihi Mukriste. (Vafilipiya 3:16) Kutani ke, mutirheli un’wana ni un’wana la vekiweke u fanele ku hambeta a aka ku tlangela ka xiviri ka swilo swa moya. U fanele a veka nkarhi wa dyondzo ya munhu hi xiyexe. U fanele a tlangela malunghiselelo hinkwawo ya bandlha yo hlangana swin’we. U fanele ku tikarhatela ku antswisa nkoka wa swikhongelo swa yena, leswi nga ta vumba vuxaka bya munhu hi xiyexe bya le kusuhi swinene na Xikwembu.—Luka 6:45; 1 Vatesalonika 5:11; 1 Petro 4:7.

Hi ni ntshembo wa leswaku mianakanyo leyi ya Matsalwa yi ku pfunile ku twisisa leswaku hikokwalaho ka yini digri ya le yunivhesiti yi nga ri xilaveko eka lava lavaka ku tirha tanihi vatirheli va Xikwembu. Ku tlula timiliyoni tinharhu ta Timbhoni ta Yehova hi ku tshembeka ti tirhela Xikwembu tanihi vatirheli va xona, va twarisa mintiyiso leyi andlariweke eRitweni ra xona. Ha yini u nga pfumeleli un’wana wa vona a ku pfuna leswaku u kuma vutivi bya Bibele?

[Xifaniso lexi nga eka tluka 29]

Hi ku ya hi Bibele, mutirheli wa Vukriste u vekiwa loko a khuvuriwa